Read Besoa Iohane 7 Bible Online

Iohane 7 - Besoa bible

Iohane 7

¹Roo onoꞌ, Iesu lao mantoleli i tampoꞌ Galilea. Tiꞌara piꞌi Naundeꞌ lao i tampoꞌ Iudá, láwiꞌ araheꞌ tadulakoraꞌ toIahudiꞌ ionoꞌ to mampoinao ina mopapate.

²I tempó iti, ina haweꞌ miꞌi alo mahileraꞌ toIahudiꞌ to rauliꞌ Posusa Pobambaruꞌ.[55]

³Onoꞌ miꞌi haneꞌi rauliꞌ ádina Iesu i Hia, “Ineeꞌ roo-roo peKoꞌ ieneꞌ! LaomoKoꞌ i tampoꞌ Iudá, bona topeuláꞌMu ionoꞌ peisáheꞌ woꞌo moita tandaꞌ kuasaꞌ to Nubábehi.

⁴Ane mebuni-buni peKoꞌ oaꞌ ieneꞌ, tiꞌaraKoꞌ ina mewaliꞌ tauna to mokahangaꞌiá. Ane mobábehiKoꞌ tandaꞌ kuasaꞌ, hangaa-ngaa Nupopaitaꞌáheꞌ upu-upu tauna!”

⁵Noꞌonoꞌ miꞌi laluitaraꞌ ádina Iesu, láwiꞌ tiꞌaraheꞌ woꞌo mampoinálái kaꞌIana Datu Topehómpóꞌ.

⁶Mewaliꞌ nahángáꞌáheꞌ Iesu, “Tiꞌara mani haweꞌ tempóna Kupatongawaꞌáheꞌ kaheánáNgkuꞌ. Ane kómu, tiꞌara moapa ba impirákou lao i Ierusale,

⁷láwiꞌ tiꞌara ara tauna to mokáhihiꞌkou. Agáiáná Kódóꞌ, rakáhihiꞌAꞌ tauna to kadake i duniáꞌ deꞌe, láwiꞌ Kupakanótóáheꞌ kakadakena bábehiáraꞌ.

⁸Moiorumokou lao i posusaꞌá iti. Kódóꞌ tiꞌara maniAꞌ lao, láwiꞌ tiꞌara mani haweꞌ tempóNgkuꞌ.”

⁹Noꞌonoꞌ miꞌi laluitana Iesu i ádiNaheꞌ, hai toroꞌ mani oaꞌ i Galilea.

¹⁰Lao mpuꞌumoheꞌ ádina Iesu i Ierusale bona mouláꞌheꞌ Posusa Pobambaruꞌ. Kapohuꞌraꞌ iti, Iesu lao woꞌo, agáiáná lao ngkániiꞌ-niiꞌ bona tiꞌara raisá tauna to handaꞌ.

¹¹I posusaꞌá iti, tadulakoraꞌ toIahudiꞌ mampeliꞌ oaꞌ Iesu, rauliꞌ, “Iumbá ripaꞌi tauna iti?”

¹²Hai tauna to handaꞌ woꞌo, mombekuwi-kuwiheꞌ. Araheꞌ to manguliꞌ, “Ia tauna to maroꞌa.” Araheꞌ woꞌo to manguliꞌ, “Tiꞌara! Ia mopakanawoꞌ peá tauna to handaꞌ!”[56]

¹³Agáiáná tiꞌara haweꞌ hadua to pebáiꞌ molaluita i katongawaꞌána, láwiꞌ malááꞌheꞌ i tadulakoraꞌ toIahudiꞌ.

¹⁴Tangaꞌna posusa iti, Iesu mesuaꞌ i lalu tangabaa Támbina Pueꞌ Ala hai mantepuꞌu miꞌi mepaturoꞌ.

