Read Besoa Lukasi 9 Bible Online

Lukasi 9 - Besoa bible

Lukasi 9

¹Iesu mokióꞌheꞌ topeguruNa to hampuloꞌ hai rodua, haneꞌiheꞌ Naweꞌi kuasaꞌ mampopesuwuꞌ upu-upu setáꞌ hai mopakauriꞌ tauna to tiꞌara nalalu.

²Nahuoꞌheꞌ lao mopahaweꞌ bámbári kana i popárentána Pueꞌ Ala hai mopakauriꞌ tauna to tiꞌara ralalu.

³Nahángáꞌáheꞌ Iesu, “Ineeꞌkou moánti ba apa peá i polumaoámi. Ineeꞌkou moánti laiꞌ, tasi, rótiꞌ, ba dóiꞌ. Hai ineeꞌ woꞌo morontau badumi niánti.

⁴Ane ara tauna to motarimakou i támbina, toroꞌmokou ionoꞌ duuꞌmi mopaliliu polumaomi lao i wánuá ntániꞌna.

⁵Agáiáná ane rápáꞌna, haweꞌkou i hambuaꞌ wánuá, agáiáná tiꞌarakou ratarima, nipálehi pemiꞌi wánuá iti, hai nitarónta awu to mentakaꞌ i pálántáꞌ bitimi, tandaꞌna hira to ina motarima pehukuna Pueꞌ Ala.”[114]

⁶Karooraꞌ napaturoꞌ Iesu, pohuꞌmoheꞌ lao i wánuá-wánuá moánti Ngkóráꞌ Marasa, hai iumbá-umbá peá kalaoáraꞌ, mopakauriꞌ tauna to tiꞌara ralalu.

⁷I tempó iti, Datu Herode Antipa mepárentá i tampoꞌ Galilea. Ia mohádi bámbári kana i upu-upu tandaꞌ kuasaꞌ to nabábehi Iesu. Bata-bata laluna Herode, láwiꞌ ara to manguliꞌ, “Iesu ia miꞌi Iohane Toperiu to tueꞌ huleꞌ.”

⁸Araheꞌ woꞌo to manguliꞌ, “Iesu ia miꞌi nabiꞌ Eliá to haweꞌ wopiꞌi.” Hai araheꞌ woꞌo to manguliꞌ, “Iesu ia miꞌi hadua nabiꞌ hangkoia to tueꞌ huleꞌ.”

⁹Agáiáná nauliꞌ Herode, “Ane Iohane, tiꞌara woꞌo, láwiꞌ kuhuoꞌ miꞌi tauna mobóhóki tambólóna. Mewaliꞌ, heáná riꞌi Iesu deꞌe? Handaꞌ miꞌi to kuhádi mokana i Hia.” Onoꞌ miꞌi haneꞌi Herode mampeliꞌ rárá mampohidupaꞌá Iesu.[115]

¹⁰I pesuleꞌraꞌ surona Iesu to hampuloꞌ hai rodua hangko i wánuá-wánuá popahaweꞌáraꞌ Ngkóráꞌ Marasa, mampodaritaꞌámoheꞌ Iesu upu-upu to rabábehi i wánuá-wánuá. Roo onoꞌ, Iesu mowáwáhámoheꞌ topeguruNa iti lao i katoroꞌá to malaheꞌ hangko i tauna, to hungkuꞌ i wánuá Besaida {bona mengkarooheꞌ hampaiꞌ}.

¹¹Agáiáná, i karaisána tauna to handaꞌ iumbá katoroꞌá iti, metutuháheꞌ. I kahaweꞌraꞌ, natarimaheꞌ Iesu, haneꞌi Napaturoꞌheꞌ mokana i popárentána Pueꞌ Ala. Hai heáná peá to tiꞌara nalalu, Napakauriꞌ.

¹²Ina támpu miꞌi alo, laomoheꞌ topeguruNa to hampuloꞌ hai rodua i Iesu, rauliꞌ, “Guru, katoroꞌá deꞌe karaoꞌ hangko i wánuá. Rángina miꞌi Nuhuoꞌheꞌ tauna to handaꞌ deꞌe lao i wánuá-wánuá to hungkuꞌ bona peisáheꞌ mampeliꞌ pandeꞌraꞌ hai kahambengiáraꞌ.”

