Read Besoa Surona Pueꞌ Iesu 22 Bible Online

Surona Pueꞌ Iesu 22 - Besoa bible

Surona Pueꞌ Iesu 22

¹Paulu mantepuꞌu molaluita, nauliꞌ, “Umaꞌ-umaꞌ, halalu-halalu! Nipehádingiaꞌ, láwiꞌ ina kupahaweꞌákou i katoꞌu-toꞌuána.”

²Karahádina tauna to handaꞌ Paulu molaluita i lalu básáraꞌ toIahudiꞌ, maniiꞌ ntepuꞌuheꞌ. Napaliliu miꞌi Paulu laluitana nauliꞌ,

³“Kódóꞌ deꞌe toIahudiꞌaꞌ. Wánuá karapoánákaꞌángkuꞌ, kótá Tarusu i poropensi Kilikia, agáiáná rapamahileaꞌ ieneꞌ i kótá Ierusale. Meguruaꞌ Paturoꞌna Musa hangko i Gamalie,[289] guru mahile to rabiláꞌ ntepuꞌu. Ia mopaturoꞌaꞌ upu-upu áturá to naweꞌi Musa i toioruntaꞌ hangkoia. Maróhó ntepuꞌu pampeuláꞌingkuꞌ upu-upu áturána Pueꞌ Ala iti, hibali hai kómu deꞌe-deꞌe.

⁴Hangkoia, kupopeahiahiꞌheꞌ tauna to mouláꞌ Paturoꞌna Iesu. Araheꞌ to kupapate. Araheꞌ woꞌo to kuhakaꞌ hai to kutarungku, maroꞌa tobaleilo maroꞌa towawine.

⁵Tadulako Menómbá Mahile hai upu-upu tadulako agama peisá mosabiki katoꞌuna laluitangkuꞌ iti, láwiꞌ hira miꞌi to mampoweꞌiaꞌ sura kuasaꞌ to mopaliuaꞌ lao i hangka toIahudiꞌtaꞌ i kótá Damasiꞌ. Tunggáiángkuꞌ bona ina mohakaꞌaꞌ toSarani to ara ionoꞌ, hai ina kuántiheꞌ mai ieneꞌ i Ierusale bona rahukuheꞌ.”

⁶Paulu mopaliliu wopiꞌi laluitana, nauliꞌ, “Tangaꞌ kalialo i polumaongkiꞌ iti, hungkuꞌmongkaiꞌ i kótá Damasiꞌ. Hangkaꞌ-hangkaꞌ perái ara pewangkaꞌ to rumihi ntepuꞌu hangko i langiꞌ mewangkaꞌiaꞌ.

⁷Madungkáꞌaꞌ i tampoꞌ, hai kuhádi wambaꞌ to manguliꞌ, ‘Saulu, Saulu! Moapa riꞌi haneꞌiAꞌ nupopeahiahiꞌ?’

⁸Kupekuneꞌ, ‘Tuá, heánáKoꞌ?’ Nahánikiaꞌ, ‘Kódóꞌ miꞌi deꞌe Iesu toNasare to nupopeahiahiꞌ.’

⁹Rángángkuꞌ moitaheꞌ woꞌo wangkaꞌ iti, agáiáná tiꞌara raisá apa to Nahángáꞌáꞌáꞌaꞌ.

¹⁰Roo onoꞌ, kupekuneꞌ, ‘Pueꞌ, apa to hangaa-ngaa kubábehi?’ Nahánikiaꞌ Pueꞌ, ‘Mearómokoꞌ hai laomokoꞌ i kótá Damasiꞌ. Ionoꞌ ina rapahaweꞌákoꞌ upu-upu to napakanótómokoꞌ Pueꞌ Ala bona nubábehi.’

¹¹Ánti pewangkaꞌ iti, makáindi miꞌi petótóingkuꞌ, tiꞌarapoꞌ meita, onoꞌ miꞌi haneꞌi rateteꞌraꞌaꞌ rángángkuꞌheꞌ lao i kótá Damasiꞌ.

¹²I kótá iti, ara hadua tobaleilo to rahangaꞌ Anania. Ia tauna to mengkoruꞌ i Pueꞌ Ala, hai maróhó pampeuláꞌina Paturoꞌna Musa. Ia rabiláꞌ upu-upu toIahudiꞌ to toroꞌ i Damasiꞌ.

¹³I kahaweꞌna miꞌi Anania iti, ia meángkáꞌ i hintáiꞌkuꞌ, nauliꞌ, ‘Halalungkuꞌ Saulu, meitamokoꞌ huleꞌ!’ Kásáliu meita mpuꞌumoꞌ, hai kuita woꞌo Anania.

¹⁴Roo onoꞌ, nahángáꞌá wopaꞌaꞌ, ‘Pueꞌ Ala to rapenómbái toioruntaꞌ mopileꞌimokoꞌ bona nuisá apa peundeꞌáNa. Napileꞌikoꞌ bona nuita Huoꞌána Pueꞌ Ala to Manótó,[290] hai bona nuhádi laluitaNa.

¹⁵Io miꞌi to ina mewaliꞌ sabiꞌNa bona nupahaweꞌáheꞌ upu-upu tauna apa to nuita hai apa to nuhádi iti.

