Read Besoa Iohane 1 Bible Online

Iohane 1 - Besoa bible

Iohane 1

¹Rungu-runguna, hangko tiꞌara mani duniáꞌ rapopewaliꞌ, to rapándiriꞌ hai Ngkóráꞌ[1] ara miꞌi ami. Ngkóráꞌ iti, ambiꞌna miꞌi ara hingkakani hai Pueꞌ Ala, hai Ngkóráꞌ iti ia miꞌi Pueꞌ Ala haduduáNa.

²Rungu-runguna Ia hingkakani hai Pueꞌ Ala.

³Ia miꞌi to napontóáꞌ Pueꞌ Ala mampopewaliꞌ hinángkáꞌna to ara. Tiꞌara ara hampákáꞌ to mewaliꞌ ane tiꞌarai Ngkóráꞌ.[2]

⁴Ia miꞌi ntóáꞌna katueꞌ. Ia to mampoweꞌi katueꞌ i tauna hai mopamabaa laluraꞌ.

⁵Ia miꞌi pewangkaꞌ to mewangkaꞌ oaꞌ i lalu duniáꞌ to makáindi deꞌe, hai Ia tiꞌara haweꞌ hangkani nanangi kamakáindi.

⁶Hangkani tempó, haweꞌ miꞌi hadua tauna to nahuoꞌ Pueꞌ Ala, hangaꞌna Iohane.[3]

⁷Kamaina Iohane, ia mewaliꞌ hadua sabiꞌ to mopahaweꞌ kana i pewangkaꞌ iti bona upu-upu tauna to mohádi posabikina mepoináláiheꞌ i pewangkaꞌ iti.

⁸Agáiáná Iohane tiꞌara tauna to rapándiriꞌ hai pewangkaꞌ iti. Ia to mai peá mopahaweꞌ kana i kaꞌina haweꞌNa tauna iti to moánti pewangkaꞌ i upu-upu tauna.

⁹Ngkóráꞌ iti Topoánti pewangkaꞌ to toꞌu to mopamabaa laluna upu-upu tauna. Ia to haweꞌ miꞌi i duniáꞌ.

¹⁰Ia miꞌi to napontóáꞌ Pueꞌ Ala mampopewaliꞌ duniáꞌ deꞌe. Agáiáná i tempóNa ara i duniáꞌ, tauna tiꞌara moisá kaheánáNa.

¹¹Mogalo riꞌi hangka toSáráeliꞌNa, handaꞌheꞌ to tiꞌara motarima.

¹²Agáiáná heáná peá to motarima hai mepoinálái i Hia, hira miꞌi to Napopewaliꞌ ánáꞌna Pueꞌ Ala.

¹³Mewaliꞌheꞌ ánáꞌna Pueꞌ Ala tiꞌara ánti toioruraꞌ, ba ánti pohambokona tauna, ba ánti peundeꞌáraꞌ tauna. Bateꞌna peá Pueꞌ Ala to mampopewaliꞌheꞌ ánáꞌNa.

¹⁴Ngkóráꞌ iti mewaliꞌ tauna, hai toroꞌ i oloꞌtaꞌ i duniáꞌ deꞌe. Kiꞌita miꞌi kamaróhóna kuasaꞌNa. KuasaꞌNa iti Natarima hangko i UmáNa, láwiꞌ Ia miꞌi ÁnáꞌNa to HaduduáNa. LaluitaNa toꞌu ntepuꞌu, hai tongawaꞌ upu-upu kabulána laluNa i kitaꞌ.

¹⁵Hangkani tempó, Iohane mampopaisá i tauna to handaꞌ kaheánána Ngkóráꞌ iti. Ia molaluita napasimbuku, nauliꞌ, “Ia miꞌi deꞌe to kupakanótóákou hangkoia! Kuꞌuliꞌ: ara to ina mai meusungi hangko i kódóꞌ to melumbuꞌ kamaróhóna kuasaꞌNa hangko i kódóꞌ, láwiꞌ hangko tiꞌara maniaꞌ rapoánáka, Ia ambiꞌna miꞌi ara hangko i rungu-runguna.”[4]

¹⁶Ánti kabulána laluNa, kitaꞌ upu-upu molámbiꞌkeꞌ pewátiꞌ, hai pewátiꞌ to talámbiꞌ iti, tiꞌara mokahópóꞌá.

¹⁷Musa moweꞌikeꞌ áturá peá. Agáiáná Iesu Kerisitu mopatongawaꞌákeꞌ kabulána laluna Pueꞌ Ala, hai moliu paturoꞌNa to toꞌu, taisá kaheánána Pueꞌ Ala.

¹⁸Tiꞌara ara hadua to moita Pueꞌ Ala, bateꞌna peá ÁnáꞌNa to Haduduána to ara hingkakani hai Ia. Ia miꞌi to mopakanótóákeꞌ heáná katoꞌuána Pueꞌ Ala.

