Read Besoa Iohane 11 Bible Online

Iohane 11 - Besoa bible

Iohane 11

¹Hadua tobaleilo to rahangaꞌ Lasaru toroꞌ i wánuá Betania hingkakani hai Maria hai Marita halaluna. Maria iti miꞌi to mobubuhi bitina Iesu hai mina-mina to mawongi haneꞌi naumpáhi hai weluáꞌna.[87] Hangkani tempó, Lasaru rumihi kamaduꞌana.

³Maria hai Marita mohuoꞌmoheꞌ tauna lao moánti tewái i Iesu bona Ia lao i támbiraꞌ. Rauliꞌ, “Nuhángáꞌá node: ‘Pueꞌ, tauna to Nupokaꞌahiꞌ, tangaꞌna maduꞌa ntepuꞌu.’ ”

⁴Kanahádina Iesu bámbári iti, Nauliꞌ, “Hakiꞌna iti tiꞌara ina moánti i kapate. Iti mewaliꞌ bona Pueꞌ Ala ina rapomahile, hai moliu apa to ina Kubábehi, Kódóꞌ ÁnáꞌNa Pueꞌ Ala woꞌo ina rapomahile.”

⁵Iesu mampokaꞌahiꞌ Marita, Maria, hai Lasaru.

⁶Agáiáná kaNahádina kamaduꞌana Lasaru, tiꞌara kásáliu lao, roo peá i katoroꞌána rongalo kamaruena.

⁷Liu miꞌi rongalo hangko Nahángáꞌáraheꞌ topeguruNa, “Mesuleꞌmokeꞌ lao i tampoꞌ Iudá.”

⁸Rahángáꞌá, “Guru, tiꞌara maniheꞌ marue tadulakoraꞌ toIahudiꞌ ionoꞌ mampoinao ina mowatuiKoꞌ duuꞌMu mate. Mewaliꞌ moapa riꞌi haneꞌi Nupoinao wopiꞌi huleꞌ lao ionoꞌ?”

⁹Nahángáꞌáheꞌ Iesu, “I lalu hangaloá, tiꞌara paꞌi mabaa hampuloꞌ hai rojaa? Tauna to molumao mabaa, tiꞌaraheꞌ ina tehube. Peisáheꞌ meita, láwiꞌ ara pewangkaꞌ alo to mopamabaa duniáꞌ deꞌe.

¹⁰Agáiáná tauna to molumao i kakáindiána, bateꞌna ina tehube láwiꞌ tiꞌara ara to mowangkaꞌi.”

¹¹Noꞌonoꞌ miꞌi laluitana Iesu, hai roo onoꞌ Nauliꞌ wopiꞌi, “Rángántaꞌ Lasaru letaꞌ miꞌi, agáiáná ina lao Kuruaꞌ.”

¹²Katoꞌuána laluitana Iesu iti, lempóna Lasaru mate miꞌi agáiáná topeguruNa tiꞌara moisá lempóna laluitaNa iti, rauliꞌ ripaꞌi letaꞌ peá iti Lasaru. Onoꞌ miꞌi haneꞌi rahángáꞌá, “Pueꞌ, ane letaꞌ peá, ia ina mearónto.”

¹³

¹⁴Mewaliꞌ, Napakanótóáheꞌ lempóna laluitaNa, Nauliꞌ, “Lasaru mate miꞌi.

¹⁵GóeꞌAꞌ láwiꞌ tiꞌaraꞌAꞌ ara ionoꞌ i tempóna mate. Láwiꞌ apa to mewaliꞌ, ina mobunduꞌ i kómu, bona mepoináláikou i Kódóꞌ. Mewaliꞌ laomokeꞌ i Lasaru.”

¹⁶Tómá to rauliꞌ woꞌo Didimu, lempóna Toporopaꞌ, mohángáꞌáheꞌ, “Maikeꞌ meuláꞌ i Iesu, bona matekeꞌ hingkakani.”

¹⁷Kahaweꞌna Iesu i wánuá Betania, Ia mohádi bámbári to manguliꞌ iba miꞌi alona Lasaru ratawu.

¹⁸Betania iti hungkuꞌ i Ierusale, rekeꞌ-rekeꞌna tálu kiló kakaraoꞌna.

¹⁹Mewaliꞌ, handaꞌheꞌ toIahudiꞌ lao mopalindó Marita hai Maria i kamatena ádiraꞌ.

²⁰Kanahádina Marita kahaweꞌna Iesu, onoꞌ miꞌi haneꞌi lao miꞌi nadupaꞌ. Agáiáná Maria i támbi peá oaꞌ.

²¹Nauliꞌ Marita i Iesu, “Pueꞌ, ane keieneꞌKoꞌ i tempó kamaduꞌana ádingkuꞌ, ketiꞌara ina mate.

²²Agáiáná kehapiꞌ noꞌonoꞌ, kuisá: apa to Nupembiáꞌ i Pueꞌ Ala deꞌe-deꞌe mokana i ádingkuꞌ, bateꞌna ina NaweꞌiKoꞌ.”

