Read Besoa Surona Pueꞌ Iesu 7 Bible Online

Surona Pueꞌ Iesu 7 - Besoa bible

Surona Pueꞌ Iesu 7

¹Mekuneꞌ miꞌi Tadulako Menómbá Mahile[103] i Setepanu, nauliꞌ, “Nuhángáꞌáꞌangkaiꞌ, ba toꞌu mpuꞌu apa to rauliꞌ tauna to mesalaꞌi iti?”

²Nahániki Setepanu, “Tadulako-tadulako to kubiláꞌ! Nipehádingi hampaiꞌ laluitangkuꞌ! Hangkoia, Burahima toioruntaꞌ toroꞌ i tampoꞌ Mesopotamia. Hangko tiꞌara mani melimbá lao i kótá Hara, Pueꞌ Ala to mahile kuasaꞌNa mopatongawaꞌ wátáNa i Burahima iti,[104]

³Nauliꞌ, ‘Pohuꞌmokoꞌ hangko i tampoꞌmu deꞌe, nupálehi halalumuheꞌ, hai laomokoꞌ i tampoꞌ to ina Kutudeꞌákoꞌ.’

⁴Onoꞌ miꞌi haneꞌi Burahima mopálehi tampoꞌraꞌ toKasidimi[105] lao i kótá Hara. Ionoꞌ, umána Burahima mate. Roo onoꞌ, Pueꞌ Ala mohuoꞌ wopiꞌi Burahima melimbá i tampoꞌ deꞌe to takatoroꞌi deꞌe-deꞌe.

⁵I tempó iti, tiꞌara ara tampoꞌ to raweꞌi Burahima, mogalo riꞌi hampágá tampoꞌ tiꞌara ara raweꞌi. Agáiáná Pueꞌ Ala modándi i Burahima, Nauliꞌ, ‘Tampoꞌ Kánáꞌá ina Kuweꞌikoꞌ haweꞌ-haweꞌ i pemuleꞌámuheꞌ.’[106] Tempó onoꞌ, tiꞌara mani ara ánáꞌna,

⁶agáiáná nauliꞌ Pueꞌ Ala i Burahima node: ‘Pemuleꞌámu ina toroꞌ i tampoꞌraꞌ tauna ntániꞌna. Hira ina rapohawiꞌheꞌ i tampoꞌ iti hai ina rapopeahiahiꞌheꞌ iba átuna parena kamaruena.

⁷Agáiáná roo onoꞌ, ina Kuhukuheꞌ tauna to mampohawiꞌ pemuleꞌámuheꞌ iti, hai kahópóꞌána pemuleꞌámu ina pohuꞌheꞌ hangko i tampoꞌ iti mai menómbá i Kódóꞌ i tampoꞌ Kánáꞌá deꞌe.’

⁸Hangko ionoꞌ, Pueꞌ Ala mopaꞌara dándiNa hai Burahima, hai Nahuoꞌ bona Burahima ratileꞌ, tandaꞌ podándiraꞌ. Hai upu-upu pemuleꞌána Burahima hangaa-ngaa ratileꞌ woꞌo. Mewaliꞌ Isakiꞌ ánáꞌna Burahima ratileꞌ miꞌi i alo kaꞌuwalu hangko i karapoánákana. Hai Isakiꞌ momuleáka Iako, haneꞌi Iako momuleáka ánáꞌna to hampuloꞌ hai rodua, hai hira iti to mewaliꞌ toioruntaꞌ.

⁹Toioruntaꞌ iti mahiniꞌheꞌ i Iusupu ádiraꞌ,[107] onoꞌ miꞌi haneꞌi rapobaluꞌ, bona rapohawiꞌ i tampoꞌ Másiriꞌ. Agáiáná Pueꞌ Ala mamporángá oaꞌ Iusupu,

¹⁰hai kahópóꞌána Nakábáhá hangko i upu-upu kapárina hai Pueꞌ Ala moweꞌi kabukeꞌ pekiri to mopagóeꞌ laluna Piraoꞌ,[108] datu i tampoꞌ Másiriꞌ, álána Piraoꞌ moángkáꞌ Iusupu mewaliꞌ mágáuꞌ i tampoꞌ Másiriꞌ hai topohawaꞌ i lalu támbi kadatuána.

