Read Besoa Surona Pueꞌ Iesu 21 Bible Online

Surona Pueꞌ Iesu 21 - Besoa bible

Surona Pueꞌ Iesu 21

¹Karoongkiꞌ mepálákáná i tadulakoraꞌ toSarani to hangko i kótá Epesu, kipaliliu polumaongkiꞌ lao i tampoꞌ Siria. Mengkaheꞌangkaiꞌ i duanga tahiꞌ liliu lao i puló Kos, hai kahalona haweꞌangkaiꞌ i puló Rodo. Hangko ionoꞌ, liliuangkaiꞌ lao i wánuá Patara.

²I Patara, molámbiꞌangkaiꞌ hambuaꞌ duanga tahiꞌ to lao i roboꞌ Penisia i tampoꞌ Siria.[277] Mewaliꞌ mengkaheꞌangkaiꞌ i duanga tahiꞌ iti, mopaliliu polumaongkiꞌ.

³I tangaꞌ polumaongkiꞌ, moitaꞌangkaiꞌ puló Sipuru tándáꞌ i kabeoꞌkiꞌ, agáiáná liliu peangkaiꞌ duuꞌna haweꞌangkaiꞌ i tampoꞌ Siria. Mendáuluangkaiꞌ hangko i duanga tahiꞌ i kótá Tiru,[278] láwiꞌ inántina duanga hangaa-ngaa ratáurá ionoꞌ.

⁴Tangaꞌkiꞌ mampegiá duanga iti, laoangkaiꞌ moweoꞌ toSarani to ara ionoꞌ,[279] hai toroꞌangkaiꞌ hingkakani hai hira haminggu kamaruena. Ánti peteteꞌna Inao to Magasaꞌ, tauna to mepoinálái to ara i Tiru mopaingáꞌi Paulu bona ineeꞌ liliu lao i Ierusale.[280]

⁵Agáiáná haweꞌ miꞌi tempóna kaꞌina pohuꞌna duanga tahiꞌ, onoꞌ miꞌi haneꞌi ina kipaliliu polumaongkiꞌ lao i Ierusale. Mewaliꞌ upu-upu tauna to mepoinálái hai toináraꞌ hai ánáꞌraꞌheꞌ mamporángáꞌangkaiꞌ lao i rawa kótá. I wiwi tahiꞌ, molingkudu hai mekakaeangkaiꞌ.

⁶Karoongkiꞌ mekakae, mepálákánámongkaiꞌ haneꞌi mengkaheꞌangkaiꞌ i duanga tahiꞌ, hai tauna to laoangkaiꞌ mowawa, mesuleꞌmoheꞌ woꞌo lao i támbiraꞌ.

⁷Hangko i kótá Tiru, liliuangkaiꞌ haweꞌ i kótá Petolemai. Ionoꞌ moweoꞌangkaiꞌ halalu hampepepoináláingkiꞌ hai kipombetabeáheꞌ. Hambengiangkaiꞌ hai hira.

⁸Kahalona, pohuꞌ wopangkaiꞌ lao i kótá Kaisarea. Ionoꞌ toroꞌangkaiꞌ i támbina Pilipu. Pilipu iti, hadua topoánti Ngkóráꞌ Marasa, hai ia woꞌo hadua hangko i tauna to pitu to rapileꞌi mewaliꞌ diaken i Ierusale hangkoia.[281]

⁹Araheꞌ iba ánáꞌna towawine to tiꞌara mani mohamboko. Upu-upuheꞌ mewaliꞌ nabiꞌ toSarani.

¹⁰Bahangapa miꞌi alongkiꞌ i támbina Pilipu, haweꞌ miꞌi hadua nabiꞌ toSarani hangko i tampoꞌ Iudá. Hangaꞌna Agabu.

¹¹Ia moala pámpouna Paulu haneꞌi mampopotimpuku bitina hai taena haduduána. Roo onoꞌ, nauliꞌ, “Deꞌe miꞌi to napahaweꞌ Inao to Magasaꞌ: Pueꞌna pampou[282] deꞌe ina rahakaꞌ toIahudiꞌ i Ierusale. Ia ina ratimpuku nodeꞌe, hai ina rahuhuꞌáheꞌ tauna to tiꞌara toIahudiꞌ.”

¹²Kakihádina noꞌonoꞌ, kaiꞌ hai rángángkiꞌ i Kaisarea, kipembiáꞌ mpuꞌu i Paulu bona ineeꞌ liliu lao i Ierusale.

¹³Agáiáná nahánikiangkaiꞌ, nauliꞌ, “Moapa riꞌi haneꞌi teriaꞌkou? Ineeꞌkou mopamasusa lalungkuꞌ! Tiꞌaraꞌaꞌ agi ratimpuku peaꞌ, mogalo riꞌi rapapateaꞌ ánti peuláꞌkuꞌ i Pueꞌ Iesu, timamamoꞌ lao i Ierusale.”

¹⁴Ánti katiꞌárána mampokana pekóntóngkiꞌ, onoꞌ miꞌi haneꞌi tiꞌara piꞌi kikóntó. Kiuliꞌ perái, “Peundeꞌána peá Pueꞌ to mewaliꞌ.”

