Read Besoa Iohane 5 Bible Online

Iohane 5 - Besoa bible

Iohane 5

¹Roo onoꞌ, Iesu mesuleꞌ wopiꞌi lao i kótá Ierusale bona mouláꞌ alo mahileraꞌ toIahudiꞌ.

²I Ierusale, hungkuꞌ i babaꞌá to rahangaꞌ “Babaꞌá Dimbá”, ara hambuaꞌ wuhuꞌ; i lalu básá Iberani hangaꞌna Betesda.[38] Ara lima wuaꞌna tambaleꞌ to motolelingi wuhuꞌ iti.

³Handaꞌheꞌ to tiꞌara ralalu hirámpu ionoꞌ. Araheꞌ to bilo, to kompiha bitiraꞌ, hai to paluꞌ,[39] upu-upuheꞌ maturu-turu oaꞌ i tambaleꞌ iti. [Mampegiáheꞌ pokalena uwai,

⁴láwiꞌ hangkani-hangkani ara malaꞌekana Pueꞌ to mendáulu mai i wuhuꞌ iti mampopokale uwai, hai heáná to ioru mendáulu i lalu wuhuꞌ iti i tempóna uwai mokale, mauriꞌ miꞌi hangko i pohakiꞌna.][40]

⁵Ara ionoꞌ hadua tobaleilo, to tálu miꞌi puloꞌna hai uwalu parena tiꞌara peisá molumao láwiꞌ paluꞌ.

⁶Kanaitána Iesu tauna iti maturu-turu ionoꞌ, hai Naisá woꞌo kamaruena miꞌi paluꞌ, Ia mekuneꞌ, “Nuꞌundeꞌ paꞌi bona nubuku molumao?”

⁷Nauliꞌ topaluꞌ iti, “Kuꞌundeꞌ ntepuꞌu, Pueꞌ, agáiáná tiꞌara ara wongkódóꞌá to mampopendáuluaꞌ i lalu wuhuꞌ ane uwai mokale. Hangko ina mendáuluntoaꞌ, ara miꞌi to mampehindorungiaꞌ.”

⁸Nauliꞌ Iesu, “Meángkáꞌmokoꞌ, nulóló miꞌi aleꞌmu hai molumaomokoꞌ.”

⁹Tempó onoꞌ woꞌo, nalalu mpuꞌu miꞌi tauna iti, haneꞌi molóló aleꞌna hai molumao. Pewaliꞌána iti i alo Satu, alo penómbáꞌáraꞌ toIahudiꞌ,

¹⁰onoꞌ miꞌi haneꞌi tadulakoraꞌ toIahudiꞌ mokámbáróá tauna to hangko rapakauriꞌ iti, rahángáꞌá, “Dehangaloá alo penómbáꞌá! Tiꞌarakeꞌ peisá mobágóꞌ, mewaliꞌ tiꞌarakoꞌ woꞌo peisá moánti aleꞌmu.”

¹¹Nauliꞌ tauna iti, “Tauna to mopakauriꞌaꞌ ininá mohuoꞌaꞌ, ‘Nulóló miꞌi aleꞌmu hai molumaomokoꞌ.’ ”

¹²Rapekuneꞌ, “Heáná to mohuoꞌkoꞌ moánti aleꞌmu hai molumao?”

¹³Agáiáná tiꞌara naisá kaheánáNa to mopakauriꞌ, láwiꞌ pohuꞌ miꞌi Iesu hai tiꞌara piꞌi raita i oloꞌraꞌ tauna to handaꞌ.

¹⁴Tiꞌara marue hangko ionoꞌ, Iesu lao mampohidupaꞌá tauna iti i tangabaa Támbina Pueꞌ Ala, Nahángáꞌá, “Deꞌe-deꞌe nulalu miꞌi. Ineeꞌ wopakoꞌ mobábehi dósá, bona tiꞌarakoꞌ narampe apa-apa to melumbuꞌ kakadakena.”

¹⁵Hangko ionoꞌ, lao miꞌi tauna iti mampohidupaꞌáheꞌ tadulakoraꞌ toIahudiꞌ, nahángáꞌáheꞌ kaꞌIesuna to mopakauriꞌ.

¹⁶Onoꞌ miꞌi haneꞌi tadulakoraꞌ toIahudiꞌ mantepuꞌu mopakasusa Iesu, láwiꞌ Ia mepakauriꞌ i alo penómbáꞌá.

¹⁷Nahángáꞌáheꞌ Iesu, “UmáNgkuꞌ mobágóꞌ oaꞌ alo-alona, tepasuaꞌ alo penómbáꞌá, hai Kódóꞌ woꞌo mobágóꞌAꞌ oaꞌ.”[41]

¹⁸Hangko ionoꞌ, tadulakoraꞌ toIahudiꞌ mopári-páriheꞌ oaꞌ mampeliꞌ rárá bona Iesu rahuku mate. Rabábehi noꞌonoꞌ, tiꞌara peá ánti kamoliungiNa ádá i alo penómbáꞌá, agáiáná láwiꞌ Nauliꞌ woꞌo kaPueꞌ Alana UmáNa; lempóna, Ia mopahibali wátáNa hai Pueꞌ Ala.