¹¹Liu pitu parena hangko ionoꞌ,[109] tempó rimi to rumihi merampe i humalele tampoꞌ Másiriꞌ hai Kánáꞌá. Tempó iti, handaꞌ tauna mantódihá rimi, hai toioruntaꞌ woꞌo tiꞌara piꞌi ara pandeꞌraꞌ.

¹²Kanahádina Iako ara bahiꞌ to rapobaluꞌ i tampoꞌ Másiriꞌ, ia mohuoꞌheꞌ ánáꞌna, iamoheꞌ toioruntaꞌ, lao i Másiriꞌ mohóló pandeꞌ. Iti miꞌi polumaoraꞌ to rungu-runguna.

¹³Kalaoraꞌ i karongkánina, Iusupu mopakanótóáheꞌ kaꞌiana miꞌi halaluraꞌ. I tempó iti hangko naisá riꞌi Piraoꞌ kahirana miꞌi halaluna Iusupu.

¹⁴Roo onoꞌ, Iusupu motewái halalunaheꞌ bona rahángáꞌá Iako umáraꞌ hai upu-upu tinána, bona melimbáheꞌ lao i tampoꞌ Másiriꞌ. Kahandaꞌraꞌ tauna to melimbá lao i Másiriꞌ, pitu puloꞌraꞌ hai lima.[110]

¹⁵Mewaliꞌ, melimbá miꞌi Iako i tampoꞌ Másiriꞌ, hai toroꞌ ionoꞌ duuꞌna mate. Noꞌonoꞌ woꞌo upu-upu ánáꞌna.

¹⁶Agáiáná buꞌuraꞌ Iako hai Iusupu raꞌánti huleꞌ lao i kótá Sikeꞌ i tampoꞌ Kánáꞌá, hai ratawu i lalu popatawuá to nahóló Burahima hai dóiꞌ peráꞌ hangko i pemuleꞌána Hemo.[111]

¹⁷Marue-rue hangko ionoꞌ, hungkuꞌ miꞌi tempóna Pueꞌ Ala mobukeki dándiNa i Burahima. Memuleꞌ-muleꞌmoheꞌ toioruntaꞌ i tampoꞌ Másiriꞌ duuꞌna handaꞌ pemuleꞌáraꞌ.

¹⁸Kahópóꞌána, ara hadua datu to mepárentá i tampoꞌ Másiriꞌ to tiꞌara moisá kaheánána Iusupu.

¹⁹Datu iti mopamapári katueꞌraꞌ toioruntaꞌ iti. Napopeahiahiꞌheꞌ hai napárentáheꞌ motibe ánáꞌleiraꞌ tobaleilo bona mateheꞌ.[112]

²⁰I tempó iti, mesupaꞌ miꞌi Musa. Musa iti, hadua ánángkóiꞌ to malásáꞌ ntepuꞌu.[113] Tálu peá wulána rakádipurá tosaena i lalu támbiraꞌ, hai roo onoꞌ, ratibe miꞌi.

²¹Ánángkóiꞌ to ratibe iti, naꞌala miꞌi ánáꞌntawine, ánáꞌna Piraoꞌ, hai nakádipurá nodo ánáꞌna haduduána.

²²Ánti karakádipurána, upu-upu kapánderaꞌ toMásiriꞌ rapaguruá Musa, álána makuasaꞌ ntepuꞌu i polaluitana hai i bábehiána.

²³Magáná miꞌi iba puloꞌna parena tinuwuꞌna, Musa ara miꞌi pekirina lao moweoꞌ hangka toSáráeliꞌna.

²⁴I tempó iti, naita hadua toSáráeliꞌ napapahái hadua toMásiriꞌ. Lao miꞌi Musa mamperuruꞌi halaluna duuꞌna mopapate toMásiriꞌ iti.

²⁵Nauliꞌ i laluna, hangaa-ngaa raisá halaluna kaꞌiana to napileꞌi Pueꞌ Ala mokábáháheꞌ hangko i karapohawiꞌraꞌ. Mole riꞌi tiꞌara raisá.

²⁶Kahalona, Musa moita wopiꞌi rodua toSáráeliꞌ to mosisalaꞌ. Ánti kanapoinaona mopahintuwuꞌheꞌ, onoꞌ miꞌi haneꞌi nahángáꞌáheꞌ, ‘Moapa riꞌi haneꞌi mosisalaꞌkou? Kómu topohalalukou.’

