Read Besoa Iohane 10 Bible Online

Iohane 10 - Besoa bible

Iohane 10

¹Iesu molaluita, Nauliꞌ, “Toꞌu ntepuꞌu laluitaNgkuꞌ deꞌe: ane ara hadua to mesuaꞌ i lalu gimpu hai tiꞌara moliu i babaꞌá, agáiáná mengkaheꞌ riꞌi i bosoꞌ, lempóna tauna iti ia miꞌi topanako hai toperampaꞌ.

²Ane topoewu, ia mesuaꞌ moliu i babaꞌá.

³Topokámpái gimpu mobungkáhiá babaꞌá, hai dimbána mampehádingi wambaꞌna topoewuraꞌ. Topoewu iti mokióꞌ hangaꞌraꞌ hambaꞌa-hambaꞌa hai moántiheꞌ lao i rawa.

⁴Kanaꞌántiraꞌ upu-upu dimbána lao i rawa, ia moioru miꞌi hangko i hira, hai dimbána meuláꞌ i hia, láwiꞌ raisá mampetándái wambaꞌna.

⁵Tiꞌaraheꞌ mouláꞌ tauna ntániꞌna. Ane ara tauna to tiꞌara topoewuraꞌ to mokióꞌheꞌ, rapelangkaha, láwiꞌ tiꞌaraheꞌ moisá wambaꞌna.”

⁶Iesu mopahaweꞌ ngkóráꞌ pándiriꞌ iti i toParisi, agáiáná tiꞌara raisá lempóNa.

⁷Onoꞌ miꞌi haneꞌi Nauliꞌ wopiꞌi, “Toꞌu ntepuꞌu laluitaNgkuꞌ deꞌe: Kódóꞌ miꞌi deꞌe babaꞌá to rapoliui dimbá ane mesuaꞌheꞌ i lalu gimpu.

⁸Upu-upu tauna to moioru hangko i Kódóꞌ to manguliꞌ kahirana topoewu to maroꞌa[81] hira iti nodo topanako hai toperampaꞌ. Agáiáná dimbáNgkuꞌ, tiꞌaraheꞌ mampeuláꞌi pekióꞌraꞌ.

⁹Kódóꞌ miꞌi deꞌe to rapándiriꞌ nodo babaꞌá. Heáná to mesuaꞌ i surugáꞌ moliu i Kódóꞌ, molámbiꞌheꞌ katehómpóꞌ. Hira peisáheꞌ rapándiriꞌ nodo dimbá to mesuaꞌ i lalu gimpu hai mesuwuꞌheꞌ lao i rawa molámbiꞌ rumpuꞌ to maruduꞌ.

¹⁰Tunggáiána topanako, ina manako peá, mepapate hai mepakarugiꞌ. Agáiáná kamaiNgkuꞌ deꞌe bona tauna molámbiꞌheꞌ katueꞌ to maroꞌa ntepuꞌu.

¹¹Kódóꞌ miꞌi deꞌe topoewu to maroꞌa. Topoewu to maroꞌa timama mampehuhuꞌá wátána bona dimbána tueꞌheꞌ.

¹²Ane tauna to rasaro peá, tiꞌara maroꞌa poewuna, láwiꞌ ia tiꞌara pueꞌ dimbá. Ane moita mai serigala, ia melangka mopálehi dimbá to handaꞌ iti. Mewaliꞌ hambaꞌa dimbá nahakaꞌ serigala, áláraꞌ to ntániꞌna mahawuꞌ.

¹³Tauna to rasaro iti melangka, láwiꞌ ia mobágóꞌ bona molámbiꞌ peá sarona. Tiꞌara mampekiri dimbá iti. Noꞌonoꞌ woꞌo tadulako-tadulako agama, tiꞌaraheꞌ mampotepe taunána Pueꞌ Ala.[82]

¹⁴Kódóꞌ miꞌi deꞌe topoewu to maroꞌa. Nodo UmáNgkuꞌ moisáꞌAꞌ, hai Kódóꞌ woꞌo moisáꞌAꞌ UmáNgkuꞌ, noꞌonoꞌ woꞌo Kódóꞌ moisáheꞌ dimbáNgkuꞌ, hai dimbáNgkuꞌ moisáꞌAꞌ. TimamaꞌAꞌ mohuhuꞌ katueꞌKuꞌ bona dimbáNgkuꞌ tueꞌheꞌ.

