Read Besoa Roma 14 Bible Online

Roma 14 - Besoa bible

Roma 14

¹Ara halalu hampepepoináláintaꞌ to tiꞌara mani maróhó pepoináláiraꞌ, láwiꞌ bata-bata mani laluraꞌ mokana bábehiá to hintotoꞌ. Hangaa-ngaa nitarima maroꞌa tauna iti. Kehapiꞌ mosisalaꞌ polámbiꞌmi, ineeꞌ iti to mewaliꞌ ntóáꞌ pombeheheꞌmi.

²Rápáꞌna: tauna to maróhó pepoináláiraꞌ, mandeꞌheꞌ mampopengaa pandeꞌ, agáiáná tauna to maledeꞌ pepoináláiraꞌ, mandeꞌ peheꞌ haloꞌ-haloꞌ láwiꞌ tiꞌaraheꞌ báiꞌ mandeꞌ mampopengaa pandeꞌ.

³Kómu to mandeꞌ mampopengaa pandeꞌ, ineeꞌkou mopakóiꞌ hángká rángámi to tiꞌaraheꞌ mandeꞌ bauꞌ. Hai kómu to tiꞌara mandeꞌ bauꞌ, ineeꞌkou woꞌo mosalaꞌi rángámi to mandeꞌheꞌ mampopengaa pandeꞌ, láwiꞌ Pueꞌ Ala motarimaheꞌ woꞌo rángámi iti mewaliꞌ ánáꞌNa.

⁴Heánárakou haneꞌi pebáiꞌkou mokámbáróá topobágóꞌna to haduána? Ba maroꞌa bábehiána ba tiꞌara, iti popakanótóna rái pueꞌna. Hai bateꞌna ina maroꞌa bábehiána, láwiꞌ Pueꞌ haduduáNa to Nabuku mokámpái.

⁵Ara wopiꞌi pándiriꞌ to ntániꞌna: araheꞌ tauna to manguliꞌ ara alo to tepakanótó to hangaa-ngaa tapenómbái melumbuꞌ hangko i alo to ntániꞌna.[111] Agáiáná araheꞌ woꞌo tauna to manguliꞌ upu-upu alo hibali peá. Deꞌe miꞌi to paraluu: apa peá to tabábehi, hangaa-ngaa hintotoꞌ hai pepoináláintaꞌ haduduántaꞌ.

⁶Tauna to mobiláꞌ alo to tepakanótó, iti rabábehi bona mampomahileheꞌ Pueꞌ. Tauna to mandeꞌ mampopengaa pandeꞌ, iti raꞌandeꞌ bona mampomahileheꞌ Pueꞌ, hai tongawaꞌ tunggáiáraꞌ noꞌonoꞌ láwiꞌ manguliꞌheꞌ handaꞌ kamaroꞌana i Pueꞌ Ala. Noꞌonoꞌ woꞌo tauna to mandeꞌ pandeꞌ mouláꞌ páliáraꞌ, mandeꞌheꞌ woꞌo bona mampomahileheꞌ Pueꞌ, hai manguliꞌheꞌ woꞌo handaꞌ kamaroꞌana i Hia,

⁷láwiꞌ kitaꞌ to mepoinálái, tiꞌarapokeꞌ tueꞌ bona mouláꞌ pekeꞌ peundeꞌántaꞌ haduduántaꞌ. Tiꞌarakeꞌ woꞌo mate mouláꞌ peundeꞌántaꞌ haduduántaꞌ.

⁸Tueꞌ ba matekeꞌ, bateꞌna mampomahilekeꞌ Pueꞌtaꞌ láwiꞌ taunáNakeꞌ.

⁹Tunggáiána Kerisitu mate hai tueꞌ huleꞌ, bona Ia mewaliꞌ Pueꞌraꞌ upu-upu tauna, maroꞌa to tueꞌ mani, maroꞌa to mate miꞌi.

¹⁰Mewaliꞌ, moapa riꞌi haneꞌi mosalaꞌikou halalu hampepepoináláimi?[112] Moapa riꞌi woꞌo haneꞌi mopakóiꞌkou halalu hampepepoináláimi? Láwiꞌ ina haweꞌ tempóna, kitaꞌ upu-upu ina meángkáꞌ i lindoꞌna Pueꞌ Ala bona Ia mohoda-hoda kárá-kárántaꞌ.

¹¹I lalu Sura Magasaꞌ, Pueꞌ Ala manguliꞌ: “Toꞌu ntepuꞌu to Kuꞌuliꞌ deꞌe: Upu-upu tauna ina molingkudu i lindoꞌKuꞌ, hai upu-upu tauna ina mopangákuꞌ kaKódóꞌna Pueꞌ Ala.” [113]

¹²Mewaliꞌ, kitaꞌ upu-upu hangaa-ngaa mopangákuꞌkeꞌ bábehiántaꞌ i Pueꞌ Ala.