²³Nauliꞌ Iesu, “Ádimu ina tueꞌ huleꞌ.”

²⁴Nauliꞌ Marita, “Kuisánto kaꞌina tueꞌna huleꞌ i alo pobutusi i kahópóꞌána duniáꞌ, i karapopearóraꞌ upu-upu tauna to mate.”

²⁵Nauliꞌ Iesu, “Kódóꞌ miꞌi deꞌe to mampopearó tomate, hai to mampoweꞌi katueꞌ to tiꞌara mokahópóꞌá. Tauna to mepoinálái i Kódóꞌ, kehapiꞌheꞌ mate, ina tueꞌheꞌ huleꞌ.

²⁶Hai upu-upu tauna to molámbiꞌ katueꞌ hangko i pepoináláiraꞌ i Kódóꞌ, bateꞌraꞌ tiꞌara ina mate duuꞌna i rue-ruena. Ba Nupoinálái to Kuꞌuliꞌ deꞌe?”

²⁷Nauliꞌ Marita, “Toꞌu, Pueꞌ. Kupoinálái kaꞌIona Ánáꞌna Pueꞌ Ala, Datu Topehómpóꞌ to nadándi Pueꞌ Ala hangkoia to ina mai i duniáꞌ.”

²⁸Karoona manguliꞌ noꞌonoꞌ, lao miꞌi i támbi mokióꞌ Maria, haneꞌi nakuwi nauliꞌ, “Indolouꞌo ara Guru. Napoinao Napohidupaꞌákoꞌ!”

²⁹Kanahádina Maria laluitana, nagagu lao mampohidupaꞌá Iesu.

³⁰I tempó iti, Iesu tiꞌara mani mesuaꞌ i lalu wánuá, ara mani i pohidupaꞌáraꞌ hai Marita ininá.

³¹ToIahudiꞌ to laoheꞌ mepalindó i lalu támbi, moitaheꞌ Maria meángkáꞌ kásáliu pohuꞌ. Rauliꞌ ripaꞌi ia ina lao teriaꞌ i popatawuá, onoꞌ miꞌi haneꞌi meuláꞌheꞌ woꞌo.

³²I kahaweꞌna Maria i kaꞌaraꞌána Iesu, ia moita miꞌi Iesu haneꞌi lao mopalumbá i bitiNa, nauliꞌ, “Pueꞌ, ane keieneꞌKoꞌ i tempó iti, ketiꞌaranto ina mate ádingkuꞌ.”

³³Kanaitána Iesu Maria teriaꞌ, hai toIahudiꞌ to napohingkakaniá teriaꞌheꞌ woꞌo, onoꞌ haneꞌi wiora ntepuꞌu[88] hai masusa laluNa.

³⁴Nakuneꞌheꞌ, “Iumbá ratawu?” Rauliꞌ, “Pueꞌ, maimoKoꞌ, lao tapeita.”

³⁵Hangko ionoꞌ, teriaꞌ miꞌi Iesu.

³⁶Rauliꞌ toIahudiꞌ, “Peita! Maꞌahiꞌ ntepuꞌu laluNa i Lasaru!”

³⁷Agáiáná araheꞌ woꞌo to manguliꞌ, “Tauna to bilo Napakauriꞌ. Moapa riꞌi haneꞌi Ia tiꞌara mopakauriꞌ Lasaru bona tiꞌara mate?”

³⁸Hangko ionoꞌ, masusa wopiꞌi laluna Iesu, hai Ia lao i popatawuá. Popatawuá iti, ia miꞌi balamba to rakae i pingkena buluꞌ to ratuko hai watu to mahile.

³⁹Nauliꞌ Iesu, “Nigesuꞌ watu petukona iti!” Marita wutuꞌna tomate iti manguliꞌ, “Pueꞌ, ineeꞌ miꞌi rabungkáhi. Humau miꞌi, láwiꞌ iba miꞌi wengina ratawu.”

⁴⁰Nauliꞌ Iesu i Marita, “Tiꞌara paꞌi Kuhángáꞌáꞌámokoꞌ ininá, ane nupoináláiAꞌ, ina nuita mpuꞌu kamaróhóna kuasaꞌna Pueꞌ Ala?”

⁴¹Mewaliꞌ araheꞌ to lao mobungkáhi watu petuko popatawuána Lasaru iti. Iesu mengoaꞌ i langiꞌ haneꞌi Nauliꞌ, “UmáNgkuꞌ, Kuꞌuliꞌ handaꞌ kamaroꞌana i Hio, láwiꞌ Nuhádi miꞌi pembiáꞌKuꞌ deꞌe.

⁴²Kuisá, bateꞌna Nuhádi laluitaNgkuꞌ. Agáiáná laluitaNgkuꞌ deꞌe Kuꞌuliꞌ Kupasimbuku, bona rahádi tauna to handaꞌ ieneꞌ, bona rapoinálái kaꞌIona mpuꞌu miꞌi to mohuoꞌAꞌ mai.”

