Read Besoa Lukasi 8 Bible Online

Lukasi 8 - Besoa bible

Lukasi 8

¹Tiꞌara marue hangko ionoꞌ, Iesu lao i kótá-kótá hai wánuá-wánuá mopahaweꞌ bámbári to maroꞌa kana i popárentána Pueꞌ Ala. Ia raporángá oaꞌ topeguruNa to hampuloꞌ hai rodua.

²Araheꞌ woꞌo bahangapa towawine to mamporángá Iesu hai topeguruNaheꞌ. Towawine iti to napakauriꞌheꞌ Iesu hangko i hakiꞌraꞌ ba hangko i kanapesuaꞌiraꞌ tokadake. Hangaꞌna to hadua Maria to rauliꞌ woꞌo toMadalena {láwiꞌ ia hangko i wánuá Madala}. Maria iti, to napakauriꞌ Iesu hangkoia i kanapesuaꞌina pitu tokadake.

³Hadua woꞌo ia miꞌi Iohana toinána Kusa, tadulakoraꞌ topohawaꞌ i támbina Datu Herode Antipa. Susana meuláꞌ woꞌo hingkakani hai handaꞌ towawine to ntániꞌna. Upu-upuheꞌ motulungi Iesu hai topeguruNa hangko i dóiꞌraꞌ haduduáraꞌ.

⁴Handaꞌheꞌ tauna to hangko i wánuá-wánuá lao i Iesu. Kahaweꞌraꞌ tauna to handaꞌ iti, napahaweꞌáheꞌ Iesu hampákáꞌ ngkóráꞌ pándiriꞌ, Nauliꞌ,

⁵“Ara hadua topohinoe to lao mohawuꞌ i hinoena, {agáiáná hinoena iti, ionoꞌ miꞌi aha: ara to kedui, to matuꞌa, to kewatu pealeꞌ, hai ara woꞌo to maruduꞌ}. Mewaliꞌ, tempóna mohawuꞌ, ara tinudaꞌ to manawoꞌ i tampoꞌ to matuꞌa láwiꞌ paka raporárái tauna. Tinudaꞌ iti rapangka-pangka tauna hai ratilóꞌ woꞌo tádáhi duuꞌna upu.

⁶Ara woꞌo tinudaꞌ to manawoꞌ i tampoꞌ to kewatu pealeꞌ i wóiꞌna. Tinudaꞌ iti tueꞌ, agáiáná poloꞌ malau láwiꞌ mahábáꞌ peá tampoꞌna.

⁷Ara woꞌo tinudaꞌ to manawoꞌ i lalu dui. Tinudaꞌ iti tueꞌ hingkakani hai dui, agáiáná kahópóꞌána natóróbumbungi dui duuꞌna mate.

⁸Ara woꞌo tinudaꞌ to manawoꞌ i tampoꞌ to maruduꞌ. Tinudaꞌ iti maroꞌa katueꞌna duuꞌna mowuaꞌ hangatu kánina kahandaꞌna hangko i tinudaꞌna.” Roo mopahaweꞌ ngkóráꞌ pándiriꞌ iti, molaluita Iesu Napasimbuku, Nauliꞌ, “Maroꞌa ntepuꞌu ane ara tauna to mopailalu apa to nahádi!”

⁹Roo onoꞌ, topeguruNa mekuneꞌ i Iesu apa lempóna ngkóráꞌ pándiriꞌ iti.

¹⁰Nahániki Iesu, “Hangkoia, tewuniángi mani paturoꞌ kana i popárentána Pueꞌ Ala. Deꞌe-deꞌe Naweꞌimokou Pueꞌ Ala pekiri bona niꞌisá lempóna paturoꞌ iti. Agáiáná tauna to handaꞌ, Kupaturoꞌheꞌ moliu ngkóráꞌ pándiriꞌ, bona lempóna rawuniángi mani hangko i hira. ‘Kehapiꞌ raita miꞌi apa to Kubábehi, agáiáná tiꞌara raisá lempóna. Kehapiꞌ rahádi miꞌi paturoꞌKuꞌ, agáiáná tiꞌara raisá tunggáiáNgkuꞌ.’[105]

¹¹Deꞌe miꞌi lempóna ngkóráꞌ pándiriꞌ to Kupahaweꞌ ininá: tinudaꞌ to rahawuꞌ iti, lempóna ngkóráꞌna Pueꞌ Ala.

