Read Besoa Iohane 15 Bible Online

Iohane 15 - Besoa bible

Iohane 15

¹Tangaꞌraꞌ molumao, Iesu mopaliliu wopiꞌi laluitaNa, Nauliꞌ, “Kódóꞌ miꞌi deꞌe tóáꞌ anggoroꞌ to toꞌu, hai UmáNgkuꞌ topokádipurá anggoroꞌ.

²Upu-upu dáꞌáNgkuꞌ to tiꞌara mowuaꞌ, Nawehángi, hai upu-upu dáꞌáNgkuꞌ to mowuaꞌ, Nakadiri hai Nakádipurá bona tetámbái powuaꞌna.

³Kómu, magasaꞌmokou ánti pohádimi laluita to Kuhángáꞌáꞌámokou.

⁴Hangaa-ngaa mohintuwuꞌkou oaꞌ hai Kódóꞌ. Ane nibábehi noꞌonoꞌ, Kódóꞌ woꞌo ina mohintuwuꞌ hai kómu. Dáꞌá to tiꞌara mentakaꞌ i tóáꞌ anggoroꞌ, tiꞌara mowuaꞌ. Bateꞌna peá dáꞌá to mentakaꞌ i tóáꞌna to ina mowuaꞌ. Noꞌonoꞌ woꞌo kómu: tiꞌarakou peisá mowuaꞌ ane tiꞌarakou mohintuwuꞌ hai Kódóꞌ.

⁵Kódóꞌ miꞌi deꞌe tóáꞌ anggoroꞌ, hai kómu miꞌi dáꞌána. Heáná tauna to mohintuwuꞌ oaꞌ hai Kódóꞌ, hai Kódóꞌ woꞌo mohintuwuꞌ oaꞌ hai hira, ina handaꞌ powuaꞌraꞌ.[117] Agáiáná ane megáákikou hangko i Kódóꞌ, tiꞌarakou peisá mobábehi apa-apa.

⁶Heáná to tiꞌara mohintuwuꞌ hai Kódóꞌ, bateꞌraꞌ ratibe nodo karatibena dáꞌá to rawehángi duuꞌna mewaliꞌ bangi. Dáꞌána iti rarámpu haneꞌi ratibe i lalu api.[118]

⁷Ane mohintuwuꞌkou oaꞌ hai Kódóꞌ, hai laluitaNgkuꞌ nipailalu, peisá nipembiáꞌ i Pueꞌ Ala apa peundeꞌámi, hai bateꞌna ina Nabukeki.

⁸Ane handaꞌ powuaꞌmi, UmáNgkuꞌ rapomahile hai tongawaꞌ kómu topeguruNgkuꞌ mpuꞌukou.

⁹Kódóꞌ mampokaꞌahiꞌkou hibali hai kamaꞌahiꞌna UmáNgkuꞌ i Kódóꞌ. Hai hangaa-ngaa tueꞌkou oaꞌ i lalu kamaꞌahiꞌKuꞌ.

¹⁰Kupeuláꞌi hawaꞌna UmáNgkuꞌ hai tueꞌAꞌ i lalu kamaꞌahiꞌNa. Noꞌonoꞌ woꞌo, ane nipeuláꞌi hawaꞌKuꞌ, ina tueꞌkou woꞌo i lalu kamaꞌahiꞌKuꞌ.

¹¹Upu-upu deꞌe Kuhángáꞌáꞌákou, bona kagóeꞌKuꞌ ara i lalumi, hai ina bukeꞌ kagóeꞌmi.

¹²Deꞌe miꞌe hawaꞌKuꞌ: mombepokaꞌahiꞌmokou, nodo woꞌo Kódóꞌ mampokaꞌahiꞌkou.

¹³Tiꞌara ara ahiꞌ to melumbuꞌ kamahilena hangko i ahiꞌna hadua tauna to mohuhuꞌ tueꞌna bona mohómpóki rángána.

¹⁴RángáNgkuꞌ mpuꞌukou ane nibábehi apa to Kuhawaꞌákou.

¹⁵Tiꞌarapokou Kuꞌuliꞌ topobágóꞌKuꞌ, láwiꞌ hadua topobágóꞌ tiꞌara moisá apa to i lalu pekirina pueꞌna. Deꞌe-deꞌe, rángáNgkuꞌ mpuꞌumokou, láwiꞌ upu-upu to nahángáꞌáꞌáꞌAꞌ UmáNgkuꞌ Kupahaweꞌámokou.

