Read Besoa Surona Pueꞌ Iesu 25 Bible Online

Surona Pueꞌ Iesu 25 - Besoa bible

Surona Pueꞌ Iesu 25

¹Tálu miꞌi alona rapomágáuꞌ, Petusi pohuꞌ hangko i kótá Kaisarea lao i kótá Ierusale.

²Kahaweꞌna ionoꞌ, kapalaꞌ-kapalaꞌ tadulako menómbá hai tadulakoraꞌ toIahudiꞌ laomoheꞌ i Petusi mopahaweꞌ pesalaꞌiraꞌ i Paulu.

³Membiáꞌ ntepuꞌuheꞌ i Petusi bona hangko i kamaroꞌana laluna, ia mohuoꞌ tauna bona moánti Paulu lao i Ierusale, láwiꞌ tunggáiáraꞌ bona Paulu rapapate peá i tangaꞌ rárá.

⁴Agáiáná nahániki Petusi, “Paulu deꞌe-deꞌe ratarungku i Kaisarea hai tiꞌara marue ina mesuleꞌaꞌ lao ionoꞌ.

⁵Rángina miꞌi nipileꞌi hangko i oloꞌmi tauna to makuasaꞌ, to ina meuláꞌ i kódóꞌ lao i Kaisarea, bona kupehádingi laluitami, ba ara mpuꞌu bábehiána to salaꞌ.”

⁶Uwalu ba hampuloꞌ mani alona Petusi ara i Ierusale, hangko mesuleꞌ riꞌi lao i Kaisarea. Kahalona, ia mokióꞌheꞌ upu-upu tadulakoraꞌ toIahudiꞌ to meuláꞌ i hia, bona mogómbóheꞌ, hai napehawaꞌiá bona Paulu raꞌánti i pogómbóáraꞌ.

⁷I kahaweꞌna Paulu, toIahudiꞌ to haweꞌ hangko i Ierusale meángkáꞌ motolelingi Paulu, hai mesalaꞌiheꞌ. Handaꞌ pákáꞌna pesalaꞌi to matimi rapahaweꞌá, agáiáná katoꞌuna popahaweꞌraꞌ iti tiꞌara ara katongawaꞌána.

⁸Roo onoꞌ, Paulu mopahaweꞌ i katoꞌu-toꞌuána, nauliꞌ, “Tiꞌara ara salaꞌkuꞌ! Tiꞌaraꞌaꞌ moliungi áturáraꞌ toIahudiꞌ, ba motitibei Támbina Pueꞌ Ala, ba moewaꞌ Datu Mahile i Roma!”

⁹Ánti kanapoinaona Petusi moala laluraꞌ toIahudiꞌ, napekuneꞌ i Paulu, “Ba nupokana lao i Ierusale, bona kárá-kárámu rahoda-hoda i lindoꞌkuꞌ ionoꞌ?”

¹⁰Nahániki Paulu, “Deꞌe-deꞌe, meángkáꞌaꞌ i lindoꞌna mágáuꞌ to mosulewátái Datu Mahile Roma. Hai bateꞌna topopárentá Roma to hintotoꞌ mobutusi kárá-kárángkuꞌ. Nuisá ntepuꞌu mágáuꞌ, katiꞌárána ara salaꞌkuꞌ i toIahudiꞌ.

¹¹Ane toꞌu-toꞌu ara salaꞌkuꞌ to hintotoꞌ rahukuáꞌaꞌ mate, timamaꞌaꞌ rapapate. Agáiáná ane tiꞌara toꞌu popahaweꞌraꞌ toIahudiꞌ deꞌe, tiꞌara ara hadua tauna to peisá mohuhuꞌaꞌ i lalu kuasaꞌraꞌ. Hangaa-ngaa kárá-kárángkuꞌ kubuáꞌ i Datu Mahile i Roma!”

¹²Kanahádina Petusi laluitana Paulu iti, mopolaluita miꞌi i taunána to mopatente, haneꞌi nauliꞌ i Paulu, “Ánti pembiáꞌmu bona kárá-kárámu nabutusi Datu Mahile, hangaa-ngaa laokoꞌ i kótá Roma molindoꞌ Datu Mahile iti.”

¹³Bahangapa alona hangko ionoꞌ, Datu Agaripa[303] hai Beanike ádina towawine, laoheꞌ i kótá Kaisarea moweoꞌ Petusi bona mopahaweꞌ tabeáraꞌ ánti karaꞌángkáꞌna miꞌi mewaliꞌ mágáuꞌ.

¹⁴Láwiꞌ bahangapa aloraꞌ ionoꞌ, Petusi molaluita i Datu Agaripa mokana i kárá-kárána Paulu, nauliꞌ, “Ara ieneꞌ hadua tauna to ratarungku i tempóna popárentána Peliꞌ, hai ia ratarungku mani.