¹⁹Deꞌe miꞌi posabikina Iohane to mopahaweꞌ kaheánána Iesu. Hangkani tempó, tadulakoraꞌ toIahudiꞌ i Ierusale mohuoꞌheꞌ bahangapa tadulako menómbá hai toLewi[5] lao i Iohane. Kahaweꞌraꞌ i Iohane, rapekuneꞌ, “Katoꞌuána, heánákoꞌ? Ba Datu Topehómpóꞌ mpuꞌukoꞌ?”

²⁰Nahánikiheꞌ Iohane i katoꞌu-toꞌuána, nauliꞌ, “Kódóꞌ, tiꞌaraꞌaꞌ Datu Topehómpóꞌ.”

²¹Mekuneꞌ wopaheꞌ, “Ane noꞌonoꞌi, heánákoꞌ? Ba nabiꞌ Eliakoꞌ?”[6] Nauliꞌ Iohane, “Tiꞌara.” Mekuneꞌ wopaheꞌ, “Ba io miꞌi nabiꞌ mahile[7] to radándi hangkoia ina mai i duniáꞌ?” Nauliꞌ Iohane, “Tiꞌara woꞌo.”

²²Hangko ionoꞌ, rahángáꞌá, “Ane noꞌonoꞌi, nuhángáꞌáꞌangkaiꞌ ba heánákoꞌ, bona ara hánikina pekuneꞌraꞌ to mohuoꞌangkaiꞌ mai. Apa pehániꞌmu kana i wátámu haduduámu?”

²³Nahánikiheꞌ Iohane mouláꞌ laluitana nabiꞌ Iesaia hangkoia: “Kódóꞌ miꞌi deꞌe ‘tauna to molaluita masimbuku i pádá loriꞌ: Ina haweꞌ miꞌi Pueꞌ! Nipatimama ráráNa!’ ” [8]

²⁴Rauliꞌ wopiꞌi huoꞌáraꞌ toParisi iti, “Ane tiꞌarakoꞌ Datu Topehómpóꞌ, tiꞌarakoꞌ nabiꞌ Eliá, hai tiꞌarakoꞌ woꞌo nabiꞌ to radándi, moapa riꞌi haneꞌi báiꞌkoꞌ moriu tauna?”[9]

²⁵

²⁶Nauliꞌ Iohane, “Kódóꞌ moriu tauna hai uwai peá. Deꞌe-deꞌe ara miꞌi hadua i oloꞌmi, agáiáná Ia tiꞌara mani niꞌisá.

²⁷Ia miꞌi to haweꞌ meusungi hangko i kódóꞌ. Mogalo riꞌi mokekehi petakaꞌ sandaleNa, tiꞌaraꞌaꞌ hintotoꞌ.”[10]

²⁸Upu-upu iti mewaliꞌ i wánuá Betania, i periuána Iohane tándáꞌ i mata alo uwai Iarade.

²⁹Kahalona, Iohane moita Iesu lao i hia, hai nahángáꞌáheꞌ tauna to handaꞌ, “Nipeita! Domi maiꞌo tauna to rapándiriꞌ nodo Ánáꞌ Dimbá[11] to napatimama Pueꞌ Ala. Ia miꞌi to ina mohuhuꞌ wátáNa mosulewátáikeꞌ bona tehómpókikeꞌ hangko i huku dósántaꞌ.

³⁰Ia miꞌi to kuꞌuliꞌ to liu ina haweꞌ meusungi hangko i kódóꞌ, agáiáná melumbuꞌ kamaróhóna kuasaꞌNa hangko i kódóꞌ, láwiꞌ hangko tiꞌara maniaꞌ rapoánáka, Ia ambiꞌna miꞌi ara.

³¹Rungu-runguna, tiꞌara mani woꞌo kuisá kaꞌIana miꞌi Datu Topehómpóꞌ. Agáiáná deꞌe miꞌi tunggáiángkuꞌ: maiaꞌ moriuheꞌ toSáráeliꞌ hai uwai, bona toSáráeliꞌ moisáheꞌ heáná katoꞌuána Datu Topehómpóꞌ iti.”

³²Ara woꞌo posabiꞌna Iohane deꞌe, nauliꞌ, “Rungu-runguna tiꞌara mani kuisá kaꞌIesuna Datu Topohómpóꞌ, agáiáná Pueꞌ Ala mohuoꞌaꞌ moriu tauna hai uwai. Nahángáꞌáꞌáꞌaꞌ node: ‘Ane nuita Inao to Magasaꞌ mendáulu hai mengkatóá i hadua tauna, Ia miꞌi to ina mampoweꞌikou Inao to Magasaꞌ bona tebáliki lalumi.’ Mewaliꞌ, kuita mpuꞌu miꞌi Inao to Magasaꞌ mendáulu hangko i surugáꞌ nodo tádáhi manggebodoꞌ hai mengkatóá i wongkona Iesu. Onoꞌ miꞌi haneꞌi kuꞌuliꞌ: Iesu Ia miꞌi Ánáꞌna Pueꞌ Ala.”

