Read Besoa Surona Pueꞌ Iesu 9 Bible Online

Surona Pueꞌ Iesu 9 - Besoa bible

Surona Pueꞌ Iesu 9

¹I tempó iti, Saulu mampoinao ntepuꞌu oaꞌ mampopalááꞌ hai mopapate tauna to mepoinálái i Pueꞌ Iesu.[150] Onoꞌ miꞌi haneꞌi lao i Tadulako Menómbá Mahile,[151]

²membiáꞌ sura kuasaꞌ to peisá naꞌánti lao i tadulako támbi penómbáꞌá[152] i kótá Damasiꞌ.[153] Tunggáiána, ane araheꞌ nahumba tobaleilo ba towawine to mampeuláꞌi Paturoꞌna Iesu,[154] ina nahakaꞌ hai naꞌántiheꞌ lao i Ierusale.

³Agáiáná i polumaoáraꞌ lao i Damasiꞌ, i tempóna hungkuꞌmoheꞌ i kótá, hangkaꞌ-hangkaꞌ perái ara to mewangkaꞌ hangko i langiꞌ motolelingi Saulu.

⁴Madungká miꞌi Saulu haneꞌi mohádi wambaꞌ to manguliꞌ, “Saulu, Saulu! Moapa riꞌi haneꞌiAꞌ nupopeahiahiꞌ?”[155]

⁵Nauliꞌ Saulu, “Tuá, heánáKoꞌ?” Nahániki, “Kódóꞌ miꞌi Iesu, to nupopeahiahiꞌ!

⁶Mearómokoꞌ hai laomokoꞌ i kótá. Ionoꞌ ina rapahaweꞌákoꞌ apa to hangaa-ngaa nubábehi.”

⁷Wambaꞌ to nahádi Saulu iti, rahádi woꞌo rángánaheꞌ, agáiáná tiꞌara ara to raita. Onoꞌ miꞌi haneꞌi malááꞌheꞌ hai tiꞌara piꞌi raisá molaluita.

⁸Hangko ionoꞌ, meángkáꞌ miꞌi Saulu mobungkáhi mátána, agáiáná tiꞌara piꞌi meita. Mewaliꞌ, onoꞌ miꞌi haneꞌi rateteꞌ perái lao i kótá Damasiꞌ.

⁹Tálu alona kamaruena tiꞌara meita, hai tiꞌara woꞌo mandeꞌ ba mainu.

¹⁰I kótá Damasiꞌ, ara hadua tauna to mepoinálái i Iesu. Hangaꞌna Anania. Ia moita pampetudeꞌá hangko i Pueꞌ. I lalu pampetudeꞌá iti, Pueꞌ Iesu mekióꞌ, Nauliꞌ, “Anania!” Mehániꞌ Anania, nauliꞌ, “Deꞌentoaꞌ, Pueꞌ.”

¹¹Nauliꞌ Pueꞌ, “Laomokoꞌ deꞌe-deꞌe i támbina Iudasiꞌ i wiwi rárá to rahangaꞌ Rárá Manoroꞌ. Nupeliꞌ i támbi iti hadua tauna hangko i kótá Tarusu. Hangaꞌna Saulu. Tauna iti ina nuhumba tangaꞌna mekakae,

¹²hai i lalu pampetudeꞌá, naitamokoꞌ lao mampohidupaꞌá hai moángkáꞌ taemu i wátána bona meita huleꞌ.”

¹³Nahániki Anania, “Pueꞌ! Handaꞌ tauna mampolaluita kana i Saulu iti. Rumihi pampopeahiahiꞌna tauna to mepoinálái i Hio i kótá Ierusale.

¹⁴Hai ia mai woꞌo ieneꞌ láwiꞌ raweꞌi kuasaꞌ hangko i kapalaꞌ-kapalaꞌ tadulako menómbá, bona mohakaꞌ upu-upu tauna to mepoinálái i Hio.”

¹⁵Nauliꞌ wopiꞌi Pueꞌ Iesu i Anania, “Hangaa-ngaa laokoꞌ, láwiꞌ Saulu iti, Kutunggái miꞌi Kupileꞌi mewaliꞌ topobágóꞌKuꞌ. Ia ina mopahaweꞌ hangaꞌKuꞌ i toSáráeliꞌ hai i tauna ntániꞌna haweꞌ-haweꞌ woꞌo i datu.

