Read Besoa Roma 2 Bible Online

Roma 2 - Besoa bible

Roma 2

¹Niꞌisá ntepuꞌu, ane Pueꞌ Ala mosalaꞌi tauna to mobábehi to kadake, pobutusiNa bateꞌna hintotoꞌ. Agáiáná kómu tiꞌara ara rárámi mosalaꞌi tauna ntániꞌna, láwiꞌ ane nisalaꞌi tauna ntániꞌna, lempóna nisalaꞌi woꞌo wátámi haduduámi, láwiꞌ apa to rabábehi tauna ntániꞌna, iti woꞌo to nibábehi. Mewaliꞌ, tiꞌara mpuꞌu ara rárámi mosalaꞌi salaꞌraꞌ tauna ntániꞌna.

³Ane mosalaꞌikou tauna ntániꞌna, agáiáná kómu woꞌo mobábehi bábehiá to noꞌonoꞌ, ineeꞌ riꞌi nipekiri tiꞌarakou ina nahuku Pueꞌ Ala.

⁴Maroꞌa ntepuꞌu laluna Pueꞌ Ala, sabaraꞌ hai bukeꞌ ahiꞌ. Agáiáná ineeꞌ niuliꞌ i lalumi: “Tiꞌara kuparaluu mobáliki bábehiángkuꞌ.” Hangaa-ngaa nibuhinao: tunggáiána Pueꞌ Ala maroꞌa, ia miꞌi, Napoweꞌikou tempó mampenosoꞌi dósámi.

⁵Agáiáná ánti kamatuꞌana lalumi, hai ánti katiꞌárámi mau mobáliki bábehiámi, onoꞌ miꞌi haneꞌi ina tongawaꞌ kamabukoꞌna Pueꞌ Ala, hai ina tetámbái kamatimina hukumi i alo pobutusi i kahópóꞌána duniáꞌ. Hai pobutusina Pueꞌ Ala hintotoꞌ ntepuꞌu.

⁶Ia ina moháwángi bábehiáraꞌ upu-upu tauna.

⁷Ara tauna to mobábehiheꞌ oaꞌ apa to maroꞌa, láwiꞌ hira mampeliꞌheꞌ petóiá hai pebiláꞌ hangko i Pueꞌ Ala, hai mampeliꞌheꞌ woꞌo katueꞌ to maroꞌa to tiꞌara ara kahópóꞌána. I tauna to noꞌonoꞌ, Pueꞌ Ala ina mampoweꞌiheꞌ katueꞌ to tiꞌara mokahópóꞌá.

⁸Agáiáná araheꞌ woꞌo tauna to mampekiri peá wátáraꞌ haduduáraꞌ. Tiꞌaraheꞌ mau mampeuláꞌi paturoꞌ to toꞌu, mouláꞌ peheꞌ peundeꞌáraꞌ haduduáraꞌ to kadake. Hira iti to ina mohádiá kamabukoꞌNa hai pehukuna Pueꞌ Ala.

⁹Upu-upu tauna to mobábehi to kadake, bateꞌraꞌ ina mantódihá kapári. Agáiáná tauna to mobábehi to maroꞌa ina molámbiꞌheꞌ petóiá, pebiláꞌ hai roꞌa ngkatueꞌ, maroꞌa toIahudiꞌ, maroꞌa woꞌo to tiꞌara toIahudiꞌ,

¹¹láwiꞌ Pueꞌ Ala tiꞌara mampopontaniꞌ tauna.

¹²Tauna to madósá to tiꞌara mangisá Paturoꞌna Musa, bateꞌna tegááki hangko i Pueꞌ Ala, hai ina Nahukuheꞌ hintotoꞌ hai kamasalaꞌraꞌ, agáiáná tiꞌaraheꞌ ina Nahuku hintotoꞌ hai poliungiraꞌ áturá-áturá iti. Noꞌonoꞌ woꞌo tauna to mangisá Paturoꞌna Musa hai madósá ina Nahukuheꞌ woꞌo Pueꞌ Ala, agáiáná hira iti ina Nahuku ánti poliungiraꞌ áturá-áturá iti,

¹³láwiꞌ tauna to mohádi peá Paturoꞌna Musa tiꞌara ina mewaliꞌ manótó i peitáNa Pueꞌ Ala, agáiáná tauna to mampeuláꞌi upu-upu áturá to teukiꞌ i lalu Paturoꞌna Musa ina mewaliꞌ manótó i peitáNa Pueꞌ Ala.[7]

¹⁴Ane tauna to tiꞌara toIahudiꞌ, kehapiꞌheꞌ tiꞌara moisá apa to teukiꞌ i Paturoꞌna Musa, agáiáná hangkani-hangkani rabábehi bábehiá to hintotoꞌ hai paturoꞌ iti. Ionoꞌ tongawaꞌ karaisána miꞌi apa to maroꞌa hai apa to tiꞌara maroꞌa. Nodo Párentána Pueꞌ Ala teukiꞌ miꞌi ami i laluraꞌ,

¹⁵hai iti miꞌi to mopakanótóáheꞌ apa to maroꞌa hai apa to tiꞌara maroꞌa. Rahádiá i laluraꞌ ane apa to rabábehi maroꞌa ba tiꞌara maroꞌa.

¹⁶Mewaliꞌ i alo pobutusi i kahópóꞌána duniáꞌ, Pueꞌ Ala ina mampoweꞌi kuasaꞌ i Iesu Kerisitu mobutusi kara-kara tauna, haweꞌ-haweꞌ i upu-upu to tewuniángi i laluraꞌ. Iti miꞌi Ngkóráꞌ Marasa to kupahaweꞌ.

¹⁷Mewaliꞌ, noumbámokou toIahudiꞌ? Arakou to mampepemahile. Niuliꞌ kómu peá taunána Pueꞌ Ala láwiꞌ nipeuláꞌi Paturoꞌna Musa.

¹⁸Kómu toIahudiꞌ, niꞌisá miꞌi peundeꞌána Pueꞌ hai niꞌisá mampopontaniꞌ apa to maroꞌa hai apa to tiꞌara maroꞌa, láwiꞌ rapaturoꞌámokou Paturoꞌna Musa.

¹⁹Niuliꞌ i lalumi, “Kitaꞌ deꞌe to mapánde. Taisá mopaturoꞌ tauna to tiꞌara moisá Pueꞌ Ala. Kitaꞌ deꞌe to hangaa-ngaa mopakanótó tauna to ara maniheꞌ i lalu kakáindiána to tiꞌara maniheꞌ moisá paturoꞌ to toꞌu, láwiꞌ paturoꞌ to toꞌu iti teukiꞌ i lalu Paturoꞌna Musa to ara i kitaꞌ toIahudiꞌ.”

²¹Mewaliꞌ, ane mopaturoꞌkou tauna ntániꞌna, moapa riꞌi haneꞌi kómu haduduámi tiꞌara moisá mampeuláꞌi paturoꞌ to toꞌu iti? Nipaturoꞌ tauna ntániꞌna bona tiꞌaraheꞌ manako, mole kómu haduduámi to manako!

²²Mohángáꞌákou tauna ntániꞌna ineeꞌ mebualosi, mole kómu haduduámi mebualosintokou woꞌo! Mampokatidiꞌkou to rapopenómbá i ánitu, mewaliꞌ moapa riꞌi haneꞌi laontokou mopanako párewá i lalu támbi penómbáꞌá i ánitu?

²³Ba mampepemahilekou láwiꞌ moisákou Paturoꞌna Musa? Apa miꞌi bunduꞌna ane niuliꞌ moisákou Paturoꞌna Musa, agáiáná tiꞌarakou mobiláꞌ Pueꞌ Ala láwiꞌ tiꞌarakou mampeuláꞌi hawaꞌNa iti?

²⁴Ara to teukiꞌ hangkoia i lalu Sura Magasaꞌ to manguliꞌ node: “Kómu toIahudiꞌ, ánti kakadakena bábehiámi, onoꞌ miꞌi haneꞌi tauna to tiꞌara toIahudiꞌ mopakóiꞌ hangaꞌna Pueꞌ Ala.”[8]

²⁵Kómu toIahudiꞌ, niuliꞌ ara pobunduꞌána ádá petileꞌmi mouláꞌ Paturoꞌna Musa. Hai ara mpuꞌu pobunduꞌána karatileꞌmi, asalaꞌ nipeuláꞌi ntepuꞌu Paturoꞌna Musa. Agáiáná ane tiꞌara nipeuláꞌi Paturoꞌna Musa, tiꞌara piꞌi ara bunduꞌna karatileꞌmi iti.

²⁶Tauna to tiꞌaraheꞌ toIahudiꞌ, tiꞌaraheꞌ ratileꞌ mouláꞌ Paturoꞌna Musa. Agáiáná ane manótó bábehiáraꞌ mouláꞌ paturoꞌ to teukiꞌ i lalu Paturoꞌna Musa, bateꞌna ina natarimaheꞌ Pueꞌ Ala hibali hai tauna to ratileꞌ mouláꞌ Paturoꞌna Musa iti.

²⁷Ane noꞌonoꞌi, bábehiáraꞌ tauna to tiꞌara toIahudiꞌ ina mopatongawaꞌ kamasalaꞌmi kómu toIahudiꞌ, ane kómu tiꞌara mampeuláꞌi hawaꞌna Pueꞌ Ala, kehapiꞌkou moisá apa to teukiꞌ i lalu Paturoꞌna Musa, hai ratileꞌkou woꞌo mouláꞌ Hawaꞌ iti, agáiáná hira to tiꞌara ratileꞌ, hira riꞌi to mampeuláꞌi hawaꞌna Pueꞌ Ala.

²⁸ToIahudiꞌ ratileꞌ mouláꞌ Paturoꞌna Musa, agáiáná karatileꞌraꞌ iti ia miꞌi ádá to rabábábehi peá i wátáraꞌ hai i rawa peá. Tiꞌaraheꞌ mewaliꞌ taunána Pueꞌ Ala ánti ádá petileꞌ iti.

²⁹Agáiáná tauna to mewaliꞌ taunána Pueꞌ Ala, ia miꞌi tauna to mampeuláꞌi peundeꞌána Pueꞌ Ala hangko i laluna ntepuꞌu, hai peisá rapándiriꞌ nodo to ratileꞌ i laluna. Lempóna: rawehángi hangko i katueꞌna upu-upu to tiꞌara hintotoꞌ hai peundeꞌána Pueꞌ Ala.[9] Ia natarima Pueꞌ Ala ánti kaꞌárána Inao to Magasaꞌ i laluna, tiꞌara ánti pampeuláꞌina áturá-áturá to teukiꞌ. Kehapiꞌ tiꞌara ratóiá tauna, agáiáná Pueꞌ Ala bateꞌna motóiá.