Read Besoa Iohane 6 Bible Online

Iohane 6 - Besoa bible

Iohane 6

¹[47] Roo onoꞌ, Iesu lao tándáꞌ i mata alo rano Galilea, to rauliꞌ woꞌo rano Tiberia.

²Handaꞌ ntepuꞌu tauna meuláꞌ oaꞌ i Hia, láwiꞌ moitaheꞌ upu-upu tandaꞌ kuasaꞌ to Nabábehi i kamopakauriꞌNa to tiꞌara ralalu.

³Iesu mempanaiꞌ miꞌi lao i buluꞌ hingkakani hai topeguruNa, hai mehoda ionoꞌ.

⁴I tempó iti, ina haweꞌ alo mahile agama Iahudiꞌ to rauliꞌ alo Posusa Paska.

⁵Napeita riꞌi Iesu, mobárárámoheꞌ tauna to handaꞌ mantoleli mai mehungkuki. Nauliꞌ i Pilipu, “Iumbákeꞌ mohóló pandeꞌ, bona tauna to handaꞌ deꞌe peisáheꞌ tapopandeꞌ?”

⁶Katoꞌuána, naisá miꞌi Iesu apa to ina Nabábehi. Napekuneꞌ noꞌonoꞌ i Pilipu, láwiꞌ Napoinao moisá apa pekirina Pilipu bona tauna to handaꞌ peisáheꞌ rapopandeꞌ.

⁷Nauliꞌ Pilipu, “Kehapiꞌ rongatu dóiꞌ peráꞌ[48] tapopehóló pandeꞌ hai taweꞌiheꞌ upu-upu tauna, tiꞌara ina gáná kehapiꞌ hantóiꞌ-hantóiꞌ peá raweꞌiheꞌ.”

⁸Hangko ionoꞌ, hadua hangko i topeguruNa to rahangaꞌ Andaria ádina Simoꞌ Peturuꞌ, manguliꞌ,

⁹“Ieneꞌ ara hadua ánángkóiꞌ to meboku lima wuaꞌna rótiꞌ hai rombaꞌa bouꞌ, agáiáná apa miꞌi paꞌi pobunduꞌána i tauna to handaꞌ deꞌe?”

¹⁰Nauliꞌ Iesu, “Nihuoꞌmoheꞌ mehoda!” Mehoda mpuꞌumoheꞌ, hai pehodaꞌáraꞌ iti kerumpuꞌ. Kahandaꞌraꞌ tauna iti, rekeꞌ-rekeꞌna lima sábuna tobaleilo.[49]

¹¹Hangko ionoꞌ, Iesu moala miꞌi rótiꞌ hai bouꞌ iti, Napekakaeá hai Naweꞌimoheꞌ topeguruNa bona ragáláꞌ-gáláꞌáheꞌ tauna to handaꞌ to tangaꞌraꞌ mehoda. Mandeꞌmoheꞌ upu-upu duuꞌraꞌ mabuhu.

¹²Mabuhumoheꞌ upu-upu, nauliꞌ Iesu i topeguruNaheꞌ, “Nirámpu pelábiána, bona tiꞌara ara to ratibe mbero.”

¹³Upu miꞌi rarámpu, melábi mani hampuloꞌ hai rongkárándi hangko i lima wuaꞌna rótiꞌ to raꞌandeꞌ tauna to handaꞌ ininá.

¹⁴Karaitána tauna to handaꞌ tandaꞌ kuasaꞌ iti, molaluitamoheꞌ hadua hai hadua, rauliꞌ, “Hangaa-ngaa Ia miꞌi nabiꞌ nodo Musa to radándi hangkoia, to rauliꞌ ina mai i duniáꞌ!”[50]

¹⁵Mewaliꞌ tunggáiáraꞌ mopári-pári Iesu bona mewaliꞌ daturaꞌ. Kanaisána Iesu tunggáiáraꞌ iti, Ia pohuꞌ miꞌi hangko ionoꞌ lao mopataniꞌ haduduáNa i buluꞌ.

¹⁶Kalumbaꞌ miꞌi, topeguruNa mendáulumoheꞌ lao i rano

¹⁷mampegiá Iesu duuꞌna káindi, agáiáná tiꞌara haweꞌ. Mewaliꞌ moduangamoheꞌ ina lao i wánuá Kapenau.

