Read Besoa Iohane 13 Bible Online

Iohane 13 - Besoa bible

Iohane 13

¹Hangalo hangko tiꞌara mani haweꞌ alo Posusa Paska, Iesu moisá kaꞌina haweꞌna miꞌi tempóNa mopálehi duniáꞌ hai mesuleꞌ lao i UmáNa. Maꞌahiꞌ laluNa i upu-upu tauna to meuláꞌ i Hia, onoꞌ miꞌi haneꞌi kamahilena ahiꞌNa iti Napatongawaꞌáheꞌ haweꞌ-haweꞌ i kamateNa.

²Káindi iti, topeguruNa mandeꞌheꞌ hingkakani hai Iesu. I tempó iti woꞌo, Datu Tokadake roo miꞌi mampopokale laluna Iudasiꞌ ánáꞌna Simoꞌ Isikarioꞌ, bona mampobaluꞌ Iesu i ewáliNaheꞌ.

³Agáiáná naisá miꞌi Iesu kanaweꞌiNa miꞌi UmáNa upu-upu kuasaꞌ i Hia. Naisá woꞌo kahangko i Pueꞌ AlaNa, hai kaꞌina mesuleꞌNa wopiꞌi i Pueꞌ Ala.

⁴Onoꞌ haneꞌi meángkáꞌ miꞌi, mokábáhá kumbáNa, hai moala báná Naweweha i hopeꞌNa.

⁵Roo onoꞌ, Ia moala uwai Nabubuha i loia, hai Natepuꞌu mobahoꞌi bitiraꞌ topeguruNa, haneꞌi Naumpáhi hai báná to i hopeꞌNa.

⁶Haweꞌ miꞌi Iesu i Simoꞌ Peturuꞌ, agáiáná Peturuꞌ manguliꞌ, “Pueꞌ, moapa haneꞌi Io riꞌi to mobahoꞌi bitingkuꞌ?”

⁷Nauliꞌ Iesu, “Deꞌe-deꞌe, tiꞌara mani nuisá apa to Kubábehi. Agáiáná i alo to ina haweꞌ, hangko nuisá riꞌi.”

⁸Nauliꞌ Peturuꞌ, “Ineeꞌ, Pueꞌ! Tiꞌara hintotoꞌ ane Io to mobahoꞌi bitingkuꞌ.” Nauliꞌ Iesu, “Ane tiꞌarakoꞌ Kubahoꞌi, tiꞌara ara pohintuwuꞌmu hai Kódóꞌ.”

⁹Nauliꞌ Simoꞌ Peturuꞌ, “Ane noꞌonoꞌi Pueꞌ, ineeꞌ bitingkuꞌ peá, agáiáná taengkuꞌ hai wuáꞌkuꞌ woꞌo.”

¹⁰Nauliꞌ Iesu, “Tauna to roo miꞌi medói, tiꞌara piꞌi kedái, maituꞌ miꞌi upu-upu wátána, tiꞌara piꞌi paraluu rabahoꞌi huleꞌ, bateꞌna peá bitina to hangaa-ngaa rabahoꞌi wopiꞌi.[105] Kómu, tebahoꞌimokou, agáiáná tiꞌarakou upu-upu.”

¹¹Iesu molaluita noꞌonoꞌ, láwiꞌ Naisá miꞌi heáná to ina mampobaluꞌ wátáNa i ewáliNa. Onoꞌ miꞌi haneꞌi Nauliꞌ, “Tebahoꞌimokou, agáiáná tiꞌarakou upu-upu.”

¹²Karoona Iesu mobahoꞌi bitiraꞌ, Ia mopakeꞌ miꞌi huleꞌ kumbáNa hai mehoda, haneꞌi Nahángáꞌáheꞌ, “Ba niꞌisái lempóna apa to hangko Kubábehi i kómu?

¹³NibiláꞌAꞌ, mewaliꞌ nikióꞌAꞌ Guru hai Pueꞌ. Laluitami iti toꞌu ntepuꞌu.

¹⁴Ane Kódóꞌ Pueꞌmi hai Gurumi, mobágóꞌAꞌ nodo hadua hawiꞌ mobahoꞌi bitimi, apa mani kómu, hangaa-ngaa mengkaiwóiꞌkou mombekádipurá, rápáꞌna mombebahoꞌikou mpobiti.

¹⁵Kupopaitaꞌákou pándiriꞌ deꞌe ininá, bona nipeuláꞌi bábehiáNgkuꞌ.

¹⁶Toꞌu ntepuꞌu laluitaNgkuꞌ deꞌe: topobágóꞌ tiꞌara melumbuꞌ karabiláꞌna hangko i tuána, hai huoꞌá tiꞌara melumbuꞌ karabiláꞌna hangko i tauna to mehuoꞌ.

¹⁷Ánti kaniꞌisána paturoꞌ deꞌe, ina morasiꞌkou ane nipeuláꞌi.

¹⁸Apa to Kuꞌuliꞌ ininá, tiꞌara mokana i kómu upu-upu. Kuisá ami pambiárána tauna to Kupileꞌi. Agáiáná hangaa-ngaa tebukeki apa to teukiꞌ i lalu Sura Magasaꞌ to manguliꞌ: ‘Hadua tauna to paka mandeꞌ hingkakani hai Kódóꞌ,[106] ia miꞌi to mewaliꞌ ewálingkuꞌ.’[107]

¹⁹Iti Kupahaweꞌámokou ami hangko tiꞌara mani mewaliꞌ, bona ane mewaliꞌ miꞌi, ina nipoinálái kaKódóꞌna miꞌi to hangko i Pueꞌ Ala.

