Read Besoa Roma 15 Bible Online

Roma 15 - Besoa bible

Roma 15

¹Kitaꞌ to maróhó pepoináláintaꞌ i Pueꞌ Ala, hangaa-ngaa sabaraꞌkeꞌ i hángká rángántaꞌ to bata-bata mani laluraꞌ, láwiꞌ tiꞌara mani maróhó pepoináláiraꞌ. Ineeꞌ mampeliꞌ pekeꞌ kagóeꞌántaꞌ haduduántaꞌ,

²ngkáliꞌna riꞌi, kitaꞌ upu-upu hangaa-ngaa mobábehikeꞌ bábehiá to mopagóeꞌ laluna rángántaꞌ hai motulungikeꞌ hángká rángántaꞌ bona maróhó pepoináláiraꞌ.

³Talámbiꞌ pándiriꞌ hangko i Kerisitu, láwiꞌ Ia woꞌo tiꞌara mampeliꞌ kagóeꞌáNa haduduáNa. {Ánti pampeuláꞌiNa peundeꞌána Pueꞌ Ala, Nalámbiꞌ handaꞌ kapári,} nodo to teukiꞌ hangkoia i lalu Sura Magasaꞌ mokana i Pueꞌ Iesu: “Upu-upu laluita to mopakóiꞌ Pueꞌ Ala, kana miꞌi woꞌo i Kódóꞌ.”[115]

⁴Upu-upu to teukiꞌ hangkoia i lalu Sura Magasaꞌ, teukiꞌ bona mopaturoꞌkeꞌ. Hangko i paturoꞌ to tahumba i lalu Sura Magasaꞌ iti, peisákeꞌ mantaha i lalu kapári, hai tepalindó laluntaꞌ bona maróhó pehárungántaꞌ i Pueꞌ Ala.

⁵Pueꞌ Ala to motulungikeꞌ bona mantahakeꞌ i lalu kapári, hai Ia to mopakaróhó laluntaꞌ. Mekakaeaꞌ i Hia bona mohintuwuꞌkou hadua hai hadua mouláꞌ peundeꞌána Kerisitu Iesu,

⁶bona hampepekirikou, hai hingkakanikou motóiá Pueꞌ Ala Umána Iesu Kerisitu Pueꞌtaꞌ.

⁷Mewaliꞌ halalu-halalu, onoꞌ miꞌi haneꞌi Kuhángáꞌáꞌákou: hangaa-ngaa nitarima maroꞌa halalu hampepepoináláimi, nodo woꞌo Kerisitu motarimakou. Ane onoꞌ to nibábehi, Pueꞌ Ala ina rapomahile.

⁸Hangaa-ngaa nipailalu laluitangkuꞌ deꞌe: Kerisitu mai i duniáꞌ bona motulungiangkaiꞌ toIahudiꞌ, bona tongawaꞌ Pueꞌ Ala mobukeki dándina i toiorungkiꞌ.

⁹Hai kamaina Kerisitu iti, Ia mai mobungkáhi rárá bona tauna to tiꞌaraheꞌ toIahudiꞌ peisáheꞌ woꞌo molámbiꞌ katehómpóꞌ hai motóiáheꞌ Pueꞌ Ala ánti kamahilena ahiꞌNa i hira. Iti to natunggái i lalu Sura Magasaꞌ to manguliꞌ node: “Ó Pueꞌ Ala, ina kupomahileKoꞌ i oloꞌraꞌ tauna to tiꞌaraheꞌ toIahudiꞌ. Ina monaniaꞌ motóiá hangaꞌMu.” [116]

¹⁰Ara woꞌo laluita to teukiꞌ hangkoia i lalu Sura Magasaꞌ to manguliꞌ node: “Kómu to tiꞌarakou toIahudiꞌ, góeꞌkou hingkakani hai toIahudiꞌ to Napileꞌi miꞌi Pueꞌ Ala hangkoia.” [117]

¹¹Ara woꞌo laluita to teukiꞌ node: “Nitóiá miꞌi Pueꞌ, upu-upukou to tiꞌara toIahudiꞌ. Kómu upu-upu tauna to tueꞌ i duniáꞌ, nitóiá miꞌi Pueꞌ!” [118]

