Read Besoa Surona Pueꞌ Iesu 27 Bible Online

Surona Pueꞌ Iesu 27 - Besoa bible

Surona Pueꞌ Iesu 27

¹Roo onoꞌ, rapakanótó miꞌi hangaa-ngaa pohuꞌangkaiꞌ moduanga i tahiꞌ lao i tampoꞌ Italia. Paulu hai bahangapa tauna ntániꞌna to ratarungku rapehuhuꞌá i Iuliu, hadua tadulako surudadoꞌ to motadulakoi hangatu surudadoꞌ toRoma. Hira rauliꞌ “surudadoꞌna Datu Mahile”.

²Duanga tahiꞌ to kipengkaheꞌi iti, ia miꞌi hambuaꞌ duanga mahile hangko i kótá Adamitiu, hai ina mehupeꞌ-hupeꞌ i wánuá-wánuá to i wiwi tahiꞌ i poropensi Asia. Hadua rángángkiꞌ to meuláꞌ i poduangangkiꞌ ia miꞌi Aritaku, to hangko i kótá Tesalonika i tampoꞌ Makedonia.

³Hangaloá miꞌi polumaongkiꞌ, mehupeꞌangkaiꞌ i kótá Sido. Maroꞌa ntepuꞌu laluna Iuliu i Paulu, onoꞌ miꞌi haneꞌi Paulu naweꞌi tempó moweoꞌ rángána i lalu kótá iti, bona apa to naparaluu peisá raweꞌi.

⁴Hangko ionoꞌ, kipaliliu poduangangkiꞌ. Ánti karumihina wui hangko i lindoꞌ, duangangkiꞌ menánáꞌ peá i puló Sipuru tándáꞌ i mata alo bona teháláꞌangkaiꞌ hangko i wui to rumihi iti.

⁵Roo onoꞌ, moduangaꞌangkaiꞌ i tahiꞌ moliuangkaiꞌ poropensi Kilikia hai Pampilia, duuꞌna haweꞌangkaiꞌ i kótá Mira i poropensi Likia.

⁶I Mira iti, tadulako surudadoꞌ Iuliu molámbiꞌ hambuaꞌ duanga tahiꞌ hangko i kótá Alesandaria to ina lao i tampoꞌ Italia. Onoꞌ haneꞌi napopelimbaꞌangkaiꞌ i duanga tahiꞌ iti.

⁷Bahangapa alona kamaruena, maole-ole peá duanga tahiꞌ iti, hai maꞌángkárá ntepuꞌu mohungkuki kótá Kinidu. Ánti karumihina wui hangko i lindoꞌkiꞌ mai, tiꞌara kipaliliu poduangangkiꞌ nodo tunggáiángkiꞌ rungu-runguna. Onoꞌ miꞌi haneꞌi duangangkiꞌ menánáꞌ peá i puló Kereta moliu i wuntu Salamone, bona teháláꞌangkaiꞌ hangko i wui.

⁸Maꞌángkárá ntepuꞌu poduangangkiꞌ menánáꞌ i puló Kereta iti. Kahópóꞌána, haweꞌangkaiꞌ i pehupeꞌá duanga tahiꞌ to rahangaꞌ Pehupeꞌá Mababe, to hungkuꞌ i wánuá Lasea.

⁹Ánti kamawewena poduangangkiꞌ, liu miꞌi alo mahile popuasaꞌraꞌ toIahudiꞌ. Ina haweꞌ tempó lengiꞌ, tempó to melááꞌ-lááꞌi i tahiꞌ,[306] onoꞌ miꞌi haneꞌi Paulu mopaingáꞌiheꞌ topobágóꞌ i duanga, nauliꞌ,

¹⁰“Halalu-halalu, mouláꞌ polámbiꞌkuꞌ, ina hurewuꞌkeꞌ ane tapaliliu poduangaꞌántaꞌ. Ina handaꞌ kamarugiꞌántaꞌ. Tiꞌara peá duanga tahiꞌ deꞌe hai inánti to ina marugiꞌ, agáiáná ara woꞌo to ina mate.”

¹¹Agáiáná tadulako surudadoꞌ iti tiꞌara mampehádingi laluitana Paulu, láwiꞌ napehádingi mani laluitaraꞌ topoánti duanga hai pueꞌna duanga iti.

¹²Mewaliꞌ, ánti katiꞌárána maroꞌa mampegiá kaliuna tempó lengiꞌ i pehupeꞌá iti, onoꞌ miꞌi haneꞌi handaꞌ tauna membiáꞌ bona pohuꞌangkaiꞌ. Rahárungá peisáꞌangkaiꞌ haweꞌ i kótá Peniꞌ, mampegiá kaliuna tempó lengiꞌ. Peniꞌ iti ia miꞌi pehupeꞌá duanga tahiꞌ i puló Kereta to maroꞌa rapehupeꞌi i tempó lengiꞌ, láwiꞌ teháláꞌ hantóiꞌ hangko i wui to hangko i katámpuá alo tándáꞌ i wóiꞌ hai tándáꞌ i wongko.