¹³Agáiáná nahániki Iesu, “Kómu riꞌi to hangaa-ngaa mopaꞌandeꞌheꞌ.” Rahániki topeguruNa, “Guru, handaꞌheꞌ gaga! To ara i kaiꞌ, lima peá wuaꞌna rótiꞌ hai rombaꞌa bouꞌ. Tiꞌara gáná ane tiꞌaraꞌangkaiꞌ lao sieruꞌ mohóló pandeꞌ.”

¹⁴Kahandaꞌraꞌ tauna iti rekeꞌ-rekeꞌna lima sábuna tobaleilo, tiꞌara teimbaꞌ towawine hai ánángkóiꞌ. Nauliꞌ Iesu i topeguruNaheꞌ, “Nihuoꞌheꞌ tauna to handaꞌ iti mehoda lima-lima puloꞌraꞌ hantobu.”

¹⁵Apa to nahuoꞌáheꞌ Iesu, rapeuláꞌi mpuꞌu miꞌi topeguruNa.

¹⁶Mehodamoheꞌ upu-upu, haneꞌi Iesu moala rótiꞌ to lima wuaꞌna hai bouꞌ to rombaꞌa, mengoaꞌ i langiꞌ, mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti, haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.

¹⁷Mewaliꞌ mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, kahandaꞌna hampuloꞌ mani hai rongkárándi.

¹⁸Hangkani tempó, Iesu mekakae haduduáNa. TopeguruNa araheꞌ woꞌo ionoꞌ. Roo mekakae, mekuneꞌ miꞌi Iesu i topeguruNa, “Mouláꞌ panguliꞌraꞌ tauna to handaꞌ, Kódóꞌ deꞌe, heánáꞌAꞌ?”

¹⁹Rahániki, “Araheꞌ to manguliꞌ Iohane Toperiu to tueꞌ huleꞌ. Araheꞌ woꞌo to manguliꞌ nabiꞌ Eliá to haweꞌ wopiꞌi hangko i surugáꞌ nodo to nadándi Pueꞌ Ala.[116] Araheꞌ woꞌo to manguliꞌ Io hadua nabiꞌ hangkoia, to tueꞌ huleꞌ.”

²⁰Nakuneꞌ wopaheꞌ, Nauliꞌ, “Ane kómu, mouláꞌ polámbiꞌmi, Kódóꞌ deꞌe, heánáꞌAꞌ?” Nahániki Peturuꞌ, “Io miꞌi Datu Topehómpóꞌ[117] to nadándi Pueꞌ Ala!”

²¹Agáiáná nakóntó ntepuꞌuheꞌ Iesu bona ineeꞌ sieruꞌ rapepehángáꞌá i heáná peá kaꞌIana Datu Topehómpóꞌ.

²²Nauliꞌ wopiꞌi Iesu, “Ánáꞌ Mánusiá hangaa-ngaa molámbiꞌ handaꞌ kapári {láwiꞌ iti miꞌi peundeꞌána Pueꞌ Ala}. Ia ina rasápuáka totosaeraꞌ toIahudiꞌ, kapalaꞌ-kapalaꞌ tadulako menómbá hai guru-guru agama. Ina rapapate, agáiáná i katáluna alona, ina tueꞌ huleꞌ.”

²³Hangko ionoꞌ, Iesu mohángáꞌáheꞌ upu-upu tauna, “Heáná to mampoinao meuláꞌ i Kódóꞌ, hangaa-ngaa mokábáhá peundeꞌána haduduána hai hangaa-ngaa timama oaꞌ mantódihá kapári[118] haneꞌi meuláꞌ i Kódóꞌ.

