Read Besoa Surona Pueꞌ Iesu 20 Bible Online

Surona Pueꞌ Iesu 20 - Besoa bible

Surona Pueꞌ Iesu 20

¹Karoona pohiho i Epesu, Paulu mokióꞌheꞌ tauna to mepoinálái i Iesu bona hirámpuheꞌ, hai napakaróhó laluraꞌ. Roo onoꞌ, ia mepálákáná miꞌi haneꞌi mopaliliu polumaona lao i tampoꞌ Makedonia.

²I polumaoána iti,[260] ia mehupeꞌ moweoꞌheꞌ toSarani, hai mopahaweꞌáheꞌ handaꞌ laluita bona maróhó laluraꞌ. Hangko ionoꞌ, ia lao wopiꞌi i tampoꞌ Akaia, tampoꞌraꞌ toIunani,[261]

³hai toroꞌ ionoꞌ tálu wulána kamaruena. Roo onoꞌ, ina mesuleꞌ lao i tampoꞌ Siria hai duanga tahiꞌ, agáiáná nahádi bámbári kaꞌina rapapatena toIahudiꞌ, onoꞌ miꞌi haneꞌi nabutusi ina mesuleꞌ moliu tampoꞌ Makedonia.

⁴I polumaona iti, araheꞌ woꞌo bahangapa tauna to mamporángá.[262] Hangaꞌraꞌ: Sopate[263] ánáꞌna Peru to hangko i wánuá Berea, Aritaku[264] hai Sekundu to hangko i kótá Tesalonika, hai Gaiu[265] to hangko i kótá Debe. Ara woꞌo Timotiu {to hangko i kótá Lisitera i tampoꞌ Galatia},[266] Tikiku[267] hai Toropimu.[268] To rodua iti to hangko i poropensi Asia.

⁵Mewaliꞌ, hangko i tampoꞌ Makedonia, hira iti moduangaheꞌ moioru haneꞌi kaiꞌ {Paulu hai Lukasi}, rapegiáꞌangkaiꞌ i kótá Teroasi.

⁶Liu miꞌi alo mahileraꞌ toIahudiꞌ to rahangaꞌ Posusa Rótiꞌ to Tiꞌara Raragiꞌi, pohuꞌangkaiꞌ hangko i kótá Pilipi, mengkaheꞌangkaiꞌ i duanga tahiꞌ. Moduangaꞌangkaiꞌ lima alona haneꞌi mohidupaꞌangkaiꞌ hai rángángkiꞌ iti i kótá Teroasi, hai toroꞌangkaiꞌ ionoꞌ haminggu kamaruena.

⁷Káindina i alo Minggu, hirámpuangkaiꞌ hingkakani hai halalu hampepepoináláingkiꞌ i kótá Teroasi, hai mandeꞌangkaiꞌ rótiꞌ pambuhinaoángkiꞌ kamatena Pueꞌ Iesu. Paulu mepaturoꞌ duuꞌna marue wengi, láwiꞌ kahalona ina pohuꞌ miꞌi.

⁸Támbi iti mapángkáꞌ, hai hirámpuangkaiꞌ i lintuꞌ to i wongko ntepuꞌu. Handaꞌ palita rahunu.

⁹I kahirámpuángkiꞌ iti, ara hadua ánáꞌntomoane to rahangaꞌ Eutiku. Ia mehoda i sungkekeꞌ. Sungkekeꞌ iti, katáluna usuna hangko i tampoꞌ. Tangaꞌna Paulu mepaturoꞌ, ánáꞌntomoane iti malelue miꞌi duuꞌna letaꞌ, onoꞌ haneꞌi manawoꞌ hangko i sungkekeꞌ tóá i tampoꞌ. Mendáuluheꞌ rángána lao moángkáꞌ ánáꞌntomoane iti, mole mate miꞌi.

¹⁰Agáiáná mendáulu woꞌo Paulu lao mopalumbángi ánáꞌntomoane iti, haneꞌi nakápui, nauliꞌ, “Ineeꞌkou malááꞌ. Ia tueꞌ mani.”[269]

¹¹Roo onoꞌ, mengkaheꞌ miꞌi huleꞌ Paulu lao i wongko mobiseꞌ-biseꞌ rótiꞌ, hai mandeꞌheꞌ hingkakani. Mepaturoꞌ wopiꞌi Paulu duuꞌ mabaa, hangko pohuꞌ riꞌi.

