Read Besoa Iohane 8 Bible Online

Iohane 8 - Besoa bible

Iohane 8

¹Agáiáná Iesu pohuꞌ lao i Buluꞌ Saitu, hai hambengi ionoꞌ.[67]

²Kahalona mepulo-pulo, lao wopiꞌi Iesu i tangabaa Támbina Pueꞌ Ala. Haweꞌmoheꞌ tauna to handaꞌ mengkahungkuꞌ, hai Ia mehoda hai mopaturoꞌheꞌ.

³TangaꞌNa Iesu mepaturoꞌ, guru-guru agama hai toParisi haweꞌmoheꞌ moánti hadua towawine to ralámbiꞌ tangaꞌna mebualosi. Towawine iti rapopeángkáꞌ i oloꞌraꞌ tauna to handaꞌ,

⁴haneꞌi rahángáꞌá Iesu, “Guru, towawine deꞌe kilámbiꞌ tangaꞌna mebualosi!

⁵I lalu Paturoꞌna Musa, ara párentá to manguliꞌ towawine to mobábehi noꞌonoꞌ hangaa-ngaa rawatui duuꞌna mate. Mewaliꞌ noumbá polámbiꞌMu?”

⁶Tunggáiána pekuneꞌraꞌ iti, mampeliꞌ peheꞌ kamanawoꞌána laluitana Iesu bona rasalaꞌi.[68] Agáiáná Iesu tiꞌara mehániꞌ, motóngkóꞌ peá moukiꞌ hai karaweꞌNa i awu i wongko daula.

⁷Mekuneꞌheꞌ oaꞌ i Hia, onoꞌ miꞌi haneꞌi mengoaꞌ miꞌi Iesu, Nahángáꞌáheꞌ, “Heáná i oloꞌmi to tiꞌara madósá, ia miꞌi to ioru-oru mowatui towawine iti!”

⁸Roo onoꞌ, motóngkóꞌ wopiꞌi moukiꞌ i awu hai karaweꞌNa.

⁹Karahádina tadulako-tadulako toIahudiꞌ laluitana Iesu iti, hadua-haduaheꞌ pohuꞌ, mantepuꞌu hangko i tosae duuꞌna haweꞌ i to maleheꞌ, {láwiꞌ raisá kamasalaꞌraꞌ}. Kaupuána, Iesu perái to ara ionoꞌ hai towawine iti.

¹⁰Roo onoꞌ, Iesu mampengoaꞌ miꞌi towawine iti haneꞌi Nahángáꞌá, “Iumbámoheꞌ tauna to mosalaꞌikoꞌ ininá? Tiꞌara piꞌi paꞌi ara to mampoinao mohukukoꞌ?”

¹¹Nahániki towawine iti, “Tiꞌarapoheꞌ ara, Pueꞌ.” Nauliꞌ Iesu, “Kódóꞌ woꞌo, tiꞌarakoꞌ ina Kuhuku. Mewaliꞌ, mesuleꞌmokoꞌ, hai mantepuꞌu deꞌe-deꞌe, ineeꞌ wopakoꞌ mebualosi.”][69]

¹²Roo onoꞌ, molaluita wopiꞌi Iesu i toIahudiꞌ, Nauliꞌ, “Kódóꞌ miꞌi deꞌe pewangkaꞌ to mopamabaa laluraꞌ tauna i humalele duniáꞌ. Tauna to meuláꞌ i Kódóꞌ, tiꞌaraheꞌ molumao i lalu kakáindiána. Bateꞌna ina molámbiꞌheꞌ kamabaa to mopaꞌara katueꞌ to tiꞌara mokahópóꞌá.”

¹³Rauliꞌ toParisi, “Tiꞌara paraluu kipoinálái laluitaMu, láwiꞌ tiꞌara ara sabiꞌMu. Nupakanótó peá wátáMu haduduáMu.”[70]

¹⁴Nauliꞌ Iesu, “KehapiꞌAꞌ molaluita kana i wátáNgkuꞌ haduduáNgkuꞌ, bateꞌna toꞌu laluitaNgkuꞌ, láwiꞌ Kuisá kahangko iumbáꞌáNgkuꞌ mai hai Kuisá woꞌo iumbá kalaoáNgkuꞌ. Agáiáná kómu, tiꞌara niꞌisá.

¹⁵Kómu mebutusi mouláꞌ peá pekiri tauna. Kódóꞌ, tiꞌaraꞌAꞌ mohoda-hoda kárá-kárána ba heáná peá.

