Read Besoa Surona Pueꞌ Iesu 6 Bible Online

Surona Pueꞌ Iesu 6 - Besoa bible

Surona Pueꞌ Iesu 6

¹Kamarue-rueá katetátámbáiá oaꞌ tauna to meuláꞌ i Iesu. I tempó iti, upu-upu tauna to mepoinálái i Iesu, toIahudiꞌ peá, agáiáná hantángáꞌheꞌ to mobásá Iberani ba básá Árá,[93] hai hantángáꞌheꞌ woꞌo to mobásá Iunani. To mobásá Iunani, mohume-humeheꞌ mosalaꞌi rángáraꞌ to mobásá Iberani, láwiꞌ tobembaꞌ towawine to mobásá Iunani, tiꞌaraheꞌ molámbiꞌ gáláꞌraꞌ alo-alona.

²Onoꞌ miꞌi haneꞌi surona Pueꞌ Iesu to hampuloꞌ hai rodua mokióꞌmoheꞌ upu-upu tauna to mepoinálái i Iesu bona hirámpuheꞌ, hai hadua hangko i oloꞌraꞌ mohángáꞌáheꞌ, “Tiꞌara maroꞌa ane kaiꞌ surona Iesu to mogáláꞌ-gáláꞌ pandeꞌ, láwiꞌ ane noꞌonoꞌi, tiꞌara piꞌi ara tempóngkiꞌ mopahaweꞌ ngkóráꞌna Pueꞌ Ala.

³Mewaliꞌ halalu-halalu, rángina miꞌi nipileꞌi hangko i oloꞌmi pitu tauna to rabiláꞌ, to nakuasaꞌi Inao to Magasaꞌ hai to bukeꞌ pekiri. Hira to ina kiweꞌi bágóꞌ mokádipurá pogáláꞌ-gáláꞌ pandeꞌ iti.

⁴Ane tabábehi noꞌonoꞌ, peisá kipopobunduꞌ tempóngkiꞌ mekakae hai mopahaweꞌ Ngkóráꞌna Pueꞌ Ala.”

⁵Upu-upu tauna mampokana polaluitaraꞌ suro iti, onoꞌ miꞌi haneꞌi Setepanu rapileꞌi láwiꞌ ia nakuasaꞌi Inao to Magasaꞌ hai maróhó pepoináláina i Pueꞌ Iesu. Rapileꞌi woꞌo Pilipu,[94] Porokoru, Nikano, Timo, Pamena hai Nikolau toAntiokia.[95] Nikolau iti, tiꞌara toIahudiꞌ, agáiáná mesuaꞌ miꞌi i agama Iahudiꞌ hangko tiꞌara mani mepoinálái i Iesu.

⁶Tauna to pitu iti raꞌántimoheꞌ lao i surona Pueꞌ Iesu, hai suro iti mopágá wuáꞌraꞌ hai mekakae bona nawátiꞌheꞌ Pueꞌ Ala.

⁷Mewaliꞌ i Ierusale, Ngkóráꞌ Marasa rapahaweꞌ oaꞌ hai katetátámbáiá miꞌi kahandaꞌraꞌ tauna to mepoinálái i Iesu. Handaꞌmoheꞌ woꞌo tadulako menómbá[96] to mepoinálái.

⁸Setepanu nawátiꞌ ntepuꞌu Pueꞌ Ala hai Naweꞌi kuasaꞌ, onoꞌ miꞌi haneꞌi nabuku mobábehi handaꞌ pákáꞌna tandaꞌ kuasaꞌ i lindoꞌraꞌ tauna to handaꞌ.

⁹Agáiáná araheꞌ woꞌo to meꞌewaꞌ. Topeꞌewaꞌheꞌ iti ia miꞌi tauna to menómbá i támbi penómbáꞌá to rauliꞌ “Támbi Libetini”, lempóna támbi penómbáꞌáraꞌ tauna to rakábáhá hangko i karapohawiꞌraꞌ.[97] Hira iti, toIahudiꞌ to hangko i kótá Kirene hai Alesandaria.[98] Araheꞌ woꞌo toIahudiꞌ to haweꞌ hangko i poropensi Kilikia hai Asia lao moewaꞌ hai mampombeheheꞌá Setepanu,

¹⁰agáiáná tiꞌara rabuku mohániki apa to nauliꞌ Setepanu, láwiꞌ Inaona Pueꞌ Ala moweꞌi kapánde molaluita.

¹¹Onoꞌ miꞌi haneꞌi laoheꞌ moáhui bahangapa tauna bona mopaꞌaraheꞌ laluita to mopakanawoꞌ Setepanu, rauliꞌ, “Kihádi ia motitibei Paturoꞌna Musa hai mopakóiꞌ woꞌo Pueꞌ Ala!”[99]

¹²Mewaliꞌ lao mpuꞌumoheꞌ mopahaweꞌ laluita iti. Karahádina tauna to handaꞌ laluitaraꞌ to mesalaꞌi iti, mabukoꞌ ntepuꞌuheꞌ, noꞌonoꞌ woꞌo tadulakoraꞌ toIahudiꞌ hai guru-guru agama, haneꞌiheꞌ lao mohakaꞌ Setepanu bona raꞌánti i lindoꞌraꞌ Topepáresáꞌ Mahile.

¹³Kahaweꞌraꞌ ionoꞌ, raꞌánti woꞌo bahangapaheꞌ tauna to mewaliꞌ sabiꞌ dongkoꞌ.[100] Rauliꞌ sabiꞌ iti, “Tauna iti motitibei oaꞌ Támbina Pueꞌ Ala to magasaꞌ hai mopakóiꞌ woꞌo Paturoꞌna Musa!

¹⁴Kihádi ia manguliꞌ node: Iesu toNasare ina mogero Támbina Pueꞌ Ala[101] hai mobáliki upu-upu ádá to naweꞌikeꞌ Musa.”

¹⁵Karahádina Topepáresáꞌ Mahile laluita iti, motótóiheꞌ Setepanu, hai moitaheꞌ lindoꞌna nodo lindoꞌ malaꞌeka.[102]