Read Besoa Lukasi 23 Bible Online

Lukasi 23 - Besoa bible

Lukasi 23

¹Roo onoꞌ, laomoheꞌ upu-upu tadulakoraꞌ toIahudiꞌ to mogómbó ininá, moántiheꞌ Iesu i lindoꞌna Mágáuꞌ Pilatu.[264]

²Kahaweꞌraꞌ ionoꞌ, ratepuꞌu miꞌi mosalaꞌi Iesu, rauliꞌ, “Tauna deꞌe motadulakoi tauna to handaꞌ bona moewaꞌheꞌ topopárentá toRoma! Nakóntóangkaiꞌ mobaiari ásele i datuntaꞌ Datu Mahile i Roma,[265] hai Nauliꞌ woꞌo kaꞌIana miꞌi toMásehi, hadua datu.”[266]

³Mewaliꞌ, mekuneꞌ miꞌi Pilatu i Iesu, nauliꞌ, “Hadua datu? Toꞌu paꞌi Io daturaꞌ toIahudiꞌ?” Nahániki Iesu, “Io haduduámu to manguliꞌ noꞌonoꞌ.”

⁴Hangko ionoꞌ, nauliꞌ Pilatu i kapalaꞌ-kapalaꞌ tadulako menómbá hai i tauna to handaꞌ, “Tiꞌara ara salaꞌna tauna deꞌe to hintotoꞌ ina rahukuá.”

⁵Agáiáná rapaliliu miꞌi pesalaꞌiraꞌ i Iesu, rauliꞌ, “Moliu paturoꞌNa, Ia mopamaꞌamuꞌ laluraꞌ handaꞌ tauna haneꞌi timamaheꞌ toIahudiꞌ mohiho. Ia motadulakoi tauna mantepuꞌu hangko i tampoꞌ Galilea, hai deꞌe-deꞌe haweꞌ miꞌi woꞌo ieneꞌ i Ierusale i tampoꞌ Iudá.”

⁶Kanahádina Pilatu laluitaraꞌ iti, mekuneꞌ miꞌi, “Ba tauna deꞌe toGalilea?”

⁷Rahániki, “Toꞌu, Ia toGalilea.” Kanahádina pehániꞌraꞌ, nahuoꞌ miꞌi tauna bona moánti Iesu lao i Datu Herode Antipa,[267] láwiꞌ Herode ia miꞌi datu to mepárentá i tampoꞌ Galilea, {hai ara kuasaꞌna mobutusi kárá-káráraꞌ toGalilea}. Herode ara i kótá Ierusale tempó onoꞌ.

⁸Góeꞌ ntepuꞌu Herode moita Iesu, láwiꞌ marue miꞌi nahádi laluitaraꞌ tauna kana i Hia,[268] hai nahárungá woꞌo kaꞌina napotudeꞌána Iesu tandaꞌ kuasaꞌ to mehelei.

⁹Onoꞌ miꞌi haneꞌi Herode handaꞌ pekuneꞌna, agáiáná tiꞌaranto nahániki Iesu.

¹⁰Araheꞌ woꞌo ionoꞌ kapalaꞌ-kapalaꞌ tadulako menómbá hai guru-guru agama to mosalaꞌi ntepuꞌu Iesu i lindoꞌna Herode.

¹¹Roo onoꞌ, Herode hai surudadoꞌna mopakóiꞌheꞌ hai mampopowadi-wadi Iesu. Ia rakumbái miꞌi hai kumbá datu,[269] haneꞌi raꞌánti huleꞌ lao i Pilatu.

¹²Mantepuꞌu alo iti, Herode hai Pilatu maroꞌamoheꞌ. Hangkoia moewaliheꞌ.

