Read Besoa Lukasi 21 Bible Online

Lukasi 21 - Besoa bible

Lukasi 21

¹I lalu tangabaa Támbina Pueꞌ Ala, Iesu mampeita bahangapa tauna to pebuku mopusaꞌ dóiꞌraꞌ to handaꞌ i lalu petiꞌ pemboliá dóiꞌ popenómbá.

²Naita miꞌi woꞌo hadua towawine to bembaꞌ to meahiahiꞌ tueꞌna, mopusaꞌ popenómbána, ia miꞌi rompepaꞌ dóiꞌ tembaga to hantóiꞌ ntepuꞌu imbaꞌna.

³Nauliꞌ Iesu, “Toꞌu ntepuꞌu to Kuhángáꞌákou: tobembaꞌ to meahiahiꞌ tueꞌna iti, melumbuꞌ popenómbána haneꞌi popenómbá to rahuhuꞌ upu-upu tauna ntániꞌna.

⁴Hira mampeweꞌiheꞌ hangko i pelábiána dóiꞌraꞌ, agáiáná towawine iti, kehapiꞌ meahiahiꞌ tueꞌna, ia mampeweꞌi upu-upu to ara i hia to naparaluu woia i lalu katueꞌna alo-alona.”

⁵Roo onoꞌ, ara bahangapa topeguruNa to mohángáꞌá Iesu, rauliꞌ, “Maroꞌa ntepuꞌu Támbina Pueꞌ Ala deꞌe, láwiꞌ rabungaꞌ-bungaꞌi hai watu-watu to mababe hai párewá to rapopenómbá i Pueꞌ Ala.” Mewaliꞌ nauliꞌ Iesu,

⁶“Kuhángáꞌákou: ina haweꞌ tempóna, upu-upu to niꞌita i Támbina Pueꞌ Ala deꞌe ina magero, hai tiꞌara piꞌi ina ara haweꞌ hambuaꞌ watu to mentárá i katoroꞌána, bateꞌna ina ragero upu-upu.”[234]

⁷Hangko ionoꞌ, topeguruNa Iesu mekuneꞌmoheꞌ i Hia, rauliꞌ, “Guru, impirá pewaliꞌána to Nuꞌuliꞌ ininá? Hai tandaꞌ apa to ina mewaliꞌ ane haweꞌ miꞌi tempó pewaliꞌána?”

⁸Nauliꞌ Iesu, “Maingáꞌ-ingáꞌkou, bona tiꞌarakou rapakanawoꞌ, láwiꞌ handaꞌ tauna ina haweꞌ hai ina mokábeláiheꞌ hangaꞌKuꞌ. Ina rauliꞌ kahirana mpuꞌu Datu Topehómpóꞌ. Araheꞌ woꞌo to ina manguliꞌ kahaweꞌna miꞌi kahópóꞌána duniáꞌ. Agáiáná ineeꞌheꞌ nipoinálái.

⁹Ane mohádikou bámbári pombeala, ineeꞌkou malááꞌ, láwiꞌ upu-upuna iti hangaa-ngaa mewaliꞌ sieruꞌ, agáiáná tiꞌara mani haweꞌ kahópóꞌána duniáꞌ.”

¹⁰Hangko ionoꞌ, napaliliu miꞌi Iesu laluitaNa, Nauliꞌ, “I tempó iti, tampoꞌ ina mombeala hai tampoꞌ ntániꞌna, hai kadatuá ina moewaꞌ kadatuá ntániꞌna.

¹¹Iumbá-umbá peá ina ara rimi, linu to rumihi, hai hakiꞌ to humalele. Hai i langiꞌ bateꞌna ina ara tandaꞌ to meriringkuꞌi.

¹²Agáiáná hangko tiꞌara mani upu-upu iti mewaliꞌ, ina rahakaꞌkou hai rapopeahiahiꞌkou. Ina rasalaꞌikou i lalu támbi penómbáꞌá, hai ina ratarungkukou. Ina rahuhuꞌkou i datu hai i topopárentá ánti peuláꞌmi i Kódóꞌ.

¹³I tempó iti, ina raweꞌikou lógá mopahaweꞌáheꞌ kana i pepoináláimi i Kódóꞌ.

¹⁴Hangaa-ngaa nipakaróhó lalumi, hai ineeꞌkou malááꞌ ba noumbá pehániꞌmi,

¹⁵láwiꞌ Kódóꞌ haduduáNgkuꞌ to ina mopakanótóákou apa to hintotoꞌ ntepuꞌu ina nipopohánikiheꞌ, álána mapánde ntepuꞌukou. Onoꞌ miꞌi haneꞌi tiꞌara ina rabuku ewálimi mosápuáka apa to niuliꞌ.

¹⁶I tempó iti, kómu ina rapehuhuꞌákou i ewálimi. Ina rapobaluꞌkou tosaemi, halalumi, hantámbiámi, hai rángámi, hai arakou woꞌo to ina rapapate.

¹⁷Ánti peuláꞌmi i Kódóꞌ, ina rakáhihiꞌkou upu-upu tauna.

¹⁸Agáiáná kehapiꞌ noꞌonoꞌ, Pueꞌ Ala ina mokámpáikou duuꞌna i rue-ruena.[235]

¹⁹Onoꞌ miꞌi haneꞌi hangaa-ngaa nipakaróhó pepoináláimi, bona peisákou mantaha i lalu kapári, hai ina molámbiꞌkou katueꞌ to maroꞌa to tiꞌara mokahópóꞌá.”

