Read Besoa Surona Pueꞌ Iesu 2 Bible Online

Surona Pueꞌ Iesu 2 - Besoa bible

Surona Pueꞌ Iesu 2

¹Haweꞌ miꞌi tempó alo posusáraꞌ toIahudiꞌ to rahangaꞌ Alo Pentakosta,[24] upu-upu tauna to mepoinálái i Iesu hirámpu i hambuaꞌ katoroꞌá.

²Iaperái rahádi to nodo wui to rumihi hangko i langiꞌ. Pokániꞌ iti rahádi i humalele támbi kahirámpuáraꞌ.[25]

³Hai moitaheꞌ roreꞌ api[26] to nodo lilaꞌ, mendele hai mengkatóá i tutuꞌraꞌ hadua-hadua.

⁴Roo onoꞌ, upu-upu tauna iti nakuasaꞌimoheꞌ Inao to Magasaꞌ, haneꞌi mantepuꞌuheꞌ molaluita i lalu handaꞌ pákáꞌna básá to tiꞌara raisá, mouláꞌ apa to napakanótóáheꞌ Inao to Magasaꞌ.

⁵I tempó iti, handaꞌheꞌ woꞌo toIahudiꞌ hangko i tampoꞌ ntániꞌna to toroꞌ i Ierusale. Upu-upuheꞌ mengkoruꞌ i Pueꞌ Ala.

⁶Karahádina iti pokániꞌ to nodo wui ininá, handaꞌ tauna to lao meromu láwiꞌ wuliheꞌ mohádi surona Pueꞌ Iesu molaluita i lalu básáraꞌ tauna ntániꞌna.

⁷Tingkáráꞌ ntepuꞌuheꞌ, rauliꞌ, “Apa to mewaliꞌ deꞌe? Tiꞌara paꞌi topolaluitaheꞌ iti paka toGalileantoheꞌ?[27]

⁸Noumbá haneꞌi peisáheꞌ molaluitaheꞌ i lalu básántaꞌ hadua-hadua?

⁹Arakeꞌ to hangko i tampoꞌ Patia, Media, Ela, Mesopotamia,[28] Iudá hai Kapadokia. Arakeꞌ woꞌo to hangko i poropensi Pontu hai Asia,

¹⁰hangko i Perigia, Pampilia, Másiriꞌ[29] hai hangko i tampoꞌ Libia to hungkuꞌ i kótá Kirene. Arakeꞌ to hangko i kótá Roma.

¹¹Hantángáꞌkeꞌ toIahudiꞌ, hai araheꞌ woꞌo tauna ntániꞌna to mesuaꞌ i agama Iahudiꞌ.[30] Arakeꞌ woꞌo to hangko i tampoꞌ Kereta hai tampoꞌ Áráꞌ. Agáiáná kitaꞌ upu-upu mohádiheꞌ molaluita i lalu básántaꞌ hadua-hadua, hai mampolaluitaheꞌ tandaꞌ kuasaꞌ to nabábehi Pueꞌ Ala.”

¹²Tingkáráꞌ hai wulimoheꞌ upu-upu, haneꞌi mombekuneꞌ-kuneꞌheꞌ hadua hai hadua, rauliꞌ, “Apa lempóna to mewaliꞌ deꞌe?”

¹³Agáiáná araheꞌ woꞌo to mopatawai, rauliꞌ, “Nalanguiheꞌ anggoroꞌ to woꞌu!”

¹⁴Hangko ionoꞌ, Peturuꞌ meángkáꞌ miꞌi hingkakani hai rángána to hampuloꞌ hai hadua, haneꞌi molaluita napasimbuku, nauliꞌ, “Halalungkuꞌ toIahudiꞌ, hai kómu to ara i Ierusale deꞌe-deꞌe! Nipehádingi mpakaroꞌa, láwiꞌ ina kupakanótóákou apa to pewaliꞌ deꞌe.

