Read Besoa Iohane 12 Bible Online

Iohane 12 - Besoa bible

Iohane 12

¹Ini alona hangko tiꞌara mani alo Posusa Paska, Iesu haweꞌ i Betania, wánuá katoroꞌána Lasaru to Napatueꞌ huleꞌ.

²I kahaweꞌNa ionoꞌ, tauna mopaꞌaraheꞌ susa láwiꞌ góeꞌheꞌ motarima Iesu i wánuáraꞌ. Marita merórá, hai Lasaru mandeꞌ woꞌo hingkakani hai Iesu hai tauna ntániꞌna.

³Tangaꞌraꞌ mandeꞌ, haweꞌ miꞌi Maria moánti habutoloꞌ mina-mina narawastu to mawongi. Mina-mina iti rabábehi hangko i kálándá kau to mawongi, hai masuliꞌ ntepuꞌu hólóna. Maria mobubuha mina-mina iti i bitina Iesu, hai naumpáhi hai weluáꞌna. Mewaliꞌ mawongi ntepuꞌu i lalu támbi iti.

⁴Hadua topeguruna Iesu to rahangaꞌ Iudasiꞌ Isikarioꞌ, to ina mampobaluꞌ Iesu i ewáliNa, manguliꞌ,

⁵“Masuliꞌ ntepuꞌu hólóna mina-mina iti, rekeꞌ-rekeꞌna tálu átuna dóiꞌ peráꞌ.[91] Moapa riꞌi haneꞌi tiꞌara rapobaluꞌ, hai hólóna raweꞌiheꞌ tauna to meahiahiꞌ tueꞌraꞌ?”

⁶Katoꞌuána, Iudasiꞌ tiꞌara mampekiri katueꞌraꞌ to meahiahiꞌ, láwiꞌ ia topanako! Ia topotibaaꞌ dóiꞌ, hai hangkani-hangkani naꞌala ngkábuni.

⁷Nauliꞌ Iesu, “Nupatodáhi miꞌi apa to nabábehi deꞌe, láwiꞌ ia mopatimama miꞌi ami wátáNgkuꞌ i kaꞌina ratawuNgkuꞌ.

⁸Ane tauna to meahiahiꞌ, handaꞌ mani tempómi motulungiheꞌ, agáiáná Kódóꞌ, tiꞌaraPoꞌ marue hingkakani hai kómu.”

⁹Handaꞌ ntepuꞌu toIahudiꞌ mohádi kaꞌárána Iesu i Betania, onoꞌ miꞌi haneꞌi lao rapeita. Hai mampoinaoheꞌ woꞌo moita Lasaru to napatueꞌ miꞌi huleꞌ Iesu.

¹⁰Onoꞌ miꞌi haneꞌi kapalaꞌ-kapalaꞌ tadulako menómbá mogómbóheꞌ mampolaluita tunggáiáraꞌ ina mopapateheꞌ woꞌo Lasaru,

¹¹láwiꞌ ánti kaꞌiana, handaꞌ toIahudiꞌ mopálehi tadulako ágámáraꞌ hai mepoináláiheꞌ i Iesu.

¹²Kahalona, handaꞌ tauna i Ierusale mohádi Iesu ina haweꞌ i kótáraꞌ. I tempó iti, handaꞌ ntepuꞌu tauna hirámpu i Ierusale láwiꞌ ina haweꞌ alo Posusa Paska.