²⁷Agáiáná hadua to mopapahái rángána mohumbángá riꞌi Musa, nahángáꞌá, ‘Heáná to moángkáꞌkoꞌ mewaliꞌ tadulako to mobutusi posisalaꞌkiꞌ?

²⁸Ba nupoinao woꞌo mopapateaꞌ, nodo kanupapatena toMásiriꞌ iamáindi?’

²⁹Kanahádina Musa tewungkeꞌ miꞌi bábehiána, melangka miꞌi hangko i tampoꞌ Másiriꞌ lao toroꞌ i tampoꞌ Midia.[114] Ionoꞌ ia mohamboko hai momuleáka rodua ánáꞌna.

³⁰Iba puloꞌna parena hangko ionoꞌ, haweꞌ miꞌi hadua malaꞌeka[115] mampohidupaꞌá Musa i pádá loriꞌ hungkuꞌ i Buluꞌ Sinai.[116] Malaꞌeka iti naita nodo api to roreꞌ i lalu dui.

³¹Tingkáráꞌ Musa moita api iti, onoꞌ miꞌi haneꞌi lao nahungkuki láwiꞌ napoinao naisá ba apai to pewaliꞌ. Iaperái nahádi wambaꞌna Pueꞌ Ala to manguliꞌ,

³²‘Kódóꞌ miꞌi Pueꞌ Ala to rapenómbái toiorumu. Kódóꞌ miꞌi deꞌe Pueꞌ Ala to rapenómbái Burahima, Isakiꞌ hai Iako.’ Kanahádina Musa wambaꞌ iti, moridiꞌ ánti kamalááꞌna, hai tiꞌara piꞌi pebáiꞌ motótói api to roreꞌ iti.

³³Roo onoꞌ, nauliꞌ wopiꞌi Pueꞌ Ala i Musa, ‘Nuposu sandalemu, láwiꞌ tampoꞌ to nupeángkáꞌi deꞌe, tampoꞌ to magasaꞌ.

³⁴Kuita miꞌi pantódiháraꞌ taunáNgkuꞌ toSáráeliꞌ i tampoꞌ Másiriꞌ. Kuhádi miꞌi peraruaꞌraꞌ. Onoꞌ miꞌi haneꞌi mendáuluAꞌ mai mokábáháheꞌ. Mewaliꞌ deꞌe-deꞌe Kuhuoꞌkoꞌ mesuleꞌ lao i tampoꞌ Másiriꞌ, bona nukábáháheꞌ toSáráeliꞌ.’

³⁵Mewaliꞌ Musa, to rasápuáka toIahudiꞌ hangkoia, ia miꞌi to nahuoꞌ Pueꞌ Ala mesuleꞌ lao mokábáháheꞌ. Rungu-runguna toSáráeliꞌ iti manguliꞌ i Musa, ‘Heáná to moángkáꞌkoꞌ mewaliꞌ tadulakongkiꞌ to mobutusi posisalaꞌkiꞌ?’ Agáiáná kahópóꞌána ia riꞌi to nakióꞌ Pueꞌ Ala i tempóna hadua malaꞌeka molaluita hangko i lalu dui to roreꞌ. Ia miꞌi to naꞌángkáꞌ Pueꞌ Ala mewaliꞌ tadulakoraꞌ toSáráeliꞌ to mokábáháheꞌ hangko i karapohawiꞌraꞌ.[117]

³⁶Musa iti to moántiheꞌ toSáráeliꞌ hangko i tampoꞌ Másiriꞌ, hai to mobábehi handaꞌ tandaꞌ kuasaꞌ hai tandaꞌ to metingkáráki i tampoꞌ Másiriꞌ, i tahiꞌ Malei, hai i pádá loriꞌ, iba puloꞌna parena kamaruena.

