Read Besoa Surona Pueꞌ Iesu 24 Bible Online

Surona Pueꞌ Iesu 24 - Besoa bible

Surona Pueꞌ Iesu 24

¹Lima alona hangko ionoꞌ, Tadulako Menómbá Mahile Anania hai bahangapaheꞌ tadulakoraꞌ toIahudiꞌ haweꞌ i kótá Kaisarea, hai hadua tauna to mapánde molaluita ara woꞌo. Tauna iti rahangaꞌ Tetulusi. Kahaweꞌraꞌ ionoꞌ, laomoheꞌ i lindoꞌna Mágáuꞌ Peliꞌ mopahaweꞌ pesalaꞌiraꞌ i Paulu.

²Mágáuꞌ Peliꞌ mohuoꞌ miꞌi tauna moánti Paulu i lindoꞌna, hai Tetulusi raweꞌi tempó molaluita. Ia mantepuꞌu mopahaweꞌ pesalaꞌiraꞌ, nauliꞌ, “Umángkiꞌ Mágáuꞌ Peliꞌ to kibiláꞌ! Kaiꞌ taunámu to handaꞌ, tueꞌangkaiꞌ hangko i kamaroꞌana popárentámu. Ánti kamapándemu mepárentá, maroꞌa miꞌi katueꞌkiꞌ deꞌe-deꞌe i humalele tampoꞌkiꞌ.

³Upu-upuna kitarima, hai iumbá-umbá kipomahilekoꞌ.

⁴Agáiáná, bona tiꞌarakoꞌ luleꞌ, kipembiáꞌ ahiꞌ bona nupehádingi laluitangkuꞌ to rembe deꞌe.

⁵Paulu deꞌe to paka mampoposisalaꞌ tauna i humalele duniáꞌ. Iumbá-umbá peá kalaoána, ia mopamaꞌamuꞌ laluraꞌ toIahudiꞌ bona moewaꞌheꞌ topopárentá. Hai ia miꞌi hadua tadulakoraꞌ tauna to mouláꞌ paturoꞌna hadua tauna to hangko i wánuá Nasare.[300]

⁶Pelumbuꞌna miꞌi, napoinao motitibei Támbina Pueꞌ Ala, onoꞌ miꞌi haneꞌi kihakaꞌ. [Hangkoia ara tunggáiángkiꞌ mohoda-hoda kárá-kárána mouláꞌ áturána ágámángkiꞌ.

⁷Agáiáná kapalaꞌ tadulako surudadoꞌ to rahangaꞌ Lisia, poloꞌ lao moala hangko i kaiꞌ.

⁸Hai napahaweꞌ bona heáná to mampoinao mosalaꞌi Paulu deꞌe, hangaa-ngaa mai i hio mágáuꞌ.][301] Mewaliꞌ ane nupáresáꞌi, ina nuhádi hangko i hia katoꞌuna laluitangkiꞌ deꞌe to mosalaꞌi Paulu.”

⁹Upu-upu toIahudiꞌ to ara ionoꞌ, mosalaꞌiheꞌ woꞌo Paulu hai mampokana laluitana Tetulusi iti.

¹⁰Roo onoꞌ, Mágáuꞌ Peliꞌ moángkáꞌ miꞌi taena, tandaꞌna moweꞌi tempó i Paulu molaluita. Molaluita miꞌi Paulu, nauliꞌ, “Góeꞌ ntepuꞌuaꞌ, mágáuꞌ, láwiꞌ nuweꞌimoꞌ tempó ina mopahaweꞌ i katoꞌu-toꞌuána i lindoꞌmu. Kuisá, i parena miꞌi, io mewaliꞌkoꞌ topobutusi i tampoꞌkiꞌ.

¹¹Mewaliꞌ ane nupáresáꞌ laluitangkuꞌ deꞌe, ina tongawaꞌ katoꞌuna. Hampuloꞌ peá hai rongalo to liu, laoaꞌ i kótá Ierusale menómbá i Támbina Pueꞌ Ala.

¹²Tiꞌaraꞌaꞌ haweꞌ hangkani ralámbiꞌ mosisalaꞌ ba mopamaꞌamuꞌ laluraꞌ tauna to handaꞌ i Támbina Pueꞌ Ala, i támbi penómbáꞌá, ba iumbá peá i lalu kótá.

¹³Tiꞌara woꞌo haweꞌ hadua tauna to peisá mopatongawaꞌ katoꞌuna popahaweꞌraꞌ ininá to rasalaꞌiáꞌaꞌ.

¹⁴Agáiáná deꞌe miꞌi to kupangákuꞌ i Tuá: menómbáꞌaꞌ i Pueꞌ Ala to rapenómbái toiorungkiꞌ, mouláꞌ Paturoꞌna Pueꞌ Iesu. Paturoꞌ iti rauliꞌ ewálingkuꞌ paturoꞌ to mepakanawoꞌ. Hai bateꞌna kupoinálái mani upu-upu to teukiꞌ i Paturoꞌna Musa hai suraraꞌ nabiꞌ-nabiꞌ.

