Read Besoa Surona Pueꞌ Iesu 28 Bible Online

Surona Pueꞌ Iesu 28 - Besoa bible

Surona Pueꞌ Iesu 28

¹Kahaweꞌkiꞌ upu-upu i lorena, hangko kiꞌisá riꞌi puló iti ia miꞌi puló Malta.[309]

²Maroꞌa ntepuꞌu laluraꞌ pueꞌ wánuá iti i kaiꞌ. Ratarimaꞌangkaiꞌ mpakaroꞌa, rapopatueꞌáꞌangkaiꞌ api kipenenei, láwiꞌ mantepuꞌu miꞌi keudá hai melengiꞌ.

³I tempó iti, Paulu lao mekau hai nawoli i wongko api. Iaperái mesupaꞌ hambaꞌa lelótó to mobisa hangko i lalu kau, láwiꞌ maꞌámuꞌ nalálá api. Lelótó iti motilóꞌ taena.

⁴Karaitána pueꞌ wánuá lelótó iti mengkalantió i taena Paulu, rauliꞌ miꞌi, “Tauna iti bateꞌna to mepapate! Peita, kehapiꞌ tiꞌara molámbiꞌ rugiꞌ i tahiꞌ, agáiáná Ánitu Topobutusi tiꞌara mopatodáhi tueꞌ!”

⁵Agáiáná Paulu mopimpirá peá lelótó iti i lalu api hai tiꞌaranto moapa-apa.

⁶Rauliꞌ ripaꞌi pueꞌ wánuá, ina kámbá miꞌi taena, ba hangkaꞌ-hangkaꞌ perái ina madungká hai mate. Marue rapegiá, mole tiꞌaranto woꞌo mewaliꞌ, onoꞌ miꞌi haneꞌi tebáliki miꞌi pekiriraꞌ, hai rauliꞌ, “Paulu iti hadua ánitu!”

⁷Tiꞌara karaoꞌ hangko ionoꞌ, ara halimboꞌ hinoe. Hinoe iti, hinoena Pubiliu, mágáuꞌ i puló iti. Ánti kamaroꞌana laluna, nakióꞌangkaiꞌ lao i támbina, hai napotorareangkaiꞌ tálu alona kamaruena.

⁸I tempó iti, umána Pubiliu tiꞌara nalalu, malengiꞌ hai mahái taꞌina. Onoꞌ haneꞌi lao miꞌi Paulu i lintuꞌna, mopágá wátána, napekakaeá, hai kásáliu nalalu.

⁹Hangko onoꞌ, upu-upu tauna to maduꞌa i puló iti laoheꞌ membiáꞌ tulungi i Paulu, hai upu-upuheꞌ napakauriꞌ.

¹⁰Ánti pepomahileraꞌ tauna iti, handaꞌ to rabábehi moádáiangkaiꞌ, hai i kapohuꞌkiꞌ, rapoweꞌiangkaiꞌ mampopengaa to kiparaluu.

¹¹Tálu miꞌi wulána toroꞌangkaiꞌ i puló Malta, haneꞌi pohuꞌangkaiꞌ hangko ionoꞌ. Mengkaheꞌangkaiꞌ i duanga tahiꞌ to hangko i kótá Alesandaria. Duanga tahiꞌ iti marue miꞌi mengkaroo i puló iti mampegiá kaliuna tempó lengiꞌ. Hangaꞌna duanga tahiꞌ iti, “Ánitu Toporopaꞌ”.[310]

¹²Mehupeꞌangkaiꞌ i kótá Sirakusa, hai hambengiangkaiꞌ tálu alona ionoꞌ.

¹³Hangko ionoꞌ, kipaliliu miꞌi poduangangkiꞌ menánáꞌ haweꞌ i kótá Regiu. Kahalona, wui to maroꞌa mewui hangko tándáꞌ i wóiꞌ, hai kahalona wopiꞌi, mendáuluangkaiꞌ hangko i duanga tahiꞌ i kótá Putioli i tampoꞌ Italia.

¹⁴Ionoꞌ, kipohidupaꞌá bahangapa halalu hampepepoináláingkiꞌ. Rawáwáháꞌangkaiꞌ lao i támbiraꞌ hai rapotorareangkaiꞌ haminggu kamaruena. Hangko ionoꞌ, molumaoangkaiꞌ lao i Roma.

¹⁵I tangaꞌ rárá maniangkaiꞌ, halalu hampepepoináláingkiꞌ to i Roma mohádiheꞌ kaꞌina haweꞌkiꞌ, onoꞌ miꞌi haneꞌi laoheꞌ medupaꞌ i Pobaluꞌ-baluꞌá Apiu hai i Támbi Pehupeꞌá to Tálu. I pohidupaꞌkiꞌ iti, Paulu motóiá Pueꞌ Ala, hai lindó laluna.

¹⁶Kahaweꞌkiꞌ i Roma, Paulu rapaliu toroꞌ haduduána i hambuaꞌ támbi, agáiáná hangaa-ngaa nakámpái oaꞌ hadua surudadoꞌ.