¹⁸Tangaꞌraꞌ moduanga, haweꞌ miꞌi wui to rumihi, álána mahile bálumbá i rano.

¹⁹Kakaraoꞌraꞌ mowose lima ba ini kilómete hangko i wiwi rano,[51] moitamoheꞌ Iesu molumao i wongko uwai lao modupaꞌheꞌ. Malááꞌ ntepuꞌuheꞌ,

²⁰agáiáná nauliꞌ Iesu, “Ineeꞌkou malááꞌ! Kódóꞌnto deꞌe.”

²¹Karahádina wambaꞌNa, góeꞌmoheꞌ motarima Iesu i duangaraꞌ. Pengkaheꞌna Iesu i lalu duanga, kásáliu haweꞌmoheꞌ i wiwi rano to ratunggái.

²²Kahalona, handaꞌ tauna tándáꞌ i hambali rano mampeliꞌ Iesu, rauliꞌ, “Iumbá miꞌi? Ia tiꞌara moduanga hingkakani hai topeguruNaheꞌ ininá. Hai tiꞌara ara duanga ntániꞌna ieneꞌ, bateꞌna peá duanga to rapakeꞌ topeguruNa. {Mewaliꞌ noumbá riꞌi haneꞌi Ia peisá pohuꞌ hangko ieneꞌ?}”

²³Roo onoꞌ, haweꞌmoheꞌ tauna hangko i kótá Tiberia i lalu duangaraꞌ, hai mesoreheꞌ hungkuꞌ i pandeꞌáraꞌ tauna to handaꞌ to mandeꞌheꞌ rótiꞌ to nawátiꞌ Pueꞌ Iesu.

²⁴Karaisána tauna to handaꞌ Iesu hai topeguruNa tiꞌarapoheꞌ ara ionoꞌ, moduangamoheꞌ woꞌo lao i wánuá Kapenau mampeliꞌ Iesu.

²⁵Kahaweꞌraꞌ tauna to handaꞌ tándáꞌ i hambali rano mampohidupaꞌá Iesu, rapekuneꞌ, “Guru! ImpiráKoꞌ haweꞌ ieneꞌ, hai moapaKoꞌ mai?”

²⁶Mehániꞌ Iesu, “Toꞌu ntepuꞌu laluitaNgkuꞌ deꞌe: Kuisá tunggáiámi haneꞌiAꞌ mai nipeliꞌ. NipeliꞌAꞌ láwiꞌ mabuhumokou Kupopandeꞌ, tiꞌara láwiꞌ niꞌisá lempóna tandaꞌ kuasaꞌ to Kubábehi.

²⁷Ineeꞌkou mobágóꞌ mampeliꞌ pandeꞌ to hampalai peá kaupuna hai poloꞌ mawai. Mobágóꞌmokou mampeliꞌ pandeꞌ to tiꞌara peisá mawai hai to mampoweꞌi katueꞌ to maroꞌa to tiꞌara mokahópóꞌá. Ánáꞌ Mánusiá to ina mampoweꞌikou pandeꞌ iti, láwiꞌ Ia miꞌi to napileꞌi Pueꞌ Ala hai to Napokana bábehiáNa iti.”

²⁸Mekuneꞌheꞌ tauna to handaꞌ, “Apa to hangaa-ngaa kibábehi bona bábehiángkiꞌ hintotoꞌ hai peundeꞌána Pueꞌ Ala?”

²⁹Nauliꞌ Iesu, “Deꞌe miꞌi to naundeꞌ Pueꞌ Ala bona nibábehi: mepoináláimokou i Kódóꞌ to Nahuoꞌ mai.”

³⁰Onoꞌ miꞌi haneꞌi rauliꞌ wopiꞌi tauna to handaꞌ, “Ane noꞌonoꞌi, tandaꞌ kuasaꞌ apa to Nupopaitaꞌangkaiꞌ, bona kipoinálái kahangko i Pueꞌ Alana mpuꞌuKoꞌ mai? Apa to ina Nubábehi?

