Read Besoa Roma 13 Bible Online

Roma 13 - Besoa bible

Roma 13

¹[107] Upu-upu tauna hangaa-ngaa mengkoruꞌ i topopárentá, láwiꞌ kuasaꞌraꞌ mepárentá mentóáꞌ hangko i Pueꞌ Ala. Onoꞌ miꞌi haneꞌi tauna to moewaꞌ topopárentá, hibali peá hai moewaꞌ Pueꞌ Ala, láwiꞌ topopárentá napakanótó miꞌi Pueꞌ Ala. Hai tauna to moewaꞌ topopárentá bateꞌna ina molámbiꞌ pehuku!

³Ane maroꞌa bábehiámi, tiꞌarakou paraluu malááꞌ i topopárentá. Agáiáná tauna to kadake bábehiána, bateꞌna malááꞌ i topopárentá. Mewaliꞌ, ane niundeꞌ bona tiꞌarakou malááꞌ i topopárentá, hangaa-ngaa mobábehikou oaꞌ to maroꞌa, hai ina ratóiákou topopárentá.

⁴Láwiꞌ topopárentá iti, ia miꞌi huoꞌána Pueꞌ Ala to mampopolumao bágóꞌNa bona maroꞌa katueꞌmi. Agáiáná ane mobábehikou to kadake, bateꞌna malááꞌkou i topopárentá, láwiꞌ ara kuasaꞌraꞌ mehuku. Topopárentá iti huoꞌána Pueꞌ Ala bona moánti pehukuNa i tauna to mobábehi to kadake.

⁵Onoꞌ miꞌi haneꞌi hangaa-ngaa mampeuláꞌikou hawaꞌraꞌ topopárentá, tiꞌara peá láwiꞌ malááꞌkou ina rahuku, agáiáná láwiꞌ niꞌisá i lalumi apa to hintotoꞌ nibábehi.

⁶Onoꞌ miꞌi haneꞌi hangaa-ngaa mobaiarikou ásele, láwiꞌ topopárentá iti mampopolumao bágóꞌ to naweꞌiheꞌ Pueꞌ Ala.

⁷Hangaa-ngaa nibaiari i topopárentá apa to hintotoꞌ nibaiari, rápáꞌna: ásele hai to ntániꞌna. Mengkoruꞌkou i tauna to hintotoꞌ rapengkoruꞌi, hai nibiláꞌheꞌ upu-upu tauna to hintotoꞌ rabiláꞌ.[108]

⁸Hangaa-ngaa nibaiari upu-upu indámi, agáiáná hampákáꞌ indámi to tiꞌara peisá upu nibaiari, ia miꞌi mombepokaꞌahiꞌkou hadua hai hadua, láwiꞌ heáná peá to mampokaꞌahiꞌ hángká rángána, ia miꞌi to mampeuláꞌi Párentána Pueꞌ Ala to napahaweꞌ Musa.

⁹I lalu Párentána Pueꞌ Ala ara hawaꞌ to node: “Ineeꞌ mebualosi, ineeꞌ mepapate, ineeꞌ manako, ineeꞌ mampokaelu apa peá to ara i hángká rángámu.” Upu-upu hawaꞌ iti hai hawaꞌ to ntániꞌna woꞌo, nipeuláꞌi miꞌi ane mampeuláꞌikou hawaꞌ to hampákáꞌ deꞌe: “Nipokaꞌahiꞌ hángká rángámi nodokou mampokaꞌahiꞌ wátámi haduduámi.”

¹⁰Ane nipokaꞌahiꞌ hángká rángámi, tiꞌarakou mobábehi to kadake i hira. Mewaliꞌ ane maꞌahiꞌkou, lempóna: nipeuláꞌi upu-upu Párentána Pueꞌ Ala.

¹¹Upu-upuna iti hangaa-ngaa nipopolumao, láwiꞌ tempó deꞌe, kahungkuꞌ-hungkuꞌá miꞌi tempóna Pueꞌ Ala ina mohómpókikeꞌ hangko i duniáꞌ to kadake deꞌe. Mewaliꞌ, maingáꞌ-ingáꞌmokou, láwiꞌ hungkuꞌ miꞌi tempó katekábáháꞌántaꞌ hangko i rungu-rungumi mepoinálái.

¹²Duniáꞌ deꞌe napamakáindi dósá. Agáiáná tempó kamakáindi deꞌe ina maliu miꞌi, hai ina haweꞌ kamabaa i kahaweꞌna huleꞌ Iesu Kerisitu. Onoꞌ miꞌi haneꞌi hangaa-ngaa nikábáhá bábehiá to makáindi[109] hai hangaa-ngaa nipakeꞌ kuasaꞌ hangko i Pueꞌ Ala bona peisákou moewaꞌ kamakáindi hai tueꞌkou i kamabaaꞌáNa.[110]

¹³Hangaa-ngaa nibábehi apa to hintotoꞌ, nodo to rabábehi i tempó mabaa. Ineeꞌkou mosusa haneꞌi malangu hai mobábehi salaꞌ. Noꞌonoꞌ woꞌo tobaleilo hai towawine, ineeꞌkou mobábehi bábehiá to metitidiꞌi hai mouláꞌ peundeꞌámi to kadake. Ineeꞌkou mosisalaꞌ ba mahiniꞌ.

¹⁴Hangaa-ngaa nodokou Pueꞌ Iesu Kerisitu i lalu katueꞌmi. Ineeꞌkou mampekiri bábehiá to kadake, bona ineeꞌkou mobábehi to mouláꞌ peundeꞌána lalumi haduduámi.