Read Besoa Surona Pueꞌ Iesu 17 Bible Online

Surona Pueꞌ Iesu 17 - Besoa bible

Surona Pueꞌ Iesu 17

¹Paulu hai Silasi mopaliliuheꞌ polumaoraꞌ moliu i kótá Ampipoli hai Apolonia haweꞌ-haweꞌ i kótá Tesalonika. I Tesalonika iti, ara hambuaꞌ támbi penómbáꞌáraꞌ toIahudiꞌ.

²Nodo biásána, Paulu lao i támbi penómbáꞌá iti mampolaluita i tauna to hirámpu ionoꞌ mokana i ngkóráꞌna Pueꞌ Ala. Tálu mingguna mombehuhuꞌ, Paulu mobábehi noꞌonoꞌ i alo penómbáꞌá

³bona napakanótóáheꞌ lempóna Sura Magasaꞌ. Nauliꞌ, “Datu Topehómpóꞌ to nadándi Pueꞌ Ala hangkoia, hangaa-ngaa mantódihá kapári duuꞌna mate, agáiáná Ia tueꞌ huleꞌ. Iesu to kupolaluita i kómu, Ia miꞌi Datu Topehómpóꞌ iti.”

⁴Araheꞌ bahangapa toIahudiꞌ to motarima laluita iti, meuláꞌheꞌ i Paulu hai Silasi. Araheꞌ woꞌo tauna ntániꞌna to mepoinálái, tepasuaꞌ handaꞌ toIunani to mengkoruꞌ i Pueꞌ Ala, hai handaꞌ woꞌo towawine to rabiláꞌ.

⁵Agáiáná toIahudiꞌ to tiꞌara mepoinálái, mahiniꞌheꞌ i Paulu hai Silasi. Onoꞌ miꞌi haneꞌi hirámpuheꞌ bahangapa tauna to masilaka to ara i kahiruhuá topobaluꞌ-baluꞌ, hai mopamaꞌamuꞌheꞌ laluraꞌ bona laoheꞌ mobábehi pohiho hai pohioro i lalu kótá. Kahaweꞌraꞌ i támbi to rakatoroꞌi Paulu hai Silasi, mesuaꞌheꞌ. Tunggáiáraꞌ ina rahakaꞌheꞌ hai raꞌánti lao i lindoꞌraꞌ tauna to handaꞌ,

⁶agáiáná tiꞌara ralámbiꞌ. Onoꞌ miꞌi haneꞌi mohakaꞌheꞌ pueꞌ támbi to rahangaꞌ Iaso. Iaso iti hai bahangapa toSarani raꞌánti lao i lindoꞌraꞌ topopárentá. Kahaweꞌraꞌ ionoꞌ, tauna to handaꞌ monganga-ngangaheꞌ rapasimbuku, rauliꞌ, “Paulu hai rángánaheꞌ deꞌe mampoposisalaꞌmoheꞌ tauna i humalele duniáꞌ, hai maiheꞌ woꞌo ieneꞌ mampoposisalaꞌ tauna i kótántaꞌ.

⁷Hai Iaso deꞌe, motarimaheꞌ i lalu támbina! Hira iti to moewaꞌ hawaꞌna datuntaꞌ i Roma.[229] Rauliꞌ kaꞌárána datu ntániꞌna to rahangaꞌ Iesu.”

⁸Karooraꞌ tauna to handaꞌ hai topopárentá mohádi laluitaraꞌ, mabukoꞌ ntepuꞌuheꞌ.

⁹Iaso hai halalu hampepepoináláina hangaa-ngaa mobaiariheꞌ dóiꞌ to handaꞌ, tandaꞌ podándiraꞌ tiꞌara piꞌi ina ara pohiho. Roo onoꞌ, rakábáháheꞌ.

¹⁰I wengi iti, halalu hampepepoináláiraꞌ mohángáꞌáheꞌ Paulu hai Silasi bona pohuꞌheꞌ hangko i kótá Tesalonika, lao i wánuá Berea. Kahaweꞌraꞌ i Berea, Paulu hai Silasi laoheꞌ i támbi penómbáꞌáraꞌ toIahudiꞌ.

