Read Besoa Iohane 16 Bible Online

Iohane 16 - Besoa bible

Iohane 16

¹Iesu mopaliliu wopiꞌi laluitaNa, Nauliꞌ, “Upu-upu deꞌe Kuhángáꞌáꞌákou, bona tiꞌarakou ina mokábáhá pepoináláimi i Kódóꞌ.

²Tiꞌarakou ina rapaliu menómbá i támbi penómbáꞌá. Hai tiꞌara iti peá, agáiáná ina haweꞌ tempóna tauna ina mopapatekou, hai ina rapekiri onoꞌ riꞌi peundeꞌána Pueꞌ Ala.[120]

³Upu-upu iti ina rabábehi i kómu láwiꞌ tiꞌaraheꞌ moisá UmáNgkuꞌ, tiꞌaraheꞌ woꞌo moisá kaheánáNgkuꞌ.

⁴Upu-upu deꞌe Kuhángáꞌáꞌákou, bona i tempóna mewaliꞌ, ina nibuhinao apa to Kuhángáꞌámokou ami.” Iesu mopaliliu wopiꞌi laluitaNa, Nauliꞌ, “Upu-upu paturoꞌ deꞌe tiꞌarakou Kuhángáꞌá hangko i rungu-runguna, láwiꞌ ara maniAꞌ hingkakani hai kómu.

⁵Agáiáná deꞌe-deꞌe, ina laoAꞌ i UmáNgkuꞌ to mohuoꞌAꞌ mai, agáiáná tiꞌara haweꞌ hadua hangko i oloꞌmi to mekuneꞌ i Kódóꞌ ba iumbá kalaoáNgkuꞌ.

⁶Masusa lalumi i kamohádimi laluitaNgkuꞌ ininá to manguliꞌ kaꞌina pohuꞌKuꞌ,

⁷agáiáná katoꞌuána, ina molámbiꞌkou rasiꞌ ane pohuꞌAꞌ, láwiꞌ ane tiꞌaraꞌAꞌ pohuꞌ, tiꞌara ina haweꞌ Topetulungi, ia miꞌi Inao to Magasaꞌ. Agáiáná ane pohuꞌAꞌ, Ia ina Kuhuoꞌ mai i kómu.

⁸Ane haweꞌ miꞌi Inao to Magasaꞌ iti, Ia to ina mopakanótó i tauna kamadósáraꞌ láwiꞌ Ia ina mopatongawaꞌ woꞌo kamanótóNgkuꞌ hai mopakanótó pehukuna Pueꞌ Ala.

⁹Ia ina mopakanótó kamadósáraꞌ tauna, hai dósá to melumbuꞌ kamahilena ia miꞌi ane tauna mosápuáka kaKódóꞌna miꞌi Datu Topehómpóꞌ.

¹⁰Ina laoAꞌ i UmáNgkuꞌ, hai tiꞌaraPoꞌ ina niꞌita. PesuleꞌKuꞌ i surugáꞌ ina mopatongawaꞌ kamanótóNgkuꞌ.

¹¹Hai bateꞌna Inao to Magasaꞌ ina mopakanótó woꞌo kanahukuraꞌ Pueꞌ Ala tauna to madósá, láwiꞌ tepakanótó miꞌi Datu Tokadake to mokuasaꞌi duniáꞌ deꞌe ina Nahuku.

¹²Handaꞌ mani to Kupoinao Kuhángáꞌáꞌákou, agáiáná deꞌe-deꞌe tiꞌara mani nibuku motarima upu-upuna iti.

¹³Ane haweꞌ miꞌi Inao to Magasaꞌ, Ia miꞌi to ina moteteꞌkou hai mampopaisáꞌákou upu-upu paturoꞌ to toꞌu. Ia tiꞌara ina molaluita mouláꞌ pekiriNa haduduáNa. Apa to Nahádi hangko i UmáNgkuꞌ, iti miꞌi to ina Napahaweꞌákou. Hai Ia ina mopahaweꞌákou apa to ina mewaliꞌ i alo to ina haweꞌ.

¹⁴Ia ina mampomahileAꞌ moliu popahaweꞌNa laluita to Natarima hangko i Kódóꞌ.

¹⁵Upu-upu to ara i UmáNgkuꞌ, ara woꞌo i Kódóꞌ, onoꞌ miꞌi haneꞌi Kuꞌuliꞌ: apa to natarima Inao to Magasaꞌ hangko i Kódóꞌ, iti miꞌi woꞌo to ina Napahaweꞌákou.”

¹⁶Nauliꞌ wopiꞌi Iesu, “Tiꞌara piꞌi marue, tiꞌaraPoꞌ ina niꞌita, agáiáná tiꞌara marue hangko ionoꞌ, ina niꞌita wopaꞌAꞌ.”

¹⁷Wuliheꞌ topeguruNa, hai araheꞌ to mombekuneꞌ-kuneꞌ, rauliꞌ, “Apa tunggáiáNa haneꞌi Nahángáꞌáꞌákeꞌ: ‘Tiꞌara piꞌi marue, tiꞌaraPoꞌ ina niꞌita, hai tiꞌara piꞌi woꞌo marue, ina niꞌita wopaꞌAꞌ’? Hai apa wopiꞌi tunggáiáNa haneꞌi Nauliꞌ, ‘LaoAꞌ i UmáNgkuꞌ’?”