¹⁵Pehárungángkuꞌ i Pueꞌ Ala bateꞌna hibali hai pehárungáraꞌ tauna to moewaꞌaꞌ deꞌe: kupoinálái kaꞌina árána tempó to napakanótó Pueꞌ Ala mopatueꞌ huleꞌ upu-upu tomate, maroꞌa to manótó bábehiáraꞌ, maroꞌa to kadake bábehiáraꞌ.

¹⁶Onoꞌ miꞌi haneꞌi kupári-pári mobábehi oaꞌ apa to maroꞌa, bona kuisá i lalungkuꞌ katiꞌárána ara to peisá rasalaꞌiáꞌaꞌ, maroꞌa i peitána Pueꞌ Ala, maroꞌa i peitána tauna.

¹⁷Bahangapa miꞌi parena, tiꞌaraꞌaꞌ lao i Ierusale. Roo onoꞌ, laoaꞌ huleꞌ bona moántiaꞌ dóiꞌ petulungi i halalungkuꞌ toIahudiꞌ hai moántiaꞌ woꞌo popenómbángkuꞌ i Pueꞌ Ala.

¹⁸Tangaꞌkuꞌ moánti popenómbángkuꞌ iti, láwiꞌ roomoꞌ mopamagasaꞌ mouláꞌ ádá ágámángkiꞌ, ara bahangapaheꞌ toIahudiꞌ to molámbiꞌaꞌ i Támbina Pueꞌ Ala. I tempó iti, tiꞌara handaꞌ tauna to hingkakani hai kódóꞌ, hai tiꞌara woꞌo ara to mohewo-hewo.

¹⁹Agáiáná araheꞌ ionoꞌ bahangapa toIahudiꞌ hangko i poropensi Asia. Katoꞌuána, kehira riꞌi to hangaa-ngaa mai mosalaꞌiaꞌ i lindoꞌna mágáuꞌ, ane salaꞌ mpuꞌuaꞌ,

²⁰agáiáná hira tiꞌaraheꞌ ara ieneꞌ. Mewaliꞌ, rángina miꞌi tauna to mosalaꞌiaꞌ to araheꞌ ieneꞌ deꞌe-deꞌe mopahaweꞌ apa bábehiángkuꞌ to kadake to ralámbiꞌ i karapáresáꞌkuꞌ i lindoꞌraꞌ Topepáresáꞌ Mahile i Ierusale.

²¹Bateꞌna peá laluitangkuꞌ deꞌe to rasalaꞌiáꞌaꞌ, tempóna kuꞌuliꞌ kupasimbuku i lindoꞌraꞌ, ‘Kódóꞌ deꞌe rapáresáꞌaꞌ dehangaloá, láwiꞌ kupoinálái tauna to mate bateꞌna ina rapatueꞌ huleꞌ.’ ”

²²Mágáuꞌ Peliꞌ moisá ntepuꞌu apa to rapoinálái toSarani kana i rárá katehómpóꞌ, onoꞌ miꞌi haneꞌi nauliꞌ, “Hangka ieneꞌ miꞌi sieruꞌ pehoda-hodantaꞌ. Kara-kara deꞌe kubutusi rái ane haweꞌ miꞌi kapalaꞌ tadulako surudadoꞌ Lisia.”

²³Roo onoꞌ, napohawaꞌá miꞌi tadulako surudadoꞌ mokámpái Paulu, agáiáná ia peisá mani molulumao i lalu tarungku, hai rángána rapaliuheꞌ mampoweꞌi apa to naparaluu.

²⁴Bahangapa alona hangko ionoꞌ, haweꞌ wopiꞌi Mágáuꞌ Peliꞌ hai toinána to rahangaꞌ Dusila. Dusila iti toIahudiꞌ. Napehuoꞌá miꞌi Peliꞌ bona surudadoꞌna moánti Paulu i lindoꞌraꞌ, bona mampehádingiheꞌ Paulu molaluita mokana i pepoináláina i Kerisitu Iesu.

²⁵Paulu mampolaluita i Peliꞌ noumbá rárána tauna hangaa-ngaa manótó laluraꞌ, hai hangaa-ngaa momeeꞌheꞌ peundeꞌána laluraꞌ, láwiꞌ ina haweꞌ Alo Pehukuna Pueꞌ Ala. Kanahádina Peliꞌ laluitana Paulu iti, malááꞌ miꞌi, haneꞌi nauliꞌ, “Gáná miꞌi sieruꞌ! Peisákoꞌ mesuleꞌ! Ina kukióꞌramokoꞌ ane ara logángkuꞌ.”

²⁶Katoꞌuána, nahárungá Peliꞌ kaꞌina napoweꞌina Paulu dóiꞌ sogoꞌ bona rakábáhá. Onoꞌ miꞌi haneꞌi Paulu paka nakióꞌ bona peisáheꞌ molaluita.

²⁷Liu miꞌi rompare, Mágáuꞌ Peliꞌ napaháwángi miꞌi Pekiu Petusi. Ánti kanapoinaona Peliꞌ moala laluraꞌ toIahudiꞌ, onoꞌ miꞌi haneꞌi Paulu napatodáhi peá ratarungku.[302]