¹⁹Hangko ionoꞌ, Iesu mopakanótó i tadulakoraꞌ toIahudiꞌ, Nauliꞌ, “Toꞌu ntepuꞌu laluitaNgkuꞌ deꞌe: katoꞌuána kehapiꞌAꞌ Ánáꞌna Pueꞌ Ala, tiꞌaraꞌAꞌ peisá mobágóꞌ mouláꞌ peundeꞌáNgkuꞌ haduduáNgkuꞌ ane tiꞌaraꞌAꞌ moita apa to Nabábehi UmáNgkuꞌ, láwiꞌ bateꞌna iti miꞌi to Kupobágóꞌ. Apa to napobágóꞌ UmáNgkuꞌ, iti miꞌi woꞌo bágóꞌKuꞌ, láwiꞌ Kódóꞌ ÁnáꞌNaꞌAꞌ.

²⁰UmáNgkuꞌ mampokaꞌahiꞌAꞌ, hai NatudeꞌáꞌAꞌ upu-upu to Nabábehi. Hai ara wopiꞌi tandaꞌ kuasaꞌ to ina NatudeꞌáꞌAꞌ to melumbuꞌ kamahilena hangko i tandaꞌ kuasaꞌ to roo miꞌi Kubábehi. Ina Kubábehi tandaꞌ kuasaꞌ iti hai ina nipotingkáráꞌ ntepuꞌu.

²¹UmáNgkuꞌ mampopearó tomate hai mampoweꞌiheꞌ katueꞌ, onoꞌ miꞌi haneꞌi Kódóꞌ woꞌo mampoweꞌi katueꞌ i heáná peá to mampeuláꞌi peundeꞌáNgkuꞌ.

²²Tiꞌara UmáNgkuꞌ to ina mobutusi, ngkáliꞌna riꞌi upu-upu kuasaꞌ pobutusi iti Napeweꞌi miꞌi i Kódóꞌ, ÁnáꞌNa.

²³Nabábehi noꞌonoꞌ, bona upu-upu tauna mobiláꞌAꞌ nodo woꞌo pebiláꞌraꞌ i UmáNgkuꞌ. Heáná to tiꞌaraꞌAꞌ mobiláꞌ, hibali hai tiꞌaraheꞌ woꞌo mobiláꞌ UmáNgkuꞌ to mohuoꞌAꞌ mai.

²⁴Toꞌu ntepuꞌu laluitaNgkuꞌ deꞌe: heáná peá to mampehádingi laluitaNgkuꞌ hai mepoinálái i Pueꞌ Ala to mohuoꞌAꞌ mai, molámbiꞌmoheꞌ katueꞌ to maroꞌa to tiꞌara mokahópóꞌá. Tiꞌarapoheꞌ molámbiꞌ pehuku láwiꞌ tiꞌarapoheꞌ nodo tauna to ina mampolumaoi kapate,[42] ngkáliꞌna riꞌi mantepuꞌumoheꞌ molámbiꞌ katueꞌ to maroꞌa to tiꞌara mokahópóꞌá.

²⁵Toꞌu ntepuꞌu laluitaNgkuꞌ deꞌe: ina haweꞌ tempóna, hai haweꞌ miꞌi tempóna, to tiꞌara maniheꞌ mepoinálái ina mohádi wambaꞌna Ánáꞌna Pueꞌ Ala, haneꞌiheꞌ ina mepoinálái hai molámbiꞌheꞌ katueꞌ to woꞌu.

²⁶UmáNgkuꞌ makuasaꞌ mampoweꞌi katueꞌ. Noꞌonoꞌ woꞌo, NaweꞌiMoꞌ kuasaꞌ mampoweꞌi katueꞌ to tiꞌara mokahópóꞌá.

²⁷NaweꞌiMoꞌ woꞌo kuasaꞌ mobutusi kárá-káráraꞌ tauna, láwiꞌ Kódóꞌ Ánáꞌ Mánusiá.

²⁸Ineeꞌ nipotingkáráꞌ laluitaNgkuꞌ deꞌe, láwiꞌ hangkani tempó upu-upu tauna to mate ina mohádi wambaꞌKuꞌ, hai ina mearóheꞌ hangko i popatawuáraꞌ. Tauna to mobábehi to maroꞌa ina rapopearóheꞌ bona molámbiꞌheꞌ katueꞌ to maroꞌa. Agáiáná tauna to mobábehi to kadake ina rapopearóheꞌ bona rahukuheꞌ.”

²⁹

³⁰Iesu mopaliliu wopiꞌi laluitaNa, Nauliꞌ, “Kódóꞌ tiꞌaraꞌAꞌ peisá mobábehi apa-apa mouláꞌ peundeꞌáNgkuꞌ haduduáNgkuꞌ. Kubutusi upu-upuna mouláꞌ apa to nahawaꞌáꞌAꞌ UmáNgkuꞌ. PobutusiNgkuꞌ hintotoꞌ, láwiꞌ tiꞌaraꞌAꞌ mouláꞌ peundeꞌáNgkuꞌ haduduáNgkuꞌ, mouláꞌraꞌAꞌ peundeꞌána Pueꞌ Ala to mohuoꞌAꞌ.