¹³I tempó iti, maroꞌa hantódiꞌ pewuina hangko tándáꞌ i wóiꞌ, onoꞌ miꞌi haneꞌi rauliꞌ ripaꞌi topobágóꞌ i duanga tahiꞌ, peisámongkaiꞌ mopaliliu poduangangkiꞌ. Mewaliꞌ besiꞌ popotahana duanga tahiꞌ[307] iti raoreꞌ miꞌi, hai moduangaꞌangkaiꞌ menánáꞌ i puló Kereta.

¹⁴Agáiáná, tiꞌara marue hangko ionoꞌ, kipohidupaꞌá miꞌi wui to rumihi hangko i lore tándáꞌ i mata alo, to rauliꞌ “Wui Mata Alo”.

¹⁵Ánti katiꞌárána nabuku duangangkiꞌ molindoꞌ wui, onoꞌ miꞌi haneꞌi kipatodáhi peá napotió wui.

¹⁶Poliungkiꞌ i puló to kókóiꞌ to rauliꞌ Kauda, teháláꞌangkaiꞌ hangko i wui. I tempó iti, kipári-pári modiiꞌ sikotiꞌ hangko i taleuꞌ duanga tahiꞌ,

¹⁷haneꞌi kihumpádá i wongkona duanga hai kitakaꞌ kipakaróhó. Roo onoꞌ, duangangkiꞌ ratakaꞌ hai gulaꞌ bona maróhó. Malááꞌheꞌ topobágóꞌ, duanga iti ina tehumpádá i wungi i kahadengkeána uwai to hungkuꞌ i tampoꞌ Libia.[308] Onoꞌ miꞌi haneꞌi tendana duangangkiꞌ rapopendáulu hai rapatodáhi napotió wui.

¹⁸Ánti angi to rumihi iti, kahalona mantepuꞌumoheꞌ motibe inántina duanga bona manangkoꞌ.

¹⁹Kahalona wopiꞌi, párewána duanga to ratibe i tahiꞌ.

²⁰Bahangapai alona, tiꞌaraꞌangkaiꞌ manginta wangkaꞌna alo ba betue, hai angi tiꞌara mengkaroo. Kahópóꞌána, tiꞌara piꞌi ara pehárungángkiꞌ ina tueꞌ.

²¹Ánti kahandaꞌna pobágóꞌraꞌ topobágóꞌ i duanga tahiꞌ iti, bahangapa alona tiꞌaraheꞌ nampakaꞌ mandeꞌ, onoꞌ miꞌi haneꞌi Paulu meángkáꞌ i oloꞌraꞌ, nahángáꞌáheꞌ, “Halalu-halalu, ane kenipeuláꞌi laluitangkuꞌ iaꞌo bona ineeꞌkeꞌ pohuꞌ hangko i puló Kereta, ketiꞌarakeꞌ nodeꞌe.

²²Agáiáná deꞌe-deꞌe kuhángáꞌákou: nipakaróhó lalumi láwiꞌ tiꞌara haweꞌ hadua to ina mate. Bateꞌna peá duanga tahiꞌ deꞌe to ina marugiꞌ.

²³Kuisá noꞌonoꞌ láwiꞌ iakáindi, Pueꞌ Ala to kupenómbái hai to mokádipuráꞌaꞌ, mohuoꞌ malaꞌekaNa mai i kódóꞌ.

²⁴Nauliꞌ malaꞌeka iti node: ‘Paulu, ineeꞌkoꞌ malááꞌ, láwiꞌ bateꞌmu ina lao molindoꞌ Datu Mahile i Roma. Hai ánti kamaꞌahiꞌna Pueꞌ Ala i hio, tiꞌara ara haweꞌ hadua i duanga tahiꞌ deꞌe to ina mate.’

²⁵Onoꞌ miꞌi haneꞌi halalu-halalu, hangaa-ngaa nipakaróhó lalumi, láwiꞌ kupoinálái apa to nahángáꞌáꞌaꞌ Pueꞌ Ala, bateꞌna ina mewaliꞌ.

²⁶Agáiáná duanga tahiꞌ deꞌe hangaa-ngaa tehumpádá i hambuaꞌ puló.”

²⁷Hampuloꞌ miꞌi hai iba wengina, duangangkiꞌ napotió oaꞌ wui to rumihi i tahiꞌ Adaria. Tangaꞌ káindi, topobágóꞌna duangangkiꞌ moisá babilaꞌ katiꞌárána piꞌi karaoꞌ hangko i lorena láwiꞌ mohádimoheꞌ bálumbá,

²⁸onoꞌ miꞌi haneꞌi hambuaꞌ watu popehukáꞌ raulu i tahiꞌ bona raisá kakaladuna. Kakaladuna iti, rekeꞌ-rekeꞌna iba puloꞌna mete. Roo onoꞌ, raulu wopiꞌi duuꞌna tóá, tálu puloꞌna peá mete kakaladuna.

