Read Besoa Surona Pueꞌ Iesu 4 Bible Online

Surona Pueꞌ Iesu 4 - Besoa bible

Surona Pueꞌ Iesu 4

¹Tangaꞌraꞌ mani Peturuꞌ hai Iohane mopaturoꞌ tauna i tangabaa Támbina Pueꞌ Ala, haweꞌmoheꞌ bahangapa tadulako menómbá hai toSaduki[60] hai tadulakoraꞌ topokámpái Támbina Pueꞌ Ala.[61]

²Mabukoꞌheꞌ i Peturuꞌ hai Iohane, láwiꞌ mopaturoꞌheꞌ tauna to handaꞌ katueꞌna huleꞌ Iesu mopatongawaꞌ kaꞌina tueꞌna huleꞌ tauna hangko i kapate.

³Onoꞌ miꞌi haneꞌi suro to rodua iti rahakaꞌ, rapopesuaꞌ i lalu tarungku, hai ratahaheꞌ ionoꞌ haweꞌ mepulo, láwiꞌ ina káindi miꞌi hai tiꞌara maniheꞌ peisá mobutusi kárá-káráraꞌ.

⁴Agáiáná handaꞌ miꞌi tauna to mampehádingi paturoꞌraꞌ Peturuꞌ hai Iohane i Támbina Pueꞌ Ala, hai handaꞌmoheꞌ to mepoinálái i Iesu, álána tetámbái kahandaꞌraꞌ tauna to mepoinálái duuꞌna gánáheꞌ lima sáburaꞌ tobaleilo.

⁵Kahalona, tadulako agama, tadulakoraꞌ toIahudiꞌ hai guru-guru agama[62] hirámpuheꞌ i kótá Ierusale.

⁶Araheꞌ woꞌo i pogómbóá iti: Tadulako Menómbá Mahile Hanasa[63] hai Kaiapa,[64] Iohane,[65] Alesande[66] hai tauna ntániꞌna hangko i tinána Tadulako Menómbá Mahile.

⁷Hirámpuheꞌ upu-upu, hai rapehuoꞌá bona Peturuꞌ hai Iohane raꞌánti i lindoꞌraꞌ. I kahaweꞌraꞌ, hadua hangko i oloꞌraꞌ tadulako iti mekuneꞌ miꞌi i Peturuꞌ hai Iohane, nauliꞌ, “Kómu, noumbá haneꞌi nibuku mopakauriꞌ topaluꞌ iti? Heáná to moweꞌikou kuasaꞌ mobábehi iti?”

⁸Ánti kuasaꞌna Inao to Magasaꞌ, molaluita miꞌi Peturuꞌ, nauliꞌ, “Tadulako-tadulako hai totosaengkiꞌ!

⁹Ane nipáresáꞌangkaiꞌ i alo deꞌe ánti popakauriꞌkiꞌ topaluꞌ iti, hai ane nipoinao woꞌo moisá noumbá kamauriꞌna,

¹⁰ina kihángáꞌáꞌákou hai upu-upu halaluntaꞌ toSáráeliꞌ: tauna deꞌe mauriꞌ miꞌi hai nabuku meángkáꞌ ieneꞌ ánti kuasaꞌna Iesu Kerisitu toNasare. Iesu iti to nipakuꞌ i kau mombehape, agáiáná napatueꞌ huleꞌ Pueꞌ Ala.

¹¹Ia miꞌi to natunggái i lalu Sura Magasaꞌ to manguliꞌ node: ‘Watu to ratibe topoaró támbi,[67] mole watu onoꞌ riꞌi to mewaliꞌ pehodaꞌá támbi.’ ” [68] Hai kómu miꞌi to rapándiriꞌ nodo topoaró támbi iti.

¹²Hangko ionoꞌ, nauliꞌ wopiꞌi Peturuꞌ, “Tiꞌara ara rárá ntániꞌna molámbiꞌ katehómpóꞌ, bateꞌna peá moliu Iesu. I humalele duniáꞌ deꞌe, tiꞌara ara tauna ntániꞌna, bateꞌna peá Iesu to nahuoꞌ mai Pueꞌ Ala, to peisá mohómpókikeꞌ hangko i huku dósántaꞌ.”