¹²Ánáꞌntomoane to manawoꞌ iti tueꞌ miꞌi, hai raꞌánti lao i támbina. Góeꞌheꞌ upu-upu hai lindó laluraꞌ.

¹³Moiorumongkaiꞌ mengkaheꞌ i duanga tahiꞌ lao i kótá Aso, bona kipohidupaꞌá Paulu ionoꞌ. Iti to napakanótó ami Paulu, láwiꞌ napoinao molumao lao i kótá Aso.[270]

¹⁴Mohidupaꞌangkaiꞌ i Aso, hai Paulu mengkaheꞌ hingkakani hai kaiꞌ lao i kótá Mitilene.[271]

¹⁵Hangko ionoꞌ, kipaliliu polumaongkiꞌ, hai kahalona haweꞌangkaiꞌ i tampoꞌ to mombehambali hai puló Kio. Karombengina, haweꞌangkaiꞌ i puló Samoso, hai hangalo hangko ionoꞌ, haweꞌangkaiꞌ i kótá Miletu.

¹⁶Paulu mopakanótó katiꞌarangkiꞌ sieruꞌ mehupeꞌ i kótá Epesu bona tiꞌaraꞌangkaiꞌ gaga marue i poropensi Asia. Naundeꞌ mopakawiáꞌ polumaongkiꞌ, bona poloꞌangkaiꞌ haweꞌ i kótá Ierusale hangko tiꞌara mani alo mahile to rauliꞌ Alo Pentakosta.

¹⁷Hangko i kótá Miletu, Paulu mohuoꞌ hadua tauna lao i kótá Epesu, membiáꞌ bona tadulako-tadulako jemaꞌa laoheꞌ mampohidupaꞌá Paulu.[272]

¹⁸Haweꞌmoheꞌ i Miletu, nahángáꞌáheꞌ Paulu, “Halalu-halalu, niꞌisá ntepuꞌu noumbá rárá katueꞌkuꞌ tempóngkuꞌ toroꞌ i oloꞌmi. Hangko i rungu-runguna kahaweꞌkuꞌ i poropensi Asia duuꞌna haweꞌ deꞌe-deꞌe,

¹⁹mengkaiwóiꞌaꞌ i lalu pobágóꞌkuꞌ i oloꞌmi, hai handaꞌ kánina teriaꞌaꞌ i pampopolumaongkuꞌ bágóꞌna Pueꞌ ieneꞌ. Handaꞌ woꞌo kapári to kulámbiꞌ láwiꞌ handaꞌheꞌ toIahudiꞌ to mampoinao mopapateaꞌ.

²⁰Niꞌisá halalu-halalu, katiꞌárángkuꞌ luleꞌ mopahaweꞌákou hinángkáꞌna to mobunduꞌ i lalu katueꞌmi. Kupaturoꞌkou, maroꞌa i poromu-romuámi, maroꞌa i támbimi.

²¹Kupopaingáꞌákou oaꞌ, maroꞌakou toIahudiꞌ, maroꞌakou toIunani, bona mampenosoꞌikou dósámi i lindoꞌna Pueꞌ Ala, hai mepoináláikou i Pueꞌtaꞌ Pueꞌ Iesu.

²²Deꞌe-deꞌe ina laoaꞌ i Ierusale ánti pokalena Inao to Magasaꞌ. Tiꞌara mani kuisá ba apa to ina mewaliꞌ i wátángkuꞌ ionoꞌ.

²³Agáiáná to kuisá ia miꞌi: i upu-upu kótá to kupoliui, napakanótó Inao to Magasaꞌ bateꞌkuꞌ ina ratarungku hai molámbiꞌaꞌ kapári.

²⁴Kehapiꞌ noꞌonoꞌ, tiꞌara mpuꞌu kukahiaꞌ wátángkuꞌ, asalaꞌ peisáꞌaꞌ moparoo bágóꞌ to napoináláiáꞌaꞌ Pueꞌ Iesu.[273] Bágóꞌkuꞌ deꞌe, mopahaweꞌ Ngkóráꞌ Marasa to mopatongawaꞌ kabulána laluna Pueꞌ Ala i kitaꞌ.

