Read Besoa Iohane 9 Bible Online

Iohane 9 - Besoa bible

Iohane 9

¹Tangaꞌna Iesu molumao, Ia moita hadua tauna to bilo hangko i karapoánákana.

²Hadua hangko i oloꞌraꞌ topeguruNa mekuneꞌ, “Guru, moapa riꞌi haneꞌi tauna deꞌe bilo hangko i karapoánákana? Ánti dósána haduduána, ba ánti dósáraꞌ tosaena?”

³Mehániꞌ Iesu, Nauliꞌ, “Tiꞌara ánti dósána haduduána, hai tiꞌara woꞌo ánti dósáraꞌ tosaena. Ngkáliꞌna riꞌi tauna deꞌe bilo bona kuasaꞌna Pueꞌ Ala ina tongawaꞌ moliu i hia.

⁴Tempóna mani mabaa, hangaa-ngaa Kupopolumao bágóꞌna Pueꞌ Ala to mohuoꞌAꞌ mai. Láwiꞌ ina haweꞌ tempó makáindi, hai ane makáindi miꞌi, tiꞌara piꞌi ara tauna to peisá mobábehi apa-apa.

⁵TangaꞌKuꞌ mani i duniáꞌ, Kódóꞌ miꞌi deꞌe pewangkaꞌ to mopamabaa laluraꞌ tauna i humalele duniáꞌ.”

⁶Karoona Iesu molaluita noꞌonoꞌ, metinudu miꞌi i tampoꞌ. TinuduNa Nagalo hai tampoꞌ bona mewaliꞌ regeꞌ, haneꞌi Napoporiro mátána tobilo iti.

⁷Roo onoꞌ, Nahángáꞌá, “Laomokoꞌ membahoꞌ i Wuhuꞌ Siloa.” (“Siloa” iti, lempóna “rahuoꞌ”.)[78] Lao mpuꞌu miꞌi membahoꞌ, hai i pesuleꞌna, meita miꞌi.

⁸Hangko ionoꞌ, rángána hai tauna to moisá ia tobilo to membiáꞌ-mbiáꞌ peá iaꞌo, mombekuneꞌ-kuneꞌheꞌ, rauliꞌ, “Heáná riꞌi doꞌo? Tiꞌara paꞌi ia tobilo to biásá mehoda membiáꞌ-mbiáꞌ?”

⁹Ara to manguliꞌ, “Ia mpuꞌu!” Ara woꞌo to manguliꞌ, “Tiꞌara. Kahibalina peá lenggeꞌraꞌ.” Agáiáná tobilo iti manguliꞌ, “Kódóꞌ miꞌi deꞌe!”

¹⁰Mewaliꞌ, rapekuneꞌ, “Noumbá riꞌi haneꞌi peisákoꞌ meita?”

¹¹Nahángáꞌáheꞌ, “Tauna to rahangaꞌ Iesu mobábehi regeꞌ, Napoporiro mátángkuꞌ, haneꞌi Nahángáꞌáꞌáꞌaꞌ, ‘Laokoꞌ membahoꞌ i Wuhuꞌ Siloa.’ Lao mpuꞌumoꞌ membahoꞌ, hangko ionoꞌ meitamoꞌ!”

¹²Rapekuneꞌ, “Iumbá miꞌi tauna iti deꞌe-deꞌe?” Nahángáꞌáheꞌ, “Tiꞌara kuisá baiumbá miꞌi lao.”

¹³Iesu moala tampoꞌ, Nagalo hai tinuduNa, haneꞌi mopakauriꞌ tobilo iti. Iti mewaliꞌ i alo Satu, alo penómbáꞌáraꞌ toIahudiꞌ, onoꞌ miꞌi haneꞌi tobilo to meita iti raꞌánti lao i toParisi.

¹⁵ToParisi mekuneꞌ woꞌo i hia, rauliꞌ, “Noumbá riꞌi haneꞌi peisákoꞌ meita?” Nahángáꞌáheꞌ, “Ara to morirohi mátángkuꞌ hai regeꞌ. Upu onoꞌ, Nahuoꞌaꞌ lao membahoꞌ, onoꞌ miꞌi haneꞌiaꞌ meita.”

¹⁶Mewaliꞌ hantángáꞌheꞌ toParisi manguliꞌ, “Ane noꞌonoꞌi, tauna iti tiꞌara hangko i Pueꞌ Ala, láwiꞌ tiꞌara mampeuláꞌi áturá ineeꞌkeꞌ mobágóꞌ i alo penómbáꞌá.” Agáiáná hantángáꞌ woꞌo manguliꞌ, “Ane Ia tauna to madósá, hangko iumbá riꞌi mai kuasaꞌNa mobábehi tandaꞌ kuasaꞌ to noꞌonoꞌ?” Onoꞌ miꞌi haneꞌi mombehániꞌ-hániꞌheꞌ hadua hai hadua.

¹⁷Hangko ionoꞌ, mekuneꞌ wopaheꞌ toParisi i tobilo iti, rauliꞌ, “Noumbá polámbiꞌmu mokana i tauna iti? Nuꞌuliꞌ ininá Ia to mopakauriꞌ mátámu.” Nauliꞌ tobilo iti, “Tongawaꞌ Ia hadua nabiꞌ.”

¹⁸Agáiáná tadulakoraꞌ toIahudiꞌ tiꞌara rapoinálái kaꞌiana mpuꞌu miꞌi tauna to bilo hangkoia hai hangkaꞌ-hangkaꞌ peá meita. Onoꞌ miꞌi haneꞌi rakióꞌ inána hai umána bona mampohidupaꞌáheꞌ,

¹⁹haneꞌi rapekuneꞌ, “Toꞌu-toꞌu mpuꞌu paꞌi tauna deꞌe ánáꞌmi, to bilo hangko i karapoánákana? Noumbá riꞌi haneꞌi peisá meita?”