¹⁶Agáiáná, ane mohoda-hodaꞌáꞌAꞌ kárá-kárána tauna, pobutusiNgkuꞌ bateꞌna manótó, láwiꞌ tiꞌara haduduáNgkuꞌ. UmáNgkuꞌ to mohuoꞌAꞌ, Ia miꞌi to mamporángáꞌAꞌ.

¹⁷I lalu Sura Áturámi ara teukiꞌ node: ‘Ane ara rodua sabiꞌ to hibali polaluitaraꞌ, posabiꞌraꞌ iti hangaa-ngaa rapoinálái.’

¹⁸Ara rodua sabiꞌKuꞌ: Kódóꞌ haduduáNgkuꞌ, hai karoduána UmáNgkuꞌ to mohuoꞌAꞌ mai. Mewaliꞌ polaluitaNgkuꞌ hangaa-ngaa rapoinálái.”

¹⁹Onoꞌ miꞌi haneꞌi rapekuneꞌ toParisi, “Ane ara UmáMu, iumbá miꞌi deꞌe-deꞌe?” Mehániꞌ Iesu, “Tiꞌara niꞌisá kaheánáNgkuꞌ, hai tiꞌara woꞌo niꞌisá kaheánána UmáNgkuꞌ. Ane keniꞌisáꞌAꞌ, hangaa-ngaa keniꞌisá woꞌo UmáNgkuꞌ.”

²⁰Upu-upu iti napahaweꞌ Iesu tangaꞌna mepaturoꞌ i lalu tangabaa Támbina Pueꞌ Ala hungkuꞌ i petiꞌ pemboliá dóiꞌ popenómbá. Hai Iesu tiꞌara mani mewaliꞌ rahakaꞌ, láwiꞌ tiꞌara mani haweꞌ tempóNa.

²¹Iesu molaluita wopiꞌi i tauna to handaꞌ, “Ina pohuꞌAꞌ, hai ina nipeliꞌAꞌ, agáiáná ane matekou, dósámi tiꞌara ina teámpungi.[71] Mewaliꞌ i kalaoáNgkuꞌ, tiꞌarakou peisá ina lao.”

²²Karahádina tadulakoraꞌ toIahudiꞌ laluitaNa iti, molaluitaheꞌ hadua hai hadua, rauliꞌ, “Apa lempóna laluitaNa ininá? Ba mampoinao riꞌi menoꞌo, haneꞌi Nauliꞌ tiꞌarakeꞌ peisá lao i kalaoáNa.”

²³Nahángáꞌáheꞌ Iesu, “Kómu hangko i wóiꞌ, Kódóꞌ hangko i wongko. Kómu hangko i duniáꞌ deꞌe to bukeꞌ hai to kadake, Kódóꞌ tiꞌaraꞌAꞌ hangko i duniáꞌ deꞌe.

²⁴Onoꞌ miꞌi haneꞌi Kuhángáꞌáꞌákou, ane matekou, dósámi tiꞌara ina teámpungi, láwiꞌ ane tiꞌara nipoinálái laluitaNgkuꞌ to mopakanótó kaKódóꞌna miꞌi deꞌe,[72] bateꞌna mpuꞌukou mate hai dósámi tiꞌara ina teámpungi.”

²⁵Rapekuneꞌ, “Katoꞌu-toꞌuána, heáná mpuꞌuKoꞌ?” Mehániꞌ Iesu, “Kuhángáꞌámokou hangko i rungu-runguNgkuꞌ mepaturoꞌ!

²⁶Handaꞌ mani to ina Kuꞌuliꞌ hai Kusalaꞌiákou. Agáiáná Ia to mohuoꞌAꞌ mai, Ia to hintotoꞌ rapoinálái, hai apa to Kuhádi hangko i Hia, iti miꞌi to Kupahaweꞌ i kómu to ara i duniáꞌ.”

²⁷To natunggái Iesu, ia miꞌi UmáNa to i surugáꞌ, agáiáná tiꞌara raisá tauna heáná to Natunggái.

²⁸Onoꞌ miꞌi haneꞌi Nahángáꞌá wopaheꞌ, “Ane Ánáꞌ Mánusiá nipamapángkáꞌ i kau mombehape, hangko niꞌisá riꞌi kaKódóꞌna miꞌi deꞌe.[73] Hai ina niꞌisá woꞌo, tiꞌara ara hampákáꞌ to Kubábehi mouláꞌ peundeꞌáNgkuꞌ haduduáNgkuꞌ. Bateꞌna peá Kuꞌuliꞌ apa to NapaturoꞌáꞌAꞌ UmáNgkuꞌ.

²⁹Ia miꞌi to mohuoꞌAꞌ hai to mamporángáꞌAꞌ. TiꞌaraꞌAꞌ Napatodáhi haduduáNgkuꞌ, láwiꞌ Kubábehi oaꞌ apa to mopagóeꞌ laluNa.”