¹³Hangko ionoꞌ, Pilatu morámpu wopiꞌi upu-upu kapalaꞌ tadulako menómbá, hai tadulakoraꞌ toIahudiꞌ, hai tauna to handaꞌ,

¹⁴haneꞌi nahángáꞌáheꞌ, “Tauna deꞌe, niánti mai i kódóꞌ hai niuliꞌ kaꞌIana miꞌi to mopamaꞌamuꞌ laluraꞌ tauna to handaꞌ bona moewaꞌ popárentángkuꞌ. Alo deꞌe, kupáresáꞌ miꞌi i lindoꞌmi, agáiáná tiꞌara kulámbiꞌ haweꞌ hampákáꞌ bábehiáNa to kadake nodo to nisalaꞌiá.

¹⁵Noꞌonoꞌ woꞌo polámbiꞌna Herode, láwiꞌ napopesuleꞌ huleꞌ mai i kódóꞌ. Tongawaꞌ ntepuꞌu tauna deꞌe tiꞌara mobábehi apa peá to hintotoꞌ rahukuá mate.

¹⁶Mewaliꞌ, ina kupapahái peá haneꞌi kukábáhá.” [

¹⁷Pilatu manguliꞌ noꞌonoꞌ láwiꞌ i pare-parena i Alo Posusa Paska, ia mokábáhá hadua tauna to ratarungku, hintotoꞌ hai pembiáꞌraꞌ tauna to handaꞌ.][270]

¹⁸Karahádina tauna to handaꞌ laluitana iti, monganga-ngangaheꞌ rapasimbuku, rauliꞌ, “Nupapate miꞌi! Nukábáhá Baraba!”

¹⁹Baraba iti ratarungku ánti pepapatena hai peꞌewaꞌna i lalu kótá.

²⁰Naundeꞌ mani Pilatu mokábáhá Iesu, onoꞌ miꞌi haneꞌi napolaluita wopiꞌi i tauna to handaꞌ,

²¹agáiáná monganga-ngangaheꞌ oaꞌ rapasimbuku, rauliꞌ, “Pakuꞌmode! Pakuꞌmode!”

²²I katáluna kánina, nahángáꞌáheꞌ Pilatu, “Apa salaꞌNa? Mogalo riꞌi hampákáꞌ salaꞌNa to hintotoꞌ rahukuá mate, tiꞌara ara to kulámbiꞌ. Mewaliꞌ ina kupapahái peá haneꞌi kukábáhá.”

²³Agáiáná tauna to handaꞌ iti monganga-ngangaheꞌ membiáꞌ bona Iesu hangaa-ngaa rapakuꞌ i kau mombehape. Kahópóꞌána menangiheꞌ.

²⁴Pilatu mobutusi bona Iesu rahuku mate hai Baraba[271] rakábáháꞌáheꞌ mouláꞌ pembiáꞌraꞌ. Baraba iti to ratarungku ánti pepapatena hai peꞌewaꞌna i topopárentá. Agáiáná Iesu, to tiꞌara ara salaꞌNa, rahuhuꞌ i surudadoꞌ toRoma bona rapapate mouláꞌ peundeꞌáraꞌ toIahudiꞌ.

²⁵

²⁶Hangko ionoꞌ, surudadoꞌ toRoma moántimoheꞌ Iesu lao i rawa kótá. I tangaꞌ rárá, raita hadua toKirene[272] to tangaꞌna mesuaꞌ i kótá Ierusale. Hangaꞌna tauna iti Simoꞌ. Kásáliu rapasaꞌ Simoꞌ iti bona meuláꞌ i taleuꞌna Iesu mopáháꞌá kau mombehape.

²⁷Tangaꞌna Iesu raꞌánti lao i rawa kótá, handaꞌ ntepuꞌu tauna to meuláꞌ i Hia, tepasuaꞌheꞌ woꞌo bahangapa towawine to moteriahi.