¹⁶Ara mani dimbáNgkuꞌ to ntániꞌna, {iamoheꞌ tauna to tiꞌara toIahudiꞌ to ina mepoinálái i Kódóꞌ},[83] agáiáná tiꞌaraheꞌ ara i lalu gimpu deꞌe. Hira woꞌo hangaa-ngaa Kuántiheꞌ mai. Ina moisá ntepuꞌuheꞌ wambaꞌKuꞌ, hai upu-upu dimbáNgkuꞌ ina mewaliꞌ peheꞌ hantobu, hai Kódóꞌ haduduáNgkuꞌ ina mewaliꞌ topoewuraꞌ.

¹⁷UmáNgkuꞌ mampokaꞌahiꞌAꞌ, láwiꞌ ina Kuhuhuꞌ katueꞌKuꞌ bona tueꞌAꞌ huleꞌ.

¹⁸Tiꞌara ara hadua to mopapateAꞌ ane tiꞌara peundeꞌáNgkuꞌ. Ara kuasaꞌKuꞌ mampeweꞌi wátáNgkuꞌ bona rapapate, hai ara woꞌo kuasaꞌKuꞌ moala huleꞌ katueꞌKuꞌ. Iti miꞌi hawaꞌna UmáNgkuꞌ to Kutarima.”

¹⁹Karahádina toIahudiꞌ laluitana Iesu, mombehániꞌ-hániꞌ wopaheꞌ.

²⁰Handaꞌheꞌ to manguliꞌ, “Napesuaꞌi setáꞌ hai magila! Tiꞌara piꞌi paraluu tapehádingi laluitaNa.”

²¹Agáiáná ara woꞌo to manguliꞌ, “Tiꞌara! Tauna to napesuaꞌi setáꞌ tiꞌara molaluita noꞌonoꞌ. Ara paꞌi setáꞌ to peisá mopakauriꞌ tauna to bilo?”

²²I tempó iti i Ierusale, tauna mopaꞌaraheꞌ posusa pambuhinao Alo Popamagasaꞌ Támbina Pueꞌ Ala hangkoia.[84] Tempó iti tempó lengiꞌ.

²³Iesu molumao i tangabaa Támbina Pueꞌ Ala i tambaleꞌ to rahangaꞌ Tambaleꞌ Salomo.

²⁴Bahangapaheꞌ tadulakoraꞌ toIahudiꞌ motolelingiheꞌ Iesu, rahángáꞌá, “Moapa riꞌi haneꞌi Nupatodáhiangkaiꞌ oaꞌ wuli? Tiꞌaraꞌangkaiꞌ Nupakanótóá kaheánáMu. Ane Datu Topehómpóꞌ mpuꞌuKoꞌ, Nupakanótóámongkaiꞌ.”[85]

²⁵Nauliꞌ Iesu, “Roomokou Kuhángáꞌá, agáiáná tiꞌara nipoinálái. Tandaꞌ kuasaꞌ to Kubábehi moliu kuasaꞌna UmáNgkuꞌ, iti miꞌi to mopakanótó kaheánáNgkuꞌ.

²⁶Agáiáná tiꞌara nipoinálái, láwiꞌ tiꞌarakou dimbáNgkuꞌ.

²⁷DimbáNgkuꞌ moisá wambaꞌKuꞌ. Kuisá ntepuꞌuheꞌ, hai meuláꞌheꞌ i Kódóꞌ.

²⁸Kuweꞌiheꞌ katueꞌ to maroꞌa to tiꞌara mokahópóꞌá, hai manótó katiꞌáráraꞌ ina tegááki hangko i Pueꞌ Ala duuꞌna i rue-ruena. Tiꞌara ara hadua to peisá mamperampaꞌiheꞌ hangko i taeNgkuꞌ.