²⁴Láwiꞌ heáná to mokábáhá peundeꞌána haduduána ánti peuláꞌna i Kódóꞌ, kehapiꞌ rapapate, ia miꞌi to ina molámbiꞌ katueꞌ to maroꞌa to tiꞌara mokahópóꞌá. Agáiáná heáná to mampeuláꞌi peundeꞌána haduduána tiꞌara ina molámbiꞌ katueꞌ to maroꞌa to tiꞌara mokahópóꞌá.

²⁵Apa bunduꞌna ane morámpukou upu-upu kapebuku i duniáꞌ deꞌe, agáiáná tiꞌarakou molámbiꞌ katehómpóꞌ i alo pobutusi?

²⁶Heáná to mahili mopangákuꞌ peuláꞌna i Kódóꞌ hai mampokahili paturoꞌKuꞌ, i kahaweꞌKuꞌ huleꞌ, ina mahiliAꞌ woꞌo mopangákuꞌ kaꞌiana topeuláꞌKuꞌ. I tempó iti, Ánáꞌ Mánusiá ina mendáulu mai hangko i surugáꞌ, hai ina meawaꞌ i lalu peawaꞌna UmáNa hai peawaꞌraꞌ malaꞌeka to magasaꞌ.[119]

²⁷Nipehádingi maroꞌa apa to Kuhángáꞌákou deꞌe: ara i oloꞌmi tauna to tiꞌara ina mate hangko tiꞌara mani moita popárentána Pueꞌ Ala.”[120]

²⁸Haminggu iliꞌna hangko i pepaturoꞌna Iesu iti, Ia moánti Peturuꞌ, Iohane hai Iakobu wutuꞌna Iohane, mempanaiꞌheꞌ lao i wongko buluꞌ[121] bona Iesu mekakae ionoꞌ.

²⁹TangaꞌNa mekakae, tebáliki miꞌi lindoꞌNa, waruꞌNa mewaliꞌ bulá hai mengkilaꞌ.[122]

³⁰Hangkaꞌ-hangkaꞌ perái, araheꞌ rodua nabiꞌ to molaluita hai Ia, iamoheꞌ Musa[123] hai Eliá.[124]

³¹Mewangkaꞌ hai meawaꞌ ntepuꞌuheꞌ to rodua iti. Mampolaluitaheꞌ kamatena Iesu to hangaa-ngaa ina mewaliꞌ i Ierusale bona tebukeki tunggáiána Pueꞌ Ala.

³²I tempó iti, Peturuꞌ hai rángána letaꞌ mposoheꞌ. I kapearóraꞌ, raita riꞌi Iesu meawaꞌ ntepuꞌu wátáNa, hai rodua tauna araheꞌ i hintáiꞌNa.

³³Hangko tiꞌara maniheꞌ pohuꞌ tauna to rodua iti, molaluita miꞌi Peturuꞌ, nauliꞌ, “Guru, maroꞌa ntepuꞌu kihádi kitaꞌ arakeꞌ ieneꞌ! Rángina kibábehi tálu wuaꞌna bambaruꞌ: hambuaꞌ i Hio Pueꞌ, hambuaꞌ i Musa, hai hambuaꞌ woꞌo i Eliá.” Agáiáná tiꞌara nahádiá Peturuꞌ i tempóna molaluita noꞌonoꞌ.

³⁴Tangaꞌna mani molaluita, hangkaꞌ-hangkaꞌ peramoheꞌ napótóꞌ gawu.[125] Mewaliꞌ malááꞌmoheꞌ Peturuꞌ hai rángána.

³⁵Hangko ionoꞌ, mohádimoheꞌ wambaꞌ hangko i lalu gawu to manguliꞌ, “Deꞌe miꞌi ÁnáꞌKuꞌ to Kupileꞌi. Nipehádingi miꞌi laluitaNa!”[126]

³⁶Karooraꞌ mohádi laluita iti, moitaheꞌ Iesu haduduáNa perái. Apa to raita topeguruNa to tálu iti, tiꞌara sieruꞌ rapolaluita i heáná peá.

³⁷Kahalona, Iesu hai topeguruNa to tálu mendáulumoheꞌ hangko i wongko buluꞌ, hai handaꞌheꞌ tauna lao mampohidupaꞌá Iesu.

