Read Besoa Iohane 19 Bible Online

Iohane 19 - Besoa bible

Iohane 19

¹Roo onoꞌ, Pilatu mohuoꞌmoheꞌ surudadoꞌna bona lao moala Iesu haneꞌi rahepe hai gulaꞌ.

²Surudadoꞌ iti mopakóiꞌ Iesu, mobábehiheꞌ hambuaꞌ tatali hangko i dui, lenggeꞌna nodo tatali datu, haneꞌi ratataliá Iesu. Roo onoꞌ, Ia rabadui hai kumbá to makámumu nodo kumbá datu.

³Motóngkóꞌheꞌ i lindoꞌNa, rahángáꞌá, “KibiláꞌKoꞌ, daturaꞌ toIahudiꞌ!” Roo onoꞌ, ratampedaꞌ lindoꞌNa.

⁴Hangko ionoꞌ, mesuwuꞌ wopiꞌi Pilatu lao i rawa, Nahángáꞌáheꞌ toIahudiꞌ, “Peita, kuánti miꞌi mai i kómu, bona niꞌisá katiꞌárána mpiiꞌ ara salaꞌNa haweꞌ hampákáꞌ.”

⁵Hangko ionoꞌ, raꞌánti miꞌi Iesu lao i rawa, metatali dui hai mekumbá, kumbá to makámumu nodo kumbána datu. Nauliꞌ Pilatu, “Nipeita woia tauna deꞌe!”

⁶I tempóraꞌ kapalaꞌ-kapalaꞌ tadulako menómbá hai topekámpái moita Iesu, monganga-ngangamoheꞌ, rauliꞌ, “Pakuꞌmode! Pakuꞌmode!” Nauliꞌ Pilatu, “Ane nipoinao mopakuꞌ i kau mombehape, niala miꞌi. Kómu riꞌi to hangaa-ngaa mopakuꞌ i kau, láwiꞌ tiꞌara kulámbiꞌ salaꞌNa.”

⁷Rauliꞌ toIahudiꞌ, “Mouláꞌ áturána ágámángkiꞌ, Ia hangaa-ngaa rahuku mate, láwiꞌ Nauliꞌ kaꞌIana Ánáꞌna Pueꞌ Ala.”

⁸Kanahádina Pilatu apa to rauliꞌ iti, tetámbái miꞌi kamalááꞌna.

⁹Ia mesuaꞌ huleꞌ i lalu támbina, hai mekuneꞌ wopiꞌi i Iesu, “Katoꞌuána, hangko iumbáKoꞌ mai?” Agáiáná Iesu tiꞌara mehániꞌ.

¹⁰Nauliꞌ wopiꞌi Pilatu, “TiꞌaraKoꞌ paꞌi mau mohánikiaꞌ? Tiꞌara paꞌi Nuisá, kódóꞌ deꞌe, ara kuasaꞌkuꞌ mokábáháKoꞌ ba mopakuꞌKoꞌ!”

¹¹Nauliꞌ Iesu, “Ane tiꞌarakoꞌ naweꞌi Pueꞌ Ala kuasaꞌ iti, tiꞌara ara kuasaꞌmu i Kódóꞌ. Mewaliꞌ Tadulako Menómbá Mahile to mohuhuꞌAꞌ i hio, melumbuꞌ kamahilena dósána hangko i hio.”[133]

¹²Pilatu mampeliꞌ mani rárá bona mokábáhá Iesu, agáiáná molaluita wopaheꞌ tadulakoraꞌ toIahudiꞌ rapasimbuku, rauliꞌ, “Ane nukábáhá tauna iti, io ina kipehángáꞌákoꞌ i Datu Mahile![134] Iesu iti manguliꞌ kaꞌIana datu, mewaliꞌ Ia moewaꞌ Datu Mahile!”

¹³Kanahádina Pilatu laluitaraꞌ iti, ia moánti Iesu lao i rawa. Roo onoꞌ, mehoda miꞌi i pehodaꞌá pobutusiá i hambuaꞌ katoroꞌá to rahangaꞌ Daula Watu. I lalu básáraꞌ toIahudiꞌ hangaꞌna Gabata.

¹⁴I tempó iti, ina kalialo miꞌi, hangalo hangko tiꞌara mani alo Posusa Paska. Pilatu mohángáꞌáheꞌ tadulakoraꞌ toIahudiꞌ, “Deꞌe miꞌi datumi!”

¹⁵Monganga-ngangaheꞌ, rauliꞌ, “Papate! Papate! Pakuꞌ i kau mombehape!” Nauliꞌ Pilatu, “Ba niundeꞌ mpuꞌu paꞌi kupopepakuꞌ datumi?” Rahániki kapalaꞌ-kapalaꞌ tadulako menómbá, “Datu Mahile peá datungkiꞌ.”