²⁹Melumbuꞌ kuasaꞌNa UmáNgkuꞌ hangko i upu-upuna, hai Ia miꞌi to mampoweꞌiAꞌ dimbáNgkuꞌ. Tiꞌara ara hadua to peisá mamperampaꞌiheꞌ hangko i taena UmáNgkuꞌ.

³⁰Kódóꞌ hai UmáNgkuꞌ, hadua peaNgkaiꞌ.”

³¹Karahádina peá toIahudiꞌ laluitana Iesu iti, kásáliu motimaꞌheꞌ watu. Rapoinao mowatui Iesu duuꞌna mate {láwiꞌ Ia mopahibali wátáNa hai Pueꞌ Ala}.

³²Nahángáꞌáheꞌ Iesu, “Handaꞌ bágóꞌ to maroꞌa to nahuoꞌáꞌAꞌ UmáNgkuꞌ bona Kupopaitaꞌákou. Hangko i upu-upuna iti, umbána to mewaliꞌ ntóáꞌna haneꞌiAꞌ nipoinao nipapate?”

³³Rauliꞌ tadulakoraꞌ toIahudiꞌ, “Tiꞌara ánti bágóꞌ to maroꞌa haneꞌi ina kipapateKoꞌ, agáiáná ánti popakóiꞌMu riꞌi Pueꞌ Ala! Tauna biásá peKoꞌ, agáiáná Nuꞌuliꞌ riꞌi Pueꞌ AlaKoꞌ!”

³⁴Nauliꞌ Iesu, “I lalu Sura Magasaꞌ, teukiꞌ miꞌi laluitana Pueꞌ Ala i topebutusi toIahudiꞌ hangkoia to manguliꞌ node: ‘pueꞌ alakou.’[86]

³⁵Apa to teukiꞌ i lalu Sura Magasaꞌ iti, tiꞌara ara katebálikiána. Mewaliꞌ, ane Sura Magasaꞌ manguliꞌ ‘pueꞌ alakou’ i tauna to motarima ngkóráꞌna Pueꞌ Ala hangkoia, pelumbuꞌna mani i Kódóꞌ,

³⁶láwiꞌ Kódóꞌ deꞌe to napileꞌi mpiiꞌAꞌ UmáNgkuꞌ to mohuoꞌAꞌ mai i duniáꞌ. Mewaliꞌ, moapa riꞌi haneꞌi niuliꞌ mopakóiꞌAꞌ Pueꞌ Ala ane Kuꞌuliꞌ Kódóꞌ deꞌe ÁnáꞌNaꞌAꞌ?

³⁷Ane tiꞌaraꞌAꞌ mampobágóꞌ bágóꞌ to nahuoꞌáꞌAꞌ UmáNgkuꞌ, ineeꞌAꞌ nipoinálái.

³⁸Agáiáná láwiꞌ mampobágóꞌAꞌ bágóꞌ to nahuoꞌáꞌAꞌ UmáNgkuꞌ, hangaa-ngaa nipoináláiAꞌ. KehapiꞌAꞌ tiꞌara nipoinálái, hangaa-ngaa nipoinálái tandaꞌ kuasaꞌ to Kubábehi. Ane nipoinálái tandaꞌ kuasaꞌ iti, ina niꞌisá ntepuꞌu i lalumi kamohintuwuꞌKuꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ.”

³⁹Karahádina toIahudiꞌ laluitana Iesu, rapoinao wopiꞌi rahakaꞌ, agáiáná tekábáhá peá hangko i taeraꞌ.

⁴⁰Hangko ionoꞌ, pohuꞌ wopiꞌi Iesu lao tándáꞌ i mata alo uwai Iarade i periuána Iohane hangkoia, hai toroꞌ ionoꞌ.

⁴¹Handaꞌ tauna lao mampohidupaꞌá Iesu, rauliꞌ, “Iohane tiꞌara mobábehi tandaꞌ kuasaꞌ, agáiáná tauna deꞌe mobábehi tandaꞌ kuasaꞌ, hai upu-upu to napahaweꞌ Iohane mokana i Hia bateꞌna toꞌu.”

⁴²Onoꞌ miꞌi haneꞌi handaꞌ tauna ionoꞌ mepoinálái i Iesu.