Read Besoa Surona Pueꞌ Iesu 8 Bible Online

Surona Pueꞌ Iesu 8 - Besoa bible

Surona Pueꞌ Iesu 8

¹Saulu woꞌo mampokana karapapatena Setepanu iti. Mantepuꞌu alo iti, upu-upu to mepoinálái i Pueꞌ Iesu to ara i kótá Ierusale[139] rapopeahiahiꞌ ntepuꞌuheꞌ, álána mahawuꞌheꞌ i humalele tampoꞌ Iudá hai Samaria. Bateꞌna perái surona Pueꞌ Iesu to tiꞌaraheꞌ melangka.

²Bahangapaheꞌ tauna to mengkoruꞌ i Pueꞌ Ala moala wátána Setepanu. Ánti kawioraraꞌ, rateriahi sieruꞌ, hangko ratawu.[140]

³Hai i tempó iti, Saulu mampopeahiahiꞌheꞌ oaꞌ tauna to mepoinálái i Pueꞌ Iesu. Upu-upu támbiraꞌ nasuaki, hai upu-upu tauna to mepoinálái i Iesu, maroꞌa tobaleilo maroꞌa towawine, nahakaꞌheꞌ hai naꞌántiheꞌ lao natarungku.

⁴Mewaliꞌ, tauna to mepoinálái to tehawukaheꞌ iti, hira miꞌi to mopahaweꞌ Ngkóráꞌna Pueꞌ iumbá-umbá peá kalaoáraꞌ.

⁵Rápáꞌna, Pilipu[141] lao miꞌi i hambuaꞌ wánuá i tampoꞌ Samaria,[142] mopahaweꞌáheꞌ kaꞌIesuna Datu Topehómpóꞌ.

⁶Karahádina pueꞌ wánuá apa to nauliꞌ Pilipu, rapailalu ntepuꞌu laluitana, hai raita woꞌo tandaꞌ kuasaꞌ to nabábehi to mopatongawaꞌ paturoꞌna hangko i Pueꞌ Ala.

⁷Rápáꞌna, ia mampopesuwuꞌ tokadake hangko i handaꞌ tauna to napesuaꞌi, álána mesuwuꞌ mpuꞌuheꞌ tokadake iti hai monganga-ngangaheꞌ. Handaꞌ woꞌo tauna to paluꞌ hai to kompiha bitiraꞌ napakauriꞌ Pilipu.

⁸Góeꞌ ntepuꞌumoheꞌ pueꞌ wánuá mampeita apa to pewaliꞌ iti.

⁹I lalu kótá iti, ara hadua tobaleilo to rahangaꞌ Simoꞌ. Simoꞌ iti, hadua tauna to handaꞌ pangisána, to bahangapa miꞌi parena mampopaita isána to mehelei i toSamaria. Nauliꞌ kaꞌiana tauna to mahile kuasaꞌna.

¹⁰Mentakaꞌ ntepuꞌu laluraꞌ upu-upu pueꞌ wánuá i hia, maroꞌa ánángkóiꞌ, maroꞌa totosae, rauliꞌ, “Simoꞌ iti, ara kuasaꞌna Pueꞌ Ala i hia, hai ia peisá rauliꞌ ‘Kuasaꞌ Mahile’.”

¹¹Mewaliꞌ upu-upu pueꞌ wánuá meuláꞌ i hia, láwiꞌ maruemoheꞌ moita apa to nabábehi to mehelei moliu pangisána.

¹²Agáiáná kahaweꞌna Pilipu i wánuáraꞌ, ia mopahaweꞌ bámbári kana i popárentána Pueꞌ Ala, hai napaturoꞌáheꞌ kaꞌIesuna Datu Topehómpóꞌ, áláraꞌ handaꞌ tobaleilo hai towawine mepoinálái i Iesu hai rariuheꞌ.