¹⁶Kaupuána Pilatu mohuhuꞌ miꞌi Iesu i hira bona rapakuꞌ i kau mombehape.

¹⁷Karaꞌántina miꞌi surudadoꞌ toRoma Iesu iti, Ia haduduáNa mopáháꞌá kau mombehape lao i rawa kótá haweꞌ i Buluꞌ Bangaꞌwuáꞌ. I lalu básáraꞌ toIahudiꞌ, Gologota.

¹⁸Ionoꞌ, mopakuꞌmoheꞌ Iesu i kau. Ara woꞌo rodua tauna ntániꞌna to rapakuꞌ i kau mombehape, hadua tándáꞌ i kabeoꞌna Iesu, hadua tándáꞌ i kuánáNa.

¹⁹Pilatu mohuoꞌ surudadoꞌna mopatakaꞌ hambóhóꞌ pata i kau popakuꞌána Iesu. I pata iti teukiꞌ: IESU TONASARE, DATURAꞋ TOIAHUDIꞋ.

²⁰{Tempó onoꞌ, handaꞌ tauna i Ierusale láwiꞌ mosusaheꞌ,} hai popakuꞌána Iesu hungkuꞌ i kótá. Mewaliꞌ, bona handaꞌ toIahudiꞌ peisá mobásá ukiꞌ to ara i pata iti, ukiꞌna iti raukiꞌ i lalu tálu pákáꞌna básá: básáraꞌ toIahudiꞌ, básáraꞌ toRoma, hai básáraꞌ toIunani.

²¹Mewaliꞌ, kapalaꞌ-kapalaꞌ tadulako menómbá mohángáꞌá Pilatu, “Ineeꞌ raukiꞌ: ‘Daturaꞌ toIahudiꞌ!’ Rángina miꞌi raukiꞌ: ‘Tauna deꞌe manguliꞌ kaꞌIana daturaꞌ toIahudiꞌ.’ ”

²²Nauliꞌ Pilatu, “Apa to kuꞌukiꞌ miꞌi, tiꞌara ina kubáliki!”

²³Karooraꞌ surudadoꞌ mopakuꞌ Iesu, waruꞌNa raꞌala miꞌi haneꞌi ragáláꞌ iba,[135] hadua-hadua hangaa. Agáiáná kumbáNa, tiꞌara ara podauána, láwiꞌ ratanu bona mewaliꞌ hantau báná.

²⁴Onoꞌ miꞌi haneꞌi rauliꞌheꞌ surudadoꞌ, “Ineeꞌ tabóhóꞌ-bóhóꞌ badu deꞌe. Rángina miꞌi tabolobiaꞌ bona taisá heáná to molámbiꞌ.” Mewaliꞌ tebukeki miꞌi apa to teukiꞌ hangkoia i lalu Sura Magasaꞌ, to manguliꞌ: “WaruꞌKuꞌ raꞌala hai ragáláꞌ-gáláꞌ. To molámbiꞌ kumbáNgkuꞌ rapakanótó hai bolobiaꞌ.” [136] Mewaliꞌ, apa to rabábehi surudadoꞌ iti, bateꞌna mewaliꞌ nodo to teukiꞌ miꞌi hangkoia.

²⁵Hungkuꞌ i popakuꞌána Iesu, meángkáꞌ miꞌi ináNa hai ádina inána Iesu towawine.[137] Ara woꞌo Maria toinána Keleopa, hai Maria toMadalena.[138]

²⁶Kanaitána Iesu ináNa meángkáꞌ i hintáiꞌna topeguruNa to napokaꞌahiꞌ, Iesu mampolaluitaꞌá ináNa, Nauliꞌ, “Inaꞌ, iti miꞌi ánáꞌmu.”

²⁷Hai Nahángáꞌá woꞌo topeguruNa iti, “Iti miꞌi inámu.” Mantepuꞌu hangko ionoꞌ, topeguruNa iti mokádipurá inána Iesu i támbina.

²⁸Ánti kanaisána miꞌi Iesu kahópóꞌna miꞌi upu-upu peundeꞌána Pueꞌ Ala to hangaa-ngaa Napeuláꞌi, molaluita miꞌi Nauliꞌ, “MangkadoꞌuAꞌ” bona tebukeki apa to teukiꞌ i lalu Sura Magasaꞌ.

²⁹Ionoꞌ, ara hamangku anggoroꞌ to maisu. Araheꞌ tauna to lao moala hangkumuꞌ lómóꞌ, raeme i anggoroꞌ iti, rahipika i wuntu dáꞌángkau hisop,[139] haneꞌi rapopadumeá humena Iesu.[140]

³⁰Kaupuna Iesu mohipipi anggoroꞌ iti, molaluita miꞌi, Nauliꞌ, “Hópóꞌ miꞌi bágóꞌKuꞌ!”[141] Roo onoꞌ, motóngkóꞌ, hai upu miꞌi inaoNa.