¹²Ara woꞌo laluita to naukiꞌ nabiꞌ Iesaia hangkoia to manguliꞌ node: “Hangko i pemuleꞌána Isai,[119] ina mesupaꞌ Hadua[120] to ina mopárentá tauna to tiꞌaraheꞌ toIahudiꞌ. Ia miꞌi to ina mewaliꞌ pehárungáꞌáraꞌ.” [121]

¹³Kupembiáꞌ bona Pueꞌ Ala, ntóáꞌna pehárungáꞌántaꞌ, mampoweꞌikou kagóeꞌ lalu hai roꞌa ngkatueꞌ ánti pepoináláimi i Pueꞌ Iesu. Kupembiáꞌ noꞌonoꞌ, bona moliu kuasaꞌna Inao to Magasaꞌ ina tetámbái kamaróhóna pehárungámi i Hia.

¹⁴Halalu-halalu! Kupoinálái upu-upu to nibábehi maroꞌa ntepuꞌu. Niꞌisá ntepuꞌu paturoꞌ hangko i Ngkóráꞌna Pueꞌ, hai niꞌisá mombepaturoꞌ hadua hai hadua.

¹⁵Agáiáná kehapiꞌ noꞌonoꞌ, i lalu surangkuꞌ deꞌe, pebáiꞌaꞌ mopaturoꞌákou bahangapa pákáꞌna paturoꞌ. Tunggáiángkuꞌ bona mampopambuhinaoákou huleꞌ paturoꞌ to nitarima miꞌi, láwiꞌ ánti kabulána laluNa,

¹⁶Pueꞌ Ala mopileꞌiaꞌ mewaliꞌ topobágóꞌna Kerisitu Iesu, hai Nahuoꞌaꞌ lao i tauna to tiꞌaraheꞌ toIahudiꞌ. Bágóꞌkuꞌ iti peisá rapándiriꞌ nodo pobágóꞌna tadulako menómbá, láwiꞌ mopahaweꞌaꞌ Ngkóráꞌ Marasa. Hai hira to tiꞌaraheꞌ toIahudiꞌ, to mepoinálái i Pueꞌ Iesu ánti pobágóꞌkuꞌ iti, kurekeꞌheꞌ nodo popenómbángkuꞌ i Pueꞌ Ala. Hai popenómbángkuꞌ iti, bateꞌna natarima Pueꞌ Ala, láwiꞌ Inao to Magasaꞌ to mopamagasaꞌheꞌ hai mampopewaliꞌheꞌ taunána Pueꞌ Ala.

¹⁷Ánti pohintuwuꞌkuꞌ hai Kerisitu Iesu, góeꞌ ntepuꞌu lalungkuꞌ mampopolumao bágóꞌ to naweꞌiaꞌ Pueꞌ Ala.

¹⁸Tiꞌaraꞌaꞌ pebáiꞌ mampolaluita apa peá ane tiꞌara kana i apa to nabábehi Kerisitu moliu kódóꞌ. Kubábehi iti bona tauna to tiꞌara toIahudiꞌ, peisáheꞌ mepoinálái moliu paturoꞌkuꞌ, bábehiángkuꞌ,

¹⁹hai tandaꞌ kuasaꞌ to kubábehi.[122] Upu-upuna iti mewaliꞌ ánti kuasaꞌna Inao to Magasaꞌ. Hangko i kótá Ierusale duuꞌna haweꞌ i tampoꞌ Iliriku,[123] kupahaweꞌámoheꞌ Ngkóráꞌ Marasa i katoꞌu-toꞌuána.

²⁰Deꞌe miꞌi tunggáiángkuꞌ: tiꞌara kuꞌundeꞌ moánti Ngkóráꞌ Marasa i tauna to mohádimoheꞌ hangko i tauna ntániꞌna,[124] agáiáná kuꞌundeꞌ moánti Ngkóráꞌ Marasa i tampoꞌ ntániꞌna, i tauna to tiꞌara maniheꞌ moisá mokana i Kerisitu.