¹³Moalaheꞌ taweꞌ to potarangke,[92] rapopoalehe rárá to napoliui Iesu, tandaꞌ pebiláꞌraꞌ i Hia. Monganga-ngangaheꞌ rauliꞌ: “Hosana! Tetóiá miꞌi Pueꞌ Ala! Pueꞌ Ala mowátiꞌ Tauna to haweꞌ to mewaliꞌ HuoꞌáNa! Tewátiꞌ miꞌi Daturaꞌ toSáráeliꞌ!”[93] [94]

¹⁴Iesu moala miꞌi hambaꞌa kalide to maleheꞌ mani, haneꞌi Nasaweꞌi lao i lalu kótá Ierusale. Iti mobukeki laluitana nabiꞌ hangkoia to teukiꞌ node:

¹⁵“Ineeꞌkou malááꞌ, pueꞌ wánuá Sio. Peita! Datumi haweꞌ, mesaweꞌ i hambaꞌa ánáꞌ kalide.”[95] [96]

¹⁶I tempó iti, topeguruNa tiꞌara maniheꞌ moisá lempóna apa to pewaliꞌ iti. Agáiáná karoona Iesu rapapate hai mesuleꞌ lao i surugáꞌ, hangko rabuhinao riꞌi apa to teukiꞌ i lalu Sura Magasaꞌ to mopahaweꞌ miꞌi ami apa to ina mewaliꞌ i Iesu.

¹⁷I tempó iti woꞌo, araheꞌ handaꞌ tauna i Ierusale to hingkakani hai Iesu i pokióꞌNa Lasaru hangko i popatawuá i kaNapatueꞌna huleꞌ. Tauna iti mampolaluitamoheꞌ oaꞌ mokana i apa to pewaliꞌ,

¹⁸onoꞌ miꞌi haneꞌi handaꞌ ntepuꞌuheꞌ tauna to lao mampohidupaꞌá Iesu, láwiꞌ mohádimoheꞌ kaꞌIana to mobábehi tandaꞌ kuasaꞌ iti.

¹⁹Mewaliꞌ molaluitaheꞌ toParisi hadua hai hadua, rauliꞌ, “Manangimokeꞌ! Peita, handaꞌ ntepuꞌumoheꞌ tauna i duniáꞌ meuláꞌ i Hia.”

²⁰Handaꞌheꞌ tauna lao i kótá Ierusale bona menómbá i alo Posusa Paska. I oloꞌraꞌ tauna iti, araheꞌ woꞌo bahangapa toIunani.

²¹ToIunani iti laoheꞌ i Pilipu,[97] rauliꞌ, “Tuá, kipoinao mampohidupaꞌá Iesu.” Pilipu iti hangko i wánuá Besaida i tampoꞌ Galilea.

²²Lao miꞌi Pilipu mopahaweꞌ laluitaraꞌ i Andaria, hai roo onoꞌ, hira rodua lao mampolaluita i Iesu.

²³Nahángáꞌáheꞌ Iesu, “Haweꞌ miꞌi tempóna, Pueꞌ Ala ina mampomahile Ánáꞌ Mánusiá.[98]

²⁴Nipehádingi maroꞌa: KatueꞌKuꞌ nodo hambuaꞌ tinudaꞌ. Ane tinudaꞌ tiꞌara ratudaꞌ sieruꞌ, tiꞌara ina mambáliꞌ. Bateꞌna ina hambuaꞌ peá oaꞌ. Agáiáná ane ratudaꞌ miꞌi, ina mambáliꞌ hai mewaliꞌ handaꞌ.

²⁵Tauna to mampeuláꞌi peá peundeꞌána haduduána i duniáꞌ deꞌe, ia ina mate hai tegááki hangko i Pueꞌ Ala haweꞌ i rue-ruena. Agáiáná heáná to timama mate ánti peuláꞌna i Kódóꞌ, ina molámbiꞌ katueꞌ to maroꞌa to tiꞌara mokahópóꞌá.

²⁶Heáná peá to moundeꞌ meuláꞌ i Kódóꞌ, hangaa-ngaa mewaliꞌheꞌ taunáNgkuꞌ. Iumbá kalaoáNgkuꞌ, ionoꞌheꞌ woꞌo taunáNgkuꞌ, hai UmáNgkuꞌ ina mampomahileheꞌ upu-upu tauna to mengkoruꞌ i Kódóꞌ.”

