Read Besoa Iohane 18 Bible Online

Iohane 18 - Besoa bible

Iohane 18

¹Karoona Iesu mekakae, Ia pohuꞌ hingkakani hai topeguruNaheꞌ lao i rawa kótá. Mengkalimbamoheꞌ i lokeꞌ Kidero, laoheꞌ i hinoe kau saitu to tándáꞌ i hambali.

²Iudasiꞌ to mampobaluꞌ Iesu, moisá woꞌo hinoe iti, láwiꞌ Iesu hai topegurunaheꞌ madáháꞌ hirámpu ionoꞌ.

³Mewaliꞌ lao miꞌi Iudasiꞌ i hinoe iti moántiheꞌ rómbóngá surudadoꞌ toRoma[125] hai topokámpái Támbina Pueꞌ Ala to rahuoꞌheꞌ kapalaꞌ-kapalaꞌ tadulako menómbá hai toParisi lao mohakaꞌ Iesu. Moántiheꞌ párewá pombeala, huluꞌ hai lanterá.

⁴Naisá miꞌi Iesu upu-upu to ina mewaliꞌ i wátáNa, onoꞌ haneꞌi melingkaꞌ miꞌi mampohidupaꞌáheꞌ tauna iti, Nakuneꞌheꞌ, “Heáná to nipeliꞌ?”

⁵Rauliꞌ, “Iesu toNasare.” Nauliꞌ Iesu, “Kódóꞌ miꞌi deꞌe.”[126] Iudasiꞌ to mampobaluꞌ Iesu i ewáliNa, meángkáꞌ ionoꞌ hingkakani hai hira.

⁶I kanahángáꞌáꞌáraꞌ Iesu “Kódóꞌ miꞌi deꞌe,” mosuliꞌheꞌ hai madungkáheꞌ i tampoꞌ.

⁷Napekuneꞌ wopiꞌi Iesu, “Heáná to nipeliꞌ?” Rauliꞌ, “Iesu toNasare.”

⁸Nauliꞌ Iesu, “Kuꞌuliꞌ miꞌi ininá, Kódóꞌ miꞌi deꞌe. Ane Kódóꞌ peá to nipeliꞌ, nipatodáhimoheꞌ rángáNgkuꞌ deꞌe pohuꞌ.”

⁹Nauliꞌ noꞌonoꞌ bona tebukeki miꞌi apa to Nauliꞌ i lalu pekakaeNa ininá, “Hangko i upu-upu tauna to NuweꞌiMoꞌ, tiꞌara ara hadua to ina tegááki hangko i Kódóꞌ.”

¹⁰Hangko ionoꞌ, Simoꞌ Peturuꞌ mobutuꞌ pihoꞌna motárási hadua hawiꞌna Tadulako Menómbá Mahile, agáiáná kana peá talinga kuánána hai mawehángi. Hangaꞌna hawiꞌ iti, Málákusi.

¹¹Nauliꞌ Iesu i Peturuꞌ, “Pusaꞌ huleꞌ pihoꞌmu! Ba nupekiri tiꞌara Kuparaluu mantódihá kapári to napakanótóáMoꞌ UmáNgkuꞌ?”[127]

¹²Hangko ionoꞌ, surudadoꞌ toRoma hai tadulakoraꞌ, hai tauna to rahuoꞌ tadulako-tadulako toIahudiꞌ, mohakaꞌ Iesu. Ia ratimpuku

¹³hai raꞌánti lao i támbina Tadulako Menómbá Mahile. Rungu-runguna raꞌánti lao i Hanasa, pengántiꞌina Kaiapa. Kaiapa ia miꞌi Tadulako Menómbá Mahile i tempó iti.

¹⁴Ia iti to mohángáꞌáheꞌ tadulakoraꞌ toIahudiꞌ, “Rángina miꞌi hadua tauna mate, mosulewátái upu-upu tauna.”[128]

¹⁵Simoꞌ Peturuꞌ hai hadua topeguruna Iesu to ntániꞌna meuláꞌbókóꞌheꞌ i Iesu. TopeguruNa to ntániꞌna iti mokaisánga Tadulako Menómbá Mahile, mewaliꞌ ia rapaliu mesuaꞌ i tangabaa támbina Tadulako Menómbá Mahile iti,

¹⁶agáiáná Peturuꞌ mepegiá peá i rawa babaꞌá. Hangko ionoꞌ, topeguruna Iesu to hadua iti lao huleꞌ i rawa molaluita hai towawine to mokámpái babaꞌá, onoꞌ miꞌi haneꞌi Peturuꞌ woꞌo rapaliu mesuaꞌ.