³¹Toioruntaꞌ hangkoia mandeꞌheꞌ rótiꞌ manna tangaꞌraꞌ i pádá loriꞌ, nodo to teukiꞌ i lalu Sura Magasaꞌ: ‘Ia mampoweꞌiheꞌ pandeꞌ to hangko i surugáꞌ.’[52] Ba Io woꞌo ina mobábehi tandaꞌ kuasaꞌ to noꞌonoꞌ?”

³²Nauliꞌ Iesu, “Katoꞌuána, tiꞌara nabiꞌ Musa to mampoweꞌi pandeꞌ hangko i surugáꞌ. Ngkáliꞌna riꞌi, UmáNgkuꞌ to mampoweꞌiheꞌ pandeꞌ, hai Ia miꞌi to mampoweꞌikou pandeꞌ to toꞌu-toꞌu hangko i surugáꞌ.

³³Pandeꞌ to naweꞌikou Pueꞌ Ala, ia miꞌi Ia to mendáulu mai hangko i surugáꞌ hai mampoweꞌi katueꞌ i tauna.”

³⁴Rauliꞌ tauna to handaꞌ, “Ane noꞌonoꞌi, Nuweꞌiangkaiꞌ woꞌo pandeꞌ iti i alo-alona!”

³⁵Nauliꞌ Iesu, “Kódóꞌ miꞌi deꞌe[53] pandeꞌ to mampoweꞌi katueꞌ. Heáná to mai i Kódóꞌ hai mepoinálái, tiꞌarapoheꞌ ina marimi hai tiꞌarapoheꞌ ina mangkadoꞌu duuꞌna i rue-ruena.

³⁶Agáiáná, nodo to Kuꞌuliꞌ ininá, kehapiꞌ niꞌita miꞌi tandaꞌ kuasaꞌ to Kubábehi ininá, tiꞌara manikou mepoinálái.

³⁷Upu-upu tauna to naweꞌiAꞌ UmáNgkuꞌ, bateꞌna mai i Kódóꞌ. Hai heáná peá to mai i Kódóꞌ, tiꞌara ina Kusápuáka.

³⁸KamaiNgkuꞌ hangko i surugáꞌ, tiꞌaraꞌAꞌ mai bona mampeuláꞌi peundeꞌáNgkuꞌ haduduáNgkuꞌ, ngkáliꞌna riꞌi maiAꞌ mampeuláꞌi peundeꞌána Pueꞌ Ala to mohuoꞌAꞌ.

³⁹Deꞌe miꞌi peundeꞌáNa: bona hangko i upu-upu tauna to NaweꞌiAꞌ, tiꞌara ara haweꞌ hadua to tegááki hangko i Kódóꞌ. Ngkáliꞌna riꞌi Naundeꞌ bona Kupopearóheꞌ upu-upu hangko i kapate i alo pobutusi i kahópóꞌána duniáꞌ.

⁴⁰Deꞌe miꞌi peundeꞌána UmáNgkuꞌ: bona upu-upu tauna to moitaꞌAꞌ hai mepoinálái i Kódóꞌ ÁnáꞌNa, ina molámbiꞌheꞌ katueꞌ to maroꞌa to tiꞌara mokahópóꞌá, hai ina Kupopearóheꞌ i alo pobutusi i kahópóꞌána duniáꞌ.”

⁴¹Hangko ionoꞌ, mohume-humemoheꞌ tadulakoraꞌ toIahudiꞌ, láwiꞌ nauliꞌ Iesu kaꞌIana miꞌi pandeꞌ to mendáulu mai hangko i surugáꞌ.

⁴²Molaluitamoheꞌ, rauliꞌ hadua hai hadua, “Tiꞌara paꞌi Iesu iti, ánáꞌna peá Iusupu? Taisá ntepuꞌu ináNa hai umáNa. Moapa riꞌi haneꞌi Nauliꞌ kaꞌIana hangko i surugáꞌ?”

⁴³Nauliꞌ Iesu, “Ineeꞌmokou mohume-hume.

⁴⁴Tiꞌara ara haweꞌ hadua to peisá mai i Kódóꞌ, ane tiꞌara nakióꞌ UmáNgkuꞌ to mohuoꞌAꞌ mai. Hai heáná peá to mai i Kódóꞌ, ina Kupopearó hangko i kapate i alo pobutusi i kahópóꞌána duniáꞌ.