¹⁵Roo onoꞌ, kikádipurá miꞌi tasingkiꞌ haneꞌi pohuꞌangkaiꞌ lao i kótá Ierusale.

¹⁶Bahangapa halalu hampepepoináláingkiꞌ hangko i kótá Kaisarea mamporángáꞌangkaiꞌ duuꞌna haweꞌ i támbi katoroꞌángkiꞌ i kótá Ierusale.[283] Támbi katoroꞌángkiꞌ iti ia miꞌi támbina Manaso, hadua tauna hangko i puló Sipuru, to marue miꞌi mepoinálái i Iesu.

¹⁷Kahaweꞌkiꞌ i kótá Ierusale, halalu hampepepoináláingkiꞌ motarimaꞌangkaiꞌ maroꞌa hai góeꞌ laluraꞌ.

¹⁸Kahalona meuláꞌangkaiꞌ i Paulu lao moweoꞌ Iakobu[284] {tadulakoraꞌ toSarani i Ierusale}. Upu-upu tadulako ntániꞌna hirámpu woꞌo ionoꞌ.

¹⁹Karoongkiꞌ mombetabe, Paulu mopahaweꞌ upu-upu to nabábehi Pueꞌ Ala i tempóna moánti Ngkóráꞌ Marasa i tauna to tiꞌara toIahudiꞌ.

²⁰Karahádina laluitana Paulu, motóiáheꞌ Pueꞌ Ala haneꞌi rauliꞌ, “Halalungkiꞌ Paulu, bona nuisá, i sábuna miꞌi hangka toIahudiꞌtaꞌ to mepoinálái i Iesu. Upu-upuheꞌ maróhó pampeuláꞌiraꞌ Paturoꞌna Musa.

²¹Mohádimoheꞌ woꞌo bámbári to mosalaꞌikoꞌ. Ara to manguliꞌ, nupaturoꞌheꞌ toIahudiꞌ to toroꞌ i wánuáraꞌ tauna to tiꞌara toIahudiꞌ, bona tiꞌarapoheꞌ paraluu mampeuláꞌi Paturoꞌna Musa. Hai rauliꞌ woꞌo, nupaturoꞌheꞌ bona ineeꞌheꞌ motileꞌ ánáꞌraꞌ hai ineeꞌheꞌ woꞌo mampeuláꞌi ádáraꞌ toioruntaꞌ.

²²Mewaliꞌ noumbá miꞌi? Bateꞌna ina rahádi kahaweꞌmu miꞌi ieneꞌ.

²³Maroꞌa riꞌi ane nupeuláꞌi paturoꞌkiꞌ deꞌe. Ieneꞌ araheꞌ iba rángángkiꞌ to mopaꞌara miꞌi podándi i Pueꞌ Ala.

²⁴Mewaliꞌ, hangaa-ngaa laokoꞌ i Támbina Pueꞌ Ala hingkakani hai tauna to iba iti, nupamagasaꞌ woꞌo mouláꞌ ádá ágámántaꞌ. Hai hangaa-ngaa nubaiari woꞌo binataꞌ popenómbáraꞌ, bona tauna iti peisá ralóli weluáꞌraꞌ mouláꞌ dándiraꞌ. Ane nubábehi noꞌonoꞌ, ina tongawaꞌ i upu-upu tauna katiꞌárána toꞌu bámbári to rahádi mosalaꞌikoꞌ, láwiꞌ nupeuláꞌi woꞌo Paturoꞌna Musa.

²⁵Mewaliꞌ, iti miꞌi laluitangkiꞌ i hio Paulu. Agáiáná i tauna to tiꞌara toIahudiꞌ to mepoináláiheꞌ i Iesu, roomoheꞌ kipopakatuá sura mopahaweꞌáheꞌ pobutusingkiꞌ, bona ineeꞌheꞌ mandeꞌ pandeꞌ to rapopenómbá i ánitu, hai ineeꞌheꞌ woꞌo mandeꞌ waheꞌ ba bauꞌ to tiꞌara rapopesuwuꞌ sieruꞌ waheꞌna, hai bona ineeꞌheꞌ motoina ba motoama deleꞌ, hai ineeꞌheꞌ mebualosi.”

²⁶Napeuláꞌi ntepuꞌu Paulu paturoꞌraꞌ iti, onoꞌ miꞌi haneꞌi kahalona ia lao hingkakani hai tauna to iba iti, hai mantepuꞌuheꞌ mouláꞌ ádá popamagasaꞌ. Roo onoꞌ, mesuaꞌ miꞌi Paulu i tangabaa Támbina Pueꞌ Ala[285] mopahaweꞌ i tadulako menómbá kaimpirána ina hópóꞌ alo popamagasaꞌ iti. Ane hópóꞌ miꞌi tempóna, Paulu hai tauna to iba iti hangaa-ngaa moánti hai mampeweꞌiheꞌ popenómbáraꞌ hadua-hadua.