¹⁵I tempóngkuꞌ ara i Ierusale, kapalaꞌ-kapalaꞌ tadulako menómbá hai totosaeraꞌ toIahudiꞌ mopahaweꞌáꞌaꞌ pesalaꞌiraꞌ i tauna iti, hai membiáꞌheꞌ bona ia rahuku.

¹⁶Kuhánikiheꞌ node: Mouláꞌ áturángkiꞌ toRoma, tauna to rasalaꞌi tiꞌara peisá kásáliu rahuhuꞌ i to mesalaꞌi. Ia hangaa-ngaa rahoda-hoda sieruꞌ mombelindoꞌ hai to mesalaꞌi iti, hai hangaa-ngaa raweꞌi woꞌo tempó mampeámpárái wátána haduduána.

¹⁷Hangko ionoꞌ, bahangapa tadulakoraꞌ toIahudiꞌ maiheꞌ hingkakani hai kódóꞌ hangko i kótá Ierusale. Kahaweꞌkiꞌ ieneꞌ, tiꞌara kupegiá marue. Kahalona, kupehuoꞌá bona Paulu raꞌánti mai haneꞌi kihoda-hoda kárá-kárána.

¹⁸Upu-upu tauna to mesalaꞌi iti araheꞌ woꞌo i lindoꞌkuꞌ bona mopahaweꞌheꞌ pesalaꞌiraꞌ. Kuꞌuliꞌ riꞌi ara bábehiána Paulu to kadake ntepuꞌu to rasalaꞌiá, mole tiꞌaranto.

¹⁹To kulámbiꞌ, mamposisalaꞌi peheꞌ ágámáraꞌ. Mampombeheheꞌi peheꞌ hadua tauna to rahangaꞌ Iesu. Tauna iti mate miꞌi, agáiáná nauliꞌ Paulu, bateꞌNa tueꞌ miꞌi huleꞌ.

²⁰Mewaliꞌ wuliaꞌ noumbá rárána mobutusi kárá-kárána iti, onoꞌ miꞌi haneꞌi kupekuneꞌ i Paulu ba napokana lao i Ierusale, bona kárá-kárána rahoda-hoda ionoꞌ.

²¹Agáiáná napembiáꞌ bona kárá-kárána rabuáꞌ i Datu Mahile, hai napembiáꞌ woꞌo bona rakámpái duuꞌna haweꞌ i lindoꞌna Datu Mahile. Onoꞌ miꞌi haneꞌi kupehuoꞌá bona Paulu ratarungku mani duuꞌna peisá raꞌánti lao i Datu Mahile i Roma.”

²²Hangko ionoꞌ, nauliꞌ Datu Agaripa i Petusi, “Kupoinao woꞌo mohádi polaluitana tauna iti.” Nauliꞌ Petusi, “Kahalo rái ina nuhádi polaluitana.”

²³Kahalona, haweꞌ wopaheꞌ Datu Agaripa hai Beanike ádina, hai radupaꞌheꞌ hai handaꞌ pákáꞌna pepomahile. Mesuaꞌheꞌ i lalu lintuꞌ pogómbóá hingkakani hai kapalaꞌ-kapalaꞌ tadulako surudadoꞌ hai totosae i kótá. Petusi mampehuoꞌá bona Paulu raꞌánti lao i lindoꞌraꞌ.

²⁴Hangko ionoꞌ, molaluita miꞌi Petusi, nauliꞌ, “Datu Agaripa to kubiláꞌ, umaꞌ-umaꞌ hai upu-upu to ara ieneꞌ! Nipeita tauna deꞌe! Ia rasalaꞌi upu-upu toIahudiꞌ, maroꞌa to i Ierusale, maroꞌa to ieneꞌ i Kaisarea. Molaluitaheꞌ rapasimbuku, rapembiáꞌ i kódóꞌ bona tauna deꞌe rahukuá mate.

²⁵Kehapiꞌ noꞌonoꞌ, tiꞌara ara salaꞌna to kulámbiꞌ to hintotoꞌ rahukuá mate. Agáiáná ia membiáꞌ bona kárá-kárána rabuáꞌ i Datu Mahile i Roma, onoꞌ miꞌi haneꞌi kupakanótó bona raꞌánti lao ionoꞌ.

²⁶Agáiáná tiꞌara mani manótó apa to hangaa-ngaa kuꞌukiꞌ i lalu surangkuꞌ i Datu Mahile. Mewaliꞌ, onoꞌ miꞌi haneꞌi kupehuoꞌá bona Paulu raꞌánti mai i lindoꞌmi, pelumbuꞌna miꞌi i hio Datu Agaripa to kubiláꞌ. Tunggáiángkuꞌ, bona karoona rapáresáꞌ ieneꞌ, ara miꞌi to peisá kuꞌukiꞌ,

²⁷láwiꞌ mouláꞌ polámbiꞌkuꞌ, tiꞌara hintotoꞌ tauna raꞌánti lao i pebutusiá Datu Mahile ane tiꞌara ara sura to mopakanótó apa salaꞌna.”