³⁸Ara hadua tobaleilo i oloꞌraꞌ tauna to handaꞌ mekióꞌ, nauliꞌ, “Guru! Membiáꞌaꞌ wongkódóꞌá tulungi, bona Nupeita ánáꞌkuꞌ. Ia ánáꞌkuꞌ to haduduána peá.

³⁹Ane napesuaꞌi setáꞌ, kásáliu monganga-nganga riꞌi, moridiꞌ-ridiꞌ, hai mobireꞌ woꞌo ngángána. Ane tempóna wopiꞌi setáꞌ iti mesuaꞌ, tiꞌara piꞌi napoinao pohuꞌ, naundeꞌ peá oaꞌ mampopeahiahiꞌ ánáꞌkuꞌ iti.

⁴⁰Kupembiáꞌ miꞌi i topeguruMu bona mampopesuwuꞌheꞌ setáꞌ iti, agáiáná tiꞌara rabuku.”

⁴¹Mekuneꞌ miꞌi Iesu i tauna to handaꞌ, Nauliꞌ, “Noumbárakou noeneꞌ? Moapa riꞌi haneꞌi tiꞌara manikou mepoinálái? Nisápuáka mani peundeꞌána Pueꞌ Ala! Hangapa mani kamaruena ina hingkakaniAꞌ hai kómu hai sabaraꞌAꞌ, hangko mepoináláirakou?” Roo onoꞌ, Iesu mohángáꞌá tauna iti, Nauliꞌ, “Ánti mai ánáꞌmu!”

⁴²Tangaꞌna mani ánángkóiꞌ iti molumao ina lao i Iesu, wátána nadungká wopiꞌi setáꞌ to mampesuaꞌi hai moridiꞌ-ridiꞌ. Agáiáná Iesu mokámbáróá setáꞌ iti, haneꞌi nalalu miꞌi ánángkóiꞌ iti. Roo onoꞌ, Iesu mampeweꞌi ánángkóiꞌ iti i umána.

⁴³Tingkáráꞌ ntepuꞌuheꞌ upu-upu tauna moita kamaróhóna kuasaꞌna Pueꞌ Ala. Tangaꞌraꞌ mani tauna to handaꞌ mampotingkáráꞌ upu-upu tandaꞌ kuasaꞌ to nabábehi Iesu, Nauliꞌ i topeguruNaheꞌ,

⁴⁴“Nipehádingi maroꞌa-roꞌa hai nipailalu laluitaNgkuꞌ deꞌe: Ánáꞌ Mánusiá ina rapehuhuꞌá i taeraꞌ tauna to kadake.”

⁴⁵Agáiáná topeguruNaheꞌ tiꞌara moisá tunggáiána laluitana Iesu iti, láwiꞌ tewuniángi mani lempóna i hira. Tiꞌaraheꞌ woꞌo pebáiꞌ mekuneꞌ i Hia apa lempóna laluitaNa.

⁴⁶Hangkani tempó, topeguruna Iesu mampombeheheꞌiheꞌ heáná hangko i oloꞌraꞌ to melumbuꞌ kamahilena tueꞌna.

⁴⁷Naisá miꞌi Iesu apa to ara i laluraꞌ, onoꞌ miꞌi haneꞌi Ia moala hadua ánángkóiꞌ, Napopeángkáꞌ i hintáiꞌNa,

⁴⁸haneꞌi Nahángáꞌáheꞌ topeguruNa, “Heáná to motarima hai motulungi ánángkóiꞌ to nodo ánángkóiꞌ deꞌe i lalu hangaꞌKuꞌ, lempóna Kódóꞌ miꞌi to natarima. Hai heáná to motarimaꞌAꞌ, tiꞌara Kódóꞌ peá to natarima, agáiáná motarima miꞌi woꞌo Pueꞌ Ala to mohuoꞌAꞌ mai. Heáná to mengkaiwóiꞌ i lalu katueꞌna, ia miꞌi to i reá tueꞌna i peitána Pueꞌ Ala.”