¹⁶Mewaliꞌ, apa mani to nupegiá? Meángkáꞌmokoꞌ bona rariumokoꞌ. Mekakaemokoꞌ i Pueꞌ Iesu bona dósámu Naꞌámpungi.’ ”

¹⁷Paulu mopaliliu wopiꞌi laluitana, nauliꞌ, “Mewaliꞌ hangko ionoꞌ, mesuleꞌmoꞌ mai i Ierusale, hai tangaꞌkuꞌ mekakae i tangabaa Támbina Pueꞌ Ala, kuita pampetudeꞌá.

¹⁸Moitaꞌaꞌ Pueꞌ Iesu hai Nahángáꞌáꞌáꞌaꞌ, ‘Hawiáꞌmokoꞌ pohuꞌ hangko i Ierusale, láwiꞌ tauna ieneꞌ tiꞌaraheꞌ ina mampoinálái apa to nupolaluita mokana i Kódóꞌ.’

¹⁹Kuhániki, ‘Pueꞌ, raisánto bábehiángkuꞌ hangkoia. Raisá noumbá pesuaꞌkuꞌ i támbi penómbáꞌá, mohakaꞌheꞌ, mopapahái hai motarungku tauna to mepoinálái i Hio.

²⁰Noꞌonoꞌ woꞌo, i tempóna sabiꞌMu Setepanu rapapate, araꞌaꞌ woꞌo ionoꞌ láwiꞌ kódóꞌ miꞌi to mokámpái waruꞌraꞌ tauna to mopapate, hai kupokana karapapatena.’[291]

²¹Agáiáná nahángáꞌá wopaꞌaꞌ Pueꞌ, ‘Hangaa-ngaa pohuꞌmokoꞌ, láwiꞌ ina Kuhuoꞌkoꞌ lao i tampoꞌ to karaoꞌ, i tauna to tiꞌaraheꞌ toIahudiꞌ.’ ”

²²Maniiꞌheꞌ tauna to handaꞌ mampehádingi Paulu molaluita. Agáiáná kanauliꞌna ina lao i tauna to tiꞌaraheꞌ toIahudiꞌ, monganga-ngangaheꞌ rapasimbuku mopakóiꞌ Paulu, rauliꞌ, “Nipapate pemiꞌi! Ineeꞌ miꞌi rapatodáhi tueꞌ!”

²³Monganga-ngangaheꞌ hai motelángaheꞌ kumbáraꞌ. Mokámburáheꞌ awu i laerawa ánti kamabukoꞌraꞌ.

²⁴Onoꞌ miꞌi haneꞌi kapalaꞌ tadulako surudadoꞌ iti mohuoꞌ miꞌi surudadoꞌna moánti Paulu mesuaꞌ i lalu támbi surudadoꞌ, bona rahepe hai gulaꞌ haneꞌi rapáresáꞌ, bona raisá ntóáꞌna apa to rakáhihiꞌá toIahudiꞌ.

²⁵I karatakaꞌna miꞌi Paulu i áriꞌi ina rapahái, molaluita miꞌi Paulu i hadua tadulako surudadoꞌ to ara i hintáiꞌna, nauliꞌ, “Ba hintotoꞌ toRoma rahepe ane tiꞌara mani rapáresáꞌ hai rabutusi kárá-kárána?”[292]

²⁶Kanahádina peá tadulako surudadoꞌ laluita iti, ia lao i kapalaꞌ tadulako surudadoꞌ nauliꞌ, “Tuá, moapa riꞌi haneꞌi nuhuoꞌangkaiꞌ mohepe tauna iti? Ia toRoma!”

²⁷Onoꞌ miꞌi haneꞌi kapalaꞌ tadulako surudadoꞌ iti lao i Paulu, napekuneꞌ, “Nuhángáꞌáꞌáꞌaꞌ, ba toꞌu-toꞌu toRomakoꞌ?” Nahániki Paulu, “Toꞌu.”

²⁸Nauliꞌ kapalaꞌ tadulako surudadoꞌ iti, “Masuliꞌ kakubaiarina i topopárentá, bona mewaliꞌaꞌ toRoma.” Nahániki Paulu, “Agáiáná kódóꞌ deꞌe, toRomaꞌaꞌ hangko i karapoánákangkuꞌ.”

²⁹Hangko ionoꞌ, surudadoꞌ to ina mopahái Paulu mosuliꞌheꞌ, hai kapalaꞌ tadulako surudadoꞌ iti malááꞌ miꞌi woꞌo, láwiꞌ ia miꞌi to mampehuoꞌá bona Paulu ratakaꞌ, mole toRoma.

³⁰[293] Kapalaꞌ tadulako surudadoꞌ iti mampoinao moisá ba apa mpuꞌu ntóáꞌna haneꞌi Paulu rasalaꞌi toIahudiꞌ. Onoꞌ miꞌi haneꞌi kahalona ia mokióꞌheꞌ upu-upu kapalaꞌ-kapalaꞌ tadulako menómbá hai tadulako agama Iahudiꞌ to ntániꞌna bona hirámpuheꞌ. Roo onoꞌ, Paulu rakábáhá miꞌi hangko i timpukuna haneꞌi raꞌánti lao i lindoꞌraꞌ.