¹²Araheꞌ tauna to peisá rapándiriꞌ nodo iba pákáꞌna tampoꞌ iti. Ara tinudaꞌ to manawoꞌ i tampoꞌ to matuꞌa. Lempóna: ngkóráꞌna Pueꞌ Ala rahádi, agáiáná Datu Tokadake mopawuli laluraꞌ bona tiꞌaraheꞌ mepoinálái, álána tiꞌaraheꞌ tekábáhá hangko i huku dósáraꞌ.

¹³Araheꞌ woꞌo tauna to peisá rapándiriꞌ nodo tampoꞌ to kewatu pealeꞌ. Rungu-runguna mohádiheꞌ ngkóráꞌna Pueꞌ Ala, góeꞌ laluraꞌ, mepoináláiheꞌ, agáiáná hampaiꞌ peá láwiꞌ pepoináláiraꞌ iti tiꞌara maróhó, nodo tudaꞌ-tudaꞌ to tiꞌara mokálándá. Onoꞌ miꞌi haneꞌi, ane narampeheꞌ kapári ánti pepoináláiraꞌ i ngkóráꞌna Pueꞌ Ala, mosuliꞌheꞌ hangko i pepoináláiraꞌ.

¹⁴Araheꞌ woꞌo tauna to peisá rapándiriꞌ nodo tampoꞌ to kedui. Rahádi ntepuꞌu ngkóráꞌna Pueꞌ Ala, agáiáná mampekiri peheꞌ oaꞌ katueꞌraꞌ i duniáꞌ deꞌe. Mampoinao peheꞌ morámpu peawaꞌ ngkáduniáꞌ, hai raundeꞌ peá mobábehi kagóeꞌ-góeꞌ. Upu-upu iti mopaꞌara peá katiꞌárána maróhó pepoináláiraꞌ, álána ngkóráꞌna Pueꞌ Ala tiꞌara piꞌi mobunduꞌ i lalu katueꞌraꞌ.

¹⁵Araheꞌ woꞌo tauna to peisá rapándiriꞌ nodo tampoꞌ to maruduꞌ. Kamohádiraꞌ ngkóráꞌna Pueꞌ Ala, liliu ratarima hai toꞌu-toꞌu rapailalu. Mewaliꞌ tetidaꞌ ntepuꞌuheꞌ i pampeuláꞌiraꞌ ngkóráꞌna Pueꞌ Ala duuꞌna mowuaꞌ i lalu katueꞌraꞌ.”

¹⁶Iesu mopaliliu wopiꞌi laluitaNa, Nauliꞌ, “Tiꞌara ara tauna to motótó palita haneꞌi nahumbáki ba nawoli i wóiꞌ kóiꞌ. Palita bateꞌna rawoli i kamapángkáꞌána bona pewangkaꞌna raita upu-upu tauna to mesuaꞌ i lalu támbi.

¹⁷Noꞌonoꞌ woꞌo, upu-upu paturoꞌKuꞌ {mokana i popárentána Pueꞌ Ala} to tiꞌara mani manótó lempóna, bateꞌna ina rapakanótó. Hai lempóna upu-upu laluitaNgkuꞌ to tewuniángi mani, bateꞌna ina rapatongawaꞌ.

¹⁸Onoꞌ miꞌi haneꞌi Kuhángáꞌáꞌákou, nipehádingi maroꞌa ngkóráꞌna Pueꞌ Ala, láwiꞌ tauna to mepoinálái, ina tetámbái apa to raisá kana i ngkóráꞌNa iti. Agáiáná tauna to tiꞌaraheꞌ mepoinálái, kehapiꞌ ara miꞌi hantóiꞌ to rarekeꞌ raisá miꞌi kana i ngkóráꞌna Pueꞌ, bateꞌna tiꞌara mobunduꞌ i lalu katueꞌraꞌ láwiꞌ Pueꞌ Ala ina motuko pekiriraꞌ.”