¹³Tingkáráꞌ ntepuꞌumoheꞌ tadulako iti mohádi kamapánderaꞌ Peturuꞌ hai Iohane molaluita[69] láwiꞌ tiꞌaraheꞌ malááꞌ; apa mani láwiꞌ Peturuꞌ hai Iohane tauna biásá peheꞌ to tiꞌara mapángkáꞌ sikolaꞌraꞌ.[70] Raisá woꞌo, hira miꞌi iti to meuláꞌ i Iesu.

¹⁴Agáiáná tadulako iti, tiꞌaraheꞌ pebáiꞌ molaluita, láwiꞌ topaluꞌ to rapakauriꞌ iti ara woꞌo ionoꞌ meángkáꞌ i hintáiꞌraꞌ Peturuꞌ hai Iohane.

¹⁵Onoꞌ haneꞌi rapopesuwuꞌmoheꞌ surona Pueꞌ Iesu iti hangko i pepáresáꞌáraꞌ, haneꞌiheꞌ molaluita,

¹⁶rauliꞌ, “Apa to hangaa-ngaa tabábehi i tauna to rodua iti? Upu-upu tauna to toroꞌ i Ierusale moisá kahirana to mobábehi tandaꞌ kuasaꞌ to metitingkáráki iti, mewaliꞌ tiꞌara woꞌo peisá tasápuáka.

¹⁷Agáiáná, bona tiꞌara rahádi tauna ntániꞌna, rángina miꞌi tapopalááꞌheꞌ hai takóntóheꞌ bona ineeꞌmoheꞌ molaluita i heáná peá i lalu hangaꞌna tauna iti.”[71]

¹⁸Roo onoꞌ, rakióꞌ wopaheꞌ Peturuꞌ hai Iohane, rauliꞌ, “Ineeꞌmokou mepaturoꞌ ba mokábelái hangaꞌna Iesu.”

¹⁹Agáiáná mehániꞌ Peturuꞌ hai Iohane, rauliꞌ, “Nipekiri umbána to naundeꞌ Pueꞌ Ala: mampeuláꞌiangkaiꞌ hawaꞌmi ba hawaꞌNa!

²⁰Kaiꞌ, tiꞌara piꞌi peisá kikábáhá mampolaluita apa to kiꞌita hai to kihádi miꞌi.”

²¹Hangko ionoꞌ, Peturuꞌ hai Iohane rapopalááꞌ ntepuꞌu wopaheꞌ tadulako iti, hai kahópóꞌána, rakábáháheꞌ. Tiꞌara ara rárá ina mohukuheꞌ láwiꞌ upu-upu tauna motóiá Pueꞌ Ala ánti tandaꞌ kuasaꞌ to rabábehi iti.

²²Tauna to rapakauriꞌ iti, tinuwuꞌna iba miꞌi puloꞌna parena lábi.

²³I karakábáháraꞌ Peturuꞌ hai Iohane, laomoheꞌ mampohidupaꞌá halalu hampepepoináláiraꞌ, haneꞌi mampolaluitaheꞌ apa to rahángáꞌáheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna.

²⁴Karahádina laluitaraꞌ iti, mekakaemoheꞌ hingkakani i Pueꞌ Ala, haneꞌi hadua hangko i oloꞌraꞌ manguliꞌ, “Ó Pueꞌ, Io miꞌi to mampopewaliꞌ langiꞌ, tampoꞌ, tahiꞌ, hai hinángkáꞌna óntóꞌna.[72]

²⁵Io to mongkóráꞌ i toiorungkiꞌ Datu Daudiꞌ, huoꞌáMu, haneꞌi ia molaluita moliu Inao to Magasaꞌ, nauliꞌ, ‘Moapa riꞌi haneꞌiheꞌ mabukoꞌ tauna to tiꞌara toIahudiꞌ? Moapa riꞌi haneꞌi tauna to handaꞌ mobábehiheꞌ tunggáiáraꞌ to tiꞌara mobunduꞌ?