³¹Ane Kódóꞌ peá haduduáNgkuꞌ to manguliꞌ kahangko i Pueꞌ AlaNgkuꞌ, {hai tiꞌara ara tauna ntániꞌna to mosabikiAꞌ,} ketiꞌara niꞌisá ba toꞌu laluitaNgkuꞌ ba tiꞌara.[43]

³²Agáiáná ara to ntániꞌna to mosabikiAꞌ, ia miꞌi UmáNgkuꞌ, hai Kuisá katoꞌuna posabikiNa.

³³Hangkoia kómu mohuoꞌkou huoꞌámi lao i Iohane mampekuneꞌ kana i Kódóꞌ,[44] hai ia mohángáꞌáheꞌ posabikina. Apa to nauliꞌ mokana i Kódóꞌ, upu-upuna toꞌu.[45]

³⁴Agáiáná katoꞌuána tiꞌara Kuparaluu sabiꞌ hangko i tauna. Kupopambuhinaoákou laluitana iti, bona molámbiꞌkou katueꞌ to maroꞌa.

³⁵Tempóna mani Iohane moriu tauna, ia nodo huluꞌ to mewangkaꞌ hai moánti kamabaa i kómu, hai góeꞌkou mohádi laluitana. Agáiáná kagóeꞌmi iti hampaiꞌ peá.

³⁶Agáiáná Kódóꞌ, ara sabiꞌKuꞌ to mopakanótó kaheánáNgkuꞌ, hai sabiꞌ iti melumbuꞌ mani hangko i posabiꞌna Iohane. Ane niꞌita pobágóꞌKuꞌ, iti miꞌi to mopakanótó kaheánáNgkuꞌ. Apa to Kubábehi deꞌe-deꞌe, iti miꞌi tandaꞌ kuasaꞌ to nahawaꞌiáꞌAꞌ UmáNgkuꞌ bona Kuparoo. Tandaꞌ kuasaꞌ to Kubábehi, iti to mopakanótó kaKódóꞌna to nahuoꞌ UmáNgkuꞌ mai i duniáꞌ deꞌe.

³⁷Hai melumbuꞌ hangko i hinti, UmáNgkuꞌ to mohuoꞌAꞌ mai, Ia haduduáNa mewaliꞌ sabiꞌKuꞌ bona mopakanótó kaKódóꞌna HuoꞌáNa. Agáiáná kómu, tiꞌara mani haweꞌ hangkani nihádi wambaꞌNa, tiꞌara mani niꞌita lenggeꞌNa.

³⁸LaluitaNa tiꞌara nipailalu, láwiꞌ tiꞌarakou mepoinálái i Kódóꞌ to Nahuoꞌ mai.

³⁹Pakakou mampegurui Sura Magasaꞌ, láwiꞌ nipekiri ane mampeguruikou Sura Magasaꞌ iti, ina nilámbiꞌ katueꞌ to maroꞌa to tiꞌara mokahópóꞌá. Mole Sura Magasaꞌ iti mopakanótó kaheánáNgkuꞌ.

⁴⁰Agáiáná kehapiꞌ noꞌonoꞌ, tiꞌara mani niundeꞌ mai i Kódóꞌ bona molámbiꞌkou katueꞌ to maroꞌa to tiꞌara mokahópóꞌá.

⁴¹TiꞌaraꞌAꞌ mampopetóiá i tauna,

⁴²agáiáná Kuisá ntepuꞌu lalumi, katiꞌárána ara ahiꞌmi i Pueꞌ Ala.

⁴³MaiAꞌ ieneꞌ hai kuasaꞌ to hangko i UmáNgkuꞌ, tiꞌaraꞌAꞌ nitarima. Agáiáná ane araheꞌ to mai i lalu kuasaꞌraꞌ haduduáraꞌ, nitarimaheꞌ.

⁴⁴Noumbá miꞌi kaꞌina mepoináláimi i Kódóꞌ, láwiꞌ niundeꞌ mani ratóiákou hángká rángámi. Kómu, tiꞌara niundeꞌ mobáliki lalumi bona natóiákou Pueꞌ Ala haduduáNa.

⁴⁵Ineeꞌ nipekiri kaKódóꞌna to ina mosalaꞌikou i UmáNgkuꞌ. Nipekiri ánti peuláꞌmi i Paturoꞌna Musa, ia to ina mampelaekou. Tiꞌara. Ngkáliꞌna riꞌi, nabiꞌ Musa to ina mosalaꞌikou.

⁴⁶Agáiáná ane toꞌu-toꞌu kamepoináláimi i Musa, manótó nipoináláiAꞌ woꞌo, láwiꞌ Musa moukiꞌ mokana i Kódóꞌ.[46]

⁴⁷Láwiꞌ tiꞌara nipoinálái apa to naukiꞌ Musa, laluitaNgkuꞌ woꞌo tiꞌara ina nipoinálái.”