Read Besoa Surona Pueꞌ Iesu 11 Bible Online

Surona Pueꞌ Iesu 11 - Besoa bible

Surona Pueꞌ Iesu 11

¹Upu-upu surona Pueꞌ Iesu hai halalu hampepepoináláiraꞌ to ntániꞌna i tampoꞌ Iudá, mohádi kaꞌáráraꞌ tauna to tiꞌara toIahudiꞌ to motarimamoheꞌ woꞌo ngkóráꞌna Pueꞌ Ala.

²I kahaweꞌna Peturuꞌ i kótá Ierusale, bahangapaheꞌ toIahudiꞌ to mepoinálái i Iesu mosalaꞌi Peturuꞌ,

³rauliꞌ, “Moapa riꞌi haneꞌi mesuaꞌkoꞌ i támbina tauna to tiꞌara toIahudiꞌ,[177] hai mandeꞌkoꞌ woꞌo hingkakani hai hira?”

⁴Onoꞌ miꞌi haneꞌi natuntuáheꞌ Peturuꞌ upu-upu to mewaliꞌ mantepuꞌu hangko i rungu-runguna, nauliꞌ,

⁵“Tangaꞌkuꞌ mekakae i kótá Iope, hangkaꞌ-hangkaꞌ kuita pampetudeꞌá. I lalu pampetudeꞌá iti, kuita ara to nodo báná to mapepaꞌ, hai hokina to iba iti rabárárángi, haneꞌi raulu hangko i langiꞌ tóá i lindoꞌkuꞌ.

⁶Kuita óntóꞌna mampopengaa binataꞌ: ara to mobiti iba, ara to maila, ara to mendólóꞌ, hai ara woꞌo tádáhi.

⁷Tiꞌara marue hangko ionoꞌ, kuhádi wambaꞌ to manguliꞌ, ‘Peturuꞌ, meángkáꞌmokoꞌ, nusambalemoheꞌ binataꞌ iti láwiꞌ iti miꞌi pandeꞌmu.’

⁸Kuhániki: ‘Tiꞌara Pueꞌ! Tiꞌara haweꞌ hangkani kuandeꞌ binataꞌ to rapáliá mouláꞌ ádá ágámángkiꞌ láwiꞌ kedái.’

⁹Kuhádi wopiꞌi wambaꞌ iti manguliꞌ, ‘Apa to nauliꞌ Pueꞌ Ala maroꞌa, ineeꞌ nuꞌuliꞌ kedái.’

¹⁰Tálu miꞌi kánina mewaliꞌ noꞌonoꞌ, haneꞌi upu-upuna teoreꞌ miꞌi huleꞌ lao i langiꞌ.

¹¹Tempó onoꞌ woꞌo, tálu tobaleilo haweꞌ i támbi to kikatoroꞌi.[178] To tálu iti, rahuoꞌheꞌ hangko i kótá Kaisarea lao i kótá Iope mampeliꞌaꞌ.

¹²I tempó iti, nahángáꞌáꞌaꞌ Inao to Magasaꞌ, ‘Peturuꞌ, meuláꞌmokoꞌ i hira, hai ineeꞌ nupopontaniꞌ tauna.’[179] Mewaliꞌ lao mpuꞌuaꞌ hingkakani hai hira. Hai ara woꞌo sabiꞌkuꞌ ieneꞌ, láwiꞌ halaluntaꞌ to ini deꞌe mamporángáꞌaꞌ lao i Kaisarea. Kahaweꞌkiꞌ i támbina Koroneliu, mesuaꞌangkaiꞌ.

¹³Koroneliu iti mopahaweꞌ apa to naita, ia miꞌi hadua malaꞌeka to haweꞌ i támbina to mohángáꞌá, ‘Nuhuoꞌmoheꞌ bahangapa tauna lao i kótá Iope bona laoheꞌ mai moala hadua tobaleilo to rahangaꞌ Simoꞌ, to rauliꞌ woꞌo Peturuꞌ.

¹⁴Ia to ina mopahaweꞌákoꞌ bámbári to moánti katehómpóꞌ i hio hai i upu-upu tauna to toroꞌ i támbimu.’ ”

¹⁵Peturuꞌ mopaliliu wopiꞌi laluitana, nauliꞌ, “Mewaliꞌ, hangko mantepuꞌuaꞌ mopaturoꞌheꞌ, mendáulu miꞌi Inao to Magasaꞌ mokuasaꞌiheꞌ, hibali hai to mewaliꞌ i kitaꞌ toIahudiꞌ rungu-runguntaꞌ nakuasaꞌi Inao to Magasaꞌ i alo Pentakosta.[180]

¹⁶Hangko ionoꞌ, kubuhinao miꞌi laluitana Pueꞌ to manguliꞌ, ‘Iohane meriu hai uwai, agáiáná kómu ina rariukou hai Inao to Magasaꞌ.’[181]

¹⁷Mewaliꞌ halalu-halalu, kehapiꞌ tiꞌaraheꞌ toIahudiꞌ, tongawaꞌ ntepuꞌu miꞌi kanaweꞌiraꞌ Pueꞌ Ala Inao to Magasaꞌ, nodo to Naweꞌikeꞌ ánti pepoináláintaꞌ i Pueꞌ Iesu Kerisitu. Ane noꞌonoꞌi, heánáraꞌaꞌ paꞌi kódóꞌ deꞌe, haneꞌi ina kuewaꞌ tunggáiána Pueꞌ Ala i hira?”