⁴⁵I lalu suraraꞌ nabiꞌ-nabiꞌ hangkoia teukiꞌ node: ‘Pueꞌ Ala ina mopaturoꞌ upu-upu topeuláꞌNa.’[54] Mewaliꞌ, upu-upu tauna to mohádi hai motarima paturoꞌna UmáNgkuꞌ, bateꞌna ina maiheꞌ i Kódóꞌ.

⁴⁶Ineeꞌ riꞌi nipekiri araheꞌ to moita UmáNgkuꞌ. Bateꞌna peá Kódóꞌ to moita, láwiꞌ Kódóꞌ hangko i Pueꞌ Ala.

⁴⁷Toꞌu ntepuꞌu laluitaNgkuꞌ deꞌe: heáná to mepoinálái i Kódóꞌ, molámbiꞌheꞌ katueꞌ to maroꞌa to tiꞌara mokahópóꞌá.

⁴⁸Kódóꞌ miꞌi deꞌe pandeꞌ to mampoweꞌi katueꞌ.

⁴⁹Toiorumi hangkoia i pádá loriꞌ mandeꞌheꞌ pandeꞌ rótiꞌ manna, agáiáná mate peheꞌ upu-upu.

⁵⁰Agáiáná tiꞌara hibali hai pandeꞌ to mendáulu mai hangko i surugáꞌ. Heáná peá to mandeꞌ pandeꞌ deꞌe, tiꞌaraheꞌ ina mate.

⁵¹Kódóꞌ miꞌi deꞌe pandeꞌ to mendáulu mai hangko i surugáꞌ, pandeꞌ to mampoweꞌi katueꞌ i tauna! Heáná peá to mandeꞌ pandeꞌ deꞌe ina molámbiꞌheꞌ katueꞌ to tiꞌara mokahópóꞌá. Pandeꞌ ngkatueꞌ deꞌe, lempóna wátáNgkuꞌ to Kupeweꞌi bona tauna molámbiꞌ katueꞌ.”

⁵²Karahádina toIahudiꞌ laluitana Iesu iti, mombeháni-hániꞌmoheꞌ hadua hai hadua, rauliꞌ, “Noumbá haneꞌi peisá mampeweꞌi wátáNa i kitaꞌ bona taꞌandeꞌ?”

⁵³Onoꞌ miꞌi haneꞌi Nahángáꞌáꞌáheꞌ, “Ane tiꞌara niandeꞌ wátána Ánáꞌ Mánusiá, hai tiꞌara niꞌinu waheꞌNa, tiꞌarakou ina molámbiꞌ katueꞌ duuꞌna i rue-ruena.

⁵⁴Tauna to mandeꞌ wátáNgkuꞌ hai mainu waheꞌKuꞌ, ina molámbiꞌheꞌ katueꞌ to maroꞌa to tiꞌara mokahópóꞌá, hai ina Kupopearóheꞌ hangko i kapate i alo pobutusi i kahópóꞌána duniáꞌ,

⁵⁵láwiꞌ hangko i wátáNgkuꞌ ina nipolámbiꞌi pandeꞌ ngkatueꞌ, hai hangko i waheꞌKuꞌ ina nipolámbiꞌi uwai ngkatueꞌ.

⁵⁶Tauna to mandeꞌ wátáNgkuꞌ hai mainu waheꞌKuꞌ, ina mohintuwuꞌheꞌ oaꞌ hai Kódóꞌ, noꞌonoꞌ woꞌo Kódóꞌ hai hira.

⁵⁷UmáNgkuꞌ to mohuoꞌAꞌ, Ia miꞌi pentóáꞌána katueꞌ, hai Kódóꞌ tueꞌ hangko i Hia. Noꞌonoꞌ woꞌo tauna to mandeꞌ wátáNgkuꞌ, molámbiꞌheꞌ katueꞌ hangko i Kódóꞌ.