²⁸Mewaliꞌ napehaileꞌheꞌ Iesu, Nauliꞌ, “Ee, towawine toIerusale, ineeꞌ peá Kódóꞌ to niteriahi, agáiáná niteriahi woꞌo wátámi haduduámi hai ánáꞌmi.[273]

²⁹Láwiꞌ ina haweꞌ tempó mapári hai tauna ina manguliꞌ, ‘Morasiꞌheꞌ towawine to lalo, to tiꞌara ara ánáꞌraꞌ!’[274]

³⁰I tempó iti,[275] tauna ina manguliꞌ, ‘Tiꞌara piꞌi kiundeꞌ tueꞌ! Rángina miꞌi nadumpingiangkaiꞌ buluꞌ hai natámbungiangkaiꞌ tampoꞌ!’[276]

³¹Iti bateꞌna ina mewaliꞌ, láwiꞌ mogalo paꞌi Kódóꞌ to tiꞌaraꞌAꞌ masalaꞌ rahukuAꞌ mate, pelumbuꞌna mani tauna to masalaꞌ ntepuꞌu.”[277]

³²I karaꞌántina Iesu lao rapakuꞌ i kau mombehape, ara rodua tauna to kadake bábehiáraꞌ to raꞌánti hingkakani bona rapapate woꞌo.

³³Kahaweꞌraꞌ i buluꞌ to rahangaꞌ Buluꞌ Bangaꞌwuáꞌ,[278] Iesu rapakuꞌ miꞌi i kau mombehape[279] hai rodua tauna to kadake iti rapakuꞌ woꞌo. Hadua rapakuꞌ tándáꞌ i kuánáNa hai hadua tándáꞌ i kabeoꞌNa.

³⁴Iesu mekakae, Nauliꞌ, “Umaꞌ, Nuámpungi wohiraꞌá tauna deꞌe,[280] láwiꞌ tiꞌara raisá apa to rabábehi.” Surudadoꞌ to mopakuꞌ Iesu mobolobiaꞌmoheꞌ bona raisá heáná to ina molámbiꞌ waruꞌNa.[281]

³⁵Handaꞌheꞌ tauna meángkáꞌ i wóiꞌna kau mombehape mampengoaꞌ Iesu. Araheꞌ woꞌo tadulakoraꞌ toIahudiꞌ to mopakóiꞌ oaꞌ, rauliꞌ, “Tauna ntániꞌna Natulungiheꞌ, agáiáná wátáNa haduduáNa tiꞌara Nabuku Natulungi. Ane toꞌu-toꞌu mpuꞌu kaꞌIana Datu Topehómpóꞌ to napileꞌi Pueꞌ Ala, ina tongawaꞌ ane Ia mendáulu hangko i kau mombehape iti!”

³⁶Surudadoꞌ woꞌo mampopengaa-ngaaheꞌ Iesu, hai rahungkuki nodo to ina rapopainu anggoroꞌ to maisu,[282]

³⁷rauliꞌ, “Ane toꞌu-toꞌu daturaꞌKoꞌ toIahudiꞌ, Nupelae wátáMu haduduáMu!”

³⁸I kau karapakuꞌána Iesu, i wongko wuáꞌNa, teukiꞌ node: DEMIꞋI DATURAꞋ TOIAHUDIꞋ.

³⁹Hadua tauna to kadake bábehiána to rapakuꞌ i kau i hintáiꞌna Iesu, mopakóiꞌ woꞌo, nauliꞌ, “TiꞌaraKoꞌ paꞌi Datu Topehómpóꞌ? Tulungimode wátáMu hingkakani hai kaiꞌ!”

⁴⁰Agáiáná to haduána mokámbáróá rángána, nahángáꞌá, “Tiꞌarakoꞌ paꞌi mengkoruꞌ i Pueꞌ Ala? Kitaꞌ deꞌe, hingkakanikeꞌ rahuku mate.

⁴¹Io hai kódóꞌ, hintotoꞌkeꞌ rahuku mate ánti bábehiántaꞌ to kadake, agáiáná Ia, tiꞌara ara salaꞌNa.”

⁴²Roo onoꞌ, nauliꞌ wopiꞌi tauna iti, “Iesu, Nubuhinaoaꞌ wongkódóꞌá, ane haweꞌKoꞌ hai mewaliꞌmoKoꞌ Datu!”