³¹Alo karapakuꞌna Iesu i kau mombehape iti mewaliꞌ i Alo Popatimamaꞌá, hangalo hangko tiꞌara mani alo penómbáꞌáraꞌ toIahudiꞌ. Mouláꞌ páliáraꞌ tiꞌara peisá ara tomate to tetóe i kau mombehape i alo penómbáꞌá, apa mani láwiꞌ ina kana Alo Posusa Paska. Onoꞌ miꞌi haneꞌi tadulakoraꞌ toIahudiꞌ membiáꞌ i Pilatu bona to rapakuꞌheꞌ iti ratepóꞌ bitiraꞌ bona hawiáꞌheꞌ mate. Membiáꞌheꞌ woꞌo bona wátáraꞌ rapopendáulu.

³²Mewaliꞌ, lao mpuꞌumoheꞌ surudadoꞌ motepóꞌ bitiraꞌ to rodua to rapakuꞌ i kau mombehape hingkakani hai Iesu.

³³Agáiáná i kahaweꞌraꞌ iti, raita Iesu mate miꞌi, onoꞌ miꞌi haneꞌi tiꞌara mewaliꞌ ratepóꞌ bitiNa.[142]

³⁴Agáiáná hadua surudadoꞌ moala tawalaꞌna motohuꞌ lompena Iesu. KaratohuꞌNa iti, moili miꞌi waheꞌ hai uwai.

³⁵Tauna to moita mata apa to mewaliꞌ iti, ia to mopahaweꞌákou apa to naita, bona mepoináláikou woꞌo. Posabikina deꞌe toꞌu, hai ia moisá ntepuꞌu katoꞌuna.

³⁶Iti mewaliꞌ bona tebukeki apa to teukiꞌ hangkoia i lalu Sura Magasaꞌ to manguliꞌ, “Tiꞌara mpuꞌu ara hangkau buꞌuNa to ina ratepóꞌ.”[143]

³⁷Ara woꞌo to teukiꞌ i lalu Sura Magasaꞌ to manguliꞌ, “Hira ina mampengoaꞌheꞌ Ia to ratohuꞌ miꞌi.”[144]

³⁸Tempó iti, ara hadua tauna to rahangaꞌ Iusupu, to hangko i wánuá Arimatea. Ia mepoinálái ngkábuni i Iesu, láwiꞌ mampokalááꞌ tadulakoraꞌ toIahudiꞌ. I kamatena Iesu, Iusupu lao miꞌi i Pilatu membiáꞌ wátámandoꞌna Iesu bona ratawu. Napaliu miꞌi Pilatu, mewaliꞌ lao mpuꞌu miꞌi Iusupu moala wátámandoꞌna Iesu.

³⁹Ara woꞌo hadua tauna to lao hingkakani hai Iusupu, hangaꞌna Nikodemu. Hangkoia Nikodemu iti to lao mampohidupaꞌá Iesu i tangaꞌ káindi.[145] Laomoheꞌ rodua tauna iti mokádipurá wátámandoꞌna Iesu. I kalaoraꞌ, Nikodemu moánti mina-mina to mawongi to rahangaꞌ mire hai rampaꞌ-rampaꞌ gaharu, rekeꞌ-rekeꞌna tálu puloꞌna hai iba kiló kamatimina.

⁴⁰Tauna to rodua iti moalamoheꞌ wátámandoꞌna Iesu, rabungkuhi hai báná to bulá ntepuꞌu hai meálu, hai mopakeꞌheꞌ woꞌo mina-mina to mawongi hai rampaꞌ-rampaꞌ mouláꞌ ádá popatawu toIahudiꞌ.

⁴¹Hungkuꞌ i popakuꞌána Iesu, ara hinoe kau, hai i wiwina hinoe iti ara balamba i pingkena buluꞌ watu. Balamba iti rapatimama miꞌi mewaliꞌ popatawuá. Popatawuá iti woꞌu mani, tiꞌara mani haweꞌ hadua to ratawu ionoꞌ.

⁴²Láwiꞌ popatawuá iti tiꞌara karaoꞌ, hai tiꞌara piꞌi marue ina mantepuꞌu alo penómbáꞌá, onoꞌ miꞌi haneꞌi wátámandoꞌna Iesu hangaa-ngaa ratawu hangko tiꞌara mani támpu alo. Mewaliꞌ lao mpuꞌu miꞌi rawoli wátámandoꞌna Iesu i lalu popatawuá to hungkuꞌ iti, {haneꞌi ratuko hai hambuaꞌ watu to mahile}.