Read Besoa Surona Pueꞌ Iesu 18 Bible Online

Surona Pueꞌ Iesu 18 - Besoa bible

Surona Pueꞌ Iesu 18

¹Roo onoꞌ, pohuꞌ miꞌi Paulu hangko i kótá Atena lao i kótá Korintu.

²Ionoꞌ ia mampohidupaꞌá hadua tobaleilo toIahudiꞌ to rahangaꞌ Akila. Akila iti rapoánáka i poropensi Pontu. Toinána rahangaꞌ Pirikila. Hira hamboko melimbámoheꞌ hangko i tampoꞌ Italia láwiꞌ Datu Mahile Laudiu i Roma mampopesuwuꞌ miꞌi párentá bona upu-upu toIahudiꞌ hangaa-ngaa pohuꞌ hangko i kótá Roma. Kahaweꞌna Paulu i kótá Korintu, lao mpuꞌumoheꞌ naweoꞌ,

³hai ánti kahibalina bágóꞌraꞌ mobábehi bambaruꞌ {hangko i koliꞌ binataꞌ}, onoꞌ miꞌi haneꞌi ia toroꞌ hingkakani hai hira.[236]

⁴I alo-alo penómbáꞌáraꞌ toIahudiꞌ, Paulu lao i támbi penómbáꞌáraꞌ mopaturoꞌ tauna to hirámpu ionoꞌ, maroꞌa toIahudiꞌ maroꞌa toIunani.[237] Tunggáiána Paulu bona mepoináláiheꞌ i Pueꞌ Iesu.

⁵Kahaweꞌraꞌ Silasi hai Timotiu hangko i tampoꞌ Makedonia, Paulu tiꞌara piꞌi mobágóꞌ mobábehi bambaruꞌ hangko i koliꞌ, láwiꞌ ia mopahaweꞌ oaꞌ Ngkóráꞌ Marasa i toIahudiꞌ. Napahaweꞌáheꞌ kaꞌIesuna miꞌi Datu Topehómpóꞌ to nadándi Pueꞌ Ala.

⁶Agáiáná toIahudiꞌ to i kótá Korintu moewaꞌ hai mopakóiꞌ oaꞌ Paulu, onoꞌ miꞌi haneꞌi ia motarónta awu hangko i waruꞌna,[238] nahángáꞌáheꞌ, “Ane nahukukou Pueꞌ Ala, tiꞌara kódóꞌ to mampohurunga, agáiáná kómu riꞌi! Mewaliꞌ mantepuꞌu deꞌe-deꞌe, ina laoaꞌ moánti Ngkóráꞌ Marasa i tauna to tiꞌara toIahudiꞌ!”

⁷Roo onoꞌ, napálehimoheꞌ pohuꞌ lao i támbina Titiu Iusutu to ara i hintáiꞌna támbi penómbáꞌá. Pueꞌ támbi iti tiꞌara toIahudiꞌ, agáiáná ia mengkoruꞌ i Pueꞌ Ala.

⁸Ara woꞌo hadua tauna to rahangaꞌ Kirisipu.[239] Ia miꞌi hadua tadulako i támbi penómbáꞌá to i hintáiꞌna támbina Titiu. Ia hai upu-upu hantámbiána, mepoináláiheꞌ i Pueꞌ Iesu. Hai handaꞌ toKorintu mampehádingi bámbári to napahaweꞌ Paulu, álána mepoináláiheꞌ woꞌo hai rariuheꞌ.

⁹Hangkani tempó, tangaꞌ káindi, Paulu moita wopiꞌi pampetudeꞌá. I lalu pampetudeꞌá iti, nahángáꞌá Pueꞌ, “Ineeꞌkoꞌ malááꞌ, hai ineeꞌkoꞌ mengkaroo mopahaweꞌ ngkóráꞌKuꞌ i kótá Korintu deꞌe,

¹⁰láwiꞌ Kódóꞌ miꞌi to mamporángákoꞌ, hai handaꞌ miꞌi taunáNgkuꞌ i kótá deꞌe. Tiꞌara ara hadua to ina mopaháikoꞌ.”

¹¹Mewaliꞌ, Paulu toroꞌ i Korintu hampare hantangaꞌ kamaruena, hai mepaturoꞌ oaꞌ kana i ngkóráꞌna Pueꞌ Ala.

¹²I tempóna topopárentá Roma moángkáꞌ Galio mewaliꞌ mágáuꞌ[240] i tampoꞌ Akaia,[241] hintuwuꞌmoheꞌ toIahudiꞌ moewaꞌ Paulu, haneꞌi raꞌánti i lindoꞌna mágáuꞌ iti.

¹³Rasalaꞌi, rauliꞌ, “Tauna deꞌe mopakanawoꞌ handaꞌ tauna. Ia mopaturoꞌheꞌ kana i rárá menómbá i Pueꞌ Ala, agáiáná apa to napaturoꞌáheꞌ iti, tiꞌara hintotoꞌ hai apa to teukiꞌ i Paturoꞌna Musa!”