²⁵Mewaliꞌ halalu-halalu, tempóngkuꞌ meweoꞌ i kómu bahangapa parena to liu, kupopaisáꞌámokou kana i popárentána Pueꞌ Ala. Agáiáná manótó miꞌi i lalungkuꞌ, katiꞌárángkuꞌ piꞌi ina niꞌita.[274]

²⁶Onoꞌ miꞌi haneꞌi kupahaweꞌámokou ami alo deꞌe: ane arakou to tiꞌara molámbiꞌ katueꞌ to maroꞌa to tiꞌara mokahópóꞌá, tiꞌara salaꞌkuꞌ,

²⁷láwiꞌ tiꞌaraꞌaꞌ luleꞌ mopahaweꞌákou upu-upu tunggáiána Pueꞌ Ala i kómu.

²⁸Maingáꞌ-ingáꞌkou bona tiꞌarakou madósá, hai nikádipurá maroꞌa jemaꞌa to napoináláiákou Inao to Magasaꞌ, nodo hadua topoewu mampoewu dimbána. Hangaa-ngaa nikádipuráheꞌ, láwiꞌ Ánáꞌna Pueꞌ Ala mate mobaiari huku dósáraꞌ bona hira mewaliꞌ taunána Pueꞌ Ala.

²⁹Kuisá halalu-halalu, ane pohuꞌaꞌ hangko ieneꞌ, bateꞌna ina haweꞌheꞌ tauna to kadake to mampopeahiahiꞌ tauna to nipoewu iti, nodo serigala mohakaꞌ dimbá.

³⁰Maingáꞌ-ingáꞌkou, láwiꞌ araheꞌ woꞌo tauna hangko i oloꞌmi to ina mopawuli tauna to mepoinálái i Iesu moliu paturoꞌraꞌ to salaꞌ. Ina rabábehi noꞌonoꞌ bona raꞌántikou hingkakani i rárá to mepakanawoꞌ. Nibuhinao halalu-halalu, tálu parena kamaruena, tiꞌaraꞌaꞌ mengkangkaroo mopaturoꞌkou hadua-hadua, maroꞌa mabaa, maroꞌa káindi, hai handaꞌ káningkuꞌ moteriahikou.

³²Deꞌe-deꞌe halalu-halalu, mekakaeaꞌ i Pueꞌ Ala bona Ia mokádipurákou. Kupembiáꞌ bona mampeuláꞌikou oaꞌ ngkóráꞌna Pueꞌ to mopakanótóákou noumbá kabulána laluna Pueꞌ Ala i kómu. Láwiꞌ Pueꞌ Ala peá to makuasaꞌ mopakaróhó lalumi hai mampoweꞌikou sosora[275] to Napatimama miꞌi ami i tauna to Napataniꞌ mewaliꞌ ánáꞌNa to magasaꞌ.

³³Tiꞌara kupokaelu párewána tauna, nodo peráꞌ, buláwá ba waruꞌ.

³⁴Niꞌisá miꞌi, halalu-halalu, biásá mobágóꞌaꞌ hai taengkuꞌ haduduángkuꞌ, bona kubuku mohóló hinángkáꞌna to kuparaluu hai to raparaluu woꞌo rángángkuꞌheꞌ.

³⁵I pákáꞌ-pákáꞌna iti, mewaliꞌaꞌ pándiriꞌ i kómu, bona niꞌisá rárá mobágóꞌ motulungi tauna to tiꞌara rabuku. Nibuhinao oaꞌ laluitana Pueꞌ Iesu to manguliꞌ, ‘Morasiꞌ mani tauna to mampeweꞌi haneꞌi tauna to motarima.’ ”[276]

³⁶Karoona Paulu molaluita, molingkudu miꞌi hingkakani hai upu-upu rángána to hangko i Epesu, haneꞌiheꞌ mekakae.

³⁷Ánti kawiororaꞌ, teriaꞌmoheꞌ upu-upu, Paulu rakápui hai raꞌángki.

³⁸To mopamasusa ntepuꞌu laluraꞌ, laluitana Paulu to manguliꞌ tiꞌara piꞌi ina raita. Hangko ionoꞌ, Paulu raporángá duuꞌna mengkaheꞌ i duanga tahiꞌ.