³⁷Hai Musa woꞌo to mopahaweꞌ laluita deꞌe i toSáráeliꞌ, nauliꞌ, ‘Pueꞌ Ala ina moángkáꞌ hadua hangko i halalumi bona mewaliꞌ nabiꞌ nodo kódóꞌ deꞌe.’[118]

³⁸Musa iti to motadulakoi toSáráeliꞌ to handaꞌ i pádá loriꞌ. Ia woꞌo to mohádi ngkóráꞌna malaꞌeka i Buluꞌ Sinai hai mewaliꞌ topetangaꞌ-tangaꞌi to mampoweꞌi ngkóráꞌ to moánti katueꞌ iti[119] i toioruntaꞌ bona rapahaweꞌ woꞌo i kitaꞌ.

³⁹Agáiáná, kehapiꞌ noꞌonoꞌ, toioruntaꞌ hangkoia, tiꞌara raundeꞌ mengkoruꞌ i Musa. Rasápuáka karapotadulakona hai rapoinao peá mesuleꞌ huleꞌ lao i tampoꞌ Másiriꞌ.

⁴⁰Mewaliꞌ, i tempóna Musa ara mani i wongko buluꞌ Sinai, laoheꞌ i Haruni wutuꞌna Musa,[120] rapembiáꞌ, rauliꞌ, ‘Nubábehiáꞌangkaiꞌ lenggeꞌ ba apa peá to peisá kipenómbái, bona lenggeꞌ iti miꞌi to mewaliꞌ tadulakongkiꞌ,[121] láwiꞌ tiꞌara piꞌi kiꞌisá apa to mewaliꞌ i Musa to moántiangkaiꞌ mai hangko i tampoꞌ Másiriꞌ.’

⁴¹Hangko ionoꞌ, mobábehiheꞌ hambuaꞌ lenggeꞌ ánáꞌ gapiꞌ hangko i buláwá. Lenggeꞌ to rabábehi iti, rapenómbái hai raposambaleá binataꞌ. Mosusaheꞌ motóiá apa to rabábehi hai taeraꞌ iti.[122]

⁴²Onoꞌ miꞌi haneꞌi nataleukiheꞌ Pueꞌ Ala hai Napatodáhiheꞌ menómbá i betue i langiꞌ[123] nodo to teukiꞌ i lalu suraraꞌ nabiꞌ-nabiꞌ[124] to manguliꞌ: ‘Kómu toSáráeliꞌ! Iba puloꞌna parena kamaruemi i pádá loriꞌ, tiꞌarakou haweꞌ hangkani mosambale binataꞌ nipopenómbá i Kódóꞌ, agáiáná nipopenómbá riꞌi i handaꞌ pákáꞌna ánitu.

⁴³Niánti-ánti támbi katoroꞌána ánitu Moloꞌ[125] hai pinowali to molenggeꞌ betue Repana.[126] Lenggeꞌ iti nibábehi bona nipenómbái. Onoꞌ miꞌi haneꞌi ina Kupatodáhikou ratawani, duuꞌna raꞌántikou haweꞌ tándáꞌ i hambalina kótá Bábeli.’ [127]

⁴⁴Tangaꞌraꞌ toioruntaꞌ i pádá loriꞌ, Pueꞌ Ala mohuoꞌ miꞌi Musa mobábehi Bambaruꞌ Penómbáꞌá[128] to peisá rabubungkáhi hai raꞌánti-ánti iumbá-umbá peá kalaoáraꞌ. Bambaruꞌ Penómbáꞌá iti mewaliꞌ tandaꞌ kaꞌárána Pueꞌ Ala mamporángá toSáráeliꞌ, hai rabábehi mouláꞌ apa to napopaitaꞌá Pueꞌ Ala i Musa.

⁴⁵Marue hangko ionoꞌ, matemoheꞌ toioruntaꞌ i pádá loriꞌ,[129] hai Bambaruꞌ Penómbáꞌá iti raꞌánti ánáꞌraꞌ tempóraꞌ mesuaꞌ i tampoꞌ Kánáꞌá deꞌe. Tempó onoꞌ, Iosuá motadulakoiheꞌ toioruntaꞌ mamperampaꞌi tampoꞌraꞌ toKánáꞌá, hai tampoꞌ iti to takatoroꞌi deꞌe-deꞌe. I tempó iti, Pueꞌ Ala mampopesuwuꞌ upu-upu tauna to toroꞌ i tampoꞌ iti, tampoꞌ Kánáꞌá deꞌe. Hai Bambaruꞌ Penómbáꞌáraꞌ iti ara mani i oloꞌraꞌ duuꞌna haweꞌ i tempóna Datu Daudiꞌ.