¹⁸Mombekuneꞌ-kuneꞌheꞌ oaꞌ, rauliꞌ, “Moapa riꞌi haneꞌi Nauliꞌ, ‘Tiꞌara piꞌi marue’? Tiꞌara taisá lempóna.”

¹⁹Naisá Iesu karapoinaona mekuneꞌ i Hia, onoꞌ miꞌi haneꞌi Nahángáꞌáheꞌ, “Ba mampopombekuneꞌ-kuneꞌkou apa lempóna laluitaNgkuꞌ ininá to manguliꞌ: ‘Tiꞌara piꞌi marue, tiꞌaraPoꞌ ina niꞌita, agáiáná tiꞌara marue hangko ionoꞌ, ina niꞌita wopaꞌAꞌ’?

²⁰Toꞌu ntepuꞌu laluitaNgkuꞌ deꞌe: ina teriaꞌkou, agáiáná tauna to tiꞌara mepoinálái i Kódóꞌ, ina góeꞌ ntepuꞌuheꞌ. Ina masusa lalumi, agáiáná kamasusami iti ina tebáliki mewaliꞌ kagóeꞌmi.

²¹Kagóeꞌmi iti, ina nodo kagóeꞌna hadua towawine ane roo miꞌi moánáꞌ. Rungu-runguna mantódihá humádi, agáiáná ane mesupaꞌ miꞌi ánáꞌna, towawine iti tiꞌara piꞌi mambuhinao pantódihána. Góeꞌ miꞌi láwiꞌ mesupaꞌ miꞌi ánáꞌna i duniáꞌ.

²²Noꞌonoꞌ woꞌo kómu: deꞌe-deꞌe masusa lalumi {láwiꞌ Kuꞌuliꞌ ina pohuꞌMoꞌ}. Agáiáná ina Kupohidupaꞌá wopakou. I tempó iti, ina góeꞌkou huleꞌ, hai tiꞌara ara to peisá moala kagóeꞌmi iti hangko i kómu.

²³I tempó iti, tiꞌara piꞌi paraluu nipekuneꞌ ba apa-apa i Kódóꞌ. Peisámokou mekuneꞌ haduduámi i UmáNgkuꞌ. Noꞌonoꞌ woꞌo ane membiáꞌkou, peisámokou woꞌo haduduámi membiáꞌ i UmáNgkuꞌ i lalu hangaꞌKuꞌ, hai bateꞌna ina Nabukeki pembiáꞌmi iti.

²⁴Duuꞌna deꞌe-deꞌe, tiꞌara manikou membiáꞌ apa-apa i lalu hangaꞌKuꞌ. Hangaa-ngaa nipembiáꞌ oaꞌ, hai ina nitarima bona góeꞌ ntepuꞌukou.”

²⁵Iesu mopaliliu wopiꞌi laluitaNa, Nauliꞌ, “Upu-upu deꞌe Kuhángáꞌáꞌámokou moliu pándiriꞌ. Agáiáná ina haweꞌ tempóna, tiꞌara piꞌi Kupakeꞌ pándiriꞌ. Ina Kupolaluitaꞌákou kana i UmáNgkuꞌ i kanótó-nótóána.

²⁶I tempó iti, ina membiáꞌkou i UmáNgkuꞌ i lalu hangaꞌKuꞌ. Tiꞌara piꞌi paraluu Kupembiáꞌákou apa to niparaluu i UmáNgkuꞌ,

²⁷láwiꞌ UmáNgkuꞌ haduduáNa to mampokaꞌahiꞌkou. Ia mampokaꞌahiꞌkou, láwiꞌ nipokaꞌahiꞌAꞌ, hai nipoinálái kaKódóꞌNa miꞌi to hangko i Pueꞌ Ala.

²⁸KahaweꞌKuꞌ i duniáꞌ deꞌe, maiAꞌ hangko i UmáNgkuꞌ. Deꞌe-deꞌe, ina Kupálehi duniáꞌ deꞌe, hai mesuleꞌAꞌ lao i UmáNgkuꞌ.”

²⁹Rauliꞌ topeguruNa, “Pueꞌ, deꞌe-deꞌe manótó miꞌi laluitaMu, láwiꞌ tiꞌaraKoꞌ mopakeꞌ pándiriꞌ.

³⁰Manótó miꞌi i kaiꞌ: Io to moisá upu-upuna. Tiꞌara ara to paraluu kipekuneꞌ i Hio. Deꞌe-deꞌe, kipoinálái miꞌi kahangko i Pueꞌ AlaMu.”

³¹Nauliꞌ Iesu, “Toꞌu paꞌi kanipoináláina?

³²Nipehádingi! Ina haweꞌ tempóna hai katoꞌuána tempó iti haweꞌ miꞌi, ina melangkakou hadua-hadua lao i támbimi, hai ina nipálehiAꞌ.[121] Agáiáná i tempó iti, tiꞌaraꞌAꞌ haduduáNgkuꞌ, láwiꞌ UmáNgkuꞌ ina mamporángáꞌAꞌ.

³³Upu-upu deꞌe Kuhángáꞌámokou bona molámbiꞌkou katinda lalu hangko i pohintuwuꞌmi hai Kódóꞌ. Tangaꞌmi mani i duniáꞌ deꞌe, bateꞌna rapopeahiahiꞌkou. Agáiáná nipakaróhó lalumi, láwiꞌ Kunangi miꞌi kuasaꞌ to kadake to ara i lalu duniáꞌ deꞌe.”