¹¹ToIahudiꞌ to i Berea iti, maroꞌa ntepuꞌu laluraꞌ, tiꞌara nodo toIahudiꞌ to i Tesalonika. Raundeꞌ ntepuꞌu mampehádingi ngkóráꞌna Pueꞌ to rapahaweꞌáheꞌ Paulu hai Silasi. Alo-alona mopáresáꞌheꞌ Sura Magasaꞌ bona raisá ba toꞌu laluitana Paulu {mokana i Datu Topehómpóꞌ} ba tiꞌara.

¹²Handaꞌheꞌ toIahudiꞌ to mepoinálái i Iesu. Hai handaꞌheꞌ woꞌo toIunani to mepoinálái, maroꞌa tobaleilo maroꞌa towawine to rabiláꞌ.

¹³Tiꞌara marue hangko ionoꞌ, toIahudiꞌ i kótá Tesalonika mohádiheꞌ bámbárina Paulu mopahaweꞌ ngkóráꞌna Pueꞌ Ala i wánuá Berea, onoꞌ miꞌi haneꞌi laoheꞌ woꞌo i Berea mopamaꞌamuꞌ laluraꞌ tauna to handaꞌ.

¹⁴Mewaliꞌ toSarani to ara ionoꞌ hawiáꞌheꞌ mowawa Paulu lao i wiwi tahiꞌ. Agáiáná Silasi hai Timotiu toroꞌ maniheꞌ i Berea.

¹⁵Paulu raporángá moduanga tahiꞌ haweꞌ i kótá Atena. Roo onoꞌ, mesuleꞌheꞌ lao i Berea hai moántiheꞌ tewáina Paulu haweꞌ i Silasi hai Timotiu, bona hawiáꞌheꞌ lao mampombelámbiꞌá Paulu.

¹⁶Tangaꞌna Paulu mampegiá Silasi hai Timotiu i kótá Atena, masusa laluna mampeita kahandaꞌna lenggeꞌ ánitu to rapenómbái toAtena.

¹⁷Onoꞌ miꞌi haneꞌi i támbi penómbáꞌáraꞌ toIahudiꞌ, Paulu molaluita hai toIahudiꞌ hai tauna ntániꞌna to mengkoruꞌ i Pueꞌ Ala. Alo-alona Paulu mopaturoꞌheꞌ woꞌo heáná peá to nalámbiꞌ i pobaluꞌ-baluꞌá.

¹⁸I kótá Atena iti, araheꞌ woꞌo tauna to mapánde to mampeuláꞌi paturoꞌraꞌ toEpikuro hai toSotoa.[230] Tauna to mapánde iti mombekuneꞌ-kuneꞌheꞌ hai Paulu. Araheꞌ to manguliꞌ, “Apa riꞌi to nauliꞌ tauna to mampe to mapánde deꞌe?” Araheꞌ woꞌo to manguliꞌ, “Babilaꞌ ia mopahaweꞌ mokana i ánitu hangko i tampoꞌ ntániꞌna.” Rauliꞌ noꞌonoꞌ láwiꞌ Paulu mopaturoꞌheꞌ kana i Iesu hai katueꞌraꞌ huleꞌ tauna hangko i kapate.

¹⁹Onoꞌ miꞌi haneꞌi tauna iti moántiheꞌ Paulu lao i Kahirámpuá Areopagu,[231] rahángáꞌá, “Kipoinao kipehádingi paturoꞌmu to woꞌu iti,

²⁰láwiꞌ tiꞌara mani hangkani kihádi paturoꞌ to noꞌonoꞌ. Mepawuli ntepuꞌu, onoꞌ miꞌi haneꞌi kipoinao moisá lempóna.”

²¹Tediiꞌ laluraꞌ, láwiꞌ biásána toAtena hai tauna ntániꞌna to toroꞌ ionoꞌ moundeꞌ peheꞌ mampehádingi hai mampolaluita oaꞌ apa to woꞌu.

²²Mewaliꞌ meángkáꞌ miꞌi Paulu i lindoꞌraꞌ tauna to hirámpu i Kahirámpuá Areopagu, nauliꞌ, “Ee, toAtena! Kuita topoagama ntepuꞌukou. Mampopengaa to nipenómbái.

²³Iti kuisá, láwiꞌ tangaꞌkuꞌ molumao i kótámi deꞌe, kuita penómbáꞌámi hai kuita woꞌo hambuaꞌ watu penómbáꞌá to ara ukiꞌna node: ‘PENÓMBÁꞋÁ I PUEꞋ TO TIꞋARA RAISÁ HANGAꞋNA.’ Mewaliꞌ, pueꞌ to nipenómbái to tiꞌara niꞌisá kaheánána iti, Ia miꞌi to ina kupahaweꞌákou.