¹⁶Ina Kutudeꞌá kapári to hangaa-ngaa nalámbiꞌ ánti pobágóꞌna i Kódóꞌ.”[156]

¹⁷Mewaliꞌ, lao mpuꞌu miꞌi Anania i támbi to natunggái Pueꞌ Iesu ininá, hai moángkáꞌ miꞌi taena i wongkona Saulu, nauliꞌ, “Saulu, halalungkuꞌ! I kamaimu ieneꞌ, nuita Pueꞌ Iesu i tangaꞌ rárá. Ia miꞌi to mohuoꞌaꞌ mai moweoꞌkoꞌ hai kupekakaeákoꞌ bona meitakoꞌ huleꞌ hai nakuasaꞌikoꞌ Inao to Magasaꞌ.”

¹⁸I tempó iti, ara mpuꞌu to nodo ruke bouꞌ to malókáki hangko i mátána, hai Saulu kásáliu meita. Hangko ionoꞌ, meángkáꞌ miꞌi hai liliu rariu.

¹⁹Roo onoꞌ, mandeꞌ miꞌi haneꞌi maróhó huleꞌ wátána. Bahangapa alona kamaruena, Saulu toroꞌ hingkakani hai to mepoinálái i kótá Damasiꞌ.

²⁰Ionoꞌ, ia liliu lao i támbi-támbi penómbáꞌá, mopahaweꞌ bámbári kana i Iesu i hangka toIahudiꞌna, nauliꞌ, “Iesu Ia miꞌi Ánáꞌna Pueꞌ Ala.”[157]

²¹Tingkáráꞌ ntepuꞌu tauna to mampehádingi Saulu, rauliꞌ, “Noumbá riꞌi noeneꞌ? Iaꞌo i Ierusale ia miꞌi to mopapate tauna to menómbá i Iesu. Hai tunggáiána mai ieneꞌ, bona mohakaꞌheꞌ woꞌo tauna to mepoinálái i Iesu to ara ieneꞌ, haneꞌi naꞌántiheꞌ i kapalaꞌ-kapalaꞌ tadulako menómbá i Ierusale bona molámbiꞌheꞌ pehuku.”

²²Agáiáná kamaróhó-róhóá riꞌi Saulu mepaturoꞌ, onoꞌ miꞌi haneꞌi mopawuliheꞌ toIahudiꞌ to ara i Damasiꞌ, láwiꞌ paturoꞌna iti mopakanótó mpuꞌu kaꞌIesuna Datu Topehómpóꞌ.

²³Bahangapa kamaruena hangko ionoꞌ, mohimpudumoheꞌ toIahudiꞌ ina mopapate Saulu.

²⁴Tunggáiáraꞌ ina mokámpáiheꞌ upu-upu babaꞌá bente kótá, maroꞌa mabaa maroꞌa káindi, bona ane moliu Saulu, ina rapapate. Agáiáná tunggáiáraꞌ iti rapahaweꞌ miꞌi i Saulu.

²⁵Mewaliꞌ tangaꞌ káindi, bahangapa rángána Saulu moánti lao i bente kótá to motolelingi Damasiꞌ. Ionoꞌ, Saulu rapopehoda i lalu kárándi haneꞌi raulu hangko i sungkekeꞌ to i bente kótá, tóá-tóá i tampoꞌ i rawa kótá.[158]

²⁶Mesuleꞌ miꞌi Saulu lao i Ierusale. Kahaweꞌna, napoinao mohintuwuꞌ hai tauna to mepoinálái i Iesu, agáiáná malááꞌheꞌ i Saulu, láwiꞌ tiꞌara maniheꞌ mampoinálái kapeuláꞌna mpuꞌu miꞌi i Iesu.

²⁷Agáiáná Baranaba lao miꞌi mampobale Saulu, hai naporángá lao i suro-surona Pueꞌ Iesu. Baranaba mopatuntuáheꞌ noumbá Saulu moita Pueꞌ Iesu i tangaꞌ rárá kalaona i Damasiꞌ, hai noumbá Pueꞌ molaluita i hia. Napahaweꞌáheꞌ woꞌo kapebáiꞌna Saulu mopahaweꞌ bámbári kana i Pueꞌ Iesu i Damasiꞌ.

²⁸Hangko ionoꞌ, Saulu toroꞌ hingkakani hai hira, hai lao i humalele kótá Ierusale hingkakani hai halalu hampepepoináláina, mopahaweꞌ bámbári kana i Pueꞌ Iesu, hai tiꞌara ara kamalááꞌna.

²⁹Ia molaluita hai mampombeheheꞌá toIahudiꞌ to mobásá Iunani, onoꞌ miꞌi haneꞌi rapoinao toIahudiꞌ iti mopapate Saulu.