⁵⁸Kódóꞌ mpuꞌu miꞌi to rapándiriꞌ pandeꞌ to mendáulu hangko i surugáꞌ. Pandeꞌ iti tiꞌara nodo rótiꞌ manna to raꞌandeꞌ toiorumi hangkoia. Kehapiꞌmoheꞌ mandeꞌ rótiꞌ manna iti, bateꞌraꞌ mate. Agáiáná tauna to mandeꞌ pandeꞌ deꞌe, ina tueꞌheꞌ duuꞌna i rue-ruena.”

⁵⁹Iesu mopahaweꞌ upu-upuna iti i tempóna mepaturoꞌ i támbi penómbáꞌá i Kapenau.

⁶⁰Karahádina topeuláꞌNa laluitana Iesu iti, handaꞌheꞌ to manguliꞌ, “Paturoꞌ iti tiꞌara mesuaꞌ i akala! Heáná paꞌi to peisá mampeuláꞌi?”

⁶¹Agáiáná Iesu haduduáNa moisá pohume-humeraꞌ topeuláꞌNa, onoꞌ miꞌi haneꞌi Nahángáꞌáheꞌ, “Ba nipokóiꞌ riꞌi inao mohádi paturoꞌKuꞌ ininá?

⁶²Noumbá pekirimi ane niꞌita Ánáꞌ Mánusiá mengkaoreꞌ lao i katoroꞌáNa rungu-runguna?

⁶³Inaona miꞌi Pueꞌ Ala to mampoweꞌi katueꞌ. Kamaróhó tauna tiꞌara mobunduꞌ. LaluitaNgkuꞌ to Kupahaweꞌákou mentóáꞌ hangko i Inaona Pueꞌ Ala hai mampoweꞌi katueꞌ to tiꞌara mokahópóꞌá.

⁶⁴Agáiáná kehapiꞌ noꞌonoꞌ, ara mpuꞌu hantángáꞌ hangko i oloꞌmi to tiꞌara mampoinálái laluitaNgkuꞌ iti.” Nauliꞌ Iesu noꞌonoꞌ láwiꞌ Naisá ntepuꞌu miꞌi hangko i rungu-runguna kaheánáraꞌ to tiꞌara ina mepoinálái i Hia, hai Naisá woꞌo kaheánána to ina mampobaluꞌ wátáNa i ewáliNa.

⁶⁵Nauliꞌ wopiꞌi Iesu, “Onoꞌ miꞌi haneꞌi Kuꞌuliꞌ ininá, tiꞌara ara hadua to peisá mai i Kódóꞌ ane tiꞌara nakióꞌ UmáNgkuꞌ.”

⁶⁶Mantepuꞌu i tempó iti, handaꞌmoheꞌ topeuláꞌNa to mopálehi. Tiꞌara piꞌi raundeꞌ meuláꞌ i Hia.

⁶⁷Mewaliꞌ, Iesu mekuneꞌ wopiꞌi i topeguruNa to hampuloꞌ hai rodua, Nauliꞌ, “Ba kómu woꞌo ina mopálehiAꞌ?”

⁶⁸Nauliꞌ Simoꞌ Peturuꞌ, “Ane kipálehiKoꞌ Pueꞌ, i heánáꞌangkaiꞌ paꞌi ina lao, láwiꞌ Io peá to mohuwárá laluita to mampoweꞌi katueꞌ to maroꞌa duuꞌna i rue-ruena.

⁶⁹Kaiꞌ, kipoinálái miꞌi hai kiꞌisá kaꞌIona Huoꞌá to Magasaꞌ to hangko i Pueꞌ Ala.”

⁷⁰Nauliꞌ Iesu, “Kódóꞌ miꞌi to mopileꞌikou to hampuloꞌ hai rodua deꞌe, agáiáná tiꞌarakou upu-upu mampoinálái laluitaNgkuꞌ. Ara hadua hangko i kómu to nakuasaꞌi Datu Tokadake.”

⁷¹To natunggái Iesu ia miꞌi Iudasiꞌ ánáꞌna Simoꞌ Isikarioꞌ, láwiꞌ kehapiꞌ Iudasiꞌ mewaliꞌ hadua hangko i topeguruna Iesu to hampuloꞌ hai rodua, ia miꞌi to ina mampobaluꞌ Iesu i ewáliNa.