²⁹Malááꞌmoheꞌ topobágóꞌna duangangkiꞌ láwiꞌ rapekiri ina tehámpádáꞌangkaiꞌ i watu rangka. Onoꞌ miꞌi haneꞌi iba wuaꞌna besiꞌ popotaha raulu i lalu tahiꞌ i taleuꞌ, bona duangangkiꞌ tetaha. Kihárungá bona hawiáꞌ miꞌi mabaa.

³⁰Hangko ionoꞌ, topobágóꞌheꞌ i duangangkiꞌ mampoinaoheꞌ pohuꞌ ngkábuni mopálehi duanga iti. Mampe to laoheꞌ moulu besiꞌ popotaha i lindoꞌ duanga, mole mampopendáuluraheꞌ sikotiꞌ.

³¹Agáiáná naita Paulu apa to rabábehi iti, onoꞌ miꞌi haneꞌi nahángáꞌáheꞌ tadulako surudadoꞌ hai surudadoꞌna, “Ane topobágóꞌ iti mopálehi duanga tahiꞌ deꞌe, tiꞌarakou ina tueꞌ!”

³²Mewaliꞌ surudadoꞌ iti modepuki miꞌi popetóena sikotiꞌ álána manawoꞌ i tahiꞌ.

³³Ina mesupaꞌ miꞌi alo, nahángáꞌáheꞌ Paulu, “Hangaa-ngaa mandeꞌkou upu-upu! Hampuloꞌ miꞌi hai iba alona, nipegiá peá apa to ina mewaliꞌ, hai tiꞌara mani nipoinao mandeꞌ.

³⁴Mewaliꞌ deꞌe-deꞌe, kuhángáꞌáꞌákou, hangaa-ngaa mandeꞌkou sieruꞌ bona maróhókou, láwiꞌ tiꞌarantokou ina moapa-apa.”

³⁵Karoona Paulu molaluita noꞌonoꞌ, ia moala miꞌi rótiꞌ hai mekakae i Pueꞌ Ala i lindoꞌraꞌ upu-upu. Rótiꞌ iti nagáláꞌ-gáláꞌáheꞌ, hai natepuꞌu miꞌi mandeꞌ.

³⁶Karahádina tauna iti laluitana, maróhó miꞌi huleꞌ laluraꞌ, haneꞌi mandeꞌheꞌ woꞌo.

³⁷Upu-upuangkaiꞌ to ara i duanga tahiꞌ iti, kahandaꞌkiꞌ rongatu pitu puloꞌna hai ini.

³⁸Karoona topobágóꞌ mandeꞌ, bailoꞌ to raꞌánti duanga iti ratibe i tahiꞌ. Tunggáiáraꞌ, bona manangkoꞌ hantóiꞌ duangangkiꞌ iti.

³⁹Mabaa miꞌi, topobágóꞌna duanga tahiꞌ moitaheꞌ lorena, agáiáná tiꞌara raisá hangaꞌna tampoꞌ iti. Moitaheꞌ woꞌo kaꞌaraꞌá to teháláꞌ hangko i bálumbá láwiꞌ natolelingi lorena, hai wiwina kewungi. Onoꞌ miꞌi haneꞌi ratunggái, mole ba peisái ina mopatetuhuheꞌ duangangkiꞌ ionoꞌ.

⁴⁰Upu-upu gulaꞌ besiꞌ popotaha radepuki, hai besiꞌ popotaha iti rapálehi i lalu tahiꞌ bona duangangkiꞌ tiꞌara piꞌi tetaha. I tempó iti woꞌo, gulaꞌ to motakaꞌ peguli duanga rakekehi, hai tendana duangangkiꞌ raꞌángkáꞌ i lindoꞌ bona raꞌántiangkaiꞌ wui manoroꞌ lao i lorena.

⁴¹Agáiáná duangangkiꞌ tetuhu i wungi i kahadengkeána tahiꞌ, hai wuáꞌna tetaha ionoꞌ. Palona duanga iti marupuꞌ narokaꞌ bálumbá tahiꞌ to mahile.

⁴²Hangko ionoꞌ, surudadoꞌ motunggái ina mopapateheꞌ upu-upu tauna to ratarungku to raꞌánti, bona tiꞌaraheꞌ ara to meluꞌu lao i lorena haneꞌi melangka.

⁴³Agáiáná tadulakoraꞌ mokóntóheꞌ, láwiꞌ naundeꞌ bona Paulu ineeꞌ rapopoapa, onoꞌ miꞌi haneꞌi mohuoꞌ tauna to moisá meluꞌu mentimboꞌ ioru i tahiꞌ hai meluꞌu lao i lorena.

⁴⁴Roo onoꞌ, nahuoꞌheꞌ tauna to tiꞌara moisá meluꞌu moala pata ba kapengkáꞌána duanga tahiꞌ bona rapakeꞌ lao i lorena. Noꞌonoꞌ miꞌi iti kahaweꞌkiꞌ upu-upu i lorena i kamaroꞌa-roꞌa.