Read Besoa Surona Pueꞌ Iesu 26 Bible Online

Surona Pueꞌ Iesu 26 - Besoa bible

Surona Pueꞌ Iesu 26

¹Roo onoꞌ, nauliꞌ Datu Agaripa i Paulu, “Deꞌe-deꞌe ara miꞌi tempómu mopahaweꞌ i katoꞌu-toꞌuána.” Paulu moángkáꞌ miꞌi taena, napakaniiꞌheꞌ haneꞌi mantepuꞌu miꞌi molaluita mopahaweꞌ i katoꞌu-toꞌuána, nauliꞌ,

²“Datu Agaripa to kubiláꞌ! Ioru-oru kuꞌuliꞌ morasiꞌ ntepuꞌuaꞌ, láwiꞌ peisáꞌaꞌ meángkáꞌ ieneꞌ i lindoꞌmu datu, mopahaweꞌ i katoꞌu-toꞌuána, mohániki upu-upu pesalaꞌiraꞌ toIahudiꞌ i kódóꞌ,

³pelumbuꞌna mani láwiꞌ nuisánto datu, ádántaꞌ toIahudiꞌ hai paturoꞌ to rapombeheheꞌi.[304] Onoꞌ miꞌi haneꞌi kupembiáꞌ bona sabaraꞌkoꞌ mampehádingi laluitangkuꞌ.

⁴Upu-upu toIahudiꞌ moisá noumbá katueꞌkuꞌ mantepuꞌu hangko i rungu-runguna, i tempóngkuꞌ maleheꞌ mani hai toroꞌ i oloꞌraꞌ hangka toIahudiꞌkuꞌ i Ierusale.

⁵Marue miꞌi toIahudiꞌ moisá bábehiángkuꞌ. Ane raundeꞌ, peisáheꞌ mampodarita noumbá katueꞌkuꞌ. Kódóꞌ deꞌe tueꞌaꞌ mouláꞌ paturoꞌraꞌ toParisi to maróhó ntepuꞌu pampeuláꞌiraꞌ upu-upu áturá-áturá agama Iahudiꞌ.

⁶Hai deꞌe-deꞌe, ánti pehárungángkuꞌ i dándina Pueꞌ Ala i toioruntaꞌ hangkoia, onoꞌ miꞌi haneꞌi bateꞌkuꞌ rapáresáꞌ ieneꞌ.

⁷Dándina iti rapoinálái woꞌo upu-upu halaluntaꞌ toIahudiꞌ to hampuloꞌ hai rontina to mengkoruꞌ i Pueꞌ Ala. Datu to kubiláꞌ, ánti pehárungángkuꞌ iti, onoꞌ miꞌi haneꞌi rasalaꞌiaꞌ toIahudiꞌ.

⁸Hai kómu upu-upu, moapa riꞌi haneꞌi tiꞌara nipoinálái kamakuasaꞌna Pueꞌ Ala mopatueꞌ huleꞌ tomate?

⁹Hangkoia woꞌo, kuꞌuliꞌ riꞌi hangaa-ngaa kuewaꞌ ntepuꞌu upu-upu tauna to meuláꞌ i Iesu toNasare.

¹⁰Hai kuewaꞌ mpuꞌuheꞌ i Ierusale. I tempó iti, kutarima miꞌi sura kuasaꞌ hangko i kapalaꞌ-kapalaꞌ tadulako menómbá, onoꞌ miꞌi haneꞌi handaꞌ toSarani to kutarungku, hai kupokana ane hira woꞌo rahukuheꞌ mate.

¹¹Handaꞌ kánina kupopeahiahiꞌheꞌ i lalu támbi penómbáꞌá, hai kupári-pári bona mosápuákaheꞌ pepoináláiraꞌ i Iesu. Mabukoꞌ ntepuꞌuaꞌ moitaheꞌ, onoꞌ miꞌi haneꞌi laoaꞌ woꞌo i bahangapa kótá to karaoꞌ bona mampopeahiahiꞌheꞌ.”