¹⁵Tingkáráꞌheꞌ toIahudiꞌ mohádi paturoꞌNa, rauliꞌ, “Noumbá haneꞌi Naisá upu-upu to teukiꞌ i lalu Sura Magasaꞌ, mole Ia tiꞌara mapángkáꞌ sikolaꞌNa?”[57]

¹⁶Nahángáꞌáheꞌ Iesu, “To Kupaturoꞌákou, paturoꞌ hangko i Pueꞌ Ala to mohuoꞌAꞌ mai, tiꞌara paturoꞌKuꞌ haduduáNgkuꞌ.

¹⁷Heáná to mampoinao mampeuláꞌi peundeꞌána Pueꞌ Ala ina raisá kahangko iumbáꞌána paturoꞌKuꞌ deꞌe, ba hangko i Pueꞌ Ala mpuꞌu, ba laluitaNgkuꞌ peá haduduáNgkuꞌ.

¹⁸Heáná peá to molaluita i lalu kuasaꞌna haduduána, ia mampeliꞌ peá bona ratóiá. Agáiáná Kódóꞌ, kupoinao bona Umángkuꞌ to mohuoꞌAꞌ mai rapomahile, láwiꞌ Kódóꞌ to manótó, tiꞌaraꞌAꞌ topodongkoꞌ.

¹⁹Nabiꞌ Musa hangkoia mampoweꞌikou Áturána Pueꞌ Ala, agáiáná tiꞌarakou ara hadua to mampeuláꞌi Áturá iti, mewaliꞌ moapa riꞌi haneꞌiAꞌ nipoinao nipapate?”

²⁰Hadua hangko i tauna to handaꞌ mohángáꞌá Iesu, “NapesuaꞌiKoꞌ setáꞌ! Heáná paꞌi to mampoinao mopapateKoꞌ?”

²¹Nauliꞌ Iesu, “Hangko mopakauriꞌntoAꞌ tauna i alo penómbáꞌá,[58] kóiꞌ miꞌi inaomi.

²²Mogalo kómu woꞌo, mobábehikou ádá petileꞌ i alo penómbáꞌá ane arai ánáꞌmi to hangaa-ngaa ratileꞌ i alo iti. Nabiꞌ Musa hangkoia mohuoꞌkou motileꞌ ánáꞌmi. Agáiáná katoꞌuána ádá petileꞌ iti hangko i toioruntaꞌ to moioru hangko i Musa, tiꞌara hangko i Musa haduduána.

²³Hai metileꞌ iti tepasuaꞌ woꞌo bágóꞌ. Ánti pampeuláꞌimi Paturoꞌna Musa, mogalo riꞌi alo penómbáꞌá, mobábehikou ádá petileꞌ. Mewaliꞌ, moapa riꞌi haneꞌi nikabukoꞌiAꞌ ane mopakauriꞌAꞌ tauna i alo penómbáꞌá?

²⁴Ineeꞌkou mosalaꞌi rángámi mouláꞌ peá apa to niꞌita, agáiáná hangaa-ngaa nibutusi i katoꞌu-toꞌuána.”

²⁵Karahádina bahangapaheꞌ toIerusale laluitana Iesu iti, wuliheꞌ. Araheꞌ to manguliꞌ, “Ba Ia miꞌi to rapeliꞌ tadulakontaꞌ bona rapapate?

²⁶Mole mepaturoꞌnto oaꞌ hai tiꞌara ara kamalááꞌNa, hai tiꞌara woꞌo ara to mokámbáróá. Ba tadulakontaꞌ moisá kaꞌIana mpuꞌu miꞌi Datu Topehómpóꞌ?

