Read Besoa Surona Pueꞌ Iesu 12 Bible Online

Surona Pueꞌ Iesu 12 - Besoa bible

Surona Pueꞌ Iesu 12

¹I tempó iti, Datu Herode Agaripa[188] mantepuꞌu mampopeahiahiꞌ bahangapa tauna to mepoinálái i Pueꞌ Iesu.

²Rápáꞌna, napehuoꞌá woꞌo bona Iakobu wutuꞌna Iohane rapapate hai pihoꞌ.

³Apa to nabábehi Datu Herode iti rapogóeꞌ toIahudiꞌ. Onoꞌ miꞌi haneꞌi Herode mohuoꞌmoheꞌ tauna bona lao mohakaꞌ Peturuꞌ. Iti mewaliꞌ i alo mahileraꞌ toIahudiꞌ to rauliꞌ Posusa Rótiꞌ to Tiꞌara Raragiꞌi.[189]

⁴Rahakaꞌ mpuꞌu miꞌi Peturuꞌ, hai ratarungku. Iba kolompoꞌ surudadoꞌ rapohawaꞌá mokámpái, ragáláꞌheꞌ iba-iba mombeháwá-háwá. Tunggáiána Herode bona kárá-kárána Peturuꞌ ina rahoda-hoda i lindoꞌraꞌ tauna to handaꞌ ane liu miꞌi Alo Posusa Paska.[190]

⁵Mewaliꞌ Peturuꞌ ara i lalu tarungku, agáiáná tauna to mepoinálái i Pueꞌ Iesu mampekakaeáheꞌ oaꞌ Peturuꞌ.

⁶Tunggáiána Herode, bona kahalona mepulo, Peturuꞌ ina raꞌánti i lindoꞌraꞌ tauna to handaꞌ {bona rahuku mate}. Tangaꞌ káindi, Peturuꞌ maturu rapaitangaꞌ rodua surudadoꞌ, hai taena potimbali rarante haneꞌi rapatakaꞌ i taeraꞌ surudadoꞌ to mokámpái. Ara woꞌo surudadoꞌ ntániꞌna to mokámpái babaꞌ tarungku.

⁷Hangkaꞌ-hangkaꞌ perái, ara to mewangkaꞌ i lalu tarungku, láwiꞌ haweꞌ miꞌi hadua malaꞌekana Pueꞌ. Malaꞌeka iti mogabeꞌ Peturuꞌ, nahángáꞌá, “Hawiáꞌkoꞌ mearó!” Tempó onoꞌ woꞌo, tekábáhá pemiꞌi rante hangko i taena.

⁸Nauliꞌ malaꞌeka iti i Peturuꞌ, “Nupatakaꞌ miꞌi pámpoumu, hai nupusaꞌ miꞌi sandalemu!” Napeuláꞌi mpuꞌu miꞌi Peturuꞌ hawaꞌna, hai roo onoꞌ, nauliꞌ wopiꞌi malaꞌeka, “Nupakeꞌ miꞌi kumbámu hai meuláꞌmokoꞌ i kódóꞌ.”

⁹Meuláꞌ mpuꞌu miꞌi Peturuꞌ i malaꞌeka iti. Agáiáná tiꞌara mani manótó i Peturuꞌ ba toꞌu-toꞌu mpuꞌui malaꞌeka to naita ba pampetudeꞌá peá.

¹⁰Molumaoheꞌ moliu i surudadoꞌ to mokámpái babaꞌ to rungu-runguna hai babaꞌ to karombuaꞌna, haneꞌi haweꞌheꞌ i babaꞌá besiꞌ pesuwuꞌá lao i kótá. Babaꞌá besiꞌ iti tebungkáhi haduduána, haneꞌi mesuwuꞌheꞌ ionoꞌ. Hangko mantepuꞌuheꞌ molumao i rárá lao i kótá, hangkaꞌ-hangkaꞌ perái malaꞌeka iti mopálehi Peturuꞌ.

¹¹Hangko ionoꞌ, manótó miꞌi pekirina Peturuꞌ haneꞌi nauliꞌ, “Óó, toꞌu ntepuꞌu! Pueꞌ to mohuoꞌ malaꞌekaNa maiaꞌ mokábáhá hangko i kuasaꞌna Datu Herode hai hangko i upu-upu tunggáiáraꞌ tadulakoraꞌ toIahudiꞌ i kódóꞌ.”

¹²Roo onoꞌ, lao miꞌi Peturuꞌ i támbina Maria,[191] inána Iohane to rauliꞌ woꞌo Marakusi.[192] I támbi iti, handaꞌheꞌ tauna to hirámpu mekakae.