¹⁷Towawine topokámpái babaꞌ iti mekuneꞌ i Peturuꞌ, “Tiꞌara paꞌi io woꞌo hadua topeguruNa tauna doꞌo?” Nauliꞌ Peturuꞌ, “Tiꞌara!”

¹⁸Tempó iti tempó lengiꞌ, mewaliꞌ bahangapa hawiꞌ hai topekámpái mopatueꞌmoheꞌ api i tangabaa, hai meángkáꞌheꞌ motolelingi api rapenenei. Peturuꞌ woꞌo lao meángkáꞌ hai menene hingkakani hai hira.

¹⁹I lalu támbi iti, Tadulako Menómbá Mahile[129] mekuneꞌ miꞌi i Iesu, nauliꞌ, “Heánáheꞌ iti topeguruMu? Apa to Nupaturoꞌáheꞌ tauna to handaꞌ?”

²⁰Nauliꞌ Iesu, “MolaluitaꞌAꞌ i katoꞌu-toꞌuána i upu-upu tauna. MepaturoꞌAꞌ oaꞌ i handaꞌ támbi penómbáꞌá hai i Támbina Pueꞌ Ala, to paka rakahiruhui toIahudiꞌ. Tiꞌara ara to Kuwuniángi.

²¹Mewaliꞌ, moapa riꞌi haneꞌi nupekuneꞌ i Kódóꞌ? Nupekuneꞌ i tauna to mohádi paturoꞌKuꞌ. Hangaa-ngaa raisá ntepuꞌu apa to Kuꞌuliꞌ.”

²²Kanauliꞌna peá Iesu noꞌonoꞌ, hadua topekámpái to meángkáꞌ i hintáiꞌNa motampedaꞌ lindoꞌNa, nauliꞌ, “Pebáiꞌ mpuꞌuKoꞌ molaluita noꞌonoꞌ i Tadulako Menómbá Mahile!”

²³Nauliꞌ Iesu, “Ane tiꞌara hintotoꞌ to Kuꞌuliꞌ, nupatongawaꞌ apa salaꞌKuꞌ. Agáiáná ane toꞌu laluitaNgkuꞌ, moapa riꞌi haneꞌiAꞌ nutampedaꞌ?”

²⁴Hangko ionoꞌ, Hanasa mohuoꞌmoheꞌ topekámpái moánti Iesu lao i Tadulako Menómbá Mahile Kaiapa. Tempó iti, taena Iesu tetimpuku mani.[130]

²⁵Simoꞌ Peturuꞌ meángkáꞌ menene hingkakani hai topekámpái. Araheꞌ tauna to mekuneꞌ, “Tiꞌara paꞌi io woꞌo hadua topeguruNa?” Mesápuáka miꞌi Peturuꞌ, nauliꞌ, “Tiꞌara wongkódóꞌá kódóꞌ!”

²⁶Ara woꞌo ionoꞌ hadua hawiꞌna Tadulako Menómbá Mahile. Hawiꞌ iti halaluna tauna to natárási Peturuꞌ talingana. Nauliꞌ hawiꞌ iti i Peturuꞌ, “Tiꞌara paꞌi io to kuita ininá i hinoe iti hingkakani hai Iesu?”

²⁷Mesápuáka wopiꞌi Peturuꞌ, nauliꞌ, “Tiꞌara!” I tempó iti woꞌo, motuturuꞌuá miꞌi manuꞌ.

²⁸Hungkuꞌ mabaa, Iesu raꞌánti hangko i támbina Kaiapa lao i támbina mágáuꞌ. Tadulako toIahudiꞌ, tiꞌaraheꞌ mesuaꞌ i lalu támbina mágáuꞌ. Malááꞌheꞌ tiꞌarapoheꞌ magasaꞌ mouláꞌ áturá ágámáraꞌ, láwiꞌ mágáuꞌ iti tiꞌara toIahudiꞌ, hai ane mesuaꞌheꞌ i lalu támbina, tiꞌaraheꞌ ina peisá moandeꞌ pandeꞌ Posusa Paska.