²⁷“Deꞌe-deꞌe masusa laluNgkuꞌ. Tiꞌara Kuisá apa to hangaa-ngaa Kuꞌuliꞌ. Kupoinao mekakae node: ‘Umaꞌ, NukábáháꞌAꞌ wongKódóꞌá hangko i kapári to ina morampeAꞌ deꞌe!’ Agáiáná tiꞌara, láwiꞌ onoꞌ miꞌi tunggáiáNgkuꞌ mai i duniáꞌ, bona mantódiháꞌAꞌ kapári iti.

²⁸Umaꞌ, Kupembiáꞌ bona Nupatongawaꞌ peawaꞌMu!” Roo onoꞌ, Pueꞌ Ala molaluita hangko i surugáꞌ, Nauliꞌ, “Roo miꞌi Kupatongawaꞌ peawaꞌKuꞌ hai ina Kupopeawaꞌ wopiꞌi.”

²⁹Tauna to meángkáꞌ ionoꞌ mohádiheꞌ laluita iti. Ara to manguliꞌ, “Iti gumpataꞌ!” Agáiáná hantángáꞌheꞌ manguliꞌ, “Tiꞌara. Ara malaꞌeka to molaluita hai Ia.”

³⁰Nahángáꞌáheꞌ Iesu, “Laluita to nihádi ininá, tiꞌara bona motulungiAꞌ, agáiáná bona motulungikou.

³¹Deꞌe-deꞌe haweꞌ miꞌi tempóna Pueꞌ Ala ina mobutusi upu-upu kárá-kárána tauna i duniáꞌ. Hai deꞌe-deꞌe haweꞌ miꞌi woꞌo tempóna Datu Tokadake to mokuasaꞌi duniáꞌ deꞌe hangaa-ngaa ratibe.

³²Hai Kódóꞌ, ane rapamapángkáꞌAꞌ i kau mombehape, ina Kudiiꞌ laluraꞌ upu-upu tauna[99] bona maiheꞌ i Kódóꞌ.”

³³Laluitana Iesu iti mopakanótó noumbá kaꞌina rapapateNa.

³⁴Rauliꞌ tauna to handaꞌ, “I lalu Sura Magasaꞌ kibásá: Datu Topehómpóꞌ tueꞌ duuꞌna i rue-ruena.[100] Moapa riꞌi haneꞌi Nuꞌuliꞌ Ánáꞌ Mánusiá hangaa-ngaa rapamapángkáꞌ i kau mombehape? Ánáꞌ Mánusiá to noumbá to Nutunggái?”

³⁵Nahángáꞌáheꞌ Iesu, “Hampaiꞌ perái, pewangkaꞌ to mopamabaakou deꞌe-deꞌe tiꞌara piꞌi ina ara hingkakani hai kómu. Molumaokou oaꞌ i lalu kamabaa i tempóna pewangkaꞌ iti ara mani i kómu, bona tiꞌarakou narampe kamakáindi. Tauna to molumao i lalu kakáindiána, tiꞌara raisáꞌá iumbá kalaoáraꞌ.

³⁶Mepoináláimokou i pewangkaꞌ iti i tempóna pewangkaꞌ iti ara mani i oloꞌmi, bona kómu mewaliꞌkou tauna to tueꞌ i kamabaa.”[101] Kaupuna Iesu mopahaweꞌ upu-upuna iti, pohuꞌ miꞌi hangko ionoꞌ bona tiꞌara piꞌi raita tauna to handaꞌ.