¹⁸Karahádina tauna to natuntu iti, tiꞌarapoheꞌ mosalaꞌi Peturuꞌ, ngkáliꞌna riꞌi motóiáheꞌ Pueꞌ Ala, rauliꞌ, “Deꞌe-deꞌe tongawaꞌ miꞌi, Pueꞌ Ala motarimaheꞌ woꞌo tauna to tiꞌara toIahudiꞌ, hai Naweꞌiheꞌ tempó menosoꞌ hangko i dósáraꞌ bona peisáheꞌ woꞌo molámbiꞌ katueꞌ to maroꞌa to tiꞌara mokahópóꞌá.”

¹⁹Mantepuꞌu hangko i karapapatena Setepanu, tauna to mepoinálái i Iesu to toroꞌ i kótá Ierusale rapopeahiahiꞌheꞌ oaꞌ duuꞌraꞌ mahawuꞌ. Handaꞌheꞌ to melangka lao i wánuá ntániꞌna.[182] Araheꞌ to lao i Penisia, araheꞌ to lao i puló Sipuru, hai araheꞌ woꞌo to lao i kótá Antiokia i Siria.[183] I upu-upu wánuá to rapoliui, rabámbáriáheꞌ oaꞌ ngkóráꞌna Pueꞌ Ala, agáiáná bámbári iti rapahaweꞌ peá i toIahudiꞌ.

²⁰Mewaliꞌ ánti pobámbáriraꞌ Ngkóráꞌ Marasa, araheꞌ woꞌo tauna i puló Sipuru hai kótá Kirene to mepoinálái i Iesu.[184] Hangko i oloꞌraꞌ, araheꞌ to lao i kótá Antiokia moánti Ngkóráꞌ Marasa kana i Pueꞌ Iesu i tauna to tiꞌaraheꞌ toIahudiꞌ.

²¹Kuasaꞌna Pueꞌ ara i hira, áláraꞌ handaꞌ toAntiokia mepoinálái hai meuláꞌheꞌ i Pueꞌ Iesu.

²²Mewaliꞌ, tauna to mepoinálái to ara i Ierusale mohádiheꞌ woꞌo apa to mewaliꞌ i Antiokia iti. Onoꞌ miꞌi haneꞌi Baranaba[185] rahuoꞌ lao i Antiokia.[186]

²³Baranaba iti, hadua tauna to maroꞌa laluna. Ia nakuasaꞌi Inao to Magasaꞌ hai maróhó pepoináláina. Kahaweꞌna Baranaba i Antiokia, góeꞌ ntepuꞌu laluna láwiꞌ tongawaꞌ ntepuꞌu pewátiꞌna Pueꞌ Ala i hira to mepoinálái i Iesu. Mewaliꞌ Baranaba mopalindó laluraꞌ, hai mopaturoꞌheꞌ bona meuláꞌheꞌ oaꞌ i Pueꞌ Iesu hangko i laluraꞌ ntepuꞌu. Onoꞌ miꞌi haneꞌi handaꞌ woꞌo toAntiokia mepoinálái i Pueꞌ Iesu.

²⁵Roo onoꞌ, lao miꞌi Baranaba i kótá Tarusu mampeliꞌ Saulu.

²⁶Kanalámbiꞌna, naꞌánti lao i Antiokia. Baranaba hai Saulu toroꞌheꞌ ionoꞌ hampare kamaruena. Moromuheꞌ hai tauna to mepoinálái i Iesu, hai mopaturoꞌheꞌ handaꞌ tauna. I Antiokia miꞌi, tauna to mepoinálái i Iesu rungu-runguna rauliꞌ toSarani.

²⁷I tempó iti woꞌo, araheꞌ bahangapa nabiꞌ hangko i Ierusale to lao i kótá Antiokia.

²⁸Hadua hangko i hira to rahangaꞌ Agabu meángkáꞌ, hai moliu kuasaꞌna Inao to Magasaꞌ, nauliꞌ, “Ina haweꞌ tempó rimi to rumihi i humalele Kadatuá Roma.” Rimi iti mewaliꞌ mpuꞌu i tempó popárentána Datu Mahile Laudiu i Roma.[187]

²⁹Karahádina toSarani i Antiokia laluitana iti, rapoinao motulungi halalu hampepepoináláiraꞌ to ara i tampoꞌ Iudá. Mewaliꞌ upu-upuheꞌ mampeweꞌi dóiꞌ mouláꞌ pebukuáraꞌ hadua-hadua,

³⁰hai dóiꞌ iti rarámpu. Roo onoꞌ, Baranaba hai Saulu rapoináláiheꞌ moánti dóiꞌ iti lao i tadulakoraꞌ toSarani i kótá Ierusale.