⁴³Roo onoꞌ, nauliꞌ Iesu Napasimbuku, “Lasaru! Mesuwuꞌmokoꞌ mai!”

⁴⁴Mesuwuꞌ mpuꞌu miꞌi tauna to mate iti hangko i lalu popatawuána. Taena hai bitina tebungkuhi mani hai báná popebungkuhina, hai wuáꞌna rawewehi mani mouláꞌ ádáraꞌ toIahudiꞌ. Nahángáꞌáheꞌ Iesu, “Niwehángi miꞌi iti popebungkuhina bona ia peisá molumao.”

⁴⁵Handaꞌheꞌ toIahudiꞌ to lao moweoꞌ Maria i tempó onoꞌ, to moita apa to nabábehi Iesu, mewaliꞌ handaꞌheꞌ to mampoinálái kahangko i Pueꞌ AlaNa.

⁴⁶Agáiáná araheꞌ woꞌo hantángáꞌ to lao i toParisi mopahaweꞌáheꞌ apa to nabábehi Iesu.

⁴⁷Onoꞌ miꞌi haneꞌi toParisi hai kapalaꞌ-kapalaꞌ tadulako menómbá mopaꞌaraheꞌ pogómbó mahile hingkakani hai tadulako agama to ntániꞌna. Rauliꞌ, “Apa to hangaa-ngaa tabábehi, láwiꞌ handaꞌ ntepuꞌu tandaꞌ kuasaꞌ to nabábehi Iesu.

⁴⁸Ane tapatodáhi oaꞌ, upu-upu tauna ina mepoinálái i Hia. Kahópóꞌána, surudadoꞌ toRoma ina mai mogero Támbina Pueꞌ Ala hai upu-upu wánuántaꞌ.”

⁴⁹Roo onoꞌ, molaluita miꞌi hadua hangko i oloꞌraꞌ to rahangaꞌ Kaiapa, Tadulako Menómbá Mahile i pare iti, nauliꞌ, “Tiꞌara niꞌisá apa-apa!

⁵⁰Tiꞌara niꞌisá apa to mobunduꞌ i kómu. Rángina miꞌi hadua tauna mate mosulewátái upu-upu tauna, haneꞌikeꞌ mate upu-upu.”

⁵¹Laluita iti tiꞌara hangko i hia haduduána. Tunggáiána laluitana Kaiapa ia miꞌi Iesu hangaa-ngaa rahuku mate. Agáiáná ara woꞌo lempóna to karompákáꞌna to tiꞌara naisá, ia miꞌi kamatena Iesu ina mosulewátái toIahudiꞌ. Hai tiꞌara peá toIahudiꞌ. Ánti kamatena Iesu iti, upu-upu ánáꞌna Pueꞌ Ala to mahawuꞌ i humalele duniáꞌ ina rarámpuheꞌ huleꞌ hai rapahantobu.[89] Kaiapa iti ia miꞌi Tadulako Menómbá Mahile i tempó onoꞌ.[90]

⁵²

⁵³Mantepuꞌu alo iti, tadulakoraꞌ toIahudiꞌ himpudumoheꞌ bona Iesu rahuku mate.

⁵⁴Onoꞌ miꞌi haneꞌi Iesu tiꞌara piꞌi mopatongawaꞌ wátáNa i oloꞌraꞌ toIahudiꞌ, bona tiꞌara piꞌi raita tauna to handaꞌ. Ia pohuꞌ miꞌi hangko ionoꞌ lao i wánuá to rahangaꞌ Eparai i wiwi pádá loriꞌ, haneꞌi toroꞌ ionoꞌ hingkakani hai topeguruNa.

⁵⁵I tempó iti, ina haweꞌ alo mahile agama Iahudiꞌ to rauliꞌ Alo Posusa Paska. Handaꞌ tauna hangko i wánuá-wánuá lao i Ierusale, bona mopamagasaꞌheꞌ mouláꞌ ádá ágámáraꞌ hangko tiꞌara mani alo mahile iti.

⁵⁶Tauna to hirámpu i Ierusale iti mampeliꞌheꞌ Iesu. Tangaꞌraꞌ hirámpu i tangabaa Támbina Pueꞌ Ala, mombekuneꞌ-kuneꞌheꞌ, rauliꞌ, “Noumbá polámbiꞌmi? Ba ina haweꞌ Iesu i posusaꞌá deꞌe?”

⁵⁷Noꞌonoꞌ miꞌi polaluitaraꞌ tauna to handaꞌ. Ane kapalaꞌ-kapalaꞌ tadulako menómbá hai toParisi, ara miꞌi ami párentáraꞌ i tauna to handaꞌ to manguliꞌ, “Ane heánái to moisá kaꞌiumbáꞌána Iesu, hangaa-ngaa nihángáꞌáꞌangkaiꞌ, bona lao rahakaꞌ.”