³⁷Kehapiꞌ handaꞌ tandaꞌ kuasaꞌ to nabábehi Iesu i lindoꞌraꞌ toIahudiꞌ, agáiáná handaꞌ maniheꞌ to tiꞌara mepoinálái i Hia,

³⁸bona tebukeki miꞌi laluitana nabiꞌ Iesaia hangkoia to manguliꞌ: “Pueꞌ, tiꞌaraheꞌ handaꞌ to mepoinálái i bámbári to kiánti. Kehapiꞌheꞌ Nupopaitaꞌá kuasaꞌMu, tiꞌara maniheꞌ mepoinálái.” [102]

³⁹Mewaliꞌ, tiꞌaraheꞌ peisá mepoinálái, láwiꞌ nodo to naukiꞌ woꞌo nabiꞌ Iesaia:

⁴⁰Pueꞌ Ala manguliꞌ: “Kutunggáiheꞌ Kupabilo, bona tiꞌaraheꞌ meita. Kupamatuꞌa laluraꞌ, bona tiꞌaraheꞌ moisá peundeꞌáNgkuꞌ. Kahópóꞌána tiꞌaraheꞌ mesuleꞌ i Kódóꞌ, hai dósáraꞌ tiꞌara teámpungi.” [103]

⁴¹Laluita iti napahaweꞌ nabiꞌ Iesaia hangkoia kana i Iesu, láwiꞌ naita miꞌi ami peawaꞌNa.[104]

⁴²Kehapiꞌ noꞌonoꞌ, handaꞌheꞌ woꞌo tadulakoraꞌ toIahudiꞌ to mepoinálái i Iesu. Agáiáná tiꞌaraheꞌ mau mopatongawaꞌ pepoináláiraꞌ i Hia, láwiꞌ rapokalááꞌ tiꞌaraheꞌ ina rapaliu toParisi mesuaꞌ i lalu támbi penómbáꞌá.

⁴³Raundeꞌ mani petóiá to hangko i tauna, haneꞌi petóiá to hangko i Pueꞌ Ala.

⁴⁴Roo onoꞌ, Iesu molaluita Napasimbuku, Nauliꞌ, “Tauna to mepoinálái i Kódóꞌ, tiꞌara Kódóꞌ peá to rapoinálái, agáiáná mepoináláimoheꞌ woꞌo i Pueꞌ Ala to mohuoꞌAꞌ mai.

⁴⁵Tauna to moitaꞌAꞌ, hibali miꞌi woꞌo moita Pueꞌ Ala to mohuoꞌAꞌ mai.

⁴⁶MaiAꞌ i duniáꞌ deꞌe nodo pewangkaꞌ, bona upu-upu tauna to mepoinálái i Kódóꞌ tiꞌarapoheꞌ toroꞌ i lalu kakáindiána.

⁴⁷Tauna to mohádi laluitaNgkuꞌ agáiáná tiꞌara rapeuláꞌi, tiꞌara Kódóꞌ to ina mohukuheꞌ, láwiꞌ tunggáiáNgkuꞌ mai i duniáꞌ deꞌe, tiꞌaraꞌAꞌ mai mohuku tauna, ngkáliꞌna riꞌi maiAꞌ mokábáháheꞌ hangko i huku dósá.

⁴⁸Tauna to mosápuákaꞌAꞌ hai tiꞌara motarima laluitaNgkuꞌ, ara miꞌi to ina mohukuheꞌ. Ngkóráꞌ to Kupahaweꞌ, iti miꞌi to ina mohukuheꞌ i alo pobutusi i kahópóꞌána duniáꞌ.

⁴⁹LaluitaNgkuꞌ tiꞌara hangko i peundeꞌáNgkuꞌ haduduáNgkuꞌ. Kupahaweꞌ hai Kupolaluita apa to napárentáiáꞌAꞌ UmáNgkuꞌ, láwiꞌ Ia miꞌi to mohuoꞌAꞌ mai.

⁵⁰Hai Kuisá: heáná to mampeuláꞌi hawaꞌNa iti ina molámbiꞌ katueꞌ to maroꞌa to tiꞌara mokahópóꞌá. Mewaliꞌ, apa to Kuꞌuliꞌ deꞌe, bateꞌna laluita to napahaweꞌáMoꞌ ami UmáNgkuꞌ.”