²⁰Iesu mopaliliu wopiꞌi laluitaNa, Nauliꞌ, “Ane niꞌita surudadoꞌraꞌ ewálimi motolelingi kótá Ierusale deꞌe, ina niꞌisá katiꞌárána piꞌi marue Ierusale ina ragero.

²¹I tempó iti, tauna to toroꞌ i tampoꞌ Iudá, rángina miꞌi melangkaheꞌ lao i buluꞌ. Tauna to toroꞌ i kótá, rángina miꞌi melangkaheꞌ mopálehi kótá. Hai tauna to ara i rawa kótá, ineeꞌheꞌ mesuaꞌ i kótá,

²²láwiꞌ i alo-alo iti, ina mewaliꞌ tempó pehukuána Pueꞌ Ala, bona tebukeki miꞌi upu-upu to teukiꞌ i lalu Sura Magasaꞌ.

²³Ina mapári ntepuꞌu pehádiraꞌ towawine to tangaꞌraꞌ morodua ba mopahuhu ánáꞌraꞌ, láwiꞌ i tempó iti tauna ina narampe kapári hai pehukuna Pueꞌ Ala to rumihi ntepuꞌu.

²⁴Araheꞌ toIerusale to ina rapapate hai pihoꞌ. Araheꞌ woꞌo to ina ratawani hai rahawuꞌ-hawuꞌheꞌ iumbá-umbá peá i humalele duniáꞌ. Hai kótá Ierusale deꞌe ina ranangi[236] hai rakuasaꞌi tauna to tiꞌara toIahudiꞌ duuꞌna hópóꞌ tempó to napakanótó Pueꞌ Ala.”

²⁵“Ina ara tandaꞌ-tandaꞌ to metingkáráki to mewaliꞌ i wulá, alo, hai betue. Upu-upu tauna i duniáꞌ ina malááꞌ hai wuliheꞌ moita tahiꞌ to meriringkuꞌi hai mohádi pewoona bálumbá.

²⁶Araheꞌ tauna to ina malimpu ánti kamalááꞌraꞌ moita upu-upu to pewaliꞌ i humalele duniáꞌ, láwiꞌ upu-upu to ara i langiꞌ ina moenggo.

²⁷I tempó iti, tauna ina moita Ánáꞌ Mánusiá mendáulu mai napótóꞌ gawu. Ina tongawaꞌ ntepuꞌu kuasaꞌNa hai peawaꞌna tueꞌNa.

²⁸Ane niꞌita pantepuꞌuána tandaꞌ-tandaꞌ deꞌe, nipakaróhó lalumi hai mengoaꞌmokou, láwiꞌ hungkuꞌ miꞌi tempóna ina tekábáhákou hangko i kapárimi.”

²⁹Iesu mopahaweꞌ ngkóráꞌ pándiriꞌ deꞌe i topeguruNaheꞌ, Nauliꞌ, “Hangaa-ngaa nipailalu paturoꞌKuꞌ deꞌe mokana i katueꞌna kau:

³⁰Ane moitakou kau mohehe, niꞌisá kaꞌina mowuaꞌna.

³¹Noꞌonoꞌ woꞌo, ane niꞌita upu-upu to Kuhángáꞌákou ininá, niꞌisá kaꞌina haweꞌna miꞌi popárentána Pueꞌ Ala i duniáꞌ.

³²Toꞌu ntepuꞌu to Kuhángáꞌákou: upu-upu to Kuꞌuliꞌ ininá, bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe.

³³Langiꞌ hai duniáꞌ hai upu-upu óntóꞌna ina magero hai tiꞌara piꞌi ina ara, agáiáná laluitaNgkuꞌ bateꞌna ina ara oaꞌ haweꞌ i rue-ruena.”

³⁴“Maingáꞌ-ingáꞌkou, bona tiꞌarakou mosusa-susa hai malangu-langu oaꞌ. Maingáꞌ-ingáꞌkou, bona tiꞌarakou mampepekiri oaꞌ katueꞌmi i duniáꞌ deꞌe, álána mampomaleꞌakou.

³⁵Láwiꞌ alo kahaweꞌána huleꞌ Ánáꞌ Mánusiá[237] hangkaꞌ-hangkaꞌ perái ina haweꞌ, hai ina rapotingkáráꞌ tauna i humalele duniáꞌ to tiꞌara timama.[238]

³⁶Mewaliꞌ, hangaa-ngaa timamakou oaꞌ. Mekakaekou i Pueꞌ Ala, bona kehapiꞌ narampekou kapári, ina maróhókou oaꞌ i pepoináláimi. Ane noꞌonoꞌi, i alo kahópóꞌána duniáꞌ, peisákou meángkáꞌ i lindoꞌna Ánáꞌ Mánusiá láwiꞌ tiꞌarakou paraluu mahili.”

³⁷Ane mabaa, Iesu mepaturoꞌ i tangabaa Támbina Pueꞌ Ala. Ane káindi, Ia lao hambengi i rawa kótá i Buluꞌ Saitu.

³⁸Mepulo-pulo, handaꞌ tauna hirámpu i tangabaa Támbina Pueꞌ Ala bona mampehádingi paturoꞌNa.