²⁴Ia miꞌi Pueꞌ Ala to mampopewaliꞌ duniáꞌ hai upu-upu óntóꞌna. Ánti kaꞌIana Pueꞌna langiꞌ hai tampoꞌ, Ia tiꞌara toroꞌ i támbi penómbáꞌá to rabábehi tauna.

²⁵Ia tiꞌara ara kamakuraꞌNa to hangaa-ngaa radureiá tauna, láwiꞌ Ia to mampoweꞌikeꞌ katueꞌtaꞌ, peinaontaꞌ hai hinángkáꞌna to taparaluu.

²⁶Hangko i hadua peá tauna,[232] Pueꞌ Ala mampopemuleꞌ upu-upu tauna, bona mokatoroꞌikeꞌ humalele duniáꞌ. Ia mopakanótó miꞌi ami hangko i rungu-runguna parailiꞌna tampoꞌ to rakatoroꞌi upu-upu kadatuá,[233] hai tempóraꞌ mepárentá ba manawoꞌ.

²⁷Pueꞌ Ala mobábehi upu-upuna iti bona Ia tapeliꞌ. Hai ane tapoinao ntepuꞌu moisá Pueꞌ Ala, babilaꞌ peisá talámbiꞌ. Katoꞌuána, Ia tiꞌara karaoꞌ hangko i kitaꞌ upu-upu.

²⁸Deꞌe miꞌi to paka rauliꞌ toiorumi: ‘Hangko i Hia peá katueꞌtaꞌ. Onoꞌ miꞌi haneꞌi peisákeꞌ tueꞌ hai mokale i duniáꞌ deꞌe.’[234] Hibali woꞌo hai to raukiꞌ toiorumi hangkoia to mapánde mokáráhi nani, rauliꞌ, ‘Kitaꞌ upu-upu ánáꞌna Pueꞌ Ala.’[235]

²⁹Mewaliꞌ, ánti kakitaꞌna ánáꞌna Pueꞌ Ala, tiꞌara maroꞌa ane mopahibalikeꞌ Pueꞌ Ala hai lenggeꞌ to rabábehi hangko i buláwá ba peráꞌ ba watu, hiolaꞌ hai kapánde tauna peá.

³⁰Hangkoia, tauna tiꞌara mani moisá Pueꞌ Ala, agáiáná kehapiꞌ noꞌonoꞌ, tiꞌaraheꞌ nahuku Pueꞌ Ala. Tiꞌara Napailalu kabeberaꞌ iti, láwiꞌ tiꞌara mani raisá kaHeánána. Agáiáná deꞌe-deꞌe, Nahuoꞌ upu-upu tauna i humalele duniáꞌ bona menosoꞌkeꞌ hangko i dósántaꞌ,

³¹láwiꞌ i alo to napakanótó miꞌi Pueꞌ Ala, Ia ina mobutusi kárá-káráraꞌ tauna i humalele duniáꞌ i katoꞌu-toꞌuáNa. PebutusiNa iti ina Napobágóꞌ hadua Tauna to napileꞌi Pueꞌ Ala. Hai napatongawaꞌ miꞌi Pueꞌ Ala i upu-upu tauna kaꞌina mewaliꞌna, láwiꞌ Tauna to Napileꞌi iti, Napatueꞌ miꞌi huleꞌ hangko i kapate.”

³²I karahádina laluitana Paulu iti, araheꞌ to mopatawai láwiꞌ tiꞌaraheꞌ mampoinálái kaꞌárána tauna to peisá tueꞌ huleꞌ. Araheꞌ woꞌo to manguliꞌ, “Kiundeꞌ mani mampehádingi laluitamu iti.”

³³Roo onoꞌ, pohuꞌ miꞌi Paulu hangko i kahirámpuáraꞌ.

³⁴Agáiáná araheꞌ to meuláꞌ i Paulu hai mepoinálái i Iesu. Hadua to mepoinálái ia miꞌi Dionisiu, hadua hangko i oloꞌraꞌ Topepáresáꞌ Mahile Areopagu. Ara woꞌo hadua towawine to rahangaꞌ Damari, hai araheꞌ woꞌo to ntániꞌna.