Read Besoa Iohane 2 Bible Online

Iohane 2 - Besoa bible

Iohane 2

¹Liu rongalo hangko ionoꞌ, ara posusa petauna i wánuá Kana i tampoꞌ Galilea. Inána Iesu ara woꞌo i posusaꞌá iti.

²Iesu hai topegurunaheꞌ rakióꞌ woꞌo lao i posusaꞌá iti.

³Tangaꞌraꞌ mosusa, upu miꞌi anggoroꞌ, mewaliꞌ inána Iesu lao membiáꞌ tulungi i Hia, nauliꞌ, “Upu miꞌi anggoroꞌ.”

⁴Nahániki Iesu, “Inaꞌ, apa tunggáiámu haneꞌiAꞌ nuhángáꞌá noꞌonoꞌ? Tiꞌara mani haweꞌ tempóna[14] Kupatongawaꞌ kuasaꞌKuꞌ.”

⁵Agáiáná inána Iesu mohángáꞌáheꞌ topobágóꞌ i posusaꞌá iti, nauliꞌ, “Apa peá to ina Nahuoꞌákou, hangaa-ngaa nipeuláꞌi!”

⁶I posusaꞌá iti, ara ini wuaꞌna gumbaꞌ to mahile to rabábehi hangko i watu. Gumbaꞌ iti raóntóki uwai to ina rapakeꞌ membahoꞌ mouláꞌ ádáraꞌ toIahudiꞌ. Kahandaꞌna óntóꞌna gumbaꞌ iti, i laluna hambuaꞌ, peisá haweꞌ hangatu rompuloꞌ lite.

⁷Iesu mohángáꞌáheꞌ topobágóꞌ iti, “Nióntóki gumbaꞌ iti hai uwai.” Raóntóki mpuꞌu miꞌi haweꞌ bukeꞌ.

⁸Roo onoꞌ, Nahángáꞌáheꞌ, “Hámbuꞌ hantóiꞌ, hai lao niántiá topokádipurá posusa.” Rahámbuꞌ mpuꞌu miꞌi haneꞌi raꞌánti lao i topokádipurá posusa.

⁹Topokádipurá susa iti mampemina uwai to raꞌántiá. Tiꞌara piꞌi matáweá nodo uwai ntooꞌ, tebáliki miꞌi mewaliꞌ anggoroꞌ. Agáiáná tiꞌara naisá kahangko iumbáꞌána mai anggoroꞌ iti, to moisá bateꞌraꞌ peá topobágóꞌ. Kaupuna mampemina anggoroꞌ iti, ia mokióꞌ miꞌi tobaleilo to ratauna,

¹⁰nahángáꞌá, “Matamaꞌ ntepuꞌu anggoroꞌ deꞌe. Biásána mouláꞌ ádántaꞌ, anggoroꞌ to maroꞌa hangaa-ngaa rakándó ioru i toposusa. Ane rahádiá miꞌi mainu, hangko rakándó riꞌi to tiꞌara gaga maroꞌa. Agáiáná io, nupaibókóꞌ riꞌi anggoroꞌ to matamaꞌ ntepuꞌu.”

¹¹Iesu mobábehi tandaꞌ kuasaꞌ to rungu-runguna iti i wánuá Kana i tampoꞌ Galilea. Moliu tandaꞌ kuasaꞌ iti, Ia mopatongawaꞌ peawaꞌNa, hai topeguruNa mampoináláiheꞌ kuasaꞌNa iti hangko i Pueꞌ Ala.

¹²Roo posusa iti, upu-upuheꞌ topeguruNa, inána hai ádinaheꞌ Iesu,[15] hingkakaniheꞌ hai Iesu, laoheꞌ i wánuá Kapenau, haneꞌi toroꞌheꞌ ionoꞌ bahangapa wengina.