⁴³Nauliꞌ Iesu, “Toꞌu to Kuhángáꞌáꞌákoꞌ: i alo deꞌe, hingkakanikoꞌ hai Kódóꞌ i lalu Párádesiꞌ.”[283]

⁴⁴Kalialo miꞌi, rekeꞌ-rekeꞌna tintiꞌ hampuloꞌ hai duá, hangkaꞌ-hangkaꞌ perái makáindi i humalele tampoꞌ iti, tálu jaa kamaruena.

⁴⁵Rindi báná to tetóe i lalu Támbina Pueꞌ Ala mahepaꞌ ntangaꞌ.[284]

⁴⁶Roo onoꞌ, nauliꞌ miꞌi Iesu Napasimbuku, “Umaꞌ, Kupaisarenga peinaoNgkuꞌ i Hio!”[285] KarooNa molaluita noꞌonoꞌ, upu miꞌi inaoNa.

⁴⁷Kanaitána tadulako surudadoꞌ apa to pewaliꞌ iti, ia motóiá Pueꞌ Ala, nauliꞌ, “Tongawaꞌ ntepuꞌu tauna deꞌe tauna to manótó!”

⁴⁸Pesuleꞌraꞌ tauna to handaꞌ to lao mosabiki karapakuꞌna Iesu, motápáꞌ-tápáꞌmoheꞌ pondáraꞌ tandaꞌ kanahohoꞌna inaoraꞌ.

⁴⁹Upu-upu tauna to maruemoheꞌ moisá Iesu, tepasuaꞌheꞌ towawine to meuláꞌ hangko i tampoꞌ Galilea, meángkáꞌ ngkaraoꞌ peheꞌ bona mampeitaheꞌ upu-upuna to mewaliꞌ iti.

⁵⁰I tempó iti, ara hadua tobaleilo to rahangaꞌ Iusupu to hangko i wánuá Arimatea i tampoꞌ Iudá. Iusupu iti, ia miꞌi tauna to maroꞌa laluna hai manótó bábehiána. Marue miꞌi mampegiá tempóna Pueꞌ Ala ina mopárentá upu-upu tauna. Ia woꞌo hadua hangko i Topepáresáꞌ Mahile Agama Iahudiꞌ, agáiáná tiꞌara napokana pobutusiraꞌ tadulako iti to manguliꞌ Iesu hangaa-ngaa rahuku mate.

⁵¹

⁵²I kamatena Iesu, lao miꞌi Iusupu mampombelámbiꞌá Pilatu, membiáꞌ wátámandoꞌna Iesu bona ratawu.[286]

⁵³Roo onoꞌ, napopendáulu miꞌi wátámandoꞌna Iesu hangko i kau mombehape, haneꞌi nabungkuhi hai báná to bulá, hai nawoli i lalu balamba popatawuá to rabóbeꞌ i buluꞌ watu. Popatawuá iti tiꞌara mani haweꞌ hangkani rapakeꞌ.[287]

⁵⁴Alo iti ia miꞌi Alo Popatimamaꞌá, hai ina mantepuꞌu miꞌi alo penómbáꞌá.

⁵⁵I karaꞌántina wátámandoꞌna Iesu lao i popatawuá, bahangapaheꞌ towawine to mamporángá Iesu hangko i tampoꞌ Galilea, meuláꞌheꞌ i Iusupu. Kahaweꞌraꞌ i popatawuá, rapeita miꞌi noumbá karawolina wátámandoꞌna Iesu ionoꞌ.

⁵⁶Roo onoꞌ, mesuleꞌheꞌ lao i kahambengiáraꞌ mopatimama rampaꞌ-rampaꞌ hai lana to mawongi ina rapakeꞌ mobubuhi wátámandoꞌna Iesu, agáiáná ina mantepuꞌu miꞌi alo penómbáꞌá, mewaliꞌ tiꞌara ara to peisá rabábehi láwiꞌ alo iti alo pengkarooá mouláꞌ Paturoꞌna Musa.