¹⁵Kaiꞌ deꞌe, tiꞌaraꞌangkaiꞌ malangu nodo to niuliꞌ. Deꞌe-deꞌe tiꞌara mani tempóna mainu anggoroꞌ, láwiꞌ hangko tintiꞌ hahioꞌ mepulo![31]

¹⁶Agáiáná apa to mewaliꞌ deꞌe-deꞌe hintotoꞌ hai apa to napahaweꞌ miꞌi nabiꞌ Ioeli hangkoia.[32] Nauliꞌ node:

¹⁷Nauliꞌ Pueꞌ Ala: ‘I alo-alo to kahópóꞌána,[33] Kódóꞌ ina mampeweꞌiAꞌ InaoNgkuꞌ i upu-upu tauna. Ánáꞌmi tobaleilo hai towawine ina mohuwárá laluitaNgkuꞌ. Ánáꞌntomoane ina moita apa to Kupopaitaꞌáheꞌ. Totosae ina mopaturuáheꞌ paturu to hangko i Kódóꞌ.

¹⁸I alo iti, ina Kuweꞌiheꞌ InaoNgkuꞌ i huoꞌáNgkuꞌ maroꞌa tobaleilo maroꞌa towawine, hai hira ina mohuwárá laluitaNgkuꞌ.

¹⁹Ina Kupopaitaꞌákou to metingkáráki i langiꞌ hai tandaꞌ kuasaꞌ i duniáꞌ, nodo waheꞌ hai api hai rámbu to rumukuꞌ.[34]

²⁰Alo ina mewaliꞌ makáindi, hai wulá ina mewaliꞌ malei nodo waheꞌ, hangko tiꞌara mani haweꞌ alo to mahile hai meawaꞌ, ia miꞌi alo pebutusiána Pueꞌ.

²¹I tempó iti, heáná peá to mekióꞌ i Pueꞌ[35] bateꞌna ina tehómpóki hangko i huku dósáraꞌ.’ ” [36]

²²Napaliliu miꞌi Peturuꞌ laluitana, nauliꞌ, “Halalungkuꞌ toSáráeliꞌ! Nipehádingi apa to ina kuhángáꞌákou deꞌe. Ina kupolaluitaꞌákou mokana i Iesu toNasare. Ia peá to napileꞌi hai napakanótó miꞌi ami Pueꞌ Ala mewaliꞌ TopobágóꞌNa to Magasaꞌ. Iti niꞌisá miꞌi láwiꞌ ánti kuasaꞌna Pueꞌ Ala, Pueꞌ Iesu mobábehi handaꞌ tandaꞌ kuasaꞌ hai tandaꞌ to metingkáráki i oloꞌmi.

²³Iesu iti rahuhuꞌ i kómu, hai nipembiáꞌ bona Ia rahuku mate. Nihuhuꞌ i tauna to tiꞌara mengkoruꞌ i Paturoꞌna Musa bona rapakuꞌ i kau mombehape.[37] Marue miꞌi naisá Pueꞌ Ala apa to hangaa-ngaa ina mewaliꞌ i Iesu, hai Pueꞌ Ala haduduáNa to mopakanótó apa to ina mewaliꞌ iti. Kómu to mopapate Iesu,

²⁴agáiáná Pueꞌ Ala to mopatueꞌ huleꞌ, hai mokábáhá wátáNa hangko i kuasaꞌ kapate, láwiꞌ Iesu tiꞌara peisá nakuasaꞌi oaꞌ kapate.[38]

²⁵Ara miꞌi laluitana Datu Daudiꞌ hangkoia[39] mokana i Iesu to manguliꞌ: ‘Kuisá, bateꞌna Io Pueꞌ to mamporángáꞌAꞌ. Tiꞌara ara to Kupokalááꞌ, láwiꞌ Io Pueꞌ to motulungiAꞌ.