¹⁹Hangkani tempó, inána hai ádinaheꞌ Iesu[106] haweꞌheꞌ láwiꞌ rapoinao mampohidupaꞌá Iesu, agáiáná tiꞌaraheꞌ peisá ánti kahandaꞌraꞌ tauna to ara ionoꞌ.

²⁰Ara hadua tauna to lao mohángáꞌá Iesu, nauliꞌ, “Guru, ináMu hai ádiMuheꞌ, araheꞌ i rawa. Rapoinao mampohidupaꞌáKoꞌ.”

²¹Agáiáná nauliꞌ Iesu, “Heáná peá to mampehádingi hai mampeuláꞌi ngkóráꞌna Pueꞌ Ala, hira miꞌi ináNgkuꞌ hai halaluNgkuꞌ.”

²²Hangkani tempó, Iesu hai topeguruNa mengkaheꞌheꞌ i duanga. Nahángáꞌáheꞌ Iesu, “Laomokeꞌ tándáꞌ i hambali rano.” Mewaliꞌ lao mpuꞌumoheꞌ.

²³Tangaꞌraꞌ moduanga, letaꞌ miꞌi Iesu. Hangkaꞌ-hangkaꞌ perái mampohidupaꞌáheꞌ wui to rumihi. Duangaraꞌ narokaꞌ bálumbá, duuꞌna ina bukeꞌ miꞌi uwai, hai hungkuꞌ miꞌi ina tiri.

²⁴TopeguruNa moruaꞌ Iesu, rahángáꞌá, “Guru! Guru! Ina hurewuꞌkeꞌ!” Mewaliꞌ, mearó mpuꞌu miꞌi Iesu, haneꞌi mokámbáróá wui hai bálumbá iti, álána mengkaroo ntepuꞌu wui, hai kásáliu tinda rano iti.

²⁵Hangko ionoꞌ, nauliꞌ Iesu i topeguruNaheꞌ, “Moapa riꞌi haneꞌi tiꞌaraꞌAꞌ nipoinálái?” Upu-upu topeguruNa tingkáráꞌ hai malááꞌheꞌ. Molaluitaheꞌ hadua hai hadua, rauliꞌ, “Heáná ripaꞌi tauna deꞌe, haneꞌi mogalo wui hai bálumbá mouláꞌ hawaꞌNa?”[107]

²⁶[108] Mewaliꞌ, Iesu hai topeguruNa mopaliliuheꞌ poduangaraꞌ lao i tampoꞌ Gerasa to ara tándáꞌ i hambali rano Galilea.

²⁷I tampoꞌ Gerasa iti, ara hadua tauna to napesuaꞌi setáꞌ to handaꞌ. Tauna iti marue miꞌi tiꞌara mewaruꞌ, hai tiꞌara woꞌo toroꞌ i támbi, toroꞌ peá i balamba popatawuá. Handaꞌ kánina napesuaꞌi setáꞌ. Kehapiꞌ ratimpuku miꞌi hai rante hai rakámpái mpakaroꞌa, agáiáná ane tempóna nakuasaꞌi setáꞌ, rante iti nabuku peá nadepuꞌ-depuꞌ, haneꞌi melangka lao mebuni i katoroꞌá to malaheꞌ hangko i tauna. Mewaliꞌ i kamoitána Iesu mendáulu hangko i duanga, tauna to napesuaꞌi setáꞌ iti lao miꞌi mampohidupaꞌá Iesu. Ia monganga-nganga haneꞌi mopalumbá i bitiNa. Iesu mohuoꞌmoheꞌ setáꞌ iti bona melóhóꞌheꞌ, agáiáná monganga-nganga wopiꞌi tauna iti napasimbuku, nauliꞌ, “Iesu, Ánáꞌna Pueꞌ Ala to i Surugáꞌ! Apa riꞌi urusiáMu i kódóꞌ? Kupembiáꞌ bona ineeꞌaꞌ wongkódóꞌá Nupopeahiahiꞌ!”

²⁸

²⁹

³⁰Mekuneꞌ Iesu i tauna iti, “Heáná hangaꞌmu?” Nahániki, “Legio.” Legio, lempóna “i sábuna”[109] láwiꞌ handaꞌ ntepuꞌu setáꞌ to mesuaꞌ.