³³

³⁴

³⁵Kahalona, Iohane ara woꞌo ionoꞌ hingkakani hai rodua topeguruna.[12]

³⁶Kamoitána Iesu melempó, nauliꞌ, “Peita, domi maiꞌo Ánáꞌ Dimbána Pueꞌ Ala!”

³⁷Karahádina laluitana Iohane, laomoheꞌ meuláꞌ i Iesu.

³⁸Napehaileꞌheꞌ Iesu hai Naitaheꞌ meuláꞌ, mewaliꞌ Nakuneꞌheꞌ, “Apa to nipeliꞌ?” Rauliꞌ “Guru, iumbá katoroꞌáMu?”

³⁹Nauliꞌ Iesu, “Maimokou, niꞌita peá deiná.” Meuláꞌ mpuꞌumoheꞌ i Hia lao i katoroꞌáNa. Mantepuꞌu tintiꞌ iba duuꞌ káindi, ionoꞌmoheꞌ hingkakani hai Ia.

⁴⁰Tauna to rodua iti meuláꞌheꞌ i Iesu ánti pohádiraꞌ laluitana Iohane Toperiu. Hadua hangko i hira, hangaꞌna Andaria, ádina Simoꞌ Peturuꞌ.

⁴¹Kásáliu lao Andaria mampeliꞌ Simoꞌ, nahángáꞌá, “Kilámbiꞌ miꞌi to rauliꞌ toMásehi.” (Laluita “toMásehi” hibali hai “Kerisitu” i lalu básá Iunani. Lempóna: Datu Topehómpóꞌ.)

⁴²Roo onoꞌ, naꞌánti lao i Iesu. Iesu motótói Simoꞌ haneꞌi Nahángáꞌá, “Io Simoꞌ ánáꞌna Iohane. Mantepuꞌu deꞌe-deꞌe, ina rahangaꞌkoꞌ Kepas.” (Lempóna “Kepas” i lalu básáraꞌ toIahudiꞌ, hibali hai “Peturuꞌ” i lalu básá Iunani. Lempóna: watu.)

⁴³Kahalona, Iesu ina lao i tampoꞌ Galilea. Hangko tiꞌara mani pohuꞌ, lao miꞌi mampohidupaꞌá Pilipu hai nahángáꞌá, “Meuláꞌmokoꞌ i Kódóꞌ!”

⁴⁴Pilipu iti hangko i wánuá Besaida, wánuáraꞌ Andaria hai Peturuꞌ.

⁴⁵Hangko ionoꞌ, lao miꞌi woꞌo Pilipu mampeliꞌ rángána to rahangaꞌ Natanaeli. Nalámbiꞌ mpuꞌu miꞌi haneꞌi nahángáꞌá, “Kipohidupaꞌá miꞌi do tauna to natunggái Musa i lalu sura Paturoꞌna, hai nabiꞌ-nabiꞌ i lalu suraraꞌ hangkoia! Ia miꞌi Iesu toNasare, ánáꞌna Iusupu.”

⁴⁶Mehániꞌ Natanaeli, nauliꞌ, “Ara paꞌi woꞌo to maroꞌa to hangko i wánuá Nasare?” Nauliꞌ Pilipu, “Maimokoꞌ, bona nuita!” Mewaliꞌ lao mpuꞌumoheꞌ i Iesu.

⁴⁷Kanaitána Iesu Natanaeli mai mampohidupaꞌá, Napolaluita miꞌi kana i hia, Nauliꞌ, “Domi maiꞌo hadua toSáráeliꞌ to manoroꞌ ntepuꞌu laluna. Ia tiꞌara hangkani mobagiuꞌ tauna!”

⁴⁸Nauliꞌ Natanaeli, “Guru, noumbá riꞌi haneꞌi Nuisá ntepuꞌu pambiárángkuꞌ?” Nauliꞌ Iesu, “Hangko tiꞌara manikoꞌ nakióꞌ Pilipu, Kuitamokoꞌ i wóiꞌ kau ara.”

⁴⁹Nauliꞌ Natanaeli, “Guru, Ánáꞌna mpuꞌuKoꞌ Pueꞌ Ala! Io mpuꞌu miꞌi Datungkiꞌ toSáráeliꞌ!”

⁵⁰Nauliꞌ Iesu, “Ba nupoinálái láwiꞌ Kuꞌuliꞌ kaKuitamu i wóiꞌ kau ara? Ina nuita wopiꞌi tandaꞌ kuasaꞌ to melumbuꞌ kamahilena hangko i to pewaliꞌ deꞌe.”

⁵¹Roo onoꞌ, nauliꞌ wopiꞌi Iesu, “Toꞌu ntepuꞌu laluitaNgkuꞌ deꞌe: ina niꞌita langiꞌ tebungkáhi hai malaꞌekana Pueꞌ Ala mengkaheꞌ hai mendáulu mai i Ánáꞌ Mánusiá.”[13]