Read Besoa Surona Pueꞌ Iesu 14 Bible Online

Surona Pueꞌ Iesu 14 - Besoa bible

Surona Pueꞌ Iesu 14

¹Apa to mewaliꞌ i kótá Antiokia, mewaliꞌ wopiꞌi i kótá Ikoniu.[213] Paulu hai Baranaba lao i támbi penómbáꞌáraꞌ toIahudiꞌ hai mopahaweꞌheꞌ Ngkóráꞌ Marasa i tauna to hirámpu ionoꞌ, álána handaꞌheꞌ toIahudiꞌ hai tauna to tiꞌara toIahudiꞌ mepoinálái i Iesu.

²Agáiáná toIahudiꞌ to tiꞌara mepoinálái, mopamaꞌamuꞌheꞌ laluraꞌ handaꞌ tauna to tiꞌara toIahudiꞌ, bona mokáhihiꞌheꞌ tauna to mepoinálái i Pueꞌ Iesu.

³Marue ntepuꞌuheꞌ Paulu hai Baranaba toroꞌ i kótá iti. Tiꞌaraheꞌ malááꞌ mopahaweꞌ bámbári kana i Pueꞌ, hai Pueꞌ moweꞌiheꞌ kuasaꞌ mobábehi tandaꞌ kuasaꞌ to metingkáráki bona tongawaꞌ i upu-upu tauna katoꞌuna Ngkóráꞌ Marasa to rapahaweꞌ. Ngkóráꞌ Marasa iti mokana i kabulána laluna Pueꞌ Ala to moweꞌi katehómpóꞌ i tauna.

⁴Agáiáná tauna to toroꞌ i kótá iti, tiꞌaraheꞌ hampepekiri. Araheꞌ to tándáꞌ i toIahudiꞌ, hai araheꞌ woꞌo to tándáꞌ i surona Pueꞌ Iesu to rodua iti.

⁵Kahópóꞌána toIahudiꞌ hai tadulakoraꞌ, hai tauna to tiꞌara toIahudiꞌ, moliwoheꞌ bona Paulu hai Baranaba rapopeahiahiꞌ hai rawatui.

⁶Agáiáná i karaisána Paulu hai Baranaba tunggáiáraꞌ iti, melangkaheꞌ lao i kótá Lisitera hai Debe i roboꞌ Likaonia hai kótá-kótá ntániꞌna to hungkuꞌ ionoꞌ.

⁷Ionoꞌ mopahaweꞌheꞌ woꞌo Ngkóráꞌ Marasa.

⁸I kótá Lisitera, ara hadua tobaleilo to paluꞌ hangko i karapoánákana. Ia mehoda peá oaꞌ, tiꞌara nabuku molumao láwiꞌ tiꞌara maróhó bitina.

⁹Topaluꞌ iti mehoda hai mampehádingi polaluitana Paulu. Paulu motótói topaluꞌ iti, hai napailalu kamaróhóna pepoináláina, mewaliꞌ naisá kapeisána rapakauriꞌ.

¹⁰Onoꞌ miꞌi haneꞌi nauliꞌ Paulu napasimbuku i hia, “Meángkáꞌmokoꞌ!” To paluꞌ iti meángkáꞌ ngkásárá haneꞌi liliu molumao.

¹¹Karaitána tauna to handaꞌ tandaꞌ kuasaꞌ to nabábehi Paulu, molaluitamoheꞌ i lalu básáraꞌ, básá Likaonia, rauliꞌ, “Mendáulumoheꞌ ánitu mai i duniáꞌ, nodoheꞌ lenggeꞌ tauna!”

¹²Baranaba rahangaꞌ Seu, {hangaꞌna datu ánituraꞌ}, hai Paulu rahangaꞌ Heme, {hangaꞌna ánituraꞌ to moánti tewái}, láwiꞌ Paulu to biásá molaluita.

¹³I rawa kótá iti, ara támbi penómbáꞌá i ánitu Seu. Tadulako menómbá ionoꞌ moánti bahangapa báꞌána gapiꞌ laki hai bungaꞌ lao i babaꞌá bente kótá, hai handaꞌ ntepuꞌu tauna to meuláꞌ. Tunggáiáraꞌ mosambale gapiꞌ iti, ina rapenómbá i Paulu hai Baranaba.

¹⁴Agáiáná i karaisána suro iti, ia miꞌi Paulu hai Baranaba, apa tunggáiáraꞌ tauna to handaꞌ, mohepaꞌ-hepaꞌmoheꞌ waruꞌraꞌ {tandaꞌ katiꞌárána rapokana tunggáiáraꞌ iti}, hai melangkaheꞌ lao i tangaꞌraꞌ tauna to handaꞌ, mongangaheꞌ rapasimbuku, rauliꞌ,

¹⁵“Apa riꞌi to nibábehi? Kaiꞌ deꞌe, tauna biásá peangkaiꞌ nodo woꞌo kómu. Maiangkaiꞌ moánti Ngkóráꞌ Marasa i kómu, bona nikábáhá penómbámi i ánitu to tiꞌara mobunduꞌ hai menómbá pekou i Pueꞌ Ala to tueꞌ, láwiꞌ Ia miꞌi to mampopewaliꞌ langiꞌ, duniáꞌ, tahiꞌ hai upu-upu óntóꞌna.

