Read Besoa Surona Pueꞌ Iesu 1 Bible Online

Surona Pueꞌ Iesu 1 - Besoa bible

Surona Pueꞌ Iesu 1

¹Molámbiꞌ Teopilu i kaꞌaraꞌámu Teopilu to kubiláꞌ:[1] i lalu surangkuꞌ to rungu-runguna, kuꞌukiꞌ miꞌi upu-upu to nabábehi Iesu hai upu-upu paturoꞌNa, mantepuꞌu hangko i rungu-runguna mobágóꞌ,

²duuꞌna haweꞌ i alo pengkaoreꞌáNa lao i surugáꞌ. Hangko tiꞌara mani mengkaoreꞌ lao i surugáꞌ, Naweꞌimoheꞌ hawaꞌ moliu kuasaꞌNa Inao to Magasaꞌ i suroNa to Napileꞌi miꞌi.[2]

³I lalu iba puloꞌna alona, handaꞌ kánina Iesu mopatongawaꞌ wátáNa i suroNaheꞌ, bona tongawaꞌ katueꞌNa huleꞌ hangko i oloꞌraꞌ tomate. I tempó onoꞌ, Ia ara hingkakani hai suroNa iti, hai Napolaluitaꞌáheꞌ kana i popárentána Pueꞌ Ala.

⁴I tempóNa hirámpu hingkakani hai suroNa iti, Naweꞌiheꞌ woꞌo hawaꞌ deꞌe, Nauliꞌ, “Ineeꞌkou sieruꞌ pohuꞌ hangko i Ierusale, agáiáná nipegiá peá duuꞌna UmáNgkuꞌ mampoweꞌikou Inao to Magasaꞌ to Nadándiákou hai Kupohaweꞌámokou.[3]

⁵Iohane meriu hai uwai {tandaꞌ kamenosoꞌraꞌ miꞌi tauna iti}, agáiáná bahangapa mani alona, kómu ina rariukou hai Inao to Magasaꞌ[4] {to toꞌu-toꞌu ina mobáliki ntepuꞌu lalumi}.”

⁶I tempóna suroNa iti hingkakani hai Iesu {i buluꞌ Saitu},[5] mekuneꞌheꞌ, rauliꞌ, “Pueꞌ, ba i tempó deꞌe ina mewaliꞌKoꞌ Datu hai moaró huleꞌ popárentána toSáráeliꞌ {nodo Datu Daudiꞌ hangkoia},[6] ba tiꞌara mani?”

⁷Nahániki Iesu, “UmáNgkuꞌ peá to mopakanótó impirá pewaliꞌána upu-upu tunggáiáNa to Nabábehi hai kuasaꞌNa. Tiꞌara paraluu niꞌisá kómu.

⁸Agáiáná ina nilámbiꞌ kuasaꞌ ane mendáulu mai Inao to Magasaꞌ i kómu. Hai kómu, ina mewaliꞌkou sabiꞌKuꞌ i Ierusale, i humalele tampoꞌ Iudá hai Samaria, haweꞌ-haweꞌ i humalele duniáꞌ.”

⁹Karoona Iesu molaluita noꞌonoꞌ, mengkaoreꞌ miꞌi lao i surugáꞌ. Mengoaꞌmoheꞌ suroNa mampeita duuꞌna tiꞌara piꞌi raita láwiꞌ naháláꞌ miꞌi gawu.[7]

¹⁰Tangaꞌraꞌ mani mengoaꞌ i langiꞌ motótói pengkaoreꞌNa, hangkaꞌ-hangkaꞌ perái raita rodua tobaleilo to mewaruꞌ to bulá[8] meángkáꞌ i oloꞌraꞌ.

¹¹Rauliꞌ tauna to rodua iti, “Ee, toGalilea! Moapa riꞌi haneꞌi mengoaꞌkou oaꞌ i langiꞌ? Iesu to niꞌita deꞌe, mengkaoreꞌ miꞌi lao i surugáꞌ,[9] hai ina haweꞌ huleꞌ i duniáꞌ hangko i surugáꞌ nodo to niꞌita ininá.”

¹²I kapohuꞌraꞌ malaꞌeka iti, mesuleꞌmoheꞌ topeguruNa hangko i Buluꞌ Saitu lao i kótá Ierusale. Buluꞌ Saitu iti hakiló kakaraoꞌna[10] hangko i Ierusale.