³⁰Tangaꞌna Iesu mopahaweꞌ upu-upu iti, handaꞌ toIahudiꞌ mepoinálái i Hia.

³¹Hangko ionoꞌ, Iesu molaluita i tauna to mepoinálái i Hia, Nauliꞌ, “Ane nipeuláꞌi oaꞌ paturoꞌKuꞌ, ina mewaliꞌ mpuꞌukou topeuláꞌKuꞌ,

³²hai ina niꞌisá miꞌi apa to toꞌu mokana i Pueꞌ Ala, álána tekábáhákou hangko i karapohawiꞌmi.”

³³Mehániꞌheꞌ, rauliꞌ, “Kaiꞌ deꞌe, pemuleꞌánaꞌangkaiꞌ Burahima! Tiꞌaraꞌangkaiꞌ hangkani rapohawiꞌ. Moapa riꞌi haneꞌi Nuꞌuliꞌ ina tekábáháꞌangkaiꞌ?”

³⁴Nauliꞌ Iesu, “Toꞌu ntepuꞌu laluitaNgkuꞌ deꞌe: upu-upu tauna to mobábehi dósá, napohawiꞌheꞌ dósá.

³⁵Ane hawiꞌ, tiꞌara peisá toroꞌ oaꞌ i támbina pueꞌna. Agáiáná ane ánáꞌnai, peisá toroꞌ oaꞌ i támbina umána duuꞌna i rue-ruena.[74]

³⁶Mewaliꞌ, ane Kódóꞌ mokábáhákou hangko i dósámi, tekábáhá mpuꞌumokou, láwiꞌ Kódóꞌ ÁnáꞌnaꞌAꞌ Pueꞌ Ala.

³⁷Kuisá kakómuna pemuleꞌána Burahima. Agáiáná arakou to mampoinao ina mopapateAꞌ, láwiꞌ tiꞌara nipailalu laluitaNgkuꞌ.

³⁸Apa to Kuita i lindoꞌna UmáNgkuꞌ, iti miꞌi to Kuhángáꞌáꞌákou. Agáiáná kómu mobábehi apa to napaturoꞌákou umámi.”

³⁹Rauliꞌ toIahudiꞌ, “Umángkiꞌ ia miꞌi Burahima!” Nauliꞌ Iesu, “Ane toꞌu-toꞌu ánáꞌnakou Burahima, moapa riꞌi haneꞌi tiꞌara nipeuláꞌi bábehiána?

⁴⁰Kupahaweꞌákou paturoꞌ to toꞌu to Kutarima hangko i Pueꞌ Ala, agáiáná nipoinao peAꞌ nipapate! Ane Burahima, tiꞌara noꞌonoꞌ bábehiána.

⁴¹Bábehiámi iti bateꞌna mampeuláꞌi bábehiána umámi!” Rahániki toIahudiꞌ, “Tiꞌaraꞌangkaiꞌ ánáꞌ bule! Umángkiꞌ hadua peá, Ia miꞌi Pueꞌ Ala.”

⁴²Nauliꞌ Iesu, “Ane toꞌu-toꞌu mpuꞌu Pueꞌ Ala Umámi, kenipokaꞌahiꞌAꞌ, láwiꞌ Kódóꞌ hangko i Pueꞌ AlaꞌAꞌ mai, hai Kódóꞌ miꞌi to Nahuoꞌ mai. TiꞌaraꞌAꞌ mai mouláꞌ peundeꞌáNgkuꞌ haduduáNgkuꞌ. MaiAꞌ mouláꞌ peundeꞌána Pueꞌ Ala, láwiꞌ Ia to mohuoꞌAꞌ mai.

⁴³Moapa riꞌi haneꞌi tiꞌara niꞌisá lempóna laluitaNgkuꞌ? Láwiꞌ tiꞌara nibuku mantaha mampehádingi paturoꞌKuꞌ.

⁴⁴Umámi ia miꞌi Datu Tokadake! Hai nipoinao oaꞌ mampeuláꞌi peundeꞌána umámi iti. Hangko i rungu-runguna ia miꞌi topepapate. Paturoꞌna tiꞌara nodo paturoꞌ to toꞌu, láwiꞌ tiꞌara ara to toꞌu i hia. Ia modongkoꞌ, láwiꞌ noꞌonoꞌ miꞌi pambiárána. Ia miꞌi pentóáꞌána upu-upu dongkoꞌ, hai upu-upu tauna to modongkoꞌ mampeuláꞌi peundeꞌána.[75]

⁴⁵Mewaliꞌ, onoꞌ miꞌi haneꞌi tiꞌaraꞌAꞌ nipoinálái, láwiꞌ apa to Kuꞌuliꞌ bateꞌna toꞌu.