¹³Hangko ionoꞌ, Simoꞌ mepoinálái miꞌi woꞌo hai rariu. Karoona rariu, meuláꞌ miꞌi oaꞌ i Pilipu, láwiꞌ tingkáráꞌ laluna moita tandaꞌ kuasaꞌ to nabábehi Pilipu.

¹⁴Roo onoꞌ, surona Pueꞌ Iesu to ara i Ierusale mohádimoheꞌ bámbári, toSamaria motarimamoheꞌ ngkóráꞌna Pueꞌ Ala, onoꞌ miꞌi haneꞌi mohuoꞌheꞌ Peturuꞌ hai Iohane lao i tampoꞌ Samaria.

¹⁵Kahaweꞌraꞌ Peturuꞌ hai Iohane, mampekakaeámoheꞌ toSamaria to mepoinálái i Pueꞌ Iesu, bona molámbiꞌheꞌ Inao to Magasaꞌ,

¹⁶láwiꞌ Inao to Magasaꞌ tiꞌara mani mendáulu i hira. Rariu peheꞌ i lalu hangaꞌna Pueꞌ Iesu.

¹⁷Mewaliꞌ Peturuꞌ hai Iohane mopágá wuáꞌraꞌ toSamaria iti mampekakaeáheꞌ,[143] álána motarimaheꞌ Inao to Magasaꞌ.

¹⁸Naita Simoꞌ, heáná peá to rapekakaeá Peturuꞌ hai Iohane, hira to motarima Inao to Magasaꞌ. Onoꞌ miꞌi haneꞌi Simoꞌ moánti miꞌi dóiꞌ lao i Peturuꞌ hai Iohane,

¹⁹nahángáꞌáheꞌ, “Weꞌiaꞌ woꞌo kuasaꞌmi iti, bona heáná peá to kupágá wuáꞌna ina motarima Inao to Magasaꞌ.”

²⁰Agáiáná nauliꞌ Peturuꞌ, “Hurewuꞌmokoꞌ hingkakani hai dóiꞌmu! Ina nahukukoꞌ Pueꞌ Ala láwiꞌ nupekiri kabulána laluna Pueꞌ Ala peisá rahóló hai dóiꞌ!

²¹Tiꞌarakoꞌ hintotoꞌ mobágóꞌ hingkakani hai kaiꞌ, láwiꞌ tiꞌara manótó lalumu i Pueꞌ Ala.

²²Menosoꞌmokoꞌ hangko i tunggáiámu to kadake iti, hai mekakaekoꞌ i Pueꞌ bona Ia moámpungi tunggáiána lalumu to kadake iti;

²³láwiꞌ kuita mahiniꞌ lalumu, hai tetakaꞌ manikoꞌ i kakadakemu.”

²⁴Nauliꞌ Simoꞌ i Peturuꞌ hai Iohane, “Nipekakaeáꞌaꞌ wongkódóꞌá i Pueꞌ bona tiꞌaraꞌaꞌ narampe pehukuNa nodo to nuꞌuliꞌ!”

²⁵Karooraꞌ Peturuꞌ hai Iohane mepaturoꞌ hai mopahaweꞌ ngkóráꞌna Pueꞌ, mesuleꞌmoheꞌ lao i Ierusale. I polumaoáraꞌ, ngkóráꞌna Pueꞌ rabámbári woꞌo i wánuá-wánuá ntániꞌna i tampoꞌ Samaria.

²⁶Ara hadua malaꞌekana Pueꞌ to mopahaweꞌ laluita deꞌe i Pilipu, nauliꞌ, “Laomokoꞌ tándáꞌ i wóiꞌ, hai mouláꞌkoꞌ rárá to hangko i Ierusale haweꞌ i Gasa.” Rárá iti malaaꞌ rapelempói tauna.