²⁷Agáiáná tiꞌara hintotoꞌ kaꞌIana Datu Topehómpóꞌ, láwiꞌ taisá kahangko iumbáNa mai. Ane haweꞌ mpuꞌu Datu Topehómpóꞌ to radándi hangkoia, tiꞌara ara to ina moisá kahangko iumbáNa mai.”[59]

²⁸Mewaliꞌ, tangaꞌna Iesu mepaturoꞌ i tangabaa Támbina Pueꞌ Ala, Ia molaluita miꞌi Napasimbuku, Nauliꞌ, “Niuliꞌ niꞌisánto kaheánáNgkuꞌ hai kahangko iumbáꞌáNgkuꞌ mai. TiꞌaraꞌAꞌ mai mouláꞌ peundeꞌáNgkuꞌ haduduáNgkuꞌ, agáiáná maiAꞌ mouláꞌ peundeꞌána Pueꞌ Ala to mohuoꞌAꞌ mai. Ia miꞌi to hintotoꞌ rapoinálái. Agáiáná Ia tiꞌara niꞌisá.

²⁹Kódóꞌ, Kuisá láwiꞌ hangko i Hia kamaiáNgkuꞌ, hai Ia to mohuoꞌAꞌ mai.”

³⁰Mewaliꞌ, ánti polaluitaNa noꞌonoꞌ, onoꞌ miꞌi haneꞌi araheꞌ to mampoinao mohakaꞌ Iesu, agáiáná tiꞌara mani mewaliꞌ láwiꞌ tiꞌara mani haweꞌ tempóNa ina mate.

³¹Agáiáná araheꞌ handaꞌ tauna i oloꞌraꞌ to mepoinálái i Hia, rauliꞌ, “Ane haweꞌ mpuꞌu Datu Topehómpóꞌ, ba ina handaꞌ mani tandaꞌ kuasaꞌ to Nabábehi hangko i tauna deꞌe? Hangaa-ngaa Ia miꞌi deꞌe Datu Topehómpóꞌ.”

³²Araheꞌ toParisi to mohádi pombekuwi-kuwiraꞌ tauna to handaꞌ kana i Iesu. Onoꞌ miꞌi haneꞌi toParisi hai kapalaꞌ-kapalaꞌ tadulako menómbá mohuoꞌheꞌ bahangapa topokámpái Támbina Pueꞌ Ala lao mohakaꞌ Iesu.

³³I tempó iti, Iesu mopaturoꞌ tauna to handaꞌ, Nahángáꞌáheꞌ, “TiꞌaraPoꞌ marue hingkakani hai kómu. Ina mesuleꞌAꞌ lao i Hia to mohuoꞌAꞌ mai.

³⁴I tempó iti, ina nipeliꞌAꞌ, agáiáná tiꞌaraPoꞌ ina nilámbiꞌ. Hai i kalaoáNgkuꞌ iti, tiꞌarakou peisá lao.”

³⁵Wuliheꞌ tadulakoraꞌ toIahudiꞌ mohádi laluitaNa, hai mombekuneꞌ-kuneꞌheꞌ, rauliꞌ, “Iumbá ripaꞌi ina lao, haneꞌi Nauliꞌ tiꞌara piꞌi talámbiꞌ? Ba Ia ina lao i tampoꞌ ntániꞌna bona toroꞌ hingkakani hai toIahudiꞌ to mokatoroꞌi tampoꞌraꞌ toIunani bona Ia peisá mopaturoꞌheꞌ toIunani ionoꞌ?

³⁶Hai apa lempóna laluitaNa to manguliꞌ ina tapeliꞌ, agáiáná tiꞌara talámbiꞌ, hai tiꞌarakeꞌ peisá lao i kalaoáNa?”

³⁷Alo kahópóꞌána Posusa Pobambaruꞌ iti, ia miꞌi alo to melumbuꞌ karapomahilena.[60] I alo iti, meángkáꞌ miꞌi Iesu i lalu Támbina Pueꞌ Ala, Nahángáꞌáheꞌ Napasimbuku, “Heáná peá tauna to mangkadoꞌu, maimokou mainu i Kódóꞌ![61]

³⁸Heáná peá to mepoinálái i Kódóꞌ, nodo to teukiꞌ i lalu Sura Magasaꞌ to manguliꞌ: Hangko i laluna ina moili oaꞌ uwai ngkatueꞌ.”

