Read Besoa Iohane 3 Bible Online

Iohane 3 - Besoa bible

Iohane 3

¹Ara hadua to rahangaꞌ Nikodemu. Nikodemu iti ia miꞌi toParisi[21] hai tadulako agama Iahudiꞌ.

²Hangkani tempó, káindi, ia lao mampohidupaꞌá Iesu, nahángáꞌá, “Guru, kiꞌisá Io hadua guru to nahuoꞌKoꞌ mai Pueꞌ Ala, láwiꞌ tiꞌara ara tauna to peisá mobábehi tandaꞌ kuasaꞌ nodo to Nubábehi, ane tiꞌara naporángá Pueꞌ Ala.”

³Nauliꞌ Iesu, “Toꞌu ntepuꞌu laluitaNgkuꞌ deꞌe: ane tauna tiꞌara rapoánáka huleꞌ,[22] tiꞌara peisá mewaliꞌ taunána Pueꞌ Ala i lalu popárentáNa.”

⁴Nauliꞌ Nikodemu, “Noumbá miꞌi kapeisána tauna to sae miꞌi rapoánáka huleꞌ? Peisá paꞌi mesuaꞌ i lalu taꞌina inána hai rapoánáka huleꞌ?”

⁵Nauliꞌ Iesu, “Toꞌu ntepuꞌu laluitaNgkuꞌ deꞌe: ane tauna tiꞌara rapoánáka hai uwai[23] hai kuasaꞌna Inaona Pueꞌ Ala, tiꞌara peisá mewaliꞌ taunána Pueꞌ Ala i lalu popárentáNa.

⁶Mouláꞌ wátána, tauna rapoánáka hangko i tosaena. Agáiáná mouláꞌ pepoináláina, tauna rapoánáka hangko i Inao to Magasaꞌ.

⁷Mewaliꞌ, ineeꞌ nupotingkáráꞌ laluitaNgkuꞌ deꞌe to manguliꞌ: ‘hangaa-ngaa rapoánákakou huleꞌ.’

⁸Pándiriꞌna, wui mewui iumbá peá peundeꞌána. Nuhádi pewuina, agáiáná tiꞌara nuisá hangko iumbá kamaiána hai iumbá kalaoána. Noꞌonoꞌ woꞌo i tauna to rapoánáka huleꞌ moliu kuasaꞌna Inaona Pueꞌ Ala.”

⁹Nauliꞌ Nikodemu, “Noumbá pewaliꞌna iti?”

¹⁰Nauliꞌ Iesu, “Io toSáráeliꞌkoꞌ, hai tepasuaꞌkoꞌ hadua guru agama to rabiláꞌ, mewaliꞌ moapa riꞌi haneꞌi tiꞌara nuisá lempóna laluitaNgkuꞌ deꞌe?

¹¹Toꞌu laluitaNgkuꞌ deꞌe: manguliꞌangkaiꞌ apa to kiꞌisá, mampolaluitaꞌangkaiꞌ apa to kiꞌita. Agáiáná tiꞌara niundeꞌ motarima laluitangkiꞌ.

¹²Kutuntuákou apa to mewaliꞌ i duniáꞌ, agáiáná tiꞌara nipoinálái laluitaNgkuꞌ. Noumbá miꞌi kanipoináláina ane Kutuntuákou apa to mewaliꞌ i surugáꞌ?

¹³Tiꞌara ara haweꞌ hadua hangko i duniáꞌ deꞌe to mengkaoreꞌ lao i surugáꞌ, bateꞌna peá Ánáꞌ Mánusiá to toroꞌ i surugáꞌ hangkoia, hai mendáulu mai hangko i surugáꞌ.

¹⁴Hangkoia toSáráeliꞌ i pádá loriꞌ nahukuheꞌ Pueꞌ Ala haneꞌi ratilóꞌheꞌ lelótó. Mewaliꞌ Musa mobábehi lelótó hangko i tembaga, napatakaꞌ i kau haneꞌi natindiká, bona heáná to mampengoaꞌ lelótó iti ina mauriꞌ hai tueꞌheꞌ.[24] Noꞌonoꞌ woꞌo Ánáꞌ Mánusiá hangaa-ngaa raꞌaró i kau mombehape,

¹⁵bona heáná to mepoinálái i Ánáꞌ Mánusiá ina molámbiꞌ katueꞌ to maroꞌa to tiꞌara mokahópóꞌá.”

¹⁶Ánti kamahilena ahiꞌna Pueꞌ Ala i upu-upu tauna i duniáꞌ, onoꞌ haneꞌi Napeweꞌi miꞌi ÁnáꞌNa to HaduduáNa, bona heáná peá to mepoinálái i Hia, tiꞌara ina tegááki hangko i Pueꞌ Ala duuꞌna i rue-ruena, agáiáná ina molámbiꞌ katueꞌ to maroꞌa to tiꞌara mokahópóꞌá.[25]

¹⁷Pueꞌ Ala tiꞌara mohuoꞌ ÁnáꞌNa mai i duniáꞌ bona mohuku tauna. TunggáiáNa mohuoꞌ mai ÁnáꞌNa bona mohómpóki tauna hangko i huku dósá.

¹⁸Tauna to mepoinálái i Ánáꞌna Pueꞌ Ala, tiꞌaraheꞌ ina rahuku. Agáiáná tauna to tiꞌara mepoinálái, manótó miꞌi kaꞌina nahukuraꞌ Pueꞌ Ala, láwiꞌ tiꞌaraheꞌ mepoinálái i Ánáꞌna Pueꞌ Ala to HaduduáNa.