⁴⁹Kanahádina Iohane laluitana Iesu iti, nauliꞌ, “Guru, ara kiꞌita hadua tauna to mampopesuwuꞌ setáꞌ i lalu hangaꞌMu, agáiáná kikóntó láwiꞌ ia tiꞌara hangko i kitaꞌ.”

⁵⁰Nauliꞌ Iesu i Iohane, “Ineeꞌ nikóntó, láwiꞌ heáná to tiꞌarakou moewaꞌ, lempóna ia miꞌi rángámi mobágóꞌ.”[127]

⁵¹[128] Hungkuꞌ miꞌi tempóna Iesu ina mesuleꞌ lao i surugáꞌ, Ia mopakanótó hangaa-ngaa lao i Ierusale.[129]

⁵²Mewaliꞌ Ia mohuoꞌmoheꞌ bahangapa tauna to meuláꞌ i Hia lao moioru mopatimama upu-upu to raparaluu i kahaweꞌáNa. Mewaliꞌ pohuꞌ mpuꞌumoheꞌ, hai mesuaꞌheꞌ i hambuaꞌ wánuáraꞌ toSamaria,

⁵³agáiáná pueꞌ wánuá iti, tiꞌaraheꞌ mau motarima Iesu, láwiꞌ raisá tunggáiáNa ina lao menómbá i Ierusale.

⁵⁴Karaisána Iakobu hai Iohane toSamaria iti tiꞌaraheꞌ mau motarima Iesu, onoꞌ miꞌi haneꞌi rauliꞌ i Hia, “Pueꞌ, ane Nuꞌundeꞌi, kipembiáꞌ i Pueꞌ Ala bona Napopendáulu api hangko i langiꞌ mopapateheꞌ pueꞌ wánuá deꞌe!”[130]

⁵⁵Agáiáná kanahádina Iesu apa to rauliꞌ topeguruNa iti, Ia mehaileꞌ i taleuꞌNa haneꞌiheꞌ Nakámbáróá.

⁵⁶Roo onoꞌ, mopaliliumoheꞌ polumaoraꞌ lao i wánuá ntániꞌna.

⁵⁷Tangaꞌraꞌ Iesu hai topeguruNa molumao ina lao i Ierusale, ara hadua tauna to mampolaluitaꞌá Iesu, nauliꞌ, “Guru, iumbá kalaoáMu, ionoꞌaꞌ woꞌo ina meuláꞌ!”

⁵⁸Nahániki Iesu, “Serigala ara katoroꞌáraꞌ i balamba, hai tádáhi ara háráraꞌ, agáiáná Ánáꞌ Mánusiá tiꞌara ara támbiNa.”

⁵⁹Roo onoꞌ, molaluita Iesu i tauna ntániꞌna, Nauliꞌ, “Meuláꞌmokoꞌ i Kódóꞌ.” Agáiáná nahániki tauna iti, “Pueꞌ, Nupaliuaꞌ sieruꞌ lao motawu umángkuꞌ. Upu rái ratawu, hangko peisáraꞌaꞌ meuláꞌ i Hio.”

⁶⁰Nauliꞌ Iesu, “Nupatodáhimoheꞌ tauna to mate pepoináláiraꞌ motawu hangka tomateraꞌ.[131] Agáiáná io, laomokoꞌ mopahaweꞌ bámbári kana i popárentána Pueꞌ Ala!”

⁶¹Ara woꞌo hadua to mohángáꞌá Iesu, “Pueꞌ, Kuꞌundeꞌ ntepuꞌu meuláꞌ i Hio, agáiáná Nupaliuaꞌ sieruꞌ mesuleꞌ mesabiꞌ i halalungkuꞌheꞌ.”

⁶²Nahángáꞌá Iesu, “Tauna to mampoinao meuláꞌ i Kódóꞌ, ane mambuhinao apa peá to napálehi, tiꞌara hintotoꞌ mewaliꞌ topobágóꞌ i lalu popárentána Pueꞌ Ala. Ia hibali hai tauna to timama mopajekoꞌ, agáiáná mehaileꞌ mani i taleuꞌ.”