Read Besoa Iohane 17 Bible Online

Iohane 17 - Besoa bible

Iohane 17

¹Karoona Iesu mopahaweꞌ upu-upuna iti, Ia mengoaꞌ i langiꞌ mekakae, Nauliꞌ, “UmáNgkuꞌ, haweꞌ miꞌi tempóna! NupomahileMoꞌ ÁnáꞌMu, bona Kódóꞌ woꞌo mampomahileKoꞌ Umaꞌ.

²NuweꞌiMoꞌ kuasaꞌ motadulakoi upu-upu tauna, bona tauna to NuweꞌiMoꞌ iti, ina Kuweꞌiheꞌ woꞌo katueꞌ to maroꞌa to tiꞌara mokahópóꞌá.

³To Kutunggái hai laluita ‘katueꞌ to maroꞌa to tiꞌara mokahópóꞌá’ ia miꞌi: raisá kaꞌIona peá Pueꞌ Ala to toꞌu, hai raisá woꞌo kaKódóꞌna Iesu Kerisitu to Nuhuoꞌ mai.

⁴Umaꞌ, i lalu duniáꞌ deꞌe Kupatongawaꞌámoheꞌ peawaꞌMu moliu kaKuparoona miꞌi bágóꞌ to NuweꞌiAꞌ.

⁵Onoꞌ miꞌi haneꞌi Kupembiáꞌ bona NupopeawaꞌAꞌ huleꞌ, nodo peawaꞌKuꞌ tempóNgkuꞌ hingkakani hai Io hangko tiꞌara mani rapopewaliꞌ duniáꞌ deꞌe.

⁶Umaꞌ, Kupopaisáꞌámoheꞌ kaheánáMu i tauna to NuweꞌiMoꞌ hangko i oloꞌraꞌ tauna to i duniáꞌ deꞌe. Hira iti taunáMumoheꞌ to NuweꞌiAꞌ bona Kukádipuráheꞌ, hai mampeuláꞌimoheꞌ ngkóráꞌMu.

⁷Deꞌe-deꞌe raisá miꞌi upu-upu to NuweꞌiAꞌ mentóáꞌ hangko i Hio.

⁸Kupahaweꞌámoheꞌ upu-upu laluita to NupahaweꞌáꞌAꞌ. Laluita iti ratarima miꞌi, hai deꞌe-deꞌe raisá miꞌi kaKódóꞌna to hangko i Hio Umaꞌ. Rapoinálái miꞌi kaꞌIona to mohuoꞌAꞌ mai.

⁹Kupekakaeáheꞌ topeguruNgkuꞌ iti. Tiꞌaraheꞌ Kupekakaeá upu-upu tauna i duniáꞌ, bateꞌna peá tauna to NuweꞌiMoꞌ, láwiꞌ hira miꞌi taunáMu.

¹⁰Upu-upu tauna to mewaliꞌ taunáNgkuꞌ, taunáMumoheꞌ woꞌo. Hai upu-upu tauna to mewaliꞌ taunáMu, taunáNgkuꞌmoheꞌ woꞌo. Hai peawaꞌKuꞌ tongawaꞌ moliu taunáNgkuꞌheꞌ deꞌe.

¹¹Ina laoAꞌ i Hio Umaꞌ, tiꞌaraPoꞌ marue i duniáꞌ deꞌe. Agáiáná topeguruNgkuꞌheꞌ deꞌe ara maniheꞌ oaꞌ i duniáꞌ. Ó UmáNgkuꞌ to magasaꞌ, Kupembiáꞌ bona Nukámpáiheꞌ hai kuasaꞌna hangaꞌMu to NuweꞌiMoꞌ. Nukádipuráheꞌ bona hampepekiriheꞌ oaꞌ, nodo Io hai Kódóꞌ hampepekiriKeꞌ.

¹²TempóNgkuꞌ hingkakani hai hira, Kódóꞌ miꞌi to mokámpáiheꞌ hai kuasaꞌMu to NuweꞌiAꞌ. Kukámpáimoheꞌ bona tiꞌaraheꞌ ara to tegááki hangko i Kódóꞌ. Bateꞌna peá hadua to tegááki, ia miꞌi to ina molámbiꞌ pehuku to rumihi bona tebukeki apa to teukiꞌ i lalu Sura Magasaꞌ.[122]

¹³Deꞌe-deꞌe, ina laoAꞌ i Hio. Upu-upuna iti Kuhángáꞌámoheꞌ i tempóNgkuꞌ mani hingkakani hai hira i duniáꞌ deꞌe, bona ina bukeꞌ kagóeꞌraꞌ to ralámbiꞌ hangko i Kódóꞌ.

