Read Besoa Iohane 14 Bible Online

Iohane 14 - Besoa bible

Iohane 14

¹Iesu mopaliliu wopiꞌi laluitaNa i topeguruNaheꞌ, Nauliꞌ, “Ineeꞌ karaoꞌ inaomi! Mepoináláimokou i Pueꞌ Ala, hai mepoináláimokou woꞌo i Kódóꞌ.

²I támbina UmáNgkuꞌ, handaꞌ katoroꞌá. Ane ketiꞌarai noꞌonoꞌ, ketiꞌarakou ina Kuhángáꞌá. Ina laoAꞌ mopatimamaꞌákou katoroꞌámi.

³Ane upu miꞌi Kupatimama katoroꞌámi, ina mesuleꞌ wopaꞌAꞌ maikou Kuala, hai ina Kuántikou i katoroꞌáNgkuꞌ, bona iumbá peá kaꞌaraꞌáNgkuꞌ, ionoꞌkou woꞌo hingkakani hai Kódóꞌ.[112]

⁴Kómu, niꞌisá miꞌi iumbá rárá lao i katoroꞌáNgkuꞌ.”

⁵Nauliꞌ Tómá, “Pueꞌ, tiꞌara wongkaiꞌkaa moisá iumbá kalaoáMu. Mewaliꞌ, noumbá kakiꞌisáꞌána rárána?”

⁶Nauliꞌ Iesu, “Kódóꞌ miꞌi deꞌe rárá lao i surugáꞌ, Kódóꞌ miꞌi deꞌe to mopakanótóákou apa to toꞌu mokana i Pueꞌ Ala, hai Kódóꞌ miꞌi deꞌe to mampoweꞌikou katueꞌ to maroꞌa to tiꞌara mokahópóꞌá. Tiꞌara ara haweꞌ hadua to peisá haweꞌ i UmáNgkuꞌ, ane tiꞌara moliu i Kódóꞌ.

⁷Ane niꞌisáꞌAꞌ, niꞌisá woꞌo UmáNgkuꞌ. Mantepuꞌu deꞌe-deꞌe, niꞌisá miꞌi hai nodomokou woꞌo moita Pueꞌ Ala.”

⁸Nauliꞌ Pilipu, “Pueꞌ, Nutudeꞌáꞌangkaiꞌ UmáMu. Iti peá to kipembiáꞌ.”

⁹Nauliꞌ Iesu, “Pilipu, tiꞌara maniAꞌ paꞌi nuisá? Maruemokeꞌ hingkakani! Heáná to moitaꞌAꞌ, hibali miꞌi woꞌo moita UmáNgkuꞌ. Mewaliꞌ, moapa riꞌi haneꞌi nupembiáꞌ mani bona Kutudeꞌákou UmáNgkuꞌ?

¹⁰Ba tiꞌara mani nupoinálái kamohintuwuꞌKuꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ? Apa to Kuhángáꞌákou deꞌe, tiꞌara Kuꞌuliꞌ mouláꞌ peundeꞌáNgkuꞌ haduduáNgkuꞌ, agáiáná laluitaNgkuꞌ mentóáꞌ hangko i UmáNgkuꞌ to mohintuwuꞌ hai Kódóꞌ. Ia miꞌi pentóáꞌána kuasaꞌ, haneꞌi Kubuku mampopolumao bágóꞌNa.

¹¹Mepoináláimokou i Kódóꞌ láwiꞌ mohintuwuꞌAꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ. Ane tiꞌarakou peisá mampoinálái apa to Kuꞌuliꞌ iti, hangaa-ngaa mepoináláikou i Kódóꞌ, láwiꞌ niꞌita miꞌi upu-upu to Kubábehi.

¹²Toꞌu ntepuꞌu laluitaNgkuꞌ deꞌe: tauna to mepoinálái i Kódóꞌ, peisáheꞌ mobábehi nodo to Kubábehi, ba melumbuꞌ riꞌi hangko i to Kubábehi,[113] láwiꞌ ina laoAꞌ toroꞌ hingkakani hai UmáNgkuꞌ.

¹³Hai apa peá to nipembiáꞌ i lalu hangaꞌKuꞌ, ina Kuweꞌikou bona UmáNgkuꞌ rapomahile ánti kaKódóꞌna.

¹⁴Apa peá to nipembiáꞌ i lalu hangaꞌKuꞌ, bateꞌna ina Kubábehi.”

¹⁵Iesu mopaliliu laluitana, Nauliꞌ, “Ane nipokaꞌahiꞌAꞌ, ina nipeuláꞌi hawaꞌKuꞌ.

¹⁶Hai ina Kupembiáꞌ i UmáNgkuꞌ, bona Naweꞌikou hadua Topetulungi to ntániꞌna, bona Ia mamporángákou oaꞌ duuꞌna i rue-ruena.

¹⁷Topetulungi iti, Ia miꞌi Inaona Pueꞌ Ala to ina moteteꞌkou i paturoꞌ to toꞌu. Tauna to tiꞌara mepoinálái, tiꞌaraheꞌ peisá motarima Inaona Pueꞌ Ala, láwiꞌ tiꞌaraheꞌ moisá hai mohádiá pokalena Inaona Pueꞌ Ala. Agáiáná kómu, niꞌisá miꞌi, láwiꞌ Naporángákou deꞌe-deꞌe, hai Ia ina ara oaꞌ i lalumi.