²⁶Onoꞌ miꞌi haneꞌi góeꞌ laluNgkuꞌ, hai KutóiáKoꞌ Pueꞌ. Pehárungángkuꞌ aranto i Hio,

²⁷láwiꞌ tiꞌaraꞌAꞌ ina Nupatodáhi toroꞌ oaꞌ i katoroꞌá tomate. WátáNgkuꞌ tiꞌara ina Nupatodáhi i lalu popatawuá duuꞌna magoro, láwiꞌ Kódóꞌ miꞌi TaunáMu to Magasaꞌ.

²⁸Ina rumihi ntepuꞌu kagóeꞌKuꞌ láwiꞌ NutudeꞌáMoꞌ rárá ngkatueꞌ i tempóNgkuꞌ hingkakani hai Io.’ ” [40]

²⁹Hangko ionoꞌ, napaliliu wopiꞌi Peturuꞌ laluitana nauliꞌ, “Halalu-halalu! Bona niꞌisá katoꞌu-toꞌuána mokana i toioruntaꞌ Datu Daudiꞌ, tiꞌara wátána haduduána to natunggái i laluitana iti, láwiꞌ ia mate miꞌi hai ratawu. Popatawuána taisáꞌá mani haweꞌ deꞌe-deꞌe.

³⁰Daudiꞌ iti, hadua nabiꞌ to moisá ami apa to ina nabábehi Pueꞌ Ala. Naisá kaꞌárána podándina Pueꞌ Ala i hia to manguliꞌ: hadua hangko i pemuleꞌámu ina Kuángkáꞌ mewaliꞌ datu.[41] Mewaliꞌ, onoꞌ miꞌi haneꞌi Daudiꞌ mampopaisá ami kaꞌina tueꞌna huleꞌ Datu Topehómpóꞌ,[42] hai nauliꞌ woꞌo Ia tiꞌara ina rapatodáhi i katoroꞌá tomate, hai wátáNa tiꞌara ina rapatodáhi i lalu popatawuá duuꞌna magoro.[43]

³¹

³²Iesu miꞌi to natunggái Daudiꞌ i laluitana iti, láwiꞌ Ia miꞌi to napatueꞌ huleꞌ Pueꞌ Ala. Kaiꞌ upu-upu deꞌe mewaliꞌangkaiꞌ sabiꞌNa, láwiꞌ kiꞌita mata katueꞌNa huleꞌ.

³³Pueꞌ Ala moángkáꞌ miꞌi Iesu, Napopehoda i pehodaꞌá tándáꞌ i kuánáNa láwiꞌ Iesu Napomahile ntepuꞌu. Hangko ionoꞌ, Pueꞌ Ala Umántaꞌ mampoweꞌi Iesu Inao to Magasaꞌ nodo to Nadándi. Mewaliꞌ apa to niꞌita hai nihádi miꞌi ininá, mewaliꞌ ánti kuasaꞌna Inao to Magasaꞌ to naweꞌiangkaiꞌ Iesu.

³⁴Mewaliꞌ halalu-halalu, taisá katiꞌárána mpuꞌu wátána haduduána to natunggái Datu Daudiꞌ i laluitana, láwiꞌ tiꞌara Daudiꞌ to tueꞌ huleꞌ hai mengkaoreꞌ lao i surugáꞌ. Hai nauliꞌ wopiꞌi Daudiꞌ: Pueꞌ Ala mohángáꞌá Pueꞌkuꞌ to kupenómbái,[44] ‘MehodamoKoꞌ tándáꞌ i kuánáNgkuꞌ,

³⁵duuꞌna Kupopengkoruꞌheꞌ upu-upu ewáliMu i Hio.’ ” [45]

³⁶Hangko ionoꞌ, napahópóꞌ miꞌi Peturuꞌ laluitana, nauliꞌ, “Mewaliꞌ, onoꞌ miꞌi haneꞌi kómu toSáráeliꞌ, hangaa-ngaa niꞌisá i lalumi apa to kuꞌuliꞌ deꞌe: Iesu to nipakuꞌ i kau mombehape, Ia miꞌi to napileꞌi Pueꞌ Ala mewaliꞌ Pueꞌtaꞌ hai Datu Topehómpóꞌ.”