¹⁶Tiꞌara kómu to mopileꞌiAꞌ, agáiáná Kódóꞌ riꞌi to mopileꞌikou, hai Kupakanótó miꞌi bona laokou mampopolumao bágóꞌKuꞌ; hai wuaꞌ pobágóꞌmi iti tiꞌara ina matántá, agáiáná ina mobunduꞌ duuꞌna i rue-ruena. Mewaliꞌ, apa to nipembiáꞌ i UmáNgkuꞌ i lalu hangaꞌKuꞌ, bateꞌna mpuꞌu ina Naweꞌikou.

¹⁷Hangkani mani Kuhángáꞌáꞌákou: hangaa-ngaa mombepokaꞌahiꞌkou!”

¹⁸Iesu mopaliliu wopiꞌi laluitaNa, Nauliꞌ, “Ane rakáhihiꞌkou tauna to tiꞌara mepoinálái i Kódóꞌ, hangaa-ngaa nibuhinao: Kódóꞌ miꞌi to ioru-oru rakáhihiꞌ.

¹⁹Ane rápáꞌna mamporángákou tauna to tiꞌara mepoinálái, bateꞌna rapokaꞌahiꞌkou, láwiꞌ rángáraꞌkou. Agáiáná Kupileꞌimokou hai Kupataniꞌmokou hangko i oloꞌraꞌ, bona tiꞌarapokou raporángá, onoꞌ miꞌi haneꞌi rakáhihiꞌkou.

²⁰Nibuhinao apa to Kuhángáꞌáꞌákou ininá: hadua topobágóꞌ tiꞌara melumbuꞌ karabiláꞌna hangko i pueꞌna. Kódóꞌ pueꞌmi rapopeahiahiꞌ, pelumbuꞌna mani kómu. Ane araheꞌ tauna to mampeuláꞌi laluitaNgkuꞌ, bateꞌraꞌ mampeuláꞌi woꞌo laluitami.

²¹Upu-upu iti ina rabábehi i kómu ánti peuláꞌmi i Kódóꞌ láwiꞌ tiꞌaraheꞌ moisá Pueꞌ Ala to mohuoꞌAꞌ mai.

²²Ane ketiꞌaraꞌAꞌ mai hai mopaturoꞌheꞌ, ketiꞌaraheꞌ woꞌo masalaꞌ ánti karasápuákaNgkuꞌ. Agáiáná, láwiꞌ mai mpuꞌuMoꞌ hai mopaturoꞌheꞌ, onoꞌ miꞌi haneꞌi tiꞌara piꞌi ara rárá manguliꞌ katiꞌáráraꞌ masalaꞌ.

²³Tauna to mokáhihiꞌAꞌ, hibali peá mokáhihiꞌheꞌ woꞌo UmáNgkuꞌ.

²⁴I oloꞌraꞌ tauna to handaꞌ, Kubábehi tandaꞌ kuasaꞌ to tiꞌara mani rabábehi tauna ntániꞌna. Ane ketiꞌara Kubábehi noꞌonoꞌ, ketiꞌaraheꞌ masalaꞌ ánti karasápuákaNgkuꞌ. Agáiáná i karaitána apa to Kubábehi, rakáhihiꞌAꞌ oaꞌ, lempóna, UmáNgkuꞌ woꞌo rakáhihiꞌ.

²⁵Agáiáná bateꞌna noꞌonoꞌ, bona tebukeki apa to teukiꞌ i lalu Sura Áturáraꞌ to manguliꞌ: ‘Kehapiꞌ tiꞌara ara salaꞌKuꞌ, bateꞌna rakáhihiꞌAꞌ.’[119]

²⁶Inao to Magasaꞌ ina mai, lempóna: Inao to hangko i Pueꞌ Ala ina moteteꞌkou bona niꞌisá paturoꞌ to toꞌu. Ia miꞌi Topetulungi to ina Kuhuoꞌ mai i kómu to hangko i UmáNgkuꞌ. Ane haweꞌ mai, Ia miꞌi to ina mopakanótó kaheánáNgkuꞌ.

²⁷Hai kómu woꞌo hangaa-ngaa mopakanótó kaheánáNgkuꞌ, láwiꞌ kómu miꞌi to hingkakani hai Kódóꞌ hangko i rungu-runguna pobágóꞌKuꞌ i duniáꞌ deꞌe.”