Read Besoa Roma 6 Bible Online

Roma 6 - Besoa bible

Roma 6

¹Apa mani to peisá ina tauliꞌ? Ane Pueꞌ Ala moámpungi dósántaꞌ ánti kabulána laluNa i kitaꞌ, ba maroꞌa ane mobábehikeꞌ oaꞌ dósá bona katetátámbáiá kabulána laluNa moámpungikeꞌ?

²Tongawaꞌ tiꞌara maroꞌa! Tauna to mate tiꞌara piꞌi peisá mokale. Noꞌonoꞌ woꞌo, ane matekeꞌ hingkakani hai Kerisitu, lempóna: peundeꞌána laluntaꞌ mobábehi dósá hangaa-ngaa mate woꞌo, hai tiꞌara piꞌi makuasaꞌ i kitaꞌ. Ane matemokeꞌ i dósá, noumbá haneꞌi peisákeꞌ tueꞌ i kamadósá?

³Tiꞌara paꞌi niꞌisá, kitaꞌ rariumokeꞌ i lalu hangaꞌna Kerisitu Iesu, hai karariuntaꞌ iti molempónga kamohintuwuꞌtaꞌ miꞌi hai Kerisitu Iesu i kamateNa.

⁴I karariuntaꞌ iti, kitaꞌ nodokeꞌ tauna to mate hai ratawu hingkakani hai Kerisitu. Hai nodo Kerisitu rapatueꞌ huleꞌ hangko i kapate ánti kuasaꞌna Pueꞌ Ala Umántaꞌ, noꞌonoꞌ woꞌo kitaꞌ ina mouláꞌkeꞌ rárá to woꞌu.

⁵Mewaliꞌ, ánti pohintuwuꞌtaꞌ hai Iesu i lalu kamateNa, Pueꞌ Ala ina mopatueꞌkeꞌ woꞌo huleꞌ hibali hai Iesu,

⁶láwiꞌ taisá, i tempóna Kerisitu rapapate i kau mombehape, nodo rárá katueꞌtaꞌ hangkoia rapapate woꞌo hingkakani hai Ia. Mewaliꞌ kuasaꞌ dósá i lalu katueꞌtaꞌ magero, álána tiꞌarapokeꞌ napohawiꞌ dósá.

⁷Láwiꞌ heáná peá to mate hingkakani hai Kerisitu, tekábáhá miꞌi hangko i kuasaꞌ dósá.

⁸Mewaliꞌ, láwiꞌ matemokeꞌ hingkakani hai Kerisitu, tapoinálái ina tueꞌkeꞌ woꞌo hingkakani hai Ia.

⁹Láwiꞌ taisá, Kerisitu rapatueꞌ huleꞌ, hai roo onoꞌ, tiꞌara piꞌi ara kuasaꞌ to peisá mopapate Pueꞌ Iesu, láwiꞌ Ia tueꞌ oaꞌ duuꞌna i rue-ruena.

¹⁰Ia hangkani peá mate monangi kuasaꞌ dósá duuꞌna i rue-ruena. Deꞌe-deꞌe Ia tueꞌ oaꞌ hai mampeuláꞌi peundeꞌána Pueꞌ Ala.

¹¹Noꞌonoꞌ woꞌo kitaꞌ, hangaa-ngaa tauliꞌ i laluntaꞌ: “Mateaꞌ hingkakani hai Kerisitu Iesu; tiꞌarapoꞌ mohintuwuꞌ hai dósá, agáiáná tueꞌaꞌ bona mouláꞌaꞌ peundeꞌána Pueꞌ Ala ánti pohintuwuꞌkuꞌ hai Kerisitu Iesu.”

¹²Onoꞌ miꞌi haneꞌi kuweꞌikou laluita, halalu-halalu: ineeꞌ nipatodáhi dósá mokuasaꞌi katueꞌmi i duniáꞌ deꞌe; ineeꞌ nipeuláꞌi peundeꞌána lalumi to kadake.