²¹Kupoinao mobukeki laluita i lalu Sura Magasaꞌ to manguliꞌ node: “Tauna to tiꞌara maniheꞌ rabámbáriá kana i Hia, ina moisá ntepuꞌuheꞌ kaheánáNa. Tauna to tiꞌara maniheꞌ hangkani mohádi bámbáriNa, ina moisá ntepuꞌuheꞌ lempóna bámbári iti.” [125]

²²Tiꞌara mani ara tempóngkuꞌ lao moweoꞌkou, láwiꞌ tepatuhuaꞌ hai bágóꞌkuꞌ {moánti Ngkóráꞌ Marasa i tauna to tiꞌara mani mohádi}.

²³Agáiáná deꞌe-deꞌe, hópóꞌ miꞌi bágóꞌkuꞌ iti i tampoꞌ deꞌe. Mewaliꞌ, kuhárungá ina ara tempóngkuꞌ mampombelámbiꞌákou i kótámi. I parena miꞌi kupoinao ina laoaꞌ i kómu.

²⁴Hai ane laoaꞌ i tampoꞌ Sapanio, bateꞌna ina mehupeꞌaꞌ i kótámi iti. Mewaliꞌ, kahópóꞌána ina góeꞌaꞌ, kehapiꞌaꞌ tiꞌara marue hingkakani hai kómu. Hai kuhárungá ina nipopeángkáꞌaꞌ maroꞌa ane liliuaꞌ lao i Sapanio.

²⁵Agáiáná deꞌe-deꞌe tangaꞌkuꞌ lao i kótá Ierusale moánti dóiꞌ petulungi hangko i toSarani to ara ieneꞌ. Dóiꞌ iti rapakatu i toIahudiꞌ to hampepepoináláintaꞌ,

²⁶láwiꞌ toSarani to tiꞌaraheꞌ toIahudiꞌ i tampoꞌ Makedonia hai Akaia deꞌe, morámpumoheꞌ dóiꞌ bona raweꞌi to meahiahiꞌ tueꞌraꞌ i oloꞌraꞌ halalu hampepepoináláintaꞌ to ara i Ierusale.[126]

²⁷Bábehiáraꞌ iti mentóáꞌ hangko i kagóeꞌna laluraꞌ, hai hintotoꞌ ntepuꞌu tauna to tiꞌara toIahudiꞌ motulungi toIahudiꞌ mouláꞌ pebukuáraꞌ, láwiꞌ Pueꞌ Ala mowátiꞌheꞌ moliu toIahudiꞌ.

²⁸Mewaliꞌ, ina laoaꞌ sieruꞌ i Ierusale moánti dóiꞌ petulungi to rarámpu miꞌi, hangko laoraꞌaꞌ i tampoꞌ Sapanio, hai ina mehupeꞌaꞌ i kótámi.

²⁹Kuisá, ane haweꞌaꞌ i kómu, handaꞌ pewátiꞌ to hangko i Kerisitu ina nilámbiꞌ moliu kódóꞌ.

³⁰Halalu-halalu! Mohintuwuꞌmokeꞌ hai Pueꞌtaꞌ Iesu Kerisitu, hai mombepokaꞌahiꞌkeꞌ ánti pokalena Inao to Magasaꞌ i laluntaꞌ. Onoꞌ miꞌi haneꞌi kupembiáꞌ bona madota ntepuꞌukou mampekakaeáꞌaꞌ i Pueꞌ Ala.

³¹Mekakaekou bona Pueꞌ Ala mokámpáiaꞌ hangko i tauna to tiꞌaraheꞌ mepoinálái i Iesu ane laoaꞌ i tampoꞌ Iudá. Mekakaekou woꞌo bona toSarani to i Ierusale ina motarima maroꞌa dóiꞌ petulungi to kuánti deꞌe.

³²Kahópóꞌána, ane napokana Pueꞌ Ala, ina haweꞌaꞌ i kótámi i lalu kagóeꞌ-góeꞌ, hai ina lindó lalungkuꞌ ane araꞌaꞌ hingkakani hai kómu.

³³Kupembiáꞌ i Pueꞌ Ala to mampoweꞌikeꞌ roꞌa ngkatueꞌ bona mamporángákou upu-upu. Ami!