Read Besoa Roma 12 Bible Online

Roma 12 - Besoa bible

Roma 12

¹Mewaliꞌ halalu-halalu, ánti kamahilena ahiꞌna Pueꞌ Ala i kitaꞌ, onoꞌ miꞌi haneꞌi kupembiáꞌ bona nihuhuꞌ katueꞌmi i Pueꞌ Ala mewaliꞌ popenómbá to tueꞌ.[100] Ane iti to nibábehi, lempóna magasaꞌ katueꞌmi i peitána Pueꞌ Ala, láwiꞌ iti to mopagóeꞌ laluNa, hai iti miꞌi popenómbámi to hintotoꞌ ntepuꞌu i Hia.

²Ineeꞌmokou mampeuláꞌi bábehiáraꞌ hai ádáraꞌ tauna i duniáꞌ to tiꞌaraheꞌ mengkoruꞌ i Pueꞌ Ala, agáiáná nipatodáhi miꞌi Pueꞌ Ala mopawoꞌu pekirimi[101] bona tebáliki pambiárámi. Láwiꞌ ane nibábehiꞌi noꞌonoꞌ, ina niꞌisá ntepuꞌu peundeꞌána Pueꞌ Ala, ia miꞌi: apa to maroꞌa nibábehi, apa to mopagóeꞌ laluNa, hai apa to tiꞌara ara katesalaꞌiána.

³Ánti kabulána laluNa, Pueꞌ Ala mowátiꞌaꞌ bona mewaliꞌaꞌ suroNa, onoꞌ miꞌi haneꞌi kupahaweꞌákou laluita deꞌe: ineeꞌkou mampepemahile. Hangaa-ngaa manótó lalumi mampekiri mokana i katueꞌmi hadua-hadua, hintotoꞌ hai pewátiꞌ to nagáláꞌ-gáláꞌákou Pueꞌ Ala ánti pepoináláimi i Hia.[102]

⁴Pándiriꞌ, i wátántaꞌ handaꞌ pákáꞌna, agáiáná hambuaꞌ peá wátántaꞌ. Hampákáꞌ-hampákáꞌ montaniꞌ-ntaniꞌ bunduꞌna.

⁵Noꞌonoꞌ woꞌo kitaꞌ to mepoinálái i Kerisitu: handaꞌkeꞌ, agáiáná hampepekirikeꞌ ánti pohintuwuꞌtaꞌ hai Kerisitu, hai mohintuwuꞌkeꞌ upu-upu hadua hai hadua.

⁶Hadua-haduakeꞌ molámbiꞌ kamapánde to montaniꞌ-ntaniꞌ, mouláꞌ apa to naweꞌikeꞌ Pueꞌ Ala hangko i kabulána laluNa. Heáná to molámbiꞌ kapánde mopahaweꞌ laluitana Pueꞌ Ala, hangaa-ngaa napolaluita hintotoꞌ hai pepoináláina.

⁷Heáná to molámbiꞌ kapánde motulungi hángká rángána, hangaa-ngaa metulungi hangko i laluna ntepuꞌu. Heáná to molámbiꞌ kapánde mepaguru, hangaa-ngaa mepaguru mpuꞌu i katoꞌu-toꞌuána.

⁸Heáná to molámbiꞌ kapánde mopakaróhó laluna hángká rángána, hangaa-ngaa bateꞌna napopolumao i katoꞌu-toꞌuána. Heáná to molámbiꞌ kapánde mogáláꞌ-gáláꞌ apa to ara i hia, hangaa-ngaa napeweꞌi mpuꞌu hangko i kabulána laluna. Heáná to molámbiꞌ kapánde metadulakoi, hangaa-ngaa mewaliꞌ mpuꞌu tadulako to madota. Hai heáná to molámbiꞌ kapánde metulungi, hangaa-ngaa metulungi mpuꞌu i kagóeꞌ-góeꞌ.

⁹Nipokaꞌahiꞌ rángámi hangko i lalumi ntepuꞌu. Nikábáhá bábehiámi to kadake, hai nibábehi oaꞌ bábehiá to maroꞌa.

¹⁰Mombepokaꞌahiꞌkou hai mombeádáikou hadua hai hadua nodokou topohalalu.

¹¹Hangaa-ngaa madotakou mobágóꞌ, ineeꞌkou lohe. Nipopolumao bágóꞌna Pueꞌ hangko i lalumi ntepuꞌu.

¹²Hangaa-ngaa góeꞌkou ánti pehárungámi i upu-upu to ina nabábehiákou Pueꞌ Ala. Mantahakou i lalu kapári. Madotakou mekakae.

¹³Nitulungiheꞌ halalu hampepepoináláimi to ara kamakuraꞌraꞌ. Hangaa-ngaa góeꞌkou motarima torare.

¹⁴Ane ara tauna to mampopeahiahiꞌkou, ineeꞌheꞌ nitundaꞌ, ngkáliꞌna riꞌi hangaa-ngaa nipembiáꞌ i Pueꞌ Ala bona Nawátiꞌheꞌ.

¹⁵Hangaa-ngaa góeꞌkou hingkakani hai tauna to góeꞌ, teriaꞌkou hingkakani hai tauna to teriaꞌ.

¹⁶Hangaa-ngaa hintuwuꞌmokou hai upu-upu tauna. Ineeꞌkou mampepemahile, ngkáliꞌna riꞌi timamakou mampopolumao bágóꞌ nodo to rabágóꞌ tauna to i wóiꞌ tueꞌraꞌ,[103] hai ineeꞌkou mampe to mapánde.

¹⁷Ane araheꞌ to mobábehi to kadake i kómu, ineeꞌheꞌ niháwángi. Nibábehi apa to maroꞌa i peitáraꞌ upu-upu tauna.

¹⁸Nipári-pári i lalu katueꞌmi bona modamekou oaꞌ hai upu-upu tauna.

¹⁹Halalu-halalu to kupokaꞌahiꞌ: ineeꞌ niháwángi kakadakena tauna ntániꞌna. Nipatodáhi Pueꞌ Ala mohukuheꞌ, láwiꞌ i lalu Sura Magasaꞌ, nauliꞌ Pueꞌ Ala node: “Kódóꞌ to makuasaꞌ moháwángi. Kódóꞌ to makuasaꞌ mehuku.” [104]

²⁰Mewaliꞌ, nipeuláꞌi miꞌi paturoꞌ i lalu Sura Magasaꞌ to manguliꞌ: “Ane ewálimi marimi, nipaꞌandeꞌheꞌ. Ane mangkadoꞌuheꞌ, nipopainuheꞌ. Ane nibábehiꞌi noꞌonoꞌ, ina masandaꞌheꞌ hai rapokahili bábehiáraꞌ i kómu.”[105] [106]

²¹Mewaliꞌ ineeꞌkou nanangi bábehiá to kadake, ngkáliꞌna riꞌi bábehiáraꞌ to kadake ninangi hai bábehiá to maroꞌa.