¹³Wátámi ineeꞌ nipakeꞌ mobábehi dósá hai bábehiá to kadake. Rángina miꞌi nipaisarenga katueꞌmi i Pueꞌ Ala, láwiꞌ tekábáhámokou hangko i katueꞌmi hangkoia hai nilámbiꞌ miꞌi katueꞌ to woꞌu. Hangaa-ngaa nihuhuꞌ wátámi i Pueꞌ Ala bona wátámi nipakeꞌ mobábehi bábehiá to maroꞌa.[37]

¹⁴Láwiꞌ kómu, tiꞌarapokou nakuasaꞌi dósá, hai tiꞌarapokou mehárungá i Paturoꞌna Musa bona molámbiꞌkou katehómpóꞌ, agáiáná mehárungákou i kabulána laluna Pueꞌ Ala.

¹⁵Mewaliꞌ, ane tiꞌarapokeꞌ mehárungá i Paturoꞌna Musa, láwiꞌ mehárungákeꞌ i kabulána laluna Pueꞌ Ala i kitaꞌ, apa to hangaa-ngaa tabábehi? Ba peisá manikeꞌ oaꞌ mobábehi dósá? Tiꞌara!

¹⁶Niꞌisánto, ane rápáꞌna, mengkoruꞌkou i hadua tauna hai nipeuláꞌi hawaꞌna, kómu mewaliꞌkou hawiꞌna tauna iti. Noꞌonoꞌ woꞌo hai dósá: ane nipeuláꞌi oaꞌ peundeꞌána lalumi to kadake, ina mewaliꞌkou hawiꞌna dósá. Kahópóꞌána ina molámbiꞌkou kapate to mogáákikou hangko i Pueꞌ Ala duuꞌna i rue-ruena. Agáiáná ane mampeuláꞌikou peundeꞌána Pueꞌ Ala, mewaliꞌkou hawiꞌNa, haneꞌi mohintuwuꞌkou hai Ia.

¹⁷Hangkoia, hangko tiꞌara manikou mepoinálái i Iesu, napohawiꞌ manikou dósá. Agáiáná kuꞌuliꞌ handaꞌ kamaroꞌana i Pueꞌ Ala, láwiꞌ deꞌe-deꞌe mengkoruꞌkou i Pueꞌ Ala hangko i lalumi ntepuꞌu hai mouláꞌkou paturoꞌ to rapahaweꞌákou.

¹⁸Mewaliꞌ tekábáhámokou hangko i kanapohawiꞌmi dósá, hai mewaliꞌmokou hawiꞌna Pueꞌ Ala to mampeuláꞌi peundeꞌáNa.

¹⁹Pándiriꞌ deꞌe kupakeꞌ bona poloꞌ niꞌisá tunggáiána paturoꞌkuꞌ. Hangkoia napohawiꞌkou dósá, láwiꞌ wátámi nipatodáhi mouláꞌ peundeꞌána lalumi to kadake hai to tiꞌara hintotoꞌ, álána mantámbái riꞌi kakadakena bábehiámi. Mewaliꞌ deꞌe-deꞌe, hangaa-ngaa nihuhuꞌ wátámi i Pueꞌ Ala bona mewaliꞌkou hawiꞌNa, álána manótó ntepuꞌu bábehiámi hai magasaꞌ katueꞌmi.

²⁰Hangkoia, tempómi mani napohawiꞌ dósá, tiꞌarakou mampekiri mokana i peundeꞌána Pueꞌ Ala.

²¹Pewátiꞌ apa paꞌi to nilámbiꞌ hangko i katueꞌmi to hangkoia iti? Upu-upuna iti mopaꞌara peá kamahilimi deꞌe-deꞌe, láwiꞌ kahópóꞌána bábehiámi iti moántikou i kapate to mogáákikou hangko i Pueꞌ Ala.

²²Agáiáná deꞌe-deꞌe, tekábáhámokou hangko i kuasaꞌ dósá, hai napohawiꞌmokou Pueꞌ Ala. Iti to moánti pewátiꞌ i kómu, álána magasaꞌ katueꞌmi, hai ina molámbiꞌkou katueꞌ to maroꞌa duuꞌna i rue-ruena.

²³Háwángina dósá ia miꞌi kapate, agáiáná ánti kabulána laluna Pueꞌ Ala, katueꞌ to maroꞌa to tiꞌara mokahópóꞌá Naweꞌikeꞌ mbero-mbero moliu Kerisitu Iesu Pueꞌtaꞌ.