¹⁶Hangkoia Pueꞌ Ala mopaliu tauna menómbá mouláꞌ peá peundeꞌáraꞌ haduduáraꞌ.

¹⁷Agáiáná Napoweꞌikeꞌ oaꞌ tandaꞌ to mopakanótóákeꞌ kaheánáNa. Ia mobábehiákeꞌ apa to maroꞌa: rápáꞌna, Naweꞌikeꞌ udá hangko i langiꞌ, Napopowuaꞌ tudaꞌ-tudaꞌtaꞌ i tempóna, Naweꞌikeꞌ pandeꞌ, hai Naweꞌikeꞌ woꞌo kagóeꞌ lalu.”

¹⁸Agáiáná kehapiꞌ noꞌonoꞌ polaluitaraꞌ Paulu hai Baranaba i tauna to handaꞌ, maꞌángkárá mani mokóntóheꞌ bona tiꞌaraheꞌ moánti popenómbáraꞌ i hira.

¹⁹Tiꞌara marue hangko ionoꞌ, bahangapaheꞌ toIahudiꞌ hangko i kótá Antiokia hai Ikoniu haweꞌ i kótá Lisitera. ToIahudiꞌheꞌ iti mopamaꞌamuꞌ laluraꞌ tauna to handaꞌ i Lisitera bona laoheꞌ mowatui Paulu. Karoona rawatui, wátána radiiꞌ soso lao i rawa kótá hai rapálehi ionoꞌ, láwiꞌ rauliꞌ ripaꞌi mate miꞌi.

²⁰Agáiáná tangaꞌraꞌ toSarani i Lisitera meángkáꞌ motolelingi, mearó miꞌi Paulu, hai liliu mesuaꞌ i lalu kótá. Kahalona, pohuꞌmoheꞌ Paulu hai Baranaba lao i kótá Debe.

²¹I kótá Debe, Paulu hai Baranaba mopahaweꞌheꞌ woꞌo Ngkóráꞌ Marasa, álána handaꞌ tauna mepoinálái i Iesu. Roo onoꞌ, mesuleꞌheꞌ lao i kótá Lisitera hai Ikoniu, haneꞌi liliuheꞌ lao i kótá Antiokia i roboꞌ Pisidia.

²²I upu-upu kótá to rapoliui, Paulu hai Baranaba mopakaróhó laluraꞌ tauna to mepoinálái i Iesu hai mopaturoꞌheꞌ bona maróhó oaꞌ pepoináláiraꞌ. Rahángáꞌáheꞌ, “Kitaꞌ hangaa-ngaa molámbiꞌkeꞌ handaꞌ pákáꞌna kapári hangko tiꞌara manikeꞌ mesuaꞌ i popárentána Pueꞌ Ala.”

²³I polumaoáraꞌ iti i upu-upu jemaꞌa, Paulu hai Baranaba mampileꞌi tauna to mewaliꞌ pinátuá. Mopuasaꞌ hai mekakaeheꞌ, membiáꞌ bona Pueꞌ mokádipuráheꞌ láwiꞌ Ia pentóáꞌána pepoináláiraꞌ.

²⁴Roo onoꞌ, Paulu hai Baranaba mopaliliuheꞌ polumaoraꞌ moliu roboꞌ Pisidia haweꞌ i poropensi Pampilia.

²⁵Hangko ionoꞌ, moántiheꞌ ngkóráꞌna Pueꞌ Ala i kótá Pega, hai mendáuluheꞌ lao i wiwi tahiꞌ haweꞌ i kótá Atalia.

²⁶Hangko i kótá Atalia iti, mengkaheꞌheꞌ i duanga tahiꞌ haneꞌiheꞌ mesuleꞌ lao i kótá Antiokia i tampoꞌ Siria. Kótá Antiokia iti ia miꞌi kótá pantepuꞌuána polumaoraꞌ moánti Ngkóráꞌ Marasa. Iaꞌo, kaꞌina pohuꞌraꞌ hangko i Antiokia iti, toSarani ionoꞌ mampekakaeáheꞌ hai membiáꞌ bona nakámpáiheꞌ Pueꞌ Ala hangko i kabulána laluNa i pampopolumaoraꞌ bágóꞌraꞌ.[214] Hai roo mpuꞌu miꞌi bágóꞌraꞌ iti.

²⁷Mewaliꞌ i kahaweꞌraꞌ huleꞌ i Antiokia, Paulu hai Baranaba morámpuheꞌ upu-upu tauna to mepoinálái i Pueꞌ Iesu, hai mampodaritaheꞌ apa to nabábehi Pueꞌ Ala i lalu polumaoáraꞌ. Rapodarita woꞌo noumbá Pueꞌ Ala mampobungkáhiáheꞌ rárá bona tauna to tiꞌara toIahudiꞌ mepoináláiheꞌ woꞌo i Iesu.

²⁸Roo onoꞌ, Paulu hai Baranaba marueheꞌ toroꞌ i kótá Antiokia iti hingkakani hai tauna to mepoinálái.