¹²Paulu mopaliliu wopiꞌi laluitana, nauliꞌ, “Datu to kubiláꞌ. Onoꞌ miꞌi tunggáiángkuꞌ tempóngkuꞌ lao i kótá Damasiꞌ. I tempó onoꞌ, kapalaꞌ-kapalaꞌ tadulako menómbá mohuoꞌaꞌ hai moweꞌiaꞌ kuasaꞌ.

¹³Mewaliꞌ laoaꞌ i Damasiꞌ, agáiáná i kalialo i tangaꞌ rárá, hangkaꞌ-hangkaꞌ perái kuita wangkaꞌ hangko i langiꞌ, pewangkaꞌna rumihi mani hangko i pewangkaꞌna alo. Pewangkaꞌ iti mowangkaꞌiaꞌ hai upu-upu tauna to meuláꞌ i kódóꞌ.

¹⁴Madungkáꞌangkaiꞌ upu-upu, hai ara wambaꞌ to molaluita i kódóꞌ i lalu básá Iberani, nauliꞌ node: ‘Saulu, Saulu, moapa riꞌi haneꞌiAꞌ nupopeahiahiꞌ? Mopamapári pekoꞌ wátámu haduduámu ane moewaꞌkoꞌ oaꞌ peteteꞌKuꞌ.’

¹⁵Kupekuneꞌ, ‘Tuá, heánáKoꞌ?’ Nahánikiaꞌ, ‘Kódóꞌ miꞌi Iesu, to nupopeahiahiꞌ!

¹⁶Meángkáꞌmokoꞌ! Kupatongawaꞌámokoꞌ wátáNgkuꞌ, láwiꞌ ara tunggáiáNgkuꞌ i hio: Kupileꞌimokoꞌ mewaliꞌ topobágóꞌKuꞌ hai sabiꞌKuꞌ. Hangaa-ngaa nupahaweꞌ i tauna ntániꞌna apa to nuita miꞌi i alo dehangaloá mokana i Kódóꞌ, hai apa to ina Kupopaitaꞌákoꞌ i alo to ina haweꞌ.

¹⁷Ina Kukábáhákoꞌ hangko i kuasaꞌraꞌ toIahudiꞌ hai hangko i kuasaꞌraꞌ tauna to tiꞌara toIahudiꞌ. Kuhuoꞌkoꞌ lao moánti NgkóráꞌKuꞌ i hira.

¹⁸Kuhuoꞌkoꞌ lao mopaturoꞌheꞌ tauna to tiꞌara maniAꞌ moisá bona mepoináláiheꞌ, hai mopálehiheꞌ kamakáindi lao i kamabaa, bona tekábáháheꞌ hangko i kuasaꞌna Datu Tokadake, haneꞌi nakuasaꞌiheꞌ Pueꞌ Ala. Kuhuoꞌkoꞌ lao bona dósáraꞌ ina naꞌámpungi Pueꞌ Ala, hai ina molámbiꞌheꞌ woꞌo gáláꞌraꞌ i oloꞌraꞌ tauna to magasaꞌ ánti pepoináláiraꞌ i Kódóꞌ.’ ”

¹⁹Roo onoꞌ, Paulu mopaliliu wopiꞌi laluitana, nauliꞌ, “Datu Agaripa to kubiláꞌ. Onoꞌ miꞌi haneꞌi kupári-pári mampeuláꞌi apa to nahángáꞌáꞌaꞌ Pueꞌ i lalu pampatongawaꞌNa i kódóꞌ.

²⁰Onoꞌ miꞌi haneꞌi kupahaweꞌ i upu-upu tauna, hangaa-ngaa menosoꞌheꞌ hangko i dósáraꞌ hai mengkoruꞌheꞌ i Pueꞌ Ala, hai hangaa-ngaa mobábehiheꞌ apa to maroꞌa bona tongawaꞌ penosoꞌraꞌ. Rungu-runguna bámbári iti kupahaweꞌ i kótá Damasiꞌ, roo onoꞌ i Ierusale hai i humalele tampoꞌ Iudá, haneꞌi i tauna ntániꞌna to tiꞌaraheꞌ toIahudiꞌ.