³⁷Karahádina tauna to handaꞌ laluitana Peturuꞌ iti, nahohoꞌ miꞌi inaoraꞌ, hai mekuneꞌheꞌ i Peturuꞌ hai i surona Pueꞌ Iesu to ntániꞌna, rauliꞌ, “Ane noꞌonoꞌi, apa miꞌi to hangaa-ngaa kibábehi?”

³⁸Nahániki Peturuꞌ, “Hangaa-ngaa menosoꞌmokou hadua hai hadua hangko i dósámi, hai hangaa-ngaa rariukou i lalu hangaꞌna Iesu Kerisitu. Ane nibábehi noꞌonoꞌ, Pueꞌ Ala ina moámpungi dósámi, hai ina molámbiꞌkou Inao to Magasaꞌ,[46]

³⁹láwiꞌ dándina Pueꞌ Ala deꞌe raweꞌikeꞌ haweꞌ-haweꞌ i pemuleꞌántaꞌ hai i tauna ntániꞌna to karaoꞌ tampoꞌraꞌ. Dándina Pueꞌ Ala deꞌe, bateꞌna ina mewaliꞌ i upu-upu tauna to nakióꞌ Pueꞌtaꞌ Pueꞌ Ala mewaliꞌ taunáNa.”

⁴⁰Tiꞌara iti peá to nauliꞌ Peturuꞌ, agáiáná handaꞌ mani to napolaluita. Ia mopaturoꞌheꞌ tauna to handaꞌ hai napaingáꞌiheꞌ, nauliꞌ, “Menosoꞌmokou! Ineeꞌkou mampeuláꞌi tauna to kadake to tueꞌ tempó deꞌe, bona tiꞌarakou woꞌo molámbiꞌ pehukuna Pueꞌ Ala to ina morampeheꞌ!”

⁴¹Handaꞌ miꞌi tauna to mampoinálái laluitana Peturuꞌ, haneꞌi mampoperiuheꞌ woꞌo. I alo iti, kahandaꞌna tauna to mepoinálái i Iesu tetámbái miꞌi rekeꞌ-rekeꞌna tálu sábuna.

⁴²Roo onoꞌ, handaꞌ tauna to hangko mepoinálái i Iesu mampehádingiheꞌ oaꞌ paturoꞌraꞌ surona Pueꞌ Iesu, hai moromu-romuheꞌ oaꞌ. Mandeꞌheꞌ hingkakani, mandeꞌheꞌ rótiꞌ ánti pambuhinaoraꞌ Pueꞌ Iesu, hai mekakaeheꞌ.

⁴³Surona Pueꞌ Iesu mobábehiheꞌ handaꞌ tandaꞌ kuasaꞌ hai tandaꞌ to metingkáráki. Onoꞌ miꞌi haneꞌi tauna to handaꞌ mobiláꞌ ntepuꞌuheꞌ surona Iesu.

⁴⁴Upu-upu to mepoinálái i Iesu mohintuwuꞌheꞌ. Párewá to ara i hira rapopobunduꞌ i tauna to moparaluu.[47]

⁴⁵Rápáꞌna, araheꞌ to mampobaluꞌ tampoꞌraꞌ ba óntóꞌ támbiraꞌ, dóiꞌ hólóna ragáláꞌ-gáláꞌ i hángká rángáraꞌ to tiꞌaraheꞌ nakaꞌarai.

⁴⁶Alo-alona hirámpuheꞌ i tangabaa Támbina Pueꞌ Ala. Bulá ntepuꞌu laluraꞌ mombetatarima i támbiraꞌ, hai mandeꞌheꞌ hingkakani i lalu kagóeꞌ-góeꞌ.

⁴⁷Motóiáheꞌ oaꞌ Pueꞌ Ala, hai rapokagóeꞌheꞌ upu-upu tauna. Alo-alona katetátámbáiáheꞌ oaꞌ, láwiꞌ Pueꞌ motámbáiáheꞌ hai tauna to molámbiꞌ katehómpóꞌ.