¹³Mewaliꞌ Peturuꞌ mokadoꞌ babaꞌá támbi iti. Hadua towawine to mobágóꞌ ionoꞌ to rahangaꞌ Rode, lao ina mobungkáhi babaꞌá.

¹⁴Kanahádina wambaꞌna Peturuꞌ, góeꞌ ntepuꞌu Rode iti. Ánti kagóeꞌna, tiꞌara liliu mobungkáhi babaꞌ, agáiáná kawiáꞌ mesuaꞌ huleꞌ i támbi haneꞌi nauliꞌ, “Peturuꞌ ara i babaꞌ!”

¹⁵Rahángáꞌá tauna iti, “Ba mampaturuárakoꞌ?” Agáiáná nahuleꞌ-huleꞌ peá laluitana, onoꞌ miꞌi haneꞌi rahángáꞌá, “Tiꞌara Peturuꞌ noꞌonoꞌ, agáiáná malaꞌeka to mokámpái riꞌi.”[193]

¹⁶Tangaꞌna Rode lao i lalu támbi, Peturuꞌ mokadoꞌ oaꞌ babaꞌá. Rabungkáhi mpuꞌu miꞌi babaꞌá iti, hai raita Peturuꞌ. Tingkáráꞌ ntepuꞌuheꞌ.

¹⁷Hangko ionoꞌ, Peturuꞌ moángkáꞌ taena bona napakaniiꞌheꞌ, haneꞌi napahaweꞌáheꞌ noumbá rárána Pueꞌ mampopesuwuꞌ hangko i lalu tarungku. Napahópóꞌ miꞌi Peturuꞌ laluitana haneꞌi napembiáꞌ bona apa to pewaliꞌ iti rapahaweꞌ i halalu hampepepoináláina, hai rapahaweꞌ woꞌo i Iakobu.[194] Roo onoꞌ, pohuꞌ miꞌi Peturuꞌ lao i katoroꞌá ntániꞌna.

¹⁸Kahalona mepulo, mewaliꞌ miꞌi posisalaꞌ i oloꞌraꞌ surudadoꞌ topekámpái. Wuliheꞌ ba apa to mewaliꞌ i Peturuꞌ.

¹⁹Datu Herode Agaripa mohuoꞌ miꞌi tauna lao mampeliꞌ Peturuꞌ, agáiáná tiꞌara ralámbiꞌ. Onoꞌ miꞌi haneꞌi Herode mohuoꞌ surudadoꞌna to mokámpái Peturuꞌ bona rapáresáꞌheꞌ haneꞌi rahuku mate. Roo onoꞌ, Herode pohuꞌ hangko i tampoꞌ Iudá lao toroꞌ i kótá Kaisarea.

²⁰Hangkani tempó, rumihi kamabukoꞌna Datu Herode Agaripa i tauna to toroꞌ i kótá Tiru hai Sido, onoꞌ miꞌi haneꞌi pueꞌ wánuá iti mogómbóheꞌ. Pogómbóraꞌ iti, rabutusi bona bahangapa tauna hangaa-ngaa lao i kótá Kaisarea modame hai Datu Herode, láwiꞌ toTiru hai toSido iti molámbiꞌheꞌ pandeꞌraꞌ hangko i tampoꞌ to napárentá Herode. Rungu-runguna pueꞌ wánuá iti monáráhi hadua topobágóꞌna Herode to napoinálái ntepuꞌu Herode, bona ia modureiheꞌ. Hangaꞌna tauna iti Belastu.

²¹Mewaliꞌ i alo to rapakanótó, Herode mewaruꞌ datu mehoda i pehodaꞌá kadatuá, hai molaluita i tauna to handaꞌ.

²²Monganga-ngangaheꞌ tauna to handaꞌ rapasimbuku bona mopagóeꞌ laluna Herode, rauliꞌ, “Polaluitana nodo polaluitana pueꞌ, tiꞌara polaluitana tauna!”

²³Ánti kamaꞌángkáꞌna láwiꞌ tiꞌara naundeꞌ mobiláꞌ ba motóiá Pueꞌ Ala, kásáliu nahuku malaꞌekana Pueꞌ haneꞌi óntóꞌ laluna naꞌandeꞌ kahindoro duuꞌna mate.[195]

²⁴I tempó iti, tetámbái miꞌi tauna to mampehádingi ngkóráꞌna Pueꞌ, hai tetámbái miꞌi woꞌo kahandaꞌraꞌ to mepoinálái i Iesu.

²⁵Roo miꞌi bágóꞌraꞌ Baranaba hai Saulu i kótá Ierusale, mesuleꞌmoheꞌ lao i Antiokia, hai moántiheꞌ Iohane to rauliꞌ woꞌo Marakusi.