¹⁸I tempóNgkuꞌ pohuꞌ, tiꞌarakou ina Kupálehi nodo ánángkóiꞌ to ilu. Ina mesuleꞌ wopaꞌAꞌ mai i kómu moliu Inao to Magasaꞌ.

¹⁹Tiꞌara piꞌi marue, tiꞌaraPoꞌ ina raita tauna i duniáꞌ. Agáiáná kómu, ina niꞌitaꞌAꞌ, hai ánti katueꞌKuꞌ ina tueꞌkou woꞌo haweꞌ i rue-ruena.

²⁰Ane haweꞌ tempó iti, ina niꞌisá Kódóꞌ mohintuwuꞌ hai UmáNgkuꞌ, kómu ina mohintuwuꞌ hai Kódóꞌ, hai Kódóꞌ ina mohintuwuꞌ hai kómu.

²¹Tauna to motarima hai mampeuláꞌi hawaꞌKuꞌ, hira miꞌi to mampokaꞌahiꞌAꞌ. UmáNgkuꞌ ina mampokaꞌahiꞌ tauna to mampokaꞌahiꞌAꞌ, hai Kódóꞌ woꞌo ina mampokaꞌahiꞌheꞌ, hai ina Kupatongawaꞌáheꞌ kaheánáNgkuꞌ.”

²²Iudasiꞌ, tiꞌara Iudasiꞌ Isikarioꞌ, mekuneꞌ i Iesu, “Pueꞌ, noumbá haneꞌi ina Nupatongawaꞌ kaheánáMu i kaiꞌ peá, hai tiꞌara i upu-upu tauna to ara i duniáꞌ?”[114]

²³Nauliꞌ Iesu, “Tauna to mampokaꞌahiꞌAꞌ hai mampeuláꞌi laluitaNgkuꞌ, hira miꞌi to napokaꞌahiꞌ UmáNgkuꞌ. UmáNgkuꞌ hai Kódóꞌ ina maiaNgkaiꞌ i hira hai toroꞌ hingkakani hai hira.[115]

²⁴Tauna to tiꞌara mampokaꞌahiꞌAꞌ, tiꞌaraheꞌ mampeuláꞌi laluitaNgkuꞌ. Laluita to nihádi hangko i Kódóꞌ, katoꞌuána tiꞌara hangko i Kódóꞌ, ngkáliꞌna riꞌi hangko i UmáNgkuꞌ to mohuoꞌAꞌ mai.

²⁵Upu-upu deꞌe Kuhángáꞌáꞌákou i tempóNgkuꞌ mani ieneꞌ hingkakani hai kómu.

²⁶Agáiáná ane haweꞌ miꞌi Inao to Magasaꞌ, Ia ina mopaturoꞌákou upu-upuna, hai ina Napopambuhinaoákou upu-upu to Kuhángáꞌámokou, láwiꞌ Ia miꞌi Topetulungi to ina nahuoꞌ mai UmáNgkuꞌ mopaháwángiAꞌ.

²⁷Katinda lalu Kuwoliákou. Katinda lalu hangko i Kódóꞌ, iti miꞌi to Kuweꞌikou.[116] To Kuweꞌikou deꞌe, tiꞌara nodo to nilámbiꞌ hangko i duniáꞌ. Ineeꞌ karaoꞌ inaomi, hai ineeꞌkou malááꞌ.

²⁸Nihádi miꞌi laluitaNgkuꞌ ininá to manguliꞌ: ‘Ina pohuꞌAꞌ, agáiáná ina mesuleꞌ wopaꞌAꞌ mai i kómu.’ Ane kenipokaꞌahiꞌ ntepuꞌuAꞌ, kehangaa-ngaa góeꞌkou láwiꞌ ina mesuleꞌAꞌ lao i UmáNgkuꞌ, láwiꞌ melumbuꞌ peawaꞌna UmáNgkuꞌ i surugáꞌ hangko i Kódóꞌ deꞌe-deꞌe i duniáꞌ.

²⁹Kuhángáꞌámokou ami hangko tiꞌara mani mewaliꞌ, bona ane mewaliꞌ miꞌi, ina nipoinálái.

³⁰Tiꞌara piꞌi handaꞌ tempóNgkuꞌ molaluita hai kómu, láwiꞌ ina haweꞌ miꞌi Datu Tokadake. Ia miꞌi to mokuasaꞌi duniáꞌ deꞌe, kehapiꞌ tiꞌara ara kuasaꞌna i Kódóꞌ.

³¹Upu-upuna iti hangaa-ngaa mewaliꞌ, bona upu-upu tauna ina moisá kaKupokaꞌahiꞌna UmáNgkuꞌ hai kaKupeuláꞌina upu-upu to NahawaꞌáꞌAꞌ. Meángkáꞌmokou, pohuꞌmokeꞌ hangko ieneꞌ.”