¹³Ina haweꞌ miꞌi tempóna alo mahile agama Iahudiꞌ to rauliꞌ Alo Posusa Paska, onoꞌ miꞌi haneꞌi lao miꞌi Iesu i kótá Ierusale.

¹⁴I kahaweꞌNa i tangabaa Támbina Pueꞌ Ala, Ia moitaheꞌ tauna to mampobaluꞌ binataꞌ to ina rasambale, iamoheꞌ gapiꞌ, dimbá hai tádáhi manggebodoꞌ. Araheꞌ woꞌo toposuláꞌ dóiꞌ to mehoda ionoꞌ.[16]

¹⁵Kanaitána Iesu upu-upu iti, Ia mobábehi miꞌi pehepe hangko i gulaꞌ haneꞌi mowura upu-upu gapiꞌraꞌ hai dimbáraꞌ hangko i Támbina Pueꞌ Ala. Ia modungká-dungká mejáraꞌ toposuláꞌ dóiꞌ, álána tekámburá dóiꞌraꞌ.

¹⁶Roo onoꞌ, Nahángáꞌáheꞌ topobaluꞌ-baluꞌ tádáhi manggebodoꞌ, “Pohuꞌmokou! Niánti upu-upu iti lao i rawa! Ineeꞌ nihuleꞌ-huleꞌ mai mobaluꞌ-baluꞌ i Támbina UmáNgkuꞌ. Támbi deꞌe tiꞌara pobaluꞌ-baluꞌá!”

¹⁷Topegurunaheꞌ mobuhinao apa to teukiꞌ i lalu Sura Magasaꞌ to manguliꞌ node: “Rumihi peundeꞌáNgkuꞌ bona TámbiMu Pueꞌ ina rabiláꞌ. Iti miꞌi to mopamaꞌamuꞌ laluNgkuꞌ.” [17]

¹⁸Hangko ionoꞌ, hadua hangko i tadulakoraꞌ toIahudiꞌ mohángáꞌá Iesu, nauliꞌ, “Heáná to mampoweꞌiKoꞌ kuasaꞌ mobábehi iti? Ane ara mpuꞌu kuasaꞌMu, Nupopaitaꞌangkaiꞌ hambuaꞌ tandaꞌ kuasaꞌ!”

¹⁹Nahániki Iesu, “Ane kómu mogero Támbina Pueꞌ Ala deꞌe, i lalu tálu alona ina Kuaró huleꞌ.”[18]

²⁰Rauliꞌ tadulakoraꞌ toIahudiꞌ, “Nupanoumbá miꞌi paꞌi? Mogalo ripaꞌi iba puloꞌna hai ini parena tiꞌara mani wali Támbina Pueꞌ Ala deꞌe raꞌaró,[19] noumbá riꞌi haneꞌi Nuꞌuliꞌ ina Nuaró huleꞌ i lalu tálu peá alona!”

²¹Katoꞌuána, wátáNa haduduáNa to natunggái Iesu i tempóna mokábelái Támbina Pueꞌ Ala.

²²I katueꞌNa huleꞌ hangko rabuhinao riꞌi topeguruNa laluitaNa iti, haneꞌi mampoináláimoheꞌ apa to teukiꞌ hangkoia i lalu Sura Magasaꞌ,[20] hai apa to nauliꞌ Iesu.

²³Tangaꞌna Iesu i Ierusale mouláꞌ alo Posusa Paska, handaꞌ tauna mampoinálái kaꞌIana miꞌi Datu Topehómpóꞌ, láwiꞌ moitaheꞌ tandaꞌ-tandaꞌ kuasaꞌ to Nabábehi.

²⁴Agáiáná Iesu haduduáNa, tiꞌaraheꞌ Napoinálái, láwiꞌ Naisá aha apa to i laluraꞌ upu-upu tauna.

²⁵Tiꞌaranto paraluu tauna mopahaweꞌ pekiriraꞌ, láwiꞌ Naisá miꞌi ami apa to i laluraꞌ tauna.