¹⁴Kupahaweꞌámoheꞌ laluitaMu, áláraꞌ tauna i duniáꞌ mokáhihiꞌheꞌ, láwiꞌ pekiriraꞌ topeguruNgkuꞌ deꞌe tiꞌara piꞌi hibali hai pekiriraꞌ tauna to i duniáꞌ. Noꞌonoꞌ woꞌo Kódóꞌ, tiꞌaraꞌAꞌ mouláꞌ pekiriraꞌ tauna to i duniáꞌ deꞌe to tiꞌara mepoinálái.

¹⁵Tiꞌara Kupembiáꞌ bona Nualaheꞌ topeguruNgkuꞌ hangko i duniáꞌ deꞌe, ngkáliꞌna riꞌi Kupembiáꞌ bona Nukámpáiheꞌ hangko i Datu Tokadake.[123]

¹⁶Kódóꞌ tiꞌaraꞌAꞌ mouláꞌ pekiriraꞌ tauna i duniáꞌ, noꞌonoꞌ woꞌo topeguruNgkuꞌ tiꞌaraheꞌ mouláꞌ pekiriraꞌ.

¹⁷Kupembiáꞌ bona Nupamagasaꞌheꞌ, hai Nupopewaliꞌheꞌ taunáMu moliu paturoꞌMu to toꞌu. NgkóráꞌMu, iti miꞌi to toꞌu.

¹⁸Umaꞌ, NuhuoꞌMoꞌ mai i duniáꞌ, noꞌonoꞌ woꞌo Kódóꞌ mohuoꞌheꞌ lao i tauna ntániꞌna to ara i duniáꞌ.

¹⁹Umaꞌ, Kuhuhuꞌ katueꞌKuꞌ i Hio mewaliꞌ gáláꞌMu, bona hira woꞌo mewaliꞌ gáláꞌMu.[124]

²⁰Umaꞌ, tiꞌara peá topeguruNgkuꞌ iti to Kupekakaeá. Kupekakaeáheꞌ woꞌo tauna to ina mepoinálái i Kódóꞌ ánti pobámbáriraꞌ ngkóráꞌMu topeguruNgkuꞌ.

²¹Kupembiáꞌ bona hira upu-upu hampepekiri, hibali hai Io mohintuwuꞌ hai Kódóꞌ, hai Kódóꞌ mohintuwuꞌ hai Io. Kupembiáꞌ bona hira woꞌo mohintuwuꞌ hai Kitaꞌ bona upu-upu tauna i duniáꞌ ina mampoinálái kaꞌIona to mohuoꞌAꞌ mai.

²²Kupatongawaꞌámoheꞌ peawaꞌ to NuweꞌiAꞌ, bona ina raisá hampepekiri, nodo woꞌo Kitaꞌ hampepekiriKeꞌ.

²³Kódóꞌ mohintuwuꞌ hai hira, hai Io woꞌo mohintuwuꞌ hai Kódóꞌ. Kuhárungá hira ina mewaliꞌ mpuꞌuheꞌ hampepekiri. Ane noꞌonoꞌi, upu-upu tauna ina moisá kaNuhuoꞌKuꞌ mai hai kaNupokaꞌahiꞌraꞌ tauna to mepoinálái i Kódóꞌ. AhiꞌMu i hira hibali hai ahiꞌMu i Kódóꞌ.

²⁴PeundeꞌáNgkuꞌ bona hira to NuweꞌiAꞌ ina toroꞌheꞌ hingkakani hai Kódóꞌ i katoroꞌáNgkuꞌ, bona moitaheꞌ peawaꞌKuꞌ. PeawaꞌKuꞌ iti NuweꞌiMoꞌ hangko tiꞌara mani duniáꞌ deꞌe rapopewaliꞌ, láwiꞌ NupokaꞌahiꞌAꞌ.

²⁵Ó UmáNgkuꞌ, Io miꞌi to bukeꞌ timbá. Tauna i duniáꞌ deꞌe to tiꞌara mepoinálái i Hio, tiꞌaraheꞌ moisá kaheánáMu. Agáiáná Kódóꞌ, KuisáKoꞌ. Hai upu-upu tauna to mepoinálái i Kódóꞌ moisá kaꞌIona miꞌi to mohuoꞌAꞌ mai.

²⁶Kupopaisáꞌámoheꞌ kaheánáMu, hai bateꞌna ina Kupahaweꞌáheꞌ oaꞌ kaheánáMu, bona hira mampokaꞌahiꞌheꞌ hángká rángáraꞌ nodo kaNupokaꞌahiꞌKuꞌ, hai bona Kódóꞌ ina araꞌAꞌ oaꞌ hingkakani hai hira.”