³⁹To natunggái laluitana Iesu ia miꞌi Inao to Magasaꞌ to ina mokale oaꞌ i laluraꞌ tauna to mepoinálái i Hia. I tempóna Iesu molaluita noꞌonoꞌ, Inao to Magasaꞌ tiꞌara mani mendáulu i topeuláꞌNa, láwiꞌ Iesu tiꞌara mani mesuleꞌ lao i peawaꞌNa i surugáꞌ.[62]

⁴⁰Handaꞌ tauna mohádi laluitana Iesu, hai araheꞌ hantángáꞌ to manguliꞌ, “Ia mpuꞌu miꞌi nabiꞌ to nodo Musa to nadándi Pueꞌ Ala hangkoia.”[63]

⁴¹Araheꞌ woꞌo to manguliꞌ, “Ia miꞌi deꞌe Datu Topehómpóꞌ!” Agáiáná araheꞌ woꞌo to manguliꞌ, “Tiꞌara! Ia toGalilea! Tiꞌara hintotoꞌ Datu Topehómpóꞌ mesupaꞌ hangko i Galilea,

⁴²láwiꞌ i lalu Sura Magasaꞌ teukiꞌ: Datu Topehómpóꞌ Ia miꞌi pemuleꞌána Datu Daudiꞌ, hai Ia woꞌo hangko i wánuá Beteleme, wánuá pesupaꞌána Daudiꞌ.”[64]

⁴³Onoꞌ miꞌi haneꞌi mombehániꞌ-hániꞌmoheꞌ tauna to handaꞌ: hantángáꞌheꞌ mepoinálái i Iesu, hantángáꞌheꞌ tiꞌara.

⁴⁴Araheꞌ to mampoinao mohakaꞌ Iesu, agáiáná tiꞌara haweꞌ hadua to mampokaꞌala mohakaꞌ.

⁴⁵Topokámpái Támbina Pueꞌ Ala to rahuoꞌ lao mohakaꞌ Iesu mesuleꞌheꞌ lao i toParisi hai kapalaꞌ-kapalaꞌ tadulako menómbá. Tiꞌaraheꞌ mewaliꞌ mohakaꞌ Iesu. Mekuneꞌheꞌ tadulako iti, rauliꞌ, “Moapa riꞌi haneꞌi tiꞌara nihakaꞌ hai niánti mai?”

⁴⁶Rahániki, “Láwiꞌ tiꞌara mani haweꞌ hangkani kihádi tauna molaluita nodo Ia!”

⁴⁷Mehániꞌheꞌ toParisi iti, “Ba maꞌalamokou woꞌo Napakanawoꞌ?

⁴⁸Tiꞌara ara haweꞌ hadua tadulako ba toParisi to mampoinálái kahangko i Pueꞌ AlaNa,

⁴⁹bateꞌna peá tauna to handaꞌ to mepoinálái i Hia, láwiꞌ tiꞌaraheꞌ mangisá Paturoꞌna Musa. Hárárámoheꞌ!”

⁵⁰Roo onoꞌ, molaluita miꞌi woꞌo hadua toParisi to rahangaꞌ Nikodemu. Nikodemu iti to hangkani miꞌi mampombelámbiꞌá Iesu.[65] Nauliꞌ Nikodemu i hángká rángána,

⁵¹“Mouláꞌ áturántaꞌ, tiꞌarakeꞌ peisá mohuku hadua tauna ane tiꞌara mani rahádi kárá-kárána hai rapáresáꞌ bábehiána.”[66]

⁵²Rángánaheꞌ iti mopakóiꞌ Nikodemu, rahángáꞌá, “Ba io woꞌo hadua toGalilea? Nupeita hai nupáresáꞌ i lalu Sura Magasaꞌ. Tiꞌara ara nabiꞌ to ina mesupaꞌ hangko i Galilea.” [

⁵³Roo onoꞌ, mesuleꞌheꞌ hadua-hadua lao i támbiraꞌ.