³⁰Mewaliꞌ, karaisána halalu hampepepoináláina tunggáiáraꞌ tauna iti, ia raporángá miꞌi lao i kótá Kaisarea.[159] Hangko i Kaisarea, rapopeángkáꞌ miꞌi lao i kótá Tarusu.[160]

³¹I tempó onoꞌ, tauna to mepoinálái i Pueꞌ Iesu tiꞌara piꞌi rapopeahiahiꞌ i tampoꞌ Iudá, Galilea hai Samaria. Tetámbái miꞌi tauna to mepoinálái i Iesu, hai kamaróhó-róhóá riꞌi pepoináláiraꞌ láwiꞌ mengkoruꞌ mpuꞌuheꞌ i Pueꞌ Ala, hai Inao to Magasaꞌ mopakaróhó laluraꞌ.

³²Tempó onoꞌ woꞌo, Peturuꞌ lao motunggái bahangapa wánuá i tampoꞌ Iudá, Galilea hai Samaria. I polumaoána iti, ia mehupeꞌ i wánuá Lida[161] bona mampombelámbiꞌá tauna to mepoinálái.

³³Ionoꞌ, ia mampohidupaꞌá hadua tobaleilo to rahangaꞌ Enea. Enea iti, uwalu miꞌi parena paluꞌ, maturu peá oaꞌ.

³⁴Nauliꞌ Peturuꞌ, “Enea, Iesu Kerisitu mopakauriꞌkoꞌ! Mearómokoꞌ, hai nulóló miꞌi aleꞌmu.” Kásáliu mearó mpuꞌu miꞌi Enea.

³⁵Handaꞌ tauna to toroꞌ i kótá Lida hai i wánuá-wánuá to ara i lembo Saro,[162] moitaheꞌ kamauriꞌna miꞌi, hai mepoináláiheꞌ i Pueꞌ Iesu.

³⁶Tiꞌara karaoꞌ hangko i kótá Lida, ara woꞌo hambuaꞌ kótá to rauliꞌ Iope. I Iope, ara hadua towawine to mepoinálái i Iesu. Hangaꞌna Tabita. I lalu básá Iunani hangaꞌna Dóká, lempóna: lagiwa. Maroꞌa ntepuꞌu bábehiána, hai ia motulungi oaꞌ tauna to meahiahiꞌ.

³⁷I tempó iti, ia maduꞌa duuꞌna mate. Roo radói, wátámandoꞌna rawoli miꞌi i paturuána i lintuꞌ to i wongko.

³⁸Ánti katiꞌárána karaoꞌ kótá Iope hangko i kótá Lida,[163] onoꞌ miꞌi haneꞌi tauna to mepoinálái to ara i Iope mohádi kaꞌárána Peturuꞌ i Lida. Rodua tauna rahuoꞌ lao i Peturuꞌ membiáꞌ bona hawiáꞌ lao i Iope.[164]

³⁹Mewaliꞌ, Peturuꞌ pohuꞌ mpuꞌu miꞌi lao hingkakani hai hira. Kahaweꞌraꞌ i Iope, liliu raꞌánti lao i lintuꞌ karapowátáꞌána Dóká. Upu-upu towawine to bembaꞌ motolelingi Peturuꞌ, teriaꞌheꞌ hai rapetudeꞌá miꞌi i Peturuꞌ badu hai kumbáraꞌ to nadauáheꞌ Dóká i tempóna mani tueꞌ.

⁴⁰Agáiáná Peturuꞌ mampopesuwuꞌ upu-upu tauna hangko i lintuꞌ, haneꞌi molingkudu hai mekakae. Roo mekakae, nalindoꞌ miꞌi tomate iti, nauliꞌ, “Tabita, mearómokoꞌ!” Kásáliu tebungkáhi mátána Dóká. Kamoitána Peturuꞌ, liliu mehoda.

⁴¹Mewaliꞌ Peturuꞌ motibaaꞌ taena hai napopeángkáꞌ. Roo onoꞌ, mokióꞌmoheꞌ huleꞌ upu-upu tauna to mepoinálái i Iesu, tepasuaꞌheꞌ tobembaꞌ iti, nahángáꞌáheꞌ, “Peita! Halalumi Dóká tueꞌ huleꞌ.”

⁴²Apa to pewaliꞌ iti rapolaluita i humalele kótá Iope, álána handaꞌ tauna mepoinálái i Pueꞌ Iesu.

⁴³Roo onoꞌ, Peturuꞌ toroꞌ i Iope bahangapa kamaruena. Ia toroꞌ i támbina Simoꞌ, hadua to motandoꞌ koliꞌ.[165]