³¹Setáꞌheꞌ iti, rapembiáꞌ ntepuꞌu i Iesu bona ineeꞌheꞌ Napasuaꞌ i lalu pingke pohukuáraꞌ setáꞌ.[110]

³²Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá to tangaꞌraꞌ masungkiꞌ i buluꞌ. Rapembiáꞌ setáꞌ iti bona napaliuheꞌ Iesu mesuaꞌ i boeꞌ iti. Napokana Iesu pembiáꞌraꞌ iti,

³³mewaliꞌ mesuwuꞌmoheꞌ setáꞌ hangko i tauna iti, hai liliuheꞌ mesuaꞌ i boeꞌ. Pesuaꞌraꞌ i boeꞌ, melangkamoheꞌ boeꞌ iti hai manawoꞌheꞌ i pingke lao i lalu rano, álána mateheꞌ humpu.[111]

³⁴Karaitáraꞌ tauna to mokámpái boeꞌ apa to pewaliꞌ iti, melangkamoheꞌ lao i wánuá hai i hinoe to hungkuꞌ, mopahaweꞌ apa to raita.

³⁵Roo onoꞌ, pueꞌ wánuá laomoheꞌ i Iesu láwiꞌ mampoinaoheꞌ moita apa to pewaliꞌ. Kahaweꞌraꞌ i Iesu, moitamoheꞌ tauna to napesuaꞌi setáꞌ ininá mehoda hungkuꞌ i bitina Iesu, mewaruꞌ, hai manótó miꞌi pekirina. Onoꞌ miꞌi haneꞌi malááꞌmoheꞌ, {láwiꞌ raisá Iesu tauna to makuasaꞌ}.

³⁶Tauna to moita apa to nabábehi Iesu ininá, mampodarita i tauna to haweꞌheꞌ iti, noumbá Iesu mopakauriꞌ tauna to napesuaꞌi setáꞌ ininá.

³⁷Onoꞌ miꞌi haneꞌi handaꞌ pueꞌ wánuá membiáꞌ i Iesu bona pohuꞌ hangko i tampoꞌ Gerasa iti, láwiꞌ malááꞌ ntepuꞌuheꞌ. Mewaliꞌ mengkaheꞌ wopaheꞌ Iesu hai topeguruNa i duanga ina mesuleꞌheꞌ {lao i tampoꞌ Galilea}.

³⁸Tangaꞌna Iesu mengkaheꞌ i duanga, tauna to napesuaꞌi setáꞌ ininá membiáꞌ bona meuláꞌ woꞌo. Agáiáná tiꞌara napaliu Iesu. Nahángáꞌá,

³⁹“Mesuleꞌmokoꞌ lao i támbimu hai nupodaritaꞌámoheꞌ tauna to hambámbánuámu apa to nabábehi Pueꞌ Ala i hio.” Mesuleꞌ mpuꞌu miꞌi tauna iti mopahaweꞌ i humalele wánuána apa to nabábehi Iesu.

⁴⁰I pesuleꞌna Iesu hangko tándáꞌ i hambali rano, góeꞌmoheꞌ tauna to handaꞌ mampohidupaꞌá, láwiꞌ marue miꞌi rapegiá.

⁴¹I tempó onoꞌ, haweꞌ miꞌi woꞌo hadua tadulako támbi penómbáꞌá.[112] Hangaꞌna Iairu. Kamoitána Iesu, molingkudu miꞌi motóngkóꞌ i bitiNa, membiáꞌ bona Iesu lao i támbina,

⁴²láwiꞌ ánáꞌna towawine to haduduána maduꞌa hai hungkuꞌ miꞌi ina mate. Tinuwuꞌna ánáꞌna iti hampuloꞌ hai rompare. Pohuꞌ mpuꞌu miꞌi Iesu ina lao i támbina Iairu, agáiáná i polumaoáNa, handaꞌ tauna mombegihiꞌ-gihiꞌ.