²⁹Mewaliꞌ Mágáuꞌ Pilatu lao miꞌi i rawa mampohidupaꞌáheꞌ hai nakuneꞌheꞌ, “Apa to nisalaꞌiá tauna deꞌe?”

³⁰Agáiáná rauliꞌ peá, “Ane ketiꞌarai tauna deꞌe to kadake, ketiꞌara ina kiánti mai i hio mágáuꞌ.”

³¹Nauliꞌ Pilatu, “Niánti miꞌi hai nipakanótó hukuNa mouláꞌ ádá ágámámi haduduámi!” Rauliꞌ tadulakoraꞌ toIahudiꞌ, “Kiundeꞌ bona tauna deꞌe rahuku mate, agáiáná kaiꞌ toIahudiꞌ, tiꞌaraꞌangkaiꞌ rapaliu toRoma mohuku mate tauna.”

³²Iti mewaliꞌ bona tebukeki apa to nauliꞌ Iesu kana i rárá kamateNa.[131]

³³Hangko ionoꞌ, Pilatu mesuaꞌ huleꞌ i lalu támbina, hai nahuoꞌmoheꞌ taunána moánti Iesu i lindoꞌna, haneꞌi nakuneꞌ, “Ba Io mpuꞌui daturaꞌ toIahudiꞌ?”

³⁴Nauliꞌ Iesu, “Ba pekuneꞌmu iti hangko i hio haduduámu, ba nuhádiꞌi i tauna ntániꞌna kaKódóꞌna Datu?”

³⁵Nauliꞌ Pilatu, “Kódóꞌ tiꞌaraꞌaꞌ toIahudiꞌ! Hangka toIahudiꞌMu hai kapalaꞌ-kapalaꞌ tadulako menómbá to moántiKoꞌ mai i kódóꞌ to manguliꞌ noꞌonoꞌ. Salaꞌ apa riꞌi to Nubábehi?”

³⁶Nahániki Iesu, “Kódóꞌ, tiꞌaraꞌAꞌ nodo datu to mepárentá i duniáꞌ deꞌe. Ane kenodoAꞌ datu i duniáꞌ deꞌe, tauna to meuláꞌ i Kódóꞌ bateꞌna ina meꞌewaꞌheꞌ bona ineeꞌAꞌ rahakaꞌ hai rahuhuꞌ i tadulakoraꞌ toIahudiꞌ. Agáiáná tiꞌaraꞌAꞌ datu to hangko i duniáꞌ deꞌe.”

³⁷Nauliꞌ wopiꞌi Pilatu, “Ane noꞌonoꞌi, toꞌu mpuꞌu paꞌi kaꞌIona datu?” Nauliꞌ Iesu, “Toꞌu mpuꞌu kanuꞌuliꞌna, Kódóꞌ deꞌe datu. Onoꞌ haneꞌi rapoánákaꞌAꞌ i duniáꞌ deꞌe, bona Kupahaweꞌ apa to toꞌu. Tauna to moundeꞌ mampeuláꞌi apa to toꞌu, mampehádingiheꞌ laluitaNgkuꞌ.”

³⁸Nauliꞌ Pilatu, “Apa riꞌi lempóna ‘apa to toꞌu’ iti?” Roo onoꞌ, lao wopiꞌi Pilatu i rawa mopahaweꞌ i tadulakoraꞌ toIahudiꞌ, “Haweꞌ hampákáꞌ salaꞌNa, tiꞌara kulámbiꞌ.

³⁹Agáiáná biásána, pare-parena i Alo Mahile Posusa Paska, kukábáháꞌákou hadua toratarungku, hiolaꞌ hai peundeꞌámi. Mewaliꞌ, noumbá? Ba niundeꞌ ane kukábáháꞌákou daturaꞌ toIahudiꞌ deꞌe?”

⁴⁰Monganga-ngangamoheꞌ, rauliꞌ, “Ineeꞌ, ineeꞌ Ia! Baraba riꞌi!” Baraba[132] iti, hadua toperámpáki.