¹⁷Liu miꞌi tálu alona, Paulu mokióꞌmoheꞌ totosaeraꞌ toIahudiꞌ bona rapohidupaꞌá. I kahaweꞌraꞌ, nahángáꞌáheꞌ, “Halalu-halalu, tiꞌaranto ara salaꞌkuꞌ i halaluntaꞌ toIahudiꞌ, hai tiꞌaraꞌaꞌ woꞌo moliungi ádá toioruntaꞌ. Agáiáná kehapiꞌ noꞌonoꞌ, rahakaꞌ peaꞌ tadulakoraꞌ toIahudiꞌ i Ierusale hai rahuhuꞌaꞌ i topopárentá toRoma.

¹⁸Kárá-kárángkuꞌ rapáresáꞌ topopárentá Roma, hai rapoinao peá rakábáháꞌaꞌ, láwiꞌ tongawaꞌ miꞌi katiꞌárána ara salaꞌkuꞌ to hintotoꞌ rahukuáꞌaꞌ mate.

¹⁹Agáiáná araheꞌ toIahudiꞌ hangko i Ierusale to tiꞌara mampokana kaꞌina rakábáhángkuꞌ, onoꞌ miꞌi haneꞌi kupembiáꞌ bona kárá-kárángkuꞌ rabuáꞌ i Datu Mahile i Roma, agáiáná tiꞌara ara tunggáiángkuꞌ mosalaꞌiheꞌ hangka toIahudiꞌkuꞌ.

²⁰Kukióꞌkou mai mampohidupaꞌáꞌaꞌ láwiꞌ kupoinao kupolaluitaꞌákou kana i Datu Topehómpóꞌ to rapegiá toSáráeliꞌ. Ratakaꞌaꞌ hai rante deꞌe, láwiꞌ kupoinálái ntepuꞌu kahaweꞌna miꞌi Datu Topehómpóꞌ iti.”

²¹Rahániki toIahudiꞌ iti, rauliꞌ, “Tiꞌara ara sura hangko i tadulakontaꞌ i tampoꞌ Iudá mokana i hio. Hai tiꞌara woꞌo ara hadua tauna hangko ionoꞌ to mai moánti bámbári ba mampolaluita kakadakemu.

²²Kiundeꞌ ntepuꞌu mampehádingi noumbá pepoináláimu iti, láwiꞌ kiꞌisá iumbá-umbá peá tauna mosápuáka paturoꞌ to nupeuláꞌi.”

²³Roo onoꞌ, rapakanótó miꞌi toIahudiꞌ tempó kaꞌina hidupaꞌraꞌ wopiꞌi hai Paulu. Haweꞌ miꞌi tempó to rapakanótó, handaꞌ ntepuꞌu tauna hirámpu i katoroꞌána Paulu. Mantepuꞌu mepulo haweꞌ kalumbaꞌ, Paulu mopahaweꞌáheꞌ kana i popárentána Pueꞌ Ala, hai mobásá hangko i sura to naukiꞌ Musa hai suraraꞌ nabiꞌ-nabiꞌ, napakanótóáheꞌ kaheánána Iesu bona mepoináláiheꞌ i Hia.

²⁴Araheꞌ to mampoinálái laluitana, araheꞌ woꞌo to tiꞌara mampoinálái.

²⁵Ánti posisalaꞌna polámbiꞌraꞌ, onoꞌ miꞌi haneꞌi pohuꞌheꞌ, agáiáná hangko tiꞌara maniheꞌ mogááꞌ-gááꞌ, nahángáꞌáꞌáheꞌ Paulu, “Toꞌu laluitana Inao to Magasaꞌ i toioruntaꞌ hangkoia, to Napahaweꞌ moliu nabiꞌ Iesaia to manguliꞌ node:

²⁶Nauliꞌ Pueꞌ Ala: ‘Laomokoꞌ i tauna deꞌe, nupahaweꞌ node: Ina nihádi, agáiáná tiꞌara ina niꞌisá lempóna apa to nihádi. Ina niꞌita, agáiáná tiꞌara ina niꞌisá apa to mewaliꞌ,

²⁷láwiꞌ matuꞌa miꞌi lalumi, talingami makápá, hai mátámi bilo. Ane tiꞌara noꞌonoꞌ, ina niꞌita hai mátámi, ina nihádi hai talingami, hai ina nipakanótó lalumi, haneꞌikou mesuleꞌ i Kódóꞌ, bona Kubáliki lalumi.’ ”[311] [312]

²⁸Roo onoꞌ, nauliꞌ wopiꞌi Paulu i totosaeraꞌ toIahudiꞌ, “Onoꞌ miꞌi haneꞌi hangaa-ngaa niꞌisá halalu-halalu, Ngkóráꞌ Marasa mokana i katehómpóꞌ to hangko i Pueꞌ Ala rabámbáriámoheꞌ woꞌo tauna to tiꞌara toIahudiꞌ, hai hira riꞌi to motarima bámbári iti!” [

²⁹Karoona Paulu molaluita noꞌonoꞌ, pohuꞌmoheꞌ toIahudiꞌ hai mombehániꞌ-hániꞌheꞌ oaꞌ mokana i paturoꞌna Paulu.][313]

³⁰Roo onoꞌ, Paulu toroꞌ i Roma rompare kamaruena i támbi to nasaro. Góeꞌ laluna mampohidupaꞌáheꞌ tauna to lao moweoꞌ.

³¹Tiꞌara ara kamalááꞌna mopahaweꞌáheꞌ mokana i popárentána Pueꞌ Ala hai mokana i Pueꞌ Iesu Kerisitu, hai tiꞌara woꞌo ara to mosalempori.