Read Besoa Iohane 20 Bible Online

Iohane 20 - Besoa bible

Iohane 20

¹Mebabaeaꞌ i alo Minggu, Maria toMadalena lao i popatawuá. Haweꞌ ionoꞌ, ia moita watu petuko babaꞌ popatawuá tegesuꞌ miꞌi.

²Mewaliꞌ, ia melangka lao i Simoꞌ Peturuꞌ hai hadua topeguruna Iesu to Napokaꞌahiꞌ ntepuꞌu, nahángáꞌáheꞌ Maria, “Wátámandoꞌna Pueꞌ raꞌala miꞌi hangko i popatawuáNa, hai tiꞌara kiꞌisá kaꞌiumbáꞌána rawoli!”

³Mewaliꞌ lao mpuꞌumoheꞌ Peturuꞌ hai hadua rángána iti i popatawuá.

⁴Hira iti melangkaheꞌ hingkakani, agáiáná melumbuꞌ kamagásiꞌna topeguruna Iesu to ntániꞌna haneꞌi Peturuꞌ, onoꞌ miꞌi haneꞌi ioru haweꞌ i popatawuá,

⁵agáiáná ia tiꞌara sieruꞌ mesuaꞌ i lalu, napeloga peá. Ia moita báná to rapopobungkuhi Iesu aranto ionoꞌ.

⁶Roo onoꞌ, haweꞌ miꞌi Simoꞌ Peturuꞌ hai kásáliu mesuaꞌ. Ia woꞌo moita miꞌi báná popobungkuhina Iesu,

⁷agáiáná báná to rapopowewehi wuáꞌNa, tepilóló hai tepataniꞌ hangko i báná to ntániꞌna.[146]

⁸I pesuaꞌna Peturuꞌ i lalu popatawuá, topeguruna Iesu to ioru haweꞌ, mesuaꞌ woꞌo. Kanaitána apa to ara i lalu popatawuá iti, napoinálái katueꞌna miꞌi huleꞌ Iesu.

⁹Duuꞌna haweꞌ i alo iti, tiꞌara maniheꞌ moisá lempóna apa to teukiꞌ hangkoia i lalu Sura Magasaꞌ to mopakanótó kaꞌina tueꞌna huleꞌ Iesu hangko i kapate.[147]

¹⁰Roo onoꞌ, mesuleꞌmoheꞌ lao i támbiraꞌ.

¹¹Maria toMadalena meángkáꞌ i rawa popatawuá, teriaꞌ oaꞌ. Tangaꞌna teriaꞌ, ia meloga i lalu popatawuá

¹²hai moita rodua malaꞌeka to mebadu to bulá, mehodaheꞌ i karawoliána wátámandoꞌna Iesu hangkoia, hadua tándáꞌ i wuáꞌNa, hai hadua tándáꞌ i bitiNa.

¹³Mekuneꞌheꞌ malaꞌeka iti i Maria, rauliꞌ, “Inaꞌ, apa riꞌi to nuteriahi?” Nahániki Maria, “Wátámandoꞌna Pueꞌkuꞌ raꞌala miꞌi hangko ieneꞌ, hai tiꞌara kuisá kaꞌiumbáꞌána rawoli.”

¹⁴Hangko ionoꞌ, mehaileꞌ miꞌi Maria hai moita Iesu meángkáꞌ i taleuꞌna, agáiáná tiꞌara naisá kaꞌIesuna.

¹⁵Mekuneꞌ miꞌi Iesu i hia, “Inaꞌ, apa riꞌi to nuteriahi? Heáná to nupeliꞌ?” Nauliꞌ ripaꞌi Maria tauna iti topokádipurá hinoe, onoꞌ miꞌi haneꞌi nahángáꞌá, “Tuá, ane Io to moala wátámandoꞌNa, Nutudeꞌáꞌáꞌaꞌ iumbá kaNuwoliána. Ina lao kuala {bona ratawu maroꞌa}.”

¹⁶Nauliꞌ Iesu, “Maria.” Mehaileꞌ miꞌi Maria i Iesu haneꞌi molaluita i lalu básá Iberani, “Rabuni!” Lempóna, “Guru.”

¹⁷Nauliꞌ Iesu i Maria, “IneeꞌAꞌ nutibaaꞌ, láwiꞌ tiꞌara maniAꞌ mesuleꞌ lao i UmáNgkuꞌ. Laomokoꞌ i halaluNgkuꞌ, nuhángáꞌáꞌáheꞌ kaꞌina laoNgkuꞌ i UmáNgkuꞌ hai Umámi woꞌo, Pueꞌ AlaNgkuꞌ hai Pueꞌ Alami woꞌo.”