¹³Pueꞌ Ala ina mobutusi kárá-káráraꞌ upu-upu tauna, onoꞌ miꞌi haneꞌi kuhángáꞌáꞌákou: ineeꞌkou mombesasalaꞌi. Rángina miꞌi maroꞌa-roꞌakou bona tiꞌara ara bábehiámi to mopakanawoꞌ halalu hampepepoináláimi álána madósáheꞌ.

¹⁴Ánti pohintuwuꞌkuꞌ hai Pueꞌ Iesu, kuisá ntepuꞌu katiꞌárána ara pandeꞌ to rapáliá i peitána Pueꞌ.[114] Agáiáná ane ara tauna to manguliꞌ pandeꞌ to hampákáꞌ rapáliá, bateꞌna mpuꞌu ia masalaꞌ ane naꞌandeꞌ.

¹⁵Noꞌonoꞌ woꞌo, ane niandeꞌ apa to nauliꞌ rángámi rapáliá, álána nipamahái laluna, madósákou láwiꞌ tiꞌarakou maꞌahiꞌ i rángámi. Onoꞌ miꞌi haneꞌi kuꞌuliꞌ, hangaa-ngaa nipakaroꞌa-roꞌa bábehiámi bona ineeꞌ nikeloꞌ rángámi moliu pandeꞌ to niandeꞌ, álána nipakanawoꞌ pepoináláina. Láwiꞌ rángámi iti, ia miꞌi halalu hampepepoináláimi to nasulewátái woꞌo Kerisitu i kamateNa.

¹⁶Mewaliꞌ, ane ara to nipekiri maroꞌa, agáiáná ina mopakarugiꞌ pepoináláina rángámi, ineeꞌ nibábehi, bona bábehiámi iti tiꞌara rasalaꞌi tauna ntániꞌna.

¹⁷Láwiꞌ popárentána Pueꞌ Ala i lalumi, tiꞌara mokana ádá pandeꞌ ba painu. To hangaa-ngaa nipaioru i lalu katueꞌmi ia miꞌi: mouláꞌkou peundeꞌána Pueꞌ Ala, mohintuwuꞌkou, hai tueꞌkou i lalu kagóeꞌ-góeꞌ. Upu-upu iti mentóáꞌ hangko i Inao to Magasaꞌ.

¹⁸Ane noꞌonoꞌi peuláꞌmi i Kerisitu, ina napokagóeꞌkou Pueꞌ Ala hai rabiláꞌkou rángámi.

¹⁹Onoꞌ miꞌi haneꞌi hangaa-ngaa nipári-pári bona mohintuwuꞌkou hai hángká rángámi, hai mombepakaróhó mpolalukou hadua hai hadua.

²⁰Ineeꞌ nipakarugiꞌ apa to nabábehi Pueꞌ Ala i laluraꞌ tauna ánti kaniandeꞌna to rauliꞌ rángámi tiꞌara peisá raꞌandeꞌ. Katoꞌuána, tiꞌara ara pandeꞌ to rapáliá, agáiáná tiꞌara maroꞌa ane nikeloꞌ rángámi moliu apa to niandeꞌ duuꞌna manawoꞌheꞌ i lalu dósá.

²¹Ineeꞌkou mandeꞌ bauꞌ ba mainu to melángui, ba mobábehikou apa peá to mopakanawoꞌ halalu hampepepoináláimi, haneꞌiheꞌ madósá.

²²Mewaliꞌ, ane nipoinálái katiꞌárámi masalaꞌ mobábehi bábehiá iti, polámbiꞌmi iti hangaa-ngaa nitibaaꞌ i lalumi haduduámi hai hangaa-ngaa niꞌisá woꞌo, tiꞌarakou nasalaꞌi Pueꞌ Ala ánti bábehiámi iti. Morasiꞌheꞌ tauna to mobábehi apa to maroꞌa mouláꞌ polámbiꞌraꞌ, hai laluraꞌ tiꞌara mosalaꞌi bábehiáraꞌ iti.

²³Agáiáná ane ara tauna to bata-bata mani laluna mokana i apa to peisá naꞌandeꞌ, hai kahópóꞌána naꞌandeꞌ peá, lempóna ia madósá, láwiꞌ to nabábehi iti tiꞌara hiolaꞌ hai apa to napakanótó miꞌi i laluna. Mewaliꞌ, ane tabábehi apa to tiꞌara hiolaꞌ hai popakanótóntaꞌ, bateꞌna madósákeꞌ ánti bábehiántaꞌ iti.