²⁷Ina hópóꞌ miꞌi pitu alona popamagasaꞌ to rapakanótó iti, bahangapaheꞌ toIahudiꞌ hangko i poropensi Asia moita Paulu i Támbina Pueꞌ Ala. Mopamaꞌamuꞌheꞌ laluraꞌ tauna to handaꞌ bona mohakaꞌheꞌ Paulu.

²⁸Mongangaheꞌ rapasimbuku, rauliꞌ, “Halalu-halalu toSáráeliꞌ! Maimokou! Nidureiangkaiꞌ! Tauna deꞌe, iumbá-umbá peá kalaoána, mopaturoꞌ tauna bona moewaꞌkeꞌ toIahudiꞌ. Ia woꞌo mosápuáka Paturoꞌna Musa hai motitibei Támbina Pueꞌ Ala deꞌe! Hai pelumbuꞌ mani, ia moánti mai tauna to tiꞌara toIahudiꞌ mesuaꞌ i lalu Támbina Pueꞌ Ala, haneꞌi támbi to magasaꞌ deꞌe rapakedái!”

²⁹Molaluitaheꞌ noꞌonoꞌ, láwiꞌ ininá moitaheꞌ Toropimu hingkakani hai Paulu i lalu kótá, onoꞌ haneꞌi rauliꞌ ripaꞌi, Toropimu iti naꞌánti Paulu mesuaꞌ i Támbina Pueꞌ Ala, mole tiꞌara toꞌu.[286] Toropimu ia miꞌi toEpesu, tiꞌara toIahudiꞌ.

³⁰Karahádina Támbina Pueꞌ Ala rapakedái, mohewomoheꞌ tauna i humalele kótá Ierusale, haneꞌi mobábáráráheꞌ lao i Támbina Pueꞌ Ala. Paulu rahakaꞌ hai radiiꞌ soso lao i rawa. Roo onoꞌ, babaꞌ Támbina Pueꞌ Ala kásáliu ratuko.[287]

³¹Tangaꞌraꞌ tauna to handaꞌ ina mopapate Paulu, araheꞌ to lao mopahaweꞌ apa to pewaliꞌ iti i kapalaꞌ tadulako surudadoꞌ toRoma. Rauliꞌ kaꞌárána pohiho to rumihi i humalele kótá.

³²Mewaliꞌ kapalaꞌ tadulako surudadoꞌ iti hawiáꞌ moánti bahangapa surudadoꞌ hai tadulakoraꞌ, melangkaheꞌ monóntóhi tauna to handaꞌ iti. Karaitána tauna to handaꞌ kahaweꞌraꞌ surudadoꞌ iti, kásáliu mengkarooheꞌ mopapahái Paulu.

³³Roo onoꞌ, kapalaꞌ tadulako surudadoꞌ iti mohakaꞌ Paulu hai mohuoꞌ surudadoꞌna morante taena rombali, haneꞌi napekuneꞌ, “Heáná tauna deꞌe? Apa to nabábehi?”

³⁴Araheꞌ to mohániki nodeꞌe, araheꞌ woꞌo to mohániki nodoꞌo. Ánti pohewo-heworaꞌ, maꞌángkárá kanaisána apa katoꞌuána to pewaliꞌ, onoꞌ miꞌi haneꞌi nahuoꞌheꞌ surudadoꞌna moánti Paulu lao i lalu támbi surudadoꞌ.

³⁵Kahaweꞌraꞌ i tukaꞌ támbi iti, mabukoꞌ ntepuꞌuheꞌ tauna to handaꞌ, onoꞌ miꞌi haneꞌi surudadoꞌ iti hangaa-ngaa mokowaꞌheꞌ Paulu.

³⁶Tauna to handaꞌ meuláꞌheꞌ oaꞌ, hai monganga-ngangaheꞌ, rauliꞌ, “Nipapate pemiꞌi!”

³⁷Ina mesuaꞌmoheꞌ i lalu támbi surudadoꞌ, napembiáꞌ Paulu i kapalaꞌ tadulako surudadoꞌ, nauliꞌ, “Ba peisáꞌaꞌ molaluita hampaiꞌ?” Nauliꞌ kapalaꞌ tadulako surudadoꞌ iti, “Ee! Nuisá rikaa paꞌi mobásá Iunani?!

³⁸Ane noꞌonoꞌi, io tiꞌarakoꞌ toMásiriꞌ to hangko roo mopamaꞌamuꞌ laluraꞌ tauna to handaꞌ hai moánti iba sábuna topeꞌewaꞌ lao i pádá loriꞌ.”

³⁹Nahániki Paulu, “Kódóꞌ deꞌe toIahudiꞌaꞌ, hangko i kótá Tarusu, kótá to tekahangaꞌiá i poropensi Kilikia. Kupembiáꞌ bona nuweꞌiaꞌ tempó mopahaweꞌ laluitangkuꞌ i tauna to handaꞌ deꞌe.”

⁴⁰Mewaliꞌ naweꞌi miꞌi tempó molaluita, onoꞌ haneꞌi meángkáꞌ miꞌi Paulu i tukaꞌ haneꞌi tauna to handaꞌ napakaniiꞌheꞌ hai taena. Roo onoꞌ, mantepuꞌu miꞌi Paulu molaluita i lalu básáraꞌ toIahudiꞌ.[288]