²⁷Lao mpuꞌu miꞌi Pilipu monóntóhi rárá to natudeꞌá Pueꞌ. I tempó iti, ara woꞌo hadua toEtiopia to moliu i rárá iti mesuleꞌ lao i tampoꞌna. Tauna iti, mapángkáꞌ lántiꞌna láwiꞌ ia tadulako topokádipurá dóiꞌ i humalele kadatuá i tampoꞌ Etiopia.[144] Datu towawine i Etiopia, iti hangaꞌna Kandake.[145] Karoona toEtiopia iti menómbá i Pueꞌ Ala i Ierusale, ia mengkaheꞌ i kereta to nadiiꞌ dárá hai mesuleꞌ lao i tampoꞌna. Tangaꞌna mehoda i lalu keretana, ia mobásá hambuaꞌ sura to naukiꞌ nabiꞌ Iesaia hangkoia.

²⁹I tempó iti, Inaona Pueꞌ Ala molaluita i Pilipu, nauliꞌ, “Lao nuhungkuki kereta iti.”

³⁰Mewaliꞌ melangka mpuꞌu miꞌi Pilipu lao i kereta iti. Kahaweꞌna, nahádi tauna iti tangaꞌna mobásá Surana Nabiꞌ Iesaia. Napekuneꞌ Pilipu, “Tuá, ba nuisá lempóna to nubásá iti?”

³¹Nahániki tauna iti, “Noumbá kakuisána, láwiꞌ tiꞌara ara tauna to mopakanótóáꞌaꞌ.” Roo onoꞌ, toEtiopia iti mowáwáhá miꞌi Pilipu mengkaheꞌ i lalu keretana bona mehodaheꞌ hingkakani.

³²Deꞌe miꞌi laluita to nabásá hangko i Surana Nabiꞌ Iesaia: “Ia nodo hambaꞌa dimbá to raꞌánti lao rasambale. Ia nodo hambaꞌa ánáꞌ dimbá to ragundiꞌ wuluna agáiáná tiꞌara mobungkáhi humena; maniiꞌ-niiꞌ peá.

³³Ia rasasalaꞌi hai rahuku; tiꞌara hintotoꞌ karahukuNa. Tiꞌara ara hadua tauna to peisá mampolaluita kana i pemuleꞌáNa, láwiꞌ Ia rapapate.” [146]

³⁴Hangko ionoꞌ, mekuneꞌ miꞌi toEtiopia i Pilipu, nauliꞌ, “Nuhángáꞌáꞌaꞌ ba heáná to natunggái nabiꞌ iti, ba wátána haduduána ba tauna ntániꞌna?”

³⁵Mewaliꞌ hangko i to nabásá ininá, Pilipu mopatuntuá Ngkóráꞌ Marasa mokana i Iesu.

³⁶Tangaꞌraꞌ mokereta, moitaheꞌ uwai i wiwi rárá. Nauliꞌ toEtiopia iti i Pilipu, “Peita, indolouꞌ ara uwai. Ba peisáꞌaꞌ nuriu?” [

³⁷Nahániki Pilipu, “Ane nupoinálái ntepuꞌu miꞌi, peisákoꞌ kuriu.” Nauliꞌ toEtiopia iti, “Kupoinálái Iesu Kerisitu. Kuisá kaꞌIana miꞌi Ánáꞌna Pueꞌ Ala.”][147]

³⁸Hangko ionoꞌ, napopengkaroo miꞌi keretana, hai mendáulumoheꞌ lao i lalu uwai, haneꞌi toEtiopia iti nariu mpuꞌu miꞌi Pilipu.

³⁹Pesoreraꞌ hangko i uwai, hangkaꞌ-hangkaꞌ perái Inaona Pueꞌ Ala moánti Pilipu hangko ionoꞌ. Mewaliꞌ Pilipu tiꞌara piꞌi naita toEtiopia. ToEtiopia iti mopaliliu miꞌi polumaona hai góeꞌ ntepuꞌu laluna.

⁴⁰Agáiáná Pilipu hangkaꞌ-hangkaꞌ haweꞌ i kótá Asadoꞌ,[148] hai liliu miꞌi lao i kótá Kaisarea.[149] I polumaoána iti, ia mobámbári oaꞌ Ngkóráꞌ Marasa i upu-upu wánuá to napoliui.