⁴⁶Daudiꞌ mopagóeꞌ Pueꞌ Ala, hai membiáꞌ bona moaró támbi to ina nakatoroꞌi Pueꞌ Ala to napenómbái Iako hangkoia.

⁴⁷Agáiáná tiꞌara riꞌi Daudiꞌ to moaró Támbina Pueꞌ Ala, ngkáliꞌna riꞌi Salomo ánáꞌna.[130]

⁴⁸Agáiáná Pueꞌ Ala to i Surugáꞌ tiꞌara toroꞌ i támbi to rabábehi tauna, láwiꞌ i lalu sura nabiꞌ hangkoia teukiꞌ node:

⁴⁹Nauliꞌ Pueꞌ Ala, ‘Langiꞌ ia miꞌi pehodaꞌáNgkuꞌ, hai tampoꞌ peángkáꞌáNgkuꞌ. Támbi apa to nipoinao niaróáꞌAꞌ? Iumbá támbi to hintotoꞌ Kukatoroꞌi? Tiꞌara ara,

⁵⁰láwiꞌ Kódóꞌ to mampopewaliꞌ upu-upuna!’ ” [131]

⁵¹Nauliꞌ wopiꞌi Setepanu i tadulako agama, nahángáꞌáheꞌ, “Halalu-halalu, rumihi kamatuꞌana lalumi, hai rumihi pentibongoꞌmi! Rumihi woꞌo pentibebemi mohádi laluitana Pueꞌ Ala! Kómu hibalikou hai toiorumi hangkoia láwiꞌ mosápuákakou oaꞌ Inao to Magasaꞌ.

⁵²Upu-upu nabiꞌ hangkoia rapopeahiahiꞌ toiorumi. Hai toiorumi mopapateheꞌ woꞌo suro-surona Pueꞌ Ala to manguliꞌ kaꞌina haweꞌna Huoꞌána Pueꞌ Ala to Manótó.[132] Hai deꞌe-deꞌe, kómu to mampobaluꞌ Huoꞌána Pueꞌ Ala i ewáliNa. Kómu woꞌo to mopapate HuoꞌáNa iti, Ia miꞌi Iesu.

⁵³Mole riꞌi kómu miꞌi to motarima paturoꞌna Pueꞌ Ala to rapahaweꞌ malaꞌeka i toioruntaꞌ, agáiáná tiꞌara nipeuláꞌi paturoꞌNa iti.”

⁵⁴Karahádina tadulako-tadulako iti laluitana Setepanu, mabukoꞌ ntepuꞌuheꞌ hai kóiꞌ inaoraꞌ.[133]

⁵⁵Agáiáná Setepanu nakuasaꞌi miꞌi Inao to Magasaꞌ, hai mengoaꞌ i langiꞌ. Naita mpuꞌu peawaꞌna Pueꞌ Ala, hai naita woꞌo Iesu meángkáꞌ tándáꞌ i kuánána Pueꞌ Ala.

⁵⁶Nauliꞌ Setepanu, “Peita! Kuita langiꞌ tebungkáhi hai Ánáꞌ Mánusiá meángkáꞌ tandaꞌ i kuánána Pueꞌ Ala!”[134]

⁵⁷Roo onoꞌ, tadulako agama iti motukoheꞌ talingaraꞌ, hai monganga-ngangaheꞌ rapasimbuku. Kásáliu laoheꞌ mohakaꞌ Setepanu,

⁵⁸hai radiiꞌ lao i rawa kótá bona rawatui.[135] Tauna to mosalaꞌi Setepanu iti, mowehángiheꞌ kumbáraꞌ bona motimaꞌheꞌ watu haneꞌi rawatui.[136] Kumbáraꞌ raweꞌi hadua tobaleilo to rahangaꞌ Saulu[137] bona nakámpái.

⁵⁹Tangaꞌna Setepanu rawatui, mekakae miꞌi, nauliꞌ, “Pueꞌ Iesu, Nuala miꞌi peinaongkuꞌ!”

⁶⁰Ia molingkudu, nauliꞌ napasimbuku, “Pueꞌ, ineeꞌheꞌ Nuhuku ánti dósáraꞌ deꞌe.”[138] Roo molaluita noꞌonoꞌ, ia mate miꞌi.