²⁰Toꞌu ntepuꞌu laluitaNgkuꞌ deꞌe: heáná to motarima huoꞌáNgkuꞌ, hibali miꞌi Kódóꞌ to natarima. Noꞌonoꞌ woꞌo, heáná to motarimaꞌAꞌ, hibali miꞌi Pueꞌ Ala to natarima láwiꞌ Ia miꞌi to mohuoꞌAꞌ mai.”

²¹Karoona Iesu molaluita noꞌonoꞌ, masusa ntepuꞌu laluNa, haneꞌi Nauliꞌ, “Bona niꞌisá: hadua hangko i oloꞌmi ina mohuhuꞌAꞌ i ewálingkuꞌ.”

²²Ánti kawuliraꞌ topeguruNa, mombetótóimoheꞌ hadua hai hadua láwiꞌ tiꞌara raisá heáná to Natunggái.

²³Tempó onoꞌ, ara hadua topeguruna Iesu to Napokaꞌahiꞌ[108] mehoda i hintáiꞌNa.

²⁴Simoꞌ Peturuꞌ mokawe tauna iti, nahángáꞌá, “Nupekuneꞌ i Guru, ba heánái to Natunggái.”

²⁵Onoꞌ miꞌi haneꞌi topeguruna Iesu to mehoda i hintáiꞌNa mampehaileꞌ Iesu haneꞌi mekuneꞌ, “Heáná, Pueꞌ?”

²⁶Nahániki Iesu, “Heáná to Kuweꞌi rótiꞌ to Kutubuká i lalu rutuꞌ deꞌe,[109] ia miꞌi taunána.” Hangko ionoꞌ, moala miꞌi hantepóꞌ rótiꞌ, Natubuká i lalu rutuꞌ, haneꞌi Naweꞌi Iudasiꞌ ánáꞌna Simoꞌ Isikarioꞌ.

²⁷Kanaꞌalana Iudasiꞌ rótiꞌ iti, ia nakuasaꞌi Datu Tokadake. Roo onoꞌ, Iesu mohángáꞌá, “Apa to ina nubábehi, kawiáꞌ miꞌi nubábehi.”

²⁸Agáiáná to mandeꞌ hingkakani hai Iesu, tiꞌaraheꞌ moisá tunggáiána Iesu molaluita noꞌonoꞌ i Iudasiꞌ.

²⁹Rauliꞌ ripaꞌi Iesu mohuoꞌ Iudasiꞌ lao mohóló apa to raparaluu i posusáraꞌ, ba mampoweꞌi dóiꞌ i tauna to meahiahiꞌ, láwiꞌ Iudasiꞌ topokádipurá dóiꞌ.

³⁰Kanaꞌalana Iudasiꞌ rótiꞌ iti, ia pohuꞌ miꞌi lao i rawa. I tempó iti, káindi miꞌi.[110]

³¹Kapohuꞌna Iudasiꞌ, nauliꞌ miꞌi Iesu, “Deꞌe-deꞌe Ánáꞌ Mánusiá ina rapomahile. Hai apa to ina mewaliꞌ i Kódóꞌ, ina mampomahile woꞌo Pueꞌ Ala.

³²Ánti bábehiáNgkuꞌ, kamahilena hangaꞌna Pueꞌ Ala ina tongawaꞌ i tauna, hai Kódóꞌ woꞌo ina napomahile Pueꞌ Ala. To Kuꞌuliꞌ deꞌe hangaa-ngaa hawiáꞌ mewaliꞌ.

³³ÁnáꞌKuꞌ, tiꞌaraPoꞌ ina marue hingkakani hai kómu. Roo onoꞌ, ina nipeliꞌAꞌ, agáiáná nodo to Kuhángáꞌá tadulakoraꞌ toIahudiꞌ hangkoia, noꞌonoꞌ woꞌo to Kuhángáꞌáꞌákou: i kalaoáNgkuꞌ iti, tiꞌara manikou peisá lao.

³⁴Kuweꞌikou hawaꞌ to woꞌu: Hangaa-ngaa mombepokaꞌahiꞌkou nodo Kódóꞌ mampokaꞌahiꞌkou.

³⁵Ane mombepokaꞌahiꞌkou, upu-upu tauna ina moisá kakómuna miꞌi topeguruNgkuꞌ.”

³⁶Simoꞌ Peturuꞌ mekuneꞌ i Iesu, “Pueꞌ, iumbáKoꞌ ina lao?” Nauliꞌ Iesu, “I kalaoáNgkuꞌ iti, tiꞌarakoꞌ peisá ina lao. I alo to ina haweꞌ, hangko peisárakoꞌ meuláꞌ i Kódóꞌ.”[111]

³⁷Nauliꞌ wopiꞌi Peturuꞌ, “Pueꞌ, moapa riꞌi deꞌe-deꞌe haneꞌi tiꞌaraꞌaꞌ peisá meuláꞌ i Hio? Timamaꞌaꞌ mate ánti peuláꞌkuꞌ i Hio!”

³⁸Nauliꞌ Iesu, “Ba báiꞌ mpuꞌukoꞌ mate ánti kaKódóꞌna? Toꞌu ntepuꞌu to Kuhángáꞌáꞌákoꞌ: hangko tiꞌara mani motuturuꞌuá manuꞌ, tálu miꞌi kánina nusápuákaꞌAꞌ.”