⁴³I oloꞌraꞌ tauna to handaꞌ iti, ara hadua towawine to hampuloꞌ miꞌi hai rompare nahumba oaꞌ, tiꞌara mengkangkaroo,[113] [hai upu miꞌi dóiꞌna mobaiari sando]. Kehapiꞌ handaꞌ miꞌi kánina rapákupui, tiꞌara ara kamauriꞌána.

⁴⁴Towawine iti lao mohungkuki Iesu hangko i taleuꞌNa bona mampetóbóꞌ wuntu kumbáNa. Kanatóbóꞌna peá, kásáliu mengkaroo hakiꞌna iti.

⁴⁵Mekuneꞌ Iesu, “Heáná to mampetóbóꞌAꞌ?” Tiꞌara ara to mangákuꞌ, onoꞌ miꞌi haneꞌi nauliꞌ Peturuꞌ, “Guru, handaꞌ ntepuꞌu tauna mombegihiꞌ-gihiꞌ, onoꞌ miꞌi haneꞌi hangaa-ngaa araKoꞌ to morumpa.”

⁴⁶Nauliꞌ Iesu, “Bateꞌna ara tauna to motunggái motóbóꞌAꞌ, láwiꞌ Kuhádiá ara kuasaꞌ mepakauriꞌ to mesuwuꞌ hangko i wátáNgkuꞌ.”

⁴⁷Naisá miꞌi towawine iti kanaisána Iesu bábehiána, onoꞌ miꞌi haneꞌi ia lao mopalumbá i bitiNa, hai moridiꞌ ánti kamalááꞌna. Napolaluita i lindoꞌraꞌ tauna to handaꞌ tunggáiána motóbóꞌ kumbána Iesu, hai kamauriꞌna miꞌi hakiꞌna.

⁴⁸Iesu molaluita i towawine iti, Nauliꞌ, “ÁnáꞌKuꞌ, ánti pepoináláimu i Kódóꞌ, mauriꞌmokoꞌ. Mesuleꞌmokoꞌ i lalu roꞌa ngkatueꞌ.”

⁴⁹Tangaꞌna mani Iesu molaluita, haweꞌ miꞌi hadua tauna hangko i támbina Iairu lao mohángáꞌá Iairu, “Tuá, ánáꞌmu mate miꞌi. Tiꞌara piꞌi ara bunduꞌna membiáꞌkoꞌ tulungi i Guru.”

⁵⁰Kanahádina Iesu laluitana tauna to rahuoꞌ iti, molaluita miꞌi i Iairu, Nauliꞌ, “Ineeꞌkoꞌ malááꞌ. Ane nupoináláiAꞌ, ánáꞌmu ina tueꞌ huleꞌ.”

⁵¹Kahaweꞌraꞌ i támbina Iairu, tauna to handaꞌ tiꞌaraheꞌ napaliu Iesu mesuaꞌ i lintuꞌna ánángkóiꞌ iti; ngkáliꞌna peá Peturuꞌ, Iohane, Iakobu hai tosaena ánángkóiꞌ iti to peisá mesuaꞌ.

⁵²Upu-upu tauna to ara ionoꞌ moteriahiheꞌ ánángkóiꞌ to mate miꞌi iti, agáiáná nauliꞌ Iesu, “Ineeꞌmokou teriaꞌ. Ánángkóiꞌ deꞌe tiꞌaranto mate, agáiáná letaꞌ peá.”

⁵³Karahádina laluitaNa, rapatawai riꞌi, láwiꞌ raisá ánángkóiꞌ iti mate miꞌi.

⁵⁴Roo onoꞌ, Iesu motibaaꞌ taena ánángkóiꞌ iti, Nahángáꞌá, “ÁnáꞌKuꞌ, mearómokoꞌ!”

⁵⁵Ánángkóiꞌ iti meinao miꞌi huleꞌ, hai liliu mearó. Roo onoꞌ, Iesu mohángáꞌáheꞌ bona ánángkóiꞌ iti rapopandeꞌ.

⁵⁶Tingkáráꞌ ntepuꞌuheꞌ tosaena ánángkóiꞌ iti, agáiáná nakóntóheꞌ Iesu bona ineeꞌ rapolaluita i heáná peá apa to pewaliꞌ ininá.