¹⁸Lao miꞌi Maria toMadalena mampohidupaꞌáheꞌ topeguruna Iesu, haneꞌi nauliꞌ, “Kuita miꞌi Pueꞌ ininá!” hai napahaweꞌáheꞌ woꞌo upu-upu to nauliꞌ Iesu.

¹⁹Káindina i alo Minggu iti, topegurunaheꞌ Iesu hirámpu i támbi to tegili babaꞌna, láwiꞌ mampokalááꞌheꞌ tadulakoraꞌ toIahudiꞌ. Hangkaꞌ-hangkaꞌ perái Iesu haweꞌ, meángkáꞌ i tangaꞌraꞌ hai Natabeheꞌ, Nauliꞌ, “Katinda lalu haweꞌ i kómu.”

²⁰Roo onoꞌ, Natudeꞌáꞌámoheꞌ taeNa hai lompeNa. Góeꞌ ntepuꞌu laluraꞌ moita Pueꞌraꞌ.

²¹Nauliꞌ wopiꞌi Iesu, “Katinda lalu haweꞌ i kómu. Nodo UmáNgkuꞌ mohuoꞌAꞌ mai, noꞌonoꞌ woꞌo Kódóꞌ mohuoꞌkou.”

²²Roo onoꞌ, Natawueꞌámoheꞌ inaoNa haneꞌi Nauliꞌ, “Nitarima miꞌi Inao to Magasaꞌ.

²³Heáná to niámpungi dósána, teámpungi miꞌi dósána. Heáná to tiꞌara niámpungi dósána, Pueꞌ Ala woꞌo tiꞌara moámpungi.”

²⁴Tómá to rauliꞌ woꞌo Didimu, lempóna Toporopaꞌ, hadua hangko i topeguruna Iesu to hampuloꞌ hai rodua, tiꞌara ara hingkakani hai hira i popatongawaꞌna Iesu rungu-runguna.

²⁵Onoꞌ miꞌi haneꞌi rahángáꞌá, “Tómá, kiꞌita miꞌi Pueꞌ!” Agáiáná nauliꞌ Tómá, “Ane tiꞌara mani kuita pepakuꞌá i taeNa hai kupetóbóꞌ to rapakuꞌna iti, hai ane tiꞌara mani kupereraꞌ to ratohuꞌ i lompeNa, bateꞌna tiꞌara kupoinálái.”

²⁶Haminggu hangko ionoꞌ, hirámpu wopaheꞌ i lalu támbi iti. I tempó iti, Tómá ara miꞌi hingkakani hai hira. Ragili miꞌi upu-upu babaꞌ, agáiáná hangkaꞌ-hangkaꞌ perái Iesu meángkáꞌ i tangaꞌraꞌ, Nahángáꞌáheꞌ, “Katinda lalu haweꞌ i kómu.”

²⁷Roo onoꞌ, Ia mohángáꞌá Tómá, “Nupeita miꞌi taeNgkuꞌ hai nupetóbóꞌ popakuꞌána. Nupereraꞌ miꞌi woꞌo petohuꞌá to i lompeNgkuꞌ hai ineeꞌ miꞌi bata-bata lalumu. Mepoináláimokoꞌ, láwiꞌ tueꞌMoꞌ huleꞌ!”

²⁸Nauliꞌ Tómá, “Io miꞌi Pueꞌkuꞌ hai Pueꞌ Alangkuꞌ!”

²⁹Nauliꞌ Iesu i Tómá, “Mepoináláimokoꞌ láwiꞌ nuitaMoꞌ. Morasiꞌheꞌ tauna to mepoinálái i Kódóꞌ, kehapiꞌ tiꞌaraꞌAꞌ raita.”

³⁰Katoꞌuána handaꞌ mani tandaꞌ kuasaꞌ to nabábehi Iesu to raita mata topeguruNa to tiꞌara teukiꞌ i lalu sura deꞌe.

³¹Agáiáná upu-upu to kuꞌukiꞌ deꞌe, kuꞌukiꞌ bona nipoinálái kaꞌIesuna Datu Topehómpóꞌ, Ánáꞌna Pueꞌ Ala, hai bona ánti pepoináláimi i Hia, ina molámbiꞌkou katueꞌ to maroꞌa to tiꞌara mokahópóꞌá.