²⁶Datu-datu i duniáꞌ mampatimamamoheꞌ ina mombeala, noꞌonoꞌ woꞌo upu-upu topohawaꞌ, hintuwuꞌmoheꞌ mampoinao moewaꞌ Pueꞌ Ala hai Datu Topehómpóꞌ to Napileꞌi.’ [73]

²⁷Ó Pueꞌ, tebukeki mpuꞌu miꞌi laluitana Daudiꞌ iti, láwiꞌ tiꞌara mani marue mewaliꞌ i lalu kótá deꞌe. Datu Herode Antipa[74] hai Mágáuꞌ Pontiu Pilatu hintuwuꞌmoheꞌ hingkakani hai tauna to handaꞌ, toSáráeliꞌ hai to tiꞌaraheꞌ toSáráeliꞌ. Pohintuwuꞌraꞌ iti, mampoinaoheꞌ moewaꞌ Iesu, HuoꞌáMu to Magasaꞌ to Nupileꞌi mewaliꞌ Datu Topehómpóꞌ,

²⁸agáiáná upu-upu to rabábehi iti mobukeki apa to Nupakanótó miꞌi ami, álána mewaliꞌ hintotoꞌ hai peundeꞌáMu, láwiꞌ Io to makuasaꞌ.

²⁹Pueꞌ, deꞌe-deꞌe Nuhádi miꞌi laluitaraꞌ tauna to mampopalááꞌangkaiꞌ! Mewaliꞌ kaiꞌ huoꞌáMu deꞌe, kipembiáꞌ i Hio bona Nuweꞌiangkaiꞌ karóhó lalu bona tiꞌaraꞌangkaiꞌ malááꞌ mopahaweꞌ ngkóráꞌMu.

³⁰Kipembiáꞌ woꞌo bona Nupopaitaꞌáheꞌ kuasaꞌMu Pueꞌ, hai Nuweꞌiangkaiꞌ kuasaꞌ hangko i Iesu HuoꞌáMu to Magasaꞌ, bona kibuku mopakauriꞌ tauna to tiꞌara ralalu hai mobábehi handaꞌ tandaꞌ kuasaꞌ.”

³¹Karooraꞌ mekakae, támbi kahirámpuáraꞌ moduá-duá,[75] hai nakuasaꞌiheꞌ Inao to Magasaꞌ. Onoꞌ haneꞌi pebáiꞌ mpuꞌumoheꞌ mopahaweꞌ ngkóráꞌna Pueꞌ Ala.

³²Upu-upu tauna to mepoinálái i Iesu, mohintuwuꞌ hai hampepekiriheꞌ. Tiꞌara ara hadua to manguliꞌ, “Deꞌe párewángkuꞌ,” agáiáná upu-upu to ara i hira peisá rapopobunduꞌ tauna to moparaluu.

³³I tempó iti surona Pueꞌ Iesu molámbiꞌmoheꞌ kuasaꞌ to mahile bona mopahaweꞌheꞌ katueꞌna huleꞌ Pueꞌ Iesu, hai molámbiꞌheꞌ woꞌo handaꞌ pewátiꞌ hangko i Pueꞌ Ala.

³⁴Tiꞌara mpuꞌu ara hadua to nakakuraꞌi, láwiꞌ heáná peá to melábi tampoꞌ ba támbina, mampobaluꞌ hamboloꞌ tampoꞌ ba hambuaꞌ támbi,

³⁵hai dóiꞌ hólóna rahuhuꞌ i surona Pueꞌ Iesu bona ragáláꞌ-gáláꞌáheꞌ tauna to moparaluu.

³⁶Noꞌonoꞌ woꞌo to nabábehi Iusupu to rahangaꞌ surona Iesu Baranaba, lempóna: to mepalindó.[76] Iusupu iti ia miꞌi hadua toLewi to toroꞌ i puló Sipuru.

³⁷Ia mampobaluꞌ miꞌi hamboloꞌ tampoꞌna,[77] haneꞌi dóiꞌ hólóna nahuhuꞌáheꞌ surona Pueꞌ Iesu.