²⁰Rauliꞌ tosaena, “To kiꞌisá, ia miꞌi deꞌe ánáꞌkiꞌ, hai bilo hangko i karapoánákana.

²¹Agáiáná noumbá rárána haneꞌi peisá meita, tiꞌara kiꞌisá. Hai heáná to mopakauriꞌ, tiꞌara woꞌo kiꞌisá. Ia manginao miꞌi. Nipekuneꞌ rái i hia. Ia peisá mohániki pekuneꞌmi.”

²²Inána hai umána manguliꞌ noꞌonoꞌ, láwiꞌ malááꞌheꞌ i tadulako-tadulakoraꞌ toIahudiꞌ, láwiꞌ ara miꞌi kahimpuduána hawaꞌraꞌ tadulako-tadulako iti to node: heáná peá to manguliꞌ kaꞌIesuna Datu Topehómpóꞌ, tiꞌarapoheꞌ rapaliu mesuaꞌ i lalu támbi penómbáꞌá.

²³Onoꞌ miꞌi haneꞌi tosaena manguliꞌ, “Ia manginao miꞌi. Nipekuneꞌ rái i hia.”

²⁴Roo onoꞌ, rakióꞌ wopiꞌi tauna to bilo iti, hai rahángáꞌá, “Nunóáká i katoꞌu-toꞌuána i lindoꞌna Pueꞌ Ala! Kiꞌisá tauna iti tauna to madósá.”

²⁵Nahángáꞌáheꞌ, “Kódóꞌ, tiꞌara kuisá to mopakauriꞌ iti tomadósá ba tiꞌara. To kuisá peá, biloaꞌ hangkoia, agáiáná deꞌe-deꞌe meitamoꞌ.”

²⁶Hangko ionoꞌ, rapekuneꞌ wopiꞌi, “Apa to Nabábehi i hio? Hai noumbá ráráNa mopakauriꞌkoꞌ?”

²⁷Nahánikiheꞌ, “Roomokou kutuntuá ininá. Tiꞌara paꞌi nihádi? Moapa riꞌi haneꞌi mekuneꞌ-kuneꞌ manikou oaꞌ i kódóꞌ? Ba nipoinao woꞌo mewaliꞌ topeguruNa?”

²⁸Hangko ionoꞌ, mabukoꞌ ntepuꞌumoheꞌ haneꞌi rahángáꞌá, “Io riꞌi topeguruNakoꞌ tauna iti! Kaiꞌ, topegurunaꞌangkaiꞌ nabiꞌ Musa!

²⁹Kiꞌisá Pueꞌ Ala mopahaweꞌ laluitaNa i Musa hangkoia. Agáiáná tauna iti, tiꞌara kiꞌisá kahangko iumbáNa mai.”

³⁰Mehániꞌ tobilo iti, “Mepawuli mpuꞌukou! Niuliꞌ tiꞌara niꞌisá kahangko iumbáNa mai, mole riꞌi Ia to mopakauriꞌ mátángkuꞌ!

³¹Taisá Pueꞌ Ala tiꞌara mohániki pembiáꞌna tauna to madósá, ngkáliꞌna riꞌi Ia mampehádingi pembiáꞌna tauna to mengkoruꞌ i Hia hai to mampeuláꞌi hawaꞌNa.

³²Hangko i pewaliꞌána duniáꞌ, tiꞌara mani haweꞌ hangkani tahádi daritakáná to peisá mopakauriꞌ tauna to bilo hangko i karapoánákana.

³³Ane ketauna iti tiꞌara hangko i Pueꞌ Ala, manótó ketiꞌara peisá mobábehi nodo to mewaliꞌ i kódóꞌ!”

³⁴Rahániki tadulakoraꞌ toIahudiꞌ iti, “Io riꞌi to bukeꞌ dósá hangko i karapoánákamu. Moapa riꞌi haneꞌi báiꞌkoꞌ mopaturoꞌangkaiꞌ?” Hangko ionoꞌ, ia rapopesuwuꞌ hangko i támbi penómbáꞌá.

³⁵Nahádi Iesu karapopesuwuꞌna hangko i támbi penómbáꞌá, onoꞌ miꞌi haneꞌi lao Napombelámbiꞌá hai Nakuneꞌ, “Ba mepoináláikoꞌ i Ánáꞌ Mánusiá?”

³⁶Nauliꞌ tauna iti, “Tuá, Nuhángáꞌáꞌáꞌaꞌ heáná tauna iti, bona mepoináláiaꞌ i Hia.”

³⁷Nauliꞌ Iesu, “Nuita miꞌi! Ia miꞌi deꞌe to tangaꞌNa mampolaluitaꞌákoꞌ.”

³⁸Nauliꞌ tauna iti, “KupoináláiKoꞌ, Pueꞌ!” haneꞌi molingkudu menómbá i Hia.

³⁹Nauliꞌ Iesu, “KamaiNgkuꞌ i duniáꞌ deꞌe, maiAꞌ mobutusi kárá-káráraꞌ tauna, bona tauna to bilo peisá meita, hai tauna to meita ina mewaliꞌ bilo.”[79]

⁴⁰Araheꞌ bahangapa toParisi ionoꞌ to mohádi laluitana Iesu, rahángáꞌá, “Ba Nuꞌuliꞌ biloangkaiꞌ woꞌo?”

⁴¹Nauliꞌ Iesu, “Ane kebilokou, ketiꞌara ina niꞌisá apa to toꞌu, hai ketiꞌarakou masalaꞌ. Agáiáná láwiꞌ niuliꞌ meitantokou, bateꞌmi masalaꞌ hai dósámi tiꞌara teámpungi.”[80]