⁴⁶Kódóꞌ tiꞌaraꞌAꞌ madósá, hai tiꞌara ara hadua hangko i kómu to peisá mopakanótó kaꞌárána dósáNgkuꞌ. Kupahaweꞌ apa to toꞌu, mewaliꞌ moapa riꞌi haneꞌi tiꞌaraꞌAꞌ nipoinálái?

⁴⁷Taunána Pueꞌ Ala moundeꞌ mampehádingi hai mampeuláꞌi laluitana Pueꞌ Ala. Agáiáná kómu, tiꞌara niundeꞌ mampehádingi laluitaNgkuꞌ, láwiꞌ tiꞌarakou hangko i Pueꞌ Ala.”

⁴⁸Rauliꞌ tadulakoraꞌ toIahudiꞌ, “Toꞌu to kiuliꞌ! Io toSamaria, tiꞌara toIahudiꞌ, hai napesuaꞌiKoꞌ setáꞌ.”

⁴⁹Nauliꞌ Iesu, “TiꞌaraꞌAꞌ napesuaꞌi setáꞌ. Kódóꞌ mobiláꞌAꞌ UmáNgkuꞌ. Agáiáná kómu, tiꞌaraꞌAꞌ nibiláꞌ.

⁵⁰TiꞌaraꞌAꞌ mampeliꞌ bona rapomahileAꞌ. Naundeꞌ Pueꞌ Ala bona rapomahileAꞌ, hai Ia miꞌi to mobutusi heáná to toꞌu.

⁵¹Toꞌu ntepuꞌu laluitaNgkuꞌ deꞌe: heáná to mampeuláꞌi laluitaNgkuꞌ, tiꞌaraheꞌ ina mate, agáiáná ina tueꞌheꞌ duuꞌna i rue-ruena.”

⁵²Rauliꞌ tadulakoraꞌ toIahudiꞌ, “Deꞌe-deꞌe kiꞌisá ntepuꞌu kanapesuaꞌiMu! Burahima mate miꞌi. Noꞌonoꞌ woꞌo upu-upu nabiꞌ hangkoia, matemoheꞌ. Agáiáná Nuꞌuliꞌ riꞌi heáná to mampeuláꞌi laluitaMu tiꞌaraheꞌ ina mate.

⁵³Ba Nuꞌuliꞌ riꞌi melumbuꞌ kamahilena tueꞌMu hangko i toioruntaꞌ Burahima to marue miꞌi mate? Ba melumbuꞌ kamahilena tueꞌMu hangko i upu-upu nabiꞌ to matemoheꞌ? HeánáraKoꞌ haneꞌi Nuꞌuliꞌ noꞌonoꞌ?”

⁵⁴Nauliꞌ Iesu, “Ane mampomahileAꞌ wátáNgkuꞌ haduduáNgkuꞌ, tiꞌara ara pobunduꞌána. Agáiáná UmáNgkuꞌ to mampomahileAꞌ. Niuliꞌ kaꞌIana Pueꞌ Ala to nipenómbái,

⁵⁵agáiáná katoꞌuána tiꞌarakou moisá Pueꞌ Ala. Kódóꞌ, Kuisá. Ane keKuꞌuliꞌ tiꞌara Kuisá, modongkoꞌAꞌ hibali hai kómu. Agáiáná Kuisá, hai Kupeuláꞌi laluitaNa.

⁵⁶Ane Burahima toiorumi, góeꞌ laluna láwiꞌ naisá kaꞌina naitaNgkuꞌ i alo kahaweꞌáNgkuꞌ. Ia moita miꞌi kahaweꞌáNgkuꞌ hai góeꞌ ntepuꞌu.”

⁵⁷Rauliꞌ tadulakoraꞌ toIahudiꞌ, “TinuwuꞌMu tiꞌara mani gáná lima puloꞌna parena. Noumbá haneꞌi Nuꞌuliꞌ Nuita miꞌi Burahima?”

⁵⁸Nauliꞌ Iesu, “Toꞌu laluitaNgkuꞌ deꞌe: hangko tiꞌara mani Burahima mesupaꞌ, Kódóꞌ araMoꞌ ami.”[76]

⁵⁹Karahádina toIahudiꞌ laluitaNa iti, motimaꞌmoheꞌ watu rapoinao mowatui Iesu.[77] Agáiáná Ia pohuꞌ ngkániiꞌ-niiꞌ hangko i Támbina Pueꞌ Ala hai tiꞌara piꞌi raita.