¹⁹Haweꞌ miꞌi Ánáꞌna Pueꞌ Ala i duniáꞌ moánti kamabaa i upu-upu tauna. Agáiáná tauna moundeꞌ mani kamakáindi haneꞌi kamabaa, láwiꞌ kadake bábehiáraꞌ, onoꞌ miꞌi haneꞌi ina nahukuheꞌ Pueꞌ Ala.

²⁰Upu-upu tauna to mobábehi to kadake, mokáhihiꞌheꞌ kamabaa. Tiꞌaraheꞌ mau mohungkuki kamabaa iti bona tiꞌara tongawaꞌ bábehiáraꞌ to kadake.

²¹Tauna to manótó bábehiáraꞌ, maiheꞌ i kabaaꞌána bona bábehiáraꞌ raita hai tongawaꞌ pampeuláꞌiraꞌ peundeꞌána Pueꞌ Ala.

²²Roo onoꞌ, Iesu hai topeguruNa laoheꞌ i tampoꞌ Iudá. Toroꞌheꞌ ionoꞌ bahangapai alona hai moriuheꞌ tauna.

²³I tempó iti, Iohane tiꞌara mani ratarungku. Ia woꞌo meriu i wánuá Aino, tiꞌara karaoꞌ hangko i wánuá Salimi, láwiꞌ ionoꞌ handaꞌ uwai. Alo-alona tauna lao mampoperiu i Iohane.

²⁵Hangkani tempó, bahangapaheꞌ topeguruna Iohane mombeheheꞌ hai hadua toIahudiꞌ mokana ádá pembahoꞌ mouláꞌ ágámáraꞌ.

²⁶Laomoheꞌ i Iohane, rahángáꞌá, “Guru, ba nubuhinao mani hangkoia hadua tauna to hingkakani hai io tándáꞌ i mata alo uwai Iarade to nutudeꞌáꞌangkaiꞌ? Ia meriu woꞌo, hai kahandaꞌ-handaꞌá riꞌi tauna to lao i Hia!”

²⁷Nauliꞌ Iohane, “Tauna tiꞌara peisá tebámbári hangaꞌna ane tiꞌara naweꞌi Pueꞌ Ala kuasaꞌ.

²⁸Hangkoia, nihádi mpuꞌu miꞌi laluitangkuꞌ to manguliꞌ: ‘Kódóꞌ tiꞌaraꞌaꞌ Datu Topehómpóꞌ,’ hai tempó onoꞌ kuhángáꞌáꞌámokou tunggáiángkuꞌ: mai peaꞌ mopatimama ráráNa.”

²⁹Napaliliu wopiꞌi Iohane laluitana nauliꞌ, “Pándiriꞌ, i posusa petauna, tobaleilo to ratauna ia miꞌi to mewaliꞌ ntóáꞌna susa iti. Towawine to ratauna mewaliꞌ gáláꞌna. Ane tauna to mamporángá tobaleilo to ratauna, meángkáꞌ peá i hintáiꞌna mampehádingi laluitana, hai góeꞌ ntepuꞌu. Noꞌonoꞌ woꞌo kódóꞌ. Kódóꞌ nodoaꞌ tauna to mamporángá tobaleilo to ratauna iti. Góeꞌaꞌ, hai rumihi kagóeꞌkuꞌ mohádi laluitami,[26]

³⁰láwiꞌ kamarue-rueá, hangaꞌNa riꞌi to hangaa-ngaa melumbuꞌ karaisána tauna haneꞌi hangaꞌkuꞌ.”

³¹Iesu to haweꞌ miꞌi mai hangko i surugáꞌ, hai mahile ntepuꞌu kuasaꞌNa hangko i upu-upuna. Tauna to hangko i duniáꞌ, bateꞌna tauna biásá, hai laluitaraꞌ mopahaweꞌ apa to mewaliꞌ i duniáꞌ. Agáiáná Iesu hangko i surugáꞌ, hai mahile ntepuꞌu kuasaꞌNa hangko i upu-upuna.

³²Ia mampolaluita kana i apa to Naita hai to Nahádi miꞌi i surugáꞌ, agáiáná tiꞌaraheꞌ handaꞌ to mampoinálái laluitaNa.

³³Tauna to mampoinálái laluitaNa mopangákuꞌ katoꞌuna Pueꞌ Ala,

³⁴láwiꞌ Iesu miꞌi to nahuoꞌ Pueꞌ Ala mohuwárá laluitaNa, hai Pueꞌ Ala to mampoweꞌi Inao to Magasaꞌ i Hia, hai tiꞌara ara támpáꞌna.

³⁵Pueꞌ Ala Umántaꞌ mampokaꞌahiꞌ ÁnáꞌNa hai mampoweꞌi miꞌi upu-upu kuasaꞌNa.

³⁶Tauna to mepoinálái i ÁnáꞌNa iti, molámbiꞌmoheꞌ katueꞌ to maroꞌa to tiꞌara mokahópóꞌá. Tauna to tiꞌara mengkoruꞌ i Ánáꞌna Pueꞌ Ala, tiꞌaraheꞌ molámbiꞌ katueꞌ, ngkáliꞌna riꞌi molámbiꞌraheꞌ pehukuna Pueꞌ Ala to tiꞌara mokahópóꞌá.