¹³Kahaweꞌraꞌ i Ierusale, liliuheꞌ lao i támbi katoroꞌáraꞌ haneꞌi mengkaheꞌheꞌ i lintuꞌ to i reá. Suronaheꞌ Pueꞌ Iesu iti iamoheꞌ: Peturuꞌ hai Iohane ádina, Iakobu hai Andaria ádina; Pilipu hai Tómá; Batolomeu hai Matiu; Iakobu ánáꞌna Alapeu,[11] Simoꞌ toSeloꞌ,[12] hai Iudasiꞌ ánáꞌna Iakobu.[13]

¹⁴Ionoꞌ moromu-romuheꞌ upu-upu hai bahangapa towawine, tepasuaꞌ Maria inána Iesu, hai ádina Iesu[14] araheꞌ woꞌo ionoꞌ. Hampepekiriheꞌ, hai mekakaeheꞌ hingkakani.

¹⁵Hangkani tempó, araheꞌ rekeꞌ-rekeꞌna hangatu hai rompuloꞌ tauna to hirámpu. I tempó iti, meángkáꞌ miꞌi Peturuꞌ molaluita i oloꞌraꞌ halalu hampepepoináláina, nauliꞌ,

¹⁶“Halalu-halalu, apa to teukiꞌ i lalu Sura Magasaꞌ hangaa-ngaa tebukeki. Hangkoia ara laluita to napahaweꞌ Inao to Magasaꞌ i Datu Daudiꞌ mokana i Iudasiꞌ Isikarioꞌ. Iudasiꞌ iti to mampoioruá tauna to lao mohakaꞌ Iesu.

¹⁷Iudasiꞌ iti napopewaliꞌ Pueꞌ Iesu topeguruNa, hai ia mobágóꞌ hingkakani hai kaiꞌ.”

¹⁸Tampoꞌ kamateána Iudasiꞌ rahóló hai dóiꞌ to nalámbiꞌ Iudasiꞌ tempóna mampobaluꞌ Iesu.[15] Ionoꞌ miꞌi, ia manawoꞌ hai mate, mabeto taꞌina haneꞌi mabubu óntóꞌ laluna.

¹⁹Upu-upu toIerusale moisá apa to pewaliꞌ iti. Onoꞌ miꞌi haneꞌi tampoꞌ iti rahangaꞌ “Hakaldama.” Mouláꞌ básá Árá, básáraꞌ toIahudiꞌ, lempóna: Tampoꞌ Waheꞌ.

²⁰Nauliꞌ wopiꞌi Peturuꞌ, “I lalu Sura Petóiá, teukiꞌ node: ‘Patodáhi miꞌi katoroꞌána malaheꞌ. Ineeꞌ ara haweꞌ hadua tauna to mokatoroꞌi.’ [16] Hai ara woꞌo to teukiꞌ node: ‘Rángina miꞌi bágóꞌna naꞌala tauna ntániꞌna.’ ” [17]

²¹Hangko ionoꞌ, napaliliu Peturuꞌ laluitana, nauliꞌ, “Halalu-halalu, onoꞌ miꞌi haneꞌi hangaa-ngaa ara hadua to kipileꞌi, to mosabiki woꞌo katueꞌna huleꞌ Pueꞌ Iesu.[18] Tauna to kipileꞌi iti, hangaa-ngaa hadua to biásá miꞌi hingkakani hai kaiꞌ i tempóna Pueꞌ Iesu ara i oloꞌkiꞌ, mantepuꞌu hangko i periuna Iohane duuꞌna haweꞌ i pengkaoreꞌána Pueꞌtaꞌ lao i surugáꞌ.”

²³Hangko i oloꞌraꞌ, rapembiáꞌ rodua tobaleilo to ina rapileꞌi. Hadua rahangaꞌ Iusupu Barasaba,[19] to rauliꞌ woꞌo Iustu,[20] hai karoduána Mátiá.[21]

²⁴Roo onoꞌ, hadua hangko i oloꞌraꞌ mampekakaeáheꞌ, nauliꞌ, “Pueꞌ, Io to moisá laluraꞌ upu-upu tauna. Iudasiꞌ, to mewaliꞌ huoꞌáMu hangkoia, deꞌe-deꞌe mate miꞌi rahuku hintotoꞌ hai bábehiána. Onoꞌ miꞌi haneꞌi kipembiáꞌ i Hio Pueꞌ, bona Nupakanótóáꞌangkaiꞌ heáná hangko i oloꞌraꞌ tauna to rodua deꞌe to Nupileꞌi bona mewaliꞌ suroMu to ina mopaháwángi Iudasiꞌ mampopolumao bágóꞌMu.”

²⁶Rooheꞌ mekakae, rabolobiaꞌ miꞌi.[22] To kana ia miꞌi Mátiá. Ia raꞌángkáꞌ miꞌi mewaliꞌ surona Pueꞌ Iesu, bona gánáheꞌ hampuloꞌ hai rodua[23] nodo to rungu-runguna.