¹⁴Hangko ina mehániꞌ Paulu, nauliꞌ miꞌi Galio, “ToIahudiꞌ! Ane tauna to nisalaꞌi iti moliungi hawaꞌ topopárentá Roma ba mobábehi to kadake, hintotoꞌ miꞌi kupehádingi popahaweꞌmi.

¹⁵Agáiáná popahaweꞌmi mokana peá laluita hai áturá ágámámi. Mewaliꞌ, niurusi miꞌi haduduámi. Lohentoaꞌ mourusi!”

¹⁶Roo onoꞌ, napopesuwuꞌheꞌ hangko i támbi pobutusiá.

¹⁷I rawa támbi pobutusiá iti, tauna to handaꞌ mohakaꞌ Sotene,[242] hadua tadulako i támbi penómbáꞌá, hai rapapahái. Agáiáná bábehiáraꞌ iti tiꞌara napesuaꞌi Galio.

¹⁸Marue mani Paulu toroꞌ i kótá Korintu hangko mepálákáná riꞌi i halalu hampepepoináláina. Roo onoꞌ, ia mengkaheꞌ i duanga tahiꞌ lao i tampoꞌ Siria, hingkakani hai Pirikila hai Akila. Agáiáná hangko tiꞌara maniheꞌ pohuꞌ, Paulu mampopelóli sieruꞌ weluáꞌna i wánuá Kengkerea,[243] láwiꞌ roo miꞌi mobukeki dándina i Pueꞌ Ala.[244]

¹⁹I polumaoáraꞌ iti, mehupeꞌheꞌ i kótá Epesu. Paulu lao i támbi penómbáꞌá hai mompolaluitaꞌáheꞌ toIahudiꞌ to hirámpu ionoꞌ. Taunaheꞌ iti membiáꞌ i Paulu bona marue hingkakani hai hira, agáiáná pembiáꞌraꞌ iti tiꞌara napabukeꞌi. Kehapiꞌ noꞌonoꞌ, i kapohuꞌna, nahángáꞌáheꞌ, “Ane napokanai Pueꞌ Ala, ina mesuleꞌaꞌ mai ieneꞌ.” Pirikila hai Akila toroꞌheꞌ oaꞌ i Epesu, agáiáná Paulu mopaliliu miꞌi polumaona mengkaheꞌ i duanga tahiꞌ lao i tampoꞌ Siria.

²²Kahaweꞌna i kótá Kaisarea,[245] Paulu lao sieruꞌ i kótá Ierusale mampombelámbiꞌá toSarani to ara ionoꞌ, hangko lao riꞌi i kótá Antiokia i tampoꞌ Siria.

²³Bahangapa kamaruena hingkakani hai halalu hampepepoináláina i kótá Antiokia, pohuꞌ wopiꞌi Paulu lao i tampoꞌ Galatia hai Perigia, hai mopakaróhó pepoináláiraꞌ tauna to mepoinálái i Pueꞌ Iesu to toroꞌ ionoꞌ.

²⁴I tempó iti, ara hadua toIahudiꞌ to haweꞌ i kótá Epesu. Hangaꞌna Apolo. Apolo iti rapoánáka i kótá Alesandaria.[246] Ia mapánde molaluita, hai moisá ntepuꞌu Sura Magasaꞌ.[247]

²⁵Apolo rapaturoꞌá miꞌi woꞌo mokana i rárá katehómpóꞌ moliu Pueꞌ Iesu. Mewaliꞌ kahaweꞌna i Epesu, ia molaluita hangko i laluna ntepuꞌu, mopaturoꞌheꞌ tauna kana i Iesu i katoꞌu-toꞌuána, kehapiꞌ periuna peá Iohane to naisá.

²⁶I tempó iti, natepuꞌu miꞌi molaluita i támbi penómbáꞌáraꞌ toIahudiꞌ hai tiꞌara ara kamalááꞌna. Karahádina Pirikila hai Akila laluitana Apolo iti, raꞌánti lao i támbiraꞌ haneꞌi rapakanótóá mokana rárá katehómpóꞌ, láwiꞌ ara mani to tiꞌara naisá.

²⁷Roo onoꞌ, napoinao Apolo lao i tampoꞌ Akaia. Hai halalu hampepepoináláina i Epesu motulungi, mopakatuheꞌ sura lao i hangka toSaraniraꞌ i Akaia bona Apolo ratarima maroꞌa. Mewaliꞌ kahaweꞌna Apolo i Akaia, paturoꞌna moánti handaꞌ pewátiꞌ i upu-upu tauna to mepoinálái i Pueꞌ Iesu ánti kabulána laluna Pueꞌ Ala i hira.

²⁸Ánti kamapándena molaluita, Apolo monangiheꞌ toIahudiꞌ i lalu pombehániꞌraꞌ i lindoꞌraꞌ tauna to handaꞌ. Hangko i Sura Magasaꞌ, ia mopatongawaꞌ ntepuꞌu kaꞌIesuna Datu Topehómpóꞌ to nadándi Pueꞌ Ala.