²¹Onoꞌ miꞌi haneꞌi rahakaꞌaꞌ toIahudiꞌ i Támbina Pueꞌ Ala hai rapoinao mopapateaꞌ.

²²Agáiáná kehapiꞌ noꞌonoꞌ, duuꞌna deꞌe-deꞌe, Pueꞌ Ala mokámpáiaꞌ, hai peisá maniaꞌ meángkáꞌ ieneꞌ mampolaluita kana i posabikingkuꞌ Pueꞌ Iesu i upu-upu tauna, maroꞌa i tauna to mapángkáꞌ lántiꞌna, maroꞌa i tauna biásá. Apa to kuꞌuliꞌ deꞌe, bateꞌna hibali hai apa to rapahaweꞌ miꞌi ami Musa hai nabiꞌ-nabiꞌ hangkoia.

²³To ratunggái ia miꞌi: Datu Topehómpóꞌ hangaa-ngaa rapopeahiahiꞌ hai rapapate,[305] hai ánti kaꞌIana miꞌi to rungu-runguna tueꞌ huleꞌ hangko i kapate, Ia to ina mopatongawaꞌ ngkóráꞌna Pueꞌ Ala to mowangkaꞌi laluraꞌ upu-upu tauna, maroꞌa toIahudiꞌ, maroꞌa to tiꞌaraheꞌ toIahudiꞌ.”

²⁴Tangaꞌna mani Paulu molaluita, Petusi molaluita miꞌi napasimbuku, nauliꞌ, “Magilakoꞌ, Paulu! Kapándemu iti to mopamagilakoꞌ.”

²⁵Nahániki Paulu, “Mágáuꞌ to kubiláꞌ, tiꞌaraꞌaꞌ magila. To kupolaluita iti, toꞌu hai mesuaꞌ i akala.

²⁶Datu Agaripa woꞌo, naisá miꞌi mokana i apa to kuꞌuliꞌ ininá, onoꞌ miꞌi haneꞌi tiꞌaraꞌaꞌ malááꞌ molaluita noꞌonoꞌ i lindoꞌna. Kupekiri tiꞌara ara to tiꞌara mani nahádi Datu Agaripa, láwiꞌ upu-upu to mewaliꞌ iti, tiꞌara ara to tewuniángi.

²⁷Datu Agaripa to kubiláꞌ! Ba nupoinálái apa to rauliꞌ nabiꞌ-nabiꞌ hangkoia? Kuisá nupoinálái apa to rauliꞌ!”

²⁸Nahániki Datu Agaripa, “Ba nupekiri paꞌi ane kupehádingi apa to nupolaluita iti, ina poloꞌaꞌ mewaliꞌ toSarani?”

²⁹Nahániki Paulu, “Mekakaeaꞌ i Pueꞌ Ala bona, kawiáꞌ ba marue, datu hai upu-upu tauna to mampehádingi laluitangkuꞌ alo deꞌe, ina mewaliꞌkou nodo kódóꞌ hai mepoináláikou i Pueꞌ Iesu, ngkáliꞌna riꞌi tiꞌarakou nodo kódóꞌ, ratimpuku hai rante deꞌe.”

³⁰Kahópóꞌána, meángkáꞌmoheꞌ Datu Agaripa, Mágáuꞌ Petusi hai Beanike, hingkakani hai rángáraꞌ, haneꞌi pohuꞌheꞌ hangko i lintuꞌ pogómbóá.

³¹Haweꞌheꞌ i rawa, molaluitamoheꞌ hadua hai hadua, rauliꞌ, “Tauna iti, tiꞌara woia ara salaꞌna to hintotoꞌ rahukuá mate ba ratarungkuá.”

³²Hangko onoꞌ, nauliꞌ Datu Agaripa i Mágáuꞌ Petusi, “Kekatoꞌuána, peisá miꞌi rakábáhá, ane ketiꞌara mobuáꞌ kárá-kárána i Datu Mahile i Roma.”