Read Besoa Roma 5 Bible Online

Roma 5 - Besoa bible

Roma 5

¹Mewaliꞌ deꞌe-deꞌe, manótómokeꞌ i peitána Pueꞌ Ala ánti pepoináláintaꞌ. Onoꞌ haneꞌi maroꞌa miꞌi pohintuwuꞌtaꞌ hai Pueꞌ Ala ánti kanatangaꞌ-tangaꞌintaꞌ Pueꞌtaꞌ Iesu Kerisitu.

²Mewaliꞌ pepoináláintaꞌ i kanatangaꞌ-tangaꞌintaꞌ Iesu Kerisitu to mopahintuwuꞌkeꞌ hai Pueꞌ Ala, mopatongawaꞌ katahádiána kabulána laluna Pueꞌ Ala i lalu katueꞌtaꞌ deꞌe. Hai góeꞌ laluntaꞌ, láwiꞌ ara pehárungántaꞌ, álána taisá kaꞌina molámbiꞌtaꞌ gáláꞌtaꞌ i kapeawaꞌna tueꞌna Pueꞌ Ala.

³Hai tiꞌara iti peá. Góeꞌkeꞌ woꞌo i lalu kapári to morampekeꞌ, láwiꞌ taisá: hangko i kapári iti, megurukeꞌ bona mantaha.[31]

⁴Hai ane mantahakeꞌ, ina Napokanakeꞌ Pueꞌ Ala. Hai ane taisá Pueꞌ Ala mampokanakeꞌ, bateꞌna ina mantámbái kamaróhóna pehárungántaꞌ i Hia.

⁵Hai ane mehárungákeꞌ i Pueꞌ Ala, pehárungántaꞌ iti tiꞌara ina mepakanawoꞌ, láwiꞌ upu-upu to tahárungá hangko i Hia bateꞌna ina mewaliꞌ. Taisá kamaꞌahiꞌna Pueꞌ Ala i kitaꞌ, láwiꞌ Inao to Magasaꞌ to mopatongawaꞌ i laluntaꞌ kamaꞌahiꞌNa iti.

⁶Kamaꞌahiꞌna Pueꞌ Ala i kitaꞌ node: i tempóntaꞌ mani maledeꞌ {láwiꞌ tiꞌarakeꞌ peisá mohintuwuꞌ hai Pueꞌ Ala hangko i róhóntaꞌ haduduántaꞌ}, Pueꞌ Iesu mate ánti dósántaꞌ, hai tempó kamateNa iti napakanótó miꞌi ami Pueꞌ Ala.[32]

⁷Makuraꞌ tauna to moundeꞌ mate mosulewátái rángána to tiꞌara masalaꞌ. Ane ara hadua tauna to maroꞌa ntepuꞌu laluna, babilaꞌ ara mpuꞌui tauna to mau mate mosulewátái tauna iti.

⁸Agáiáná Pueꞌ Ala tiꞌara noꞌonoꞌ. Tangaꞌtaꞌ mani tueꞌ i lalu dósá, Ia mopatongawaꞌ ahiꞌNa i kitaꞌ moliu kamatena Kerisitu to mosulewátáikeꞌ.

⁹Mewaliꞌ deꞌe-deꞌe, kitaꞌ mewaliꞌmokeꞌ manótó i peitána Pueꞌ Ala láwiꞌ Iesu mate[33] mosulewátáikeꞌ, onoꞌ haneꞌi ina tekábáhákeꞌ hangko i kamabukoꞌna Pueꞌ Ala {i alo pobutusi i kahópóꞌána duniáꞌ}.

¹⁰Hangko tiꞌara manikeꞌ mepoinálái i Pueꞌ Ala, kitaꞌ meꞌewaꞌkeꞌ oaꞌ i Hia. Ane i tempó iti, Pueꞌ Ala mohuoꞌ mai ÁnáꞌNa bona mate mopaháwángi dósántaꞌ, apa mani deꞌe-deꞌe. Ánti pohintuwuꞌtaꞌ miꞌi, hai ánti katueꞌna huleꞌ Iesu hangko i kapate, kitaꞌ bateꞌtaꞌ tekábáhákeꞌ hangko i pehukuna Pueꞌ Ala.

¹¹Hai tiꞌara iti peá. Tapokagóeꞌ ntepuꞌu kamaroꞌana Pueꞌ Ala to talámbiꞌ ánti kamatena Iesu Kerisitu Pueꞌtaꞌ, láwiꞌ moliu Iesu Kerisitu, maroꞌa miꞌi pohintuwuꞌtaꞌ hai Pueꞌ Ala.

¹²Ánti hadua tauna to moliungi hawaꞌna Pueꞌ Ala, ia miꞌi Adama, deꞌe-deꞌe upu-upu tauna i duniáꞌ madósá. Hai ánti dósána Adama iti, upu-upu tauna i duniáꞌ hangaa-ngaa mate láwiꞌ upu-upu madósá.

¹³Hangkoia, hangko tiꞌara mani ara Párentána Pueꞌ Ala to napahaweꞌ Musa, tauna madósá miꞌi. Agáiáná tauna tempó onoꞌ tiꞌara peisá rasalaꞌi láwiꞌ tiꞌara ara párentá to motakaꞌ, ia miꞌi Paturoꞌna Musa.[34]

¹⁴Agáiáná kehapiꞌ noꞌonoꞌ, mantepuꞌu i tempóna Adama duuꞌna haweꞌ i tempóna nabiꞌ Musa, upu-upu tauna hangaa-ngaa mate, tepasuaꞌ tauna to tiꞌaraheꞌ moliungi hawaꞌna Pueꞌ Ala nodo to nabábehi Adama. Adama mewaliꞌ pándiriꞌ i kitaꞌ mokana i Iesu. Ánti dósána Adama, upu-upu tauna madósá, agáiáná ánti kamatena Iesu to haweꞌ i bókóꞌ,[35] tauna peisá teámpungi.

¹⁵Mewaliꞌ tongawaꞌ ntepuꞌu bábehiána Adama hai bábehiána Iesu karaoꞌ ntepuꞌu posisalaꞌána. Adama moliungi hawaꞌna Pueꞌ Ala, hai ánti poliungina iti, upu-upu tauna hangaa-ngaa mate. Agáiáná apa to nabábehi Iesu Kerisitu melumbuꞌ mani kamaroꞌana. Ia mopatongawaꞌ i kitaꞌ kabulána laluna Pueꞌ Ala, láwiꞌ Nahómpókimokeꞌ to mepoinálái i Hia hangko i huku dósá iti. Hai upu-upuna iti Naweꞌikeꞌ mbero.

¹⁶Kabulána laluna Pueꞌ Ala i kitaꞌ melumbuꞌ ntepuꞌu kamaroꞌana hangko i poliungina Adama hawaꞌna Pueꞌ Ala i hia.[36] Dósá to rungu-runguna iti mampopewaliꞌ upu-upu tauna masalaꞌ i peitána Pueꞌ Ala, álána hangaa-ngaa rahukuheꞌ. Agáiáná ánti kabulána laluna Pueꞌ Ala, Ia mowehángi upu-upu dósá tauna to mepoinálái i Hia, hai Narekeꞌheꞌ manótó i peitáNa.

¹⁷Ánti peliungina Adama iti, upu-upukeꞌ hangaa-ngaa mate láwiꞌ pemuleꞌánakeꞌ Adama. Agáiáná melumbuꞌ mani kamaroꞌana bábehiána Iesu Kerisitu! Heáná peá to mepoinálái i Hia ina molámbiꞌ kuasaꞌ mepárentá hingkakani hai Kerisitu, hai ina molámbiꞌ woꞌo katueꞌ to maroꞌa to tiꞌara mokahópóꞌá. Upu-upuna iti mewaliꞌ ánti kabulána laluna Pueꞌ Ala, láwiꞌ mahile ntepuꞌu kamaꞌahiꞌNa i kitaꞌ, hai Narekeꞌkeꞌ manótó i peitáNa ánti pohintuwuꞌtaꞌ hai Iesu Kerisitu.

¹⁸Mewaliꞌ, ánti kamadósána Adama, upu-upu tauna masalaꞌ hai hangaa-ngaa rahuku. Agáiáná, ánti bábehiána Iesu to mampeuláꞌi peundeꞌána Pueꞌ Ala, upu-upu tauna peisá mewaliꞌ manótó i peitána Pueꞌ Ala, hai peisáheꞌ molámbiꞌ katueꞌ to maroꞌa to tiꞌara mokahópóꞌá.

¹⁹Ánti katiꞌárána mengkoruꞌ Adama i Pueꞌ Ala, upu-upu tauna mampeuláꞌi Adama hai madósá. Agáiáná Iesu mengkoruꞌ i Pueꞌ Ala haweꞌ-haweꞌ mate i kau mombehape. Ánti pengkoruꞌNa iti, upu-upu tauna peisá mewaliꞌ manótó i peitána Pueꞌ Ala.

²⁰Ara miꞌi tunggáiána Párentána Pueꞌ Ala to napahaweꞌ Musa. Párentá iti napeweꞌi Pueꞌ Ala i tauna bona tongawaꞌ ntepuꞌu kamasalaꞌraꞌ, hai handaꞌ poliungiraꞌ Párentá iti. Agáiáná kehapiꞌ rumihi kamadósána tauna, melumbuꞌ mani kamaꞌahiꞌna Pueꞌ Ala i tauna!

²¹Hangkoia, dósá miꞌi to makuasaꞌ i lalu katueꞌna tauna, álána upu-upu tauna hangaa-ngaa rahuku mate hai tegááki hangko i Pueꞌ Ala. Agáiáná deꞌe-deꞌe, ánti kabulána laluNa, Pueꞌ Ala miꞌi to makuasaꞌ i lalu katueꞌtaꞌ. Ia mampoweꞌikeꞌ rárá bona peisákeꞌ mewaliꞌ manótó i peitáNa, hai Ia mampoweꞌikeꞌ woꞌo katueꞌ to maroꞌa to tiꞌara mokahópóꞌá ánti kanatangaꞌ-